တမန်တော် 4
4
တရားလွှတ်တော်မာ ပေတရုန ယောဟန်လေဟှို စစ်ဆေးဂေ့ဟှူကြောန်း
1ပေတရုန ယောဟန်လေဟှာ လူလေဟှို ဟောပြောနေဂေ့ခီမာ ယဇ်ပုရောဟိတ်လေ၊#၄.၁ ယဇ်ပုရောဟိတ်လေ၊ တချို့ မူရင်းလတ်ရေးမူလေမာ ယဇ်ပုရောဟိတ်ဂီးလေ၊ ဆိုဘီး ပါရှိဟှယ်။ ဗိမာန်တော်ဟှို စောန့်နေဟှူတပ်မှူးန ဇဒ္ဒုကဲလေဟှာ ရော့‑က်လာဂေ့ဟှယ်။ 2ယေရှုဟှ သေရာဟှနေ ထမြော့‑က်ဟှားဘီ ဆိုဘီး တမန်တော်လေဟှာ သတ်သေပြဘီး ဟောပြောဟှူကြောန့် ဇဒ္ဒုကဲလေဟှ စိဆိုးဂေ့ဟှယ်။ 3အယ်ကြောန့် သူးနို့လေဟှာ တမန်တော်လေဟှို ဖမ်းဂေ့ဘီး ညဉ့်ခန်းဇာဖြစ်ဟှားကြောန့် နော့‑က်တနေ့ထိ ထောန်ထဲမာ ထားဟှားဂေ့ဟှယ်။ 4အယ်ဘေမဲ့ တရားစကားဟှို ကြားဂေ့ဟှူ လူဘောင်ဂီးဟှ ကိုယ်တော့်ဟှို ယောင်ကြည်ဂေ့ဟှယ်။ ယောင်ကြည်လာဟှူ လူလေဟှ ၅,၀၀၀ လော့‑က် တိုးပွားလာဂေ့ဟှယ်။
5နော့‑က်တနေ့ ရော့‑က်ဟှူ ခီမာ ယုဒခေါန်းဆောန်လေ၊ လူဂီးလေန ကျမ်းတတ်ဆရာလေဟှာ ယေရုရှလင်ဗြို့မာ စုဂေ့ဟှယ်။ 6ယဇ်ပုရောဟိတ်မန်း အန္နတ်န သူ့ရဲ့ မိသားစုဖြစ်ဟှူ ကယာဖ၊ ယောဟန်၊ အာလေဇန္ဒြေုလူလေန တွိဂေ့ဟှယ်။ 7အယ်လူလေဟှာ သူးနို့ရှေ့မာ တမန်တော်နှေ့ပါးဟှို ရပ်ခိုင်းဘီး “နန်းနို့ဟှ ဖယ်လူရဲ့ တဂိုး၊ ဖယ်လူရဲ့ နာမန အယ်မှုလေဟှို ဖယ်မျိုး လောက်ဂေ့နူး” ဆိုဘီး မေးဂေ့ဟှယ်။
8သန့်ရှင်းဟှူဝိညာဉ်တော်န ပ္လဲ့ဝနေဟှူ ပေတရုဟှာ “လူလေရဲ့ ခေါန်းဆောန်လေန လူဂီးလေ၊ 9ခေသန်ဘဲ့ဟှူ လူတယော့‑က်ဟှို ကျိုးပြုကြောန်းန သူဟှာ ကျန်းမာဟှားဇာန ပတ်သတ်ဘီး ခုနို့လေဟှ စစ်ဆေးခံရမယ် ဆိုဟှာ၊ 10နာဇရက်ဗြို့သား ယေရှုခရစ်တော်ရဲ့ နာမတော်တဂိုးန အယ်လူဟှာ ခေသန်လာဘီး ခုနန်းနို့ရှေ့မာ ရပ်နေဇာဟှို နန်းနို့န တူးဒူ ဣသရေလလူမျိုးလေ သိမှတ်ဂေ့ပါ။ အယ်သခင်ဟှို နန်းနို့ဟှ ကားစင်တန်ဘေမဲ့ ဘုရားသခင်ဟှ သေရာဟှနေ ထမြော့‑က်စေလေဟှယ်။”
11“ယေရှုဟှ ‘တိုက်ဟှို ဆော့‑က်ဟှူ ခီမာ နန်းနို့ ပယ်ဟှားဟှူက္လော့‑က်ဟှာ
ရေးကီးဆောင်းက္လော့‑က် ဖြစ်လာဟှယ်’ ဆိုဘီး ကျမ်းစာဟှ ပြောဟှားဟှယ်။
12အယ်သခင်တပါးဘဲ့ ကယ်တန်နိုင်ဟှယ်။ ကောန်းဂန်အော့‑က်ဟှ လောကမာ အယ်သခင်နာမဟှနေ လွဲဘီး နို့လေဟှို ဖယ်လူလည်း ကယ်တန်နိုင်ဟှ” ဆိုဘီး သူးနို့ဟှို ပြောလေဟှယ်။
13ပေတရုန ယောဟန်လေဟှာ ပညာတတ်လေမှုဘဲန သာမန်လူလေဖြစ်ဘီး ရဲရင့်နေဇာဟှို တရားလွှတ်တော် ဖွဲ့ဝမ်လေဟှ ဗြင်ဂေ့ဟှူ ခီမာ ရရာတိုင်း အံ့ဩနေဂေ့ဟှယ်။ အယ်လူနှေ့ယော့‑က်ဟှာ ယေရှုရဲ့ လောက်ဖော်ဆောန်ဖတ်လေဖြစ်ဇာဟှို ဒိပြုမိဂေ့ဟှယ်။ 14အယ်ဘေမဲ့ ရောဂါပျော့‑က်ဟှားဟှူ လူဟှာ တမန်တော်လေန တူးဒူ ရပ်နေဇာဟှို ဗြင်ဟှူ ခီမာ သူးနို့ဟှာ ဖယ်မျိုးလည်း ပြောနိုင်ဂေ့ဟှ။ 15တမန်တော်လေဟှို တရားလွှတ်တော်ထဲဟှနေ ထွပ်ခိုင်းဘီးဟှာ သူးနို့ရှင်းရှင်း စဘီးဟှာ တိုင်ဗန်ဂေ့ဟှယ်။ 16သူးနို့လေဟှာ “နို့လေဟှ အယ်လူလေဟှို ဖယ်မျိုးလောက်ရဟှို့နူး။ သူးနို့အားဖြင့် ထူးခြားဟှူ နိမိတ်လတ်ခဏာ ဖြစ်ဟှားဇာဟှို ယေရုရှလင်ဗြို့ဟှ လူတိုင်းဟှ သိဂေ့ဟှယ်။ နို့လေဟှ ငြင်းနိုင်ဂေ့ဟှ။ 17အယ်ဘေမဲ့ အယ်ဒန်းဟှာ လူလေထဲမာ ပ္လံ့နှံ့ဘဲနေအောန် ယေရှုရဲ့ နာမတော်ဟှို မှီပြုဘီး နော့‑က်ထပ် ဖယ်လူဟှိုလဲ ဟောပြောဘဲနေဟှို့တွပ် အယ်လူနှေ့ယော့‑က်ဟှို ဒိပေးဂေ့မယ်” ဆိုဘီး ပြောဂေ့ဟှယ်။
18အယ်ဘီးန တမန်တော်လေဟှို ပ္လန်ခေါ်ဘီးဟှာ ယေရှုရဲ့ နာမတော်ဟှို မှီပြုဘီး နော့‑က်ထပ် လောင်းဝ ဟောပြောဘဲနေဟှို့တွပ် မိန့်ပေးလိုက်ဂေ့ဟှယ်။ 19ပေတရုန ယောဟန်လေဟှ “နို့လေဟှာ ဘုရားသခင်ရဲ့ စကားဟှို နားထောန်ဇာထတ် နန်းနို့ရဲ့ စကားဟှို နားထောန်ဇာဟှ ဘုရားသခင်ရဲ့ ရှေ့မာ မှန်ဟှယ်၊ မှားဟှယ် ဆိုဇာဟှို နန်းနို့ ကိုယ်တိုင်ဘဲ့ ဆောင်းဖြတ်ပေးဂေ့ပါ။ 20နို့လေကိုယ်တိုင် ကြားရ၊ ဗြင်ရဇာလေဟှို ဟောပြောဘဲန နေနိုင်ဟှ” ဆိုဘီး ပ္လန်ပြောလိုက်ဂေ့ဟှယ်။ 21အယ်ကြောန့် တရားလွှတ်တော် ဖွဲ့ဝမ်လေဟှာ သူးနို့ဟှို ပ္လန်ဘီးဟှာ သေးသေချားချာဟှား ဒိပေးဘီးန ထွပ်ခိုင်းလိုက်ဂေ့ဟှယ်။ လူလေဟှာ ဖြစ်ပျစ်ဟှူ ဇာလေတွပ် ဘုရားသခင်ရဲ့ ဖောင်းသရေတော်ဟှို ချီးမွမ်းနေဂေ့ဟှူကြောန့် တမန်တော်လေဟှို ဖြားပြစ်ဒန်လည်း စီရင်နိုင်ဂေ့ဟှ။ 22အံ့ဩဘွယ်ကောန်းအောန် ရောဂါပျော့‑က်ဟှားဟှူလူဟှာ သတ်လေးဆယ်ကျော်လော့‑က် ရှိဟှယ်။
ရဲရင့်လာဟှို့တွပ် ယောင်ကြည်သူလေဟှ ဆုတောန်းပေးကြောန်း
23ပေတရုန ယောဟန်လေဟှာ လွတ်မြော့‑က်လာဂေ့ဟှူ ခီမာ သူးနို့ လူလေနားဟှို ပ္လန်ဟှားဘီးန ယဇ်ပုရောဟိတ်ဂီးန သတ်ကီးဝါဂီးလေ ပြောလိုက်ဇာလေဟှို ပ္လန်ဘီး ပြောဂေ့ဟှယ်။ 24အယ်ကြောန်းဟှို ကြားရဂေ့ဟှူ ခီမာ အယ်လူလေဟှာ တူးဒူ ဆုတောန်းဂေ့ဟှယ်။ “စိုးရဟှူသခင်၊ ကိုယ်တော်ဟှ ကောန်းဂန်န မ္လေဂီး၊ ပန်လယ်န ရှိမျှဂူလောင်းဟှိုလည်း ဖန်ဆင်းဟှူ ဘုရားသခင် ဖြစ်ဟှယ်! 25ကိုယ်တော်ဟှာ သန့်ရှင်းဟှူဝိညာဉ်တော်အားဖြင့် ကိုယ်တော်ရဲ့ စေခံ၊ ကျွန်တော့်လေ ဘိုးဘေး ဒါဝိဒ်ဟှနေ တဆင့်၊”
“ ‘လူမျိုးခြားလေဟှာ ဖြားဖြစ်ကြောန့် ရောင်းရင်းဆန်ခတ် ဖြစ်နေဂေ့နူး’ ”
လူမျိုးဘောန်းဇောင်ဟှာ ဖြားဖြစ်ကြောန့် ကျိုးမှေ့ဘဲန ကြံစည်ဂေ့နူး။
26လောကရဲ့ မန်းဂီးလေန အောက်ချောက်မားလေဟှာ ဘုရားသခင်ဟှို ပေါင်ကန်ဟှို့တွပ် ပြင်ဆင်ဂေ့ဟှယ်။
ဘုရားသခင်န ကိုယ်တော်ရဲ့
မေရှိယဟှို ဆန့်ကျင်ဟှို့တွပ် စုဂေ့ဟှယ်၊
ဆိုဘီး မိန့်တော်မူဟှားဟှယ်။ 27#လု ၂၃.၇–၁၁; မ ၂၇.၁,၂; မာ ၁၅.၁; လု ၂၃.၁; ယော ၁၈.၂၈,၂၉မှန်တိုင်းဆိုဟှာ ဟေရုဒ်န ပုန္တိပိလတ်လေဟှာ လူမျိုးခြားလေ၊ ဣသရေလလူမျိုးလေန တူးဒူ ကိုယ်တော်ရဲ့ သန့်ရှင်းဟှူစေခံ၊ ကိုယ်တော်ဘိသိပေးဟှူ ယေရှုဟှို ဆန့်ကျင်ဟှို့တွပ် အယ်ဗြို့ထဲမာ စုဂေ့ဟှယ်။ 28အယ်မျိုး စုဂေ့ဇာဟှာ ကိုယ်တော်ရဲ့ တဂိုးတော်န လိုတော်ရ ခွဲခန့်ဟှားဇာလေဟှို ဖြစ်ပျစ်ဟှို့တွပ် ဖြစ်ဟှယ်။ 29သခင်၊ ခု အယ်လူလေရဲ့ ချီးခြော့‑က်ဟှူဇာဟှို မှတ်ဟှားပေးပါ။ ကိုယ်တော်ရဲ့ စေခံလေဟှို ကိုယ်တော်ရဲ့ တရားတော်ဟှို ရဲရဲရင့်ရင့်ဟှား ဟောဟှို့ခွမ့် ပေးတော်မူပါ။ 30လူလေရဲ့ ရောဂါလေဟှို ပျော့‑က်စေဟှို့တွပ် ကိုယ်တော်ရဲ့ လတ်တော်ဟှို ဆန့်တော်မူပါ။ ကိုယ်တော်ရဲ့ သန့်ရှင်းဟှူစေခံ ယေရှုရဲ့ နာမတော်န နိမိတ်လတ်ခဏာန အံ့ဩဘွယ်ရာလေဟှို လောက်တော်မူပါ။
31အယ်မျိုး ဆုတောန်းဂေ့ဘီးခီမာ သူးနို့ စည်းဝေးနေရာဟှာ လှောက်လာဟှယ်။ သူးနို့ ဂူလောင်းဟှာ သန့်ရှင်းဟှူဝိညာဉ်တော်န ပ္လဲ့ဝဘီး ဘုရားသခင်ရဲ့ တရားတော်ဟှို ရဲရဲရင့်ရင့်ဟှား ဟောပြောဂေ့ဟှယ်။
ယောင်ကြည်သူလေဟှာ သူးနို့ အောက်စာလေဟှို မျှဝီဂေ့ဟှူကြောန်း
32 #
တ ၂.၄၄,၄၅ ယောင်ကြည်သူလေဟှာ စိနှလောင်း တလောင်းတဝဒဲ ဖြစ်ဂေ့ဟှူကြောန့် ဖယ်လူလဲ ကိုယ့်ရဲ့ အောက်စာဟှို ကိုယ်ပိုင်ဟှယ် ဆိုဘီး ပြောဂေ့ဟှ။ သူးနို့မာ ရှိနေဟှူ အောက်စာလေ ဂူလောင်းဟှို ပိုင်ဂေ့ဟှယ် ဆိုဘီး ကြေညာဟှားဂေ့ဟှယ်။ 33တမန်တော်လေဟှာ သခင်ယေရှုခရစ်တော်ရဲ့ ရှင်ပ္လန်ထမြော့‑က်ရှင်းကြောန်းဟှို ကီးမားဟှူ တဂိုးန သတ်သေခံဂေ့ဟှယ်။ ဘုရားသခင်ရဲ့ ကျေးဇူးတော်ဟှာ ကီးမားဟှူ တဂိုးန သူးနို့ ဂူလောင်းထဲမာ လောက်လောက်လေဟှယ်။ 34လယ်လေ၊ အီလေ ပိုင်ဂေ့ဟှူ လူလေဟှာ သူးနို့ အောက်စာလေဟှို ရောန်းခ္လဘီး၊ ရဟှူကပ်လေဟှို ယူလာဘီးဟှာ တမန်တော်လေဟှို ပေးဂေ့ဟှယ်။ 35အယ်ဘီးန တမန်တော်လေဟှာ လိုအပ်ဟှူ လူလေဟှို လိုက်ဝီပေးဂေ့ဟှယ်။
36ယောသပ် ဆိုဘီး ခေါ်ဟှူ လူတယော့‑က်ရှိဟှယ်။ သူ့ဟှို တမန်တော်လေဟှ ဗာနဗ ဆိုဘီး ခေါ်ဂေ့ဟှယ်။ ဗာနဗရဲ့ ဓိပါယ်ဟှ အားပေးကူညီဟှူလူ ဆိုဘီး ခေါ်ဟှယ်။ သူဟှာ ကုရေနေနယ်သား လေဝိမျိုးနွယ် ဖြစ်ဟှယ်။ 37သူပိုင်ဟှူ လယ်ဂွပ်ဟှို ရောန်းဘီးဟှာ ရဟှူကပ်ဟှို ယူလာဘီးန တမန်တော်လေဟှို ပေးလေဟှယ်။
Currently Selected:
တမန်တော် 4: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World and the Dawei Bible Translation Committee, 2024.
