Markus 8
8
Yesus nfane tomwate ribun fat
8:1-10
(Mat. 15:32-39)
1Na ler sa, tomwat ngayadin rafburat sir a nbal ror Yesus. Ma to nir a tnyam, mpa Yesus ntar Ni manglartar ma nfalak, 2“Yakw klwompang resi tomwatar ye. Sir rlarat Yakw lerar tel ye lo ma nir tnyamar omp lo. 3Ma farlan ramlafar ma klwuan ma rbali sir far nir dasar e keta ketnir a rfufw na dalamtene let, fali ketnir nof sir a ne rof pnu dodo.”
4Ne Ni manglartar rfalak, “Maken, ain ye nkese i mpa tal tnyame tof mpe la tfane sir terik ma rabotan?”
5Ne Yesus nenrat sir, “Mir rotyar fir a ne?” Ne sir rfalak, “Rotyar itw.” 6Ne Yesus nfalak ber tomwat ngayadin a ne ma ramtoran bab. Ne nal rotyar itw a ne ma nose alang ber Ratu. Betno napuse roti ne ma nal ber Ni manglartar ma rasaman ber tomwat ngayadin a ne. 7Ma nir ian angkir ketnir a nbal, mpa Yesus nal inar a ne ma nose alang ber Ratu, betno nluan Ni manglartar ma rasaman inar a ne nbal. 8Mpe tomwat ngayadin a ne rtame terik ma rabotan. Ne Yesus Ni manglartar rabutin tnyamar ma nres a ne na botyar itw. 9Sir monuk ma rtame ne fafa tomwate ribun fat. Mpene Yesus nluan ma rbali sir far nir dasar. 10Ne Yesus nor Ni manglartar rfangat kumal ma rti yampren Dalmanuta.
Tomwat Farisyar rtak ma Yesus nose kabain mpasalnar
8:11-13
(Mat. 16:1-4)
11Tomwat Farisyar ketnir rma ma rakmat Yesus ma rabali ngengentar ror I. Sir rmpeang ma rateman I, mpa rfalak ber I ma nose kabain mpasalnar sa neluk faniak nema nfatutu feti Ratu nsiduk I ma nma saryamprene. 12Lama Yesus ndengar farane I nsanau melawas ma nfalak ber sir, “Safema tomwatar na are ye rtak ma kose kabain mpasalan ma neluk faniak ber sir? Mdyengar ma kfwalak, keta to kose desar faniak far ma mtyak a ne.”
13Ne I nti a ntate sir ma nti nfangat kumal nor Ni Manglartar ma rbali sir far twemul balisya.
Yesus nfalak ber Ni manglartar ma ka rajake sir rof tomwat Farisyar ma rai Herodes nir anftutwar
8:14-21
(Mat. 16:5-12)
14Na nir mpampane dalam e Yesus Ni manglartar ramlufe ma ronr roti ma rane, ma ronr lan roti lese na kumal a ne. 15Ne Yesus nal tnyanuk pupule la nsurat sir ma nfalak, “Ka mijake kmi fen ngamone myof tomwat Farisyar ma rai Herodes nir ragi, nema nir ragi ne kete ntaul a kmi.”
16Nempa Yesus Ni manglartar to rkaul ral tnyanuk pupule ne isiny mpa rafalak ber sir, “I nfalak farane fali to ninr roti.”
17Nempa Yesus nafai safe ma sir rfalak a ne, mpa nfalak ber sir, “Safema dedesar ma mfyalak feti to mir roti? Kmi to mkyaul myal a fuky e? Ali mir andanwar a ne raktem! 18Matmir ma tlingmir a ramin a ma, safema kmi farlan tomwatar ma to rakeban ma to radengar ye? Ali mimlufe lo e? 19Noak ma kupuse rotyar lim ber tomwate ribun lim a ne, kmi mibutin rotyar ma nres a ne na botyar fir?” Ne sir rfalak, “Boti buti resin du.”
20Ne Yesus nenrat sir a nbal, “Noak ma kupuse rotyar itw ber tomwate ribun fat a ne, kmi mibutin rotyar ma nres a ne na botyar fir?” Ne sir rfalak, “Botyar itw.”
21Ne Yesus nfalak, “Safema to mkyaul myal a fuky?”
Yesus nafngamone tomwat matbol sa na kote Betsaida burit
8:22-26
22Mpene Yesus nor Ni manglartar rait kote Betsaida. Na kote ne tomwatar ror matbol sa ber Yesus. Ma sir rtak I ma nasyol tomwate ne nema nangamon. 23Ne Yesus nkolat i ma nor i far kote burit. Ma I ndikat na tomwate ne matnir betno nsaup limnir a na. Ma nenrat, “Mkweban kabanir sa lo e?”
24Ne tomwate ne nfon far lury ma nfalak, “Au, yakw kweban tomwatar ma rmpan, nempa lolone bubul mpa sir farlan katutnwar ma rmpan.”
25Ne Yesus nsaup limany na tomwate ne matnir a nbal, mpe nangamon ma nakeban e nangafel. 26Ne Yesus nluan ma nbali i far ni das ma nfalak, “Ka kete mtwi kote ne lo.”
Petrus nyoding feti Yesus ye Ray Silai ma Ratu nyoding
8:27-30
(Mat. 16:13-20; Luk. 9:18-21)
27Ne Yesus nor Ni manglartar rti pnuar na Kaisarea Filipi seriny baldu. Na dalamtene let e I nenrat Ni manglartar, “Tomwatar rfalak feti Yakw ye ise?”
28Ne sir rfalak, “Ketnir rfalak feti Ko ye Yohanes Mangadiris, ketnir e rfalak feti nabi Elia, ma ketnir a nbal rfalak feti Ko ye nabi luryanir sa ma nmorip a nbali.”
29Ne Yesus nenrat sir a nbal, “Ma koko kmi e, mfyalak Yakw ye ise?” Ne Petrus nfalak, “Maken, Ko ye ninr Ray Silai ma Ratu nyoding I a ne.”
30Nempa Yesus nose nteri sir nema kete rafbotin I ber tomwatar.
Yesus nfalak na Ni suse ma Ni mamate
8:31-33
(Mat. 16:21-28; Luk. 9:22-27)
31Ne Yesus ntabw ma nafbotin safe-safe ma keta I nkoman ber Ni manglartar. Ne I nfalak, “Yakw, Tomwate Anaky ka kubare susar yadin. Ma makenar, mangsomp ulnir numur mangaftutu Musa ni faretar keta rasipur Yakw. Ma keta rluan tomwatar ma rfen Yakw nempa ni lerar tel e kmworip a kbwali.” 32Yesus nfalyole desar ngrie ne ber Ni manglartar. Nempa Petrus nrabut Yesus far seriny ma nfalak, “Maken, kete mfwalak farane.” 33Mpe Yesus nbal I ma nfon Ni manglartar ma narese Petrus. I nfalak, “Smwangat yatak ko mbwie mof ye! Ko mdwaun lan safe ma tomwatar rdaun ma to mdwaun safe ma Ratu ndaun.”
Ka tabare ninr sangwalu ma tlarat Yesus
8:34-38
34Ne Yesus ntar tomwat ngayadin ma ramin iane numur Ni manglartar. Ma nfalak ber sir, “Ise nmpeang ma nlarat Yakw, ka kete nlarat ni mpempeang, nempa ka nabare ni sangwalu ma nlarat Yakw.” 35Ise ma nmorip e nlarat koko i ni mpempeang keta to nonri momorip dedesar. Nempa ise ma nmat fali nlarat Yakw ma fali nafwibar Ibar Ngamone, keta nonri momorip dedesar. 36To ubany ber tomwate ma nonri monuk kabain saryamprenar, nempa to nonri momorip dedesar na lere ma nma ne. 37Fali kit to bise ma tal sasaf la tlikur momorip dedesar.
38Kmi myorip a na are ma tomwatar yadin rose kabain yatkar ma ratliur Ratu. Ise ma nmeat ma nyoding feti nlarat Yakw ma nmeat ma nlangun Ningw anftutwar, keta Yakw kmweat a nbal ma kyoding i a na Ratu sounlury noak ma Yakw, Tomwate Anaky kmwa saryamprene. Na lere ne keta Yakw kmwa kor dadangin ma Amangw Ratu nal, numur malaekat lelerpar ma Ratu nsiduk sir.
Currently Selected:
Markus 8: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
