Markus 7

Tomwat Yahudyar nir adat to nordeng nor Ratu Ni faretar

7:1-13

(Mat. 15:1-20)

1Na ler sa e tomwat Farisyar ketnir ma tuanggurw agamar rof Yerusalem rma ma rakmat Yesus. 2Ne sir rsalan ma Yesus Ni manglartar ketnir rtame e to rbur limnir a fuky, rlarat Yahudyar nir yayatrwar. 3Tomwat Farisyar ma tomwat Yahudyar monuk dedesar ma rose rlarat empnir nusnir nir yayatrwar nof luryain lo. Iane nwayat ma sir to bise ma rtame farlan sir to rbur limnir rlarat yayatrwar a ne. 4Ma farlan rbali sir rof pasar e, ka raflerap tenir a fuky betno rtame. Ma lolone yayatrwar yadin nof empnir nusmir a nbal ma sir dedesar ma rose rlarat. Iane farlan ma rbur cangkir, mpinan, ma kabain walyetar a nbal ma rose rof tembaga. 5Iane nwayat ma tomwat Farisyar ma tuanggurw agamar a ne renrat Yesus, “Maken, safema Nim manglartar to rose rlarat empninrar nusninrar nir yayatrwar, ma rtame e to rbur limnir a fuky?”

6Ne Yesus nfalak ber sir, “Hei, tomwatar ma myose felmir farlan tomwat ngamonar! Botuan desar safe ma luryain e nabi Yesaya nfalak na kmi. I narengi farye:

‘Tomwatar ye rfalak motak feti rdangin Yakw, nempa dalmir e to farane ma to rdaun desar Yakw.

7To ubany ma rsampayang ber Yakw, fali to rlarat Ningw faretar, ma rfatutu lan tomwatar nir wewelmpampane.’”

8Mpa kmi to myose mlyarat Ratu Ni faretar nempa myose mlyarat tomwatar nir yayatrwar.

9Ne Yesus nfalak ber sir a nbal, “Kmi mifai desar ma mlyangas Ratu Ni faretar, nema bise ma myose mlyarat empnir nusnir nir yayatrwar. 10Na tetetkar ma luryain Ratu nal ber Musa ne rarengi farye: ‘Ka myalang enmir amir! Ma ise ma natanuk yatak ber sir e ka rukun a rfen i.’ 11Nempa kmi to miftutu tomwatar ma rose farane. Kmi mfyalak feti iane to sale farlan tomwatar sa nfalak, ‘Ano Amo, keta to kal sasaf ber a kmi, fali safe ma ka kose ma kal ber a kmi ne, yakw kal ber Ratu neluk snyompe lo.’ 12Kmi myose farane iane feti miftutu tomwate ne ma nsalan lonri motak enany amany farane ma to ntulung sir. 13Mpa kmi dedesar ma myose mlyarat empnir nusmir nir yayatrwar nempa to myose mlyarat Ratu Ni faretar. Lolone kabanir yadin ma kmi myose farane nbal.”

Kabain yatkar nwayat ma tomwatar rngeryai na Ratu sounlury

7:14-23

14Ne Yesus ntar tomwat ngayadin a ne ma nfalak ber sir, “Mdyengar fen ngamone safe ma kfwalak ye nema mkyaul myal. 15Tnyamar ma kit tane iane to nose ma tngeryai na Ratu sounlury. Nempa kabain yatkar ma tose na ninr momorip a ne ma nose ma tngeryai na Ratu sounlury. 16[Mpa ka mdyengar fen ngamone safe ma kfwalak a ne lo.”]

17Mpene Yesus nti a ntate tomwat ngayadin a ne ma nti dasar sa. Ne Ni manglartar renrat I feti tnyanuk pupule ne isiny farpe. 18Mpe Yesus nfalak ber sir, “Ali kmi to mkyaul myal a fuky e? Kmi to mifai feti safe-safe monuk ma tomwatar rane nre renum a ne to rose ma sir rngeryai na Ratu sounlury e? 19Fali safe-safe monuk ma rti babnir dalam a ne keta to nti dalmir, nempa nti kampnir ma rtimudin kalin.” I nfalak farane iane feti to tnyame fen lese ma ramoli nempa bise ma rane monuk. 20Ne Yesus nfalak a nbal, “Safe ma tomwatar rdaun ma rose, iane ma nose ma rngeryai na Ratu sounlury.” 21Fali safe-safe yatkar ma rdaun a ne rbie nof dalmir, rwayat ma raosangri, ramnang, rafen, 22ranronr, rkampres, rose kabain yatkar, rlepusuk, rlarat lan nir makeus yatkar, to rmpeang ma tomwat walyetar rlengan sir, rfalak ngribatin yatkar ber tomwatar, rafdas sir, ma ulnir arwaluk. 23Kabain yatkar monuk a ne rbie rof tomwatar dalmir ma nose ma sir rngeryai na Ratu sounlury.

Bat Siro Fenisia ma nalele Yesus

7:24-30

(Mat. 15:21-28)

24Mpene Yesus nti a ntate ain a ne ma nti nusar sa ma nlosir kote Tirus. I nti tomwatar sa ni das ma namin iane. Ma to nmpeang ma tomwatar rafai I, nempa to bise ma namudim nal. 25Na iane batmaken sa anaky bate ma smwangat yatak nsung i. I ndengar feti Yesus namin das a ne, mpa nma ma nakmat I ma nsatngur a na sounlury. 26Batmakene ne to tomwat Yahudi i. I nof nus Siro Fenisia na propinsi Siria. I ntak Yesus ma natian smwangat yatak ma nsung anaky a ne. 27Ne Yesus a nfalak ber i, “Ano, ko ye to tomwat Yahudi ko. Mpa farlan ktwulung ko, iane feleles farlan tomwate ma nyebas angkir nir tnyamar ber aswar. Mpa ni ngafele e tsalan lonri ma kangkir a rtame terik ma rabotan a fuky.”

28Ne bate ne nfalak, “Amo, botuan desar. Nempa aswar ma ramin mede lebaban biase rane kangkir nir tnyam rufkir ma rfufw rof mede ne nbal.”

29Mpe Yesus nfalak ber i, “Ano, safe ma mfwalak a ne botuan desar. Mpa mbwali ko fali smwangat yatak ne nbie nof angkam lo.”

30Noak ma bate ne nbali i far ni das ma nsalan anaky e, nafline i a na koi das, ma smwangat yatak a ne nbie nof i lo.

Yesus nafngamone tomwate ma to nadengar ma namomou

7:31-37

31Mpene Yesus nor Ni manglartar rti a rtate kote Tirus, ma ralyole kote Sidon, ma rti twemul Galilea na yampren Dekapolis. 32Na iane tomwatar ror tomwat sa ma to nadengar ma namomou ber Yesus. Sir rtak I ma nsaup limany na tomwate ne ma nafngamone i. 33Ne Yesus nor i ma radu a rkatar sir rof tomwat ngayadin a ne. Ne nsunge limnir a na tomwate ne tlingnir. Mpene ndikat na limany ma nsok tomwate ne keriny. 34Ne Yesus nmetngade far langit ma nsanau melawas ma nfalak ber tomwate ne, “Efata!” Isiny feti, “Ntakbanril lo!”

35Mpe nof a ne tomwate ne nadengar desar ma natanuk e nangafel e lo. 36Ne Yesus nfalak ber tomwatar ma ramin iane ma ka kete rasaur desar ngrie ne ber tomwatar. Ma boloka ntafal ma nose nteri sir, nempa sir rtafal ma rasaur ngrie ne ber tomwatar na mpenempen. 37Tomwatar ma rdengar ibar a ne rampriang desar ma rfalak, “Tomwate ye nbal! Safe-safe ma nose ne nangafel. I nose tomwate ma to nadengar ma bise nadengar, ma tomwate ma namomou bise ma natanuk!”

Currently Selected:

Markus 7: YMD

Highlight

Copy