Markus 9

1Ne Yesus nfalak a nbal ber sir, “Ni botuan e tomwatar ketnir nof a kmi ma mimin ye keta to rmat a fuky terik ma rsalan ma Ratu nfarete nor Ni kuase.”

Yesus Ni manglartar rsalan Ni snyain ma namamas

9:2-13

(Mat. 17:1-13; Luk. 9:28-36)

2Lama Yesus naftutu monuk tomwat ngayadin a ne, ni lerar nem a rsak, I nor Petrus, Yohanes ma Yakobus rti bubuar medasar sa. Na iano to kekes a ramin ma lan koko sir. Noak a ne sir rsalan Yesus souny felan sa. 3Ma Ni rabit nangfuty resi ma namamas. To tomwate fen lese na saryamprene ye ma bise ma ntefe ni rabit terik ma nangfuty farane. 4Metryat e sir rsalan tomwatar du ma ratanuk ror Yesus, sir a ne nabi Musa ma nabi Elia. 5Lama rsalan farane e, Petrus nfalak ber Yesus, “Tuangguru, tamin ye nangafel resi. Mpa ni ngafele e kam mafdiri befkar tel: sa ber Ko, sa ber Musa ma sa nbal ber Elia.” 6Petrus nfalak farane motak nempa to nafai safe ma nfalak a ne, fali noak a ne nor tbwarnir ramtaut resi.

7Metryat e mutan a nma ma nepat sir ma rdengar liliri nof mutan dalam ma nfalak, “I ye Yakw, Anakw ma kwamis I. Ka mdyengar I!” 8Ne rsalan sapat motak e to kekes a na seriny baldu lo ma rkeban lan Yesus koko I ma nor sir. 9Noak ma sir rnrunrur rof bubuar a ne, Yesus nfalak ber sir ma ka kete rasaur ber tomwatar na safe ma rsalan a ne terik ma Tomwate Anaky nmorip a nbali nof mangmwatar.

10Mpe sir rose rlarat safe ma nfalak a ne, nempa raenrat sir feti keta nmorip a nbali nof mangmwatar iane isiny farpe. 11Ne sir renrat Yesus, “Safema mangaftutu Musa ni faretar rfalak feti ka nabi Elia nma baluan saryamprene betno Ray Silai?”

12Ne Yesus nfalak, “Botuan feti ka Elia nbalun ma nma ma nasusan safe-safe monuk. Nempa rarengi na Kitap Lelerap dalam a nbal feti keta Yakw, Tomwate Anaky kwoman susar yadin, ma tomwatar rarikan Yakw nbal? 13Mdyengar ma kfwalak, botuan feti Elia nma lo. Nempa tomwatar rose yatak i rlarat nir mpempeang. Ma sir rose farane farlan ma rarengi na Kitap Lelerap dalam na i.”

Yesus natian kalin smwangat yatak nof kanak sa

9:14-29

(Mat. 17:14-21; Luk. 9:37-43)

14Noak ma Yesus nor Ni manglartar tel rbali sir rof bubuar a ne, sir rsalan tomwatar yadin ramdir a rkolu Ni manglarat walyetar. Ma mangaftutu Musa ni faretar ketnir rabangal ror sir. 15Noak ma tomwat ngayadin a ne rsalan Yesus e, sir rampriang desar. Ma rasnyalik ma rti rakmat I. 16Mpe Yesus nenrat Ni manglartar a ne, “Kmi mibangal a na safe?”

17Ne tomwat sa nof tomwat ngayadin a ne nfalak, “Tuangguru, yakw kor anakw ye ber Ko ma mufngamone i. Fali smwangat yatak nsung i, nwayat ma namomou.” 18Noak ma smwangat yatak nsung i e, npelak i far ompak ma sukany nalabubuse, nakarat nif, ma ngerw. Yakw ktwak Nim manglartar ma ratian smwangat yatak ne lo, nempa to bonir ral.

19Ne Yesus nfalak ber sir, “Hei tomwatar ma myorip a na are ye, kmi to milele Ratu fuky e! Kmi mdyaun feti keta Yakw kor a kmi terik bengfir! Ma ka kswabar ma kor a kmi terik bengfir a betno milele Yakw.” Ne Yesus nfalak ber amany a ne, “Myor kanak a ne mya!” 20Mpe ror kanak a ne ber I. Noak ma smwangat yatak ne nsalan Yesus, npelak kanak a ne far ompak, ma nose ma ngerw, ma sukany nalabubuse. 21Ne Yesus nenrat kanak ne amany, “Smwangat yatak nsung angkam bengfir lo?” Ne nfalak, “Ntabw nof ni ngarufuky.” 22Ma far mpene ne e smwangat yatak nose ma nfufw far au dalam nre far kewas dalam ma nfen i. Mpa farlan Amangw bise ma mose kabar sa e, mlwompang kam ma mtwulung kam nrela!

23Ne Yesus nfalak, “Safema mfwalak feti farlan Yakw bise ma kose kabar sa? Ratu bise ma nose safe-safe motak lan feti tomwate ne nalele I!”

24Mpe kanak ne amany nafwayak, “Yakw kulele Ko! Nempa mtwulung yakw nema ktwafal ma kulele Ko!”

25Yesus nsalan tomwatar rtafal ma yadin, mpa I nfarete smwangat yatak a ne ma nfalak, “Hei smwangat yatak, ko ye ma mose kanak ye namomou ma to nadengar, mbwie ko mof kanak ye ma kete msung i lo.”

26Mpe smwangat yatak ma nsung kanak a ne nafwayak ma nose ma pelak polik i ma nbie nof kanak a ne. Noak ma smwangat a ne nbie, kanak a ne farlan ma nmat lo, mpa tomwat ngayadin a ne rfalak, “I nmat lo.” 27Nempa Yesus nomat kanak ne limany ma nfair i, mpe namdir desar.

28Noak ma Yesus nor Ni manglartar koko sir ramin das, sir renrat I, “Safema kam to bise ma matian smwangat yatak ne?”

29Ne Yesus nfalak ber sir, “Smwangat yatak ma farane ka kmi msyampayang, betno bise ma mitian i.”

Yesus nfalak a nbal na Ni mamate

9:30-32

(Mat. 17:22-23; Luk. 9:43-45)

30Yesus nor Ni manglartar rti a rtate ain a ne ma ralyole propinsi Galilea. I to nmpeang ma tomwatar rafai feti I namin iane, 31fali I lolone naftutu Ni manglartar a ne. I nfalak ber sir, “Tomwatar keta ranrenre Yakw, Tomwate Anaky ber mangfaretar. Ma keta rfen Yakw nempa ni lerar tel e Yakw kmworip a kbwali.”

32Yesus Ni manglartar to rkaul ral safe ma nfalak a ne, nempa sir ramtaut ma renrat I.

Yesus Ni manglartar rabangal feti ise ma silai i

9:33-37

(Mat. 18:1-5; Luk. 9:46-48)

33Mpene Yesus nor Ni manglartar rait kote Kapernaum. Noak ma rait das ma ramin a ne, I nenrat sir, “Dine na dalamtene let e kmi mibangal a na safe?”

34Nempa sir to ratanuk, fali na dalamtene let e sir rabangal feti ise ma silai i a nlengan nof sir. 35Ne Yesus namtoran, ma ntar Ni manglarat buti resin du a ne ma nfalak ber sir, “Ise ma nmpeang ma neluk tomwat silai, ka nafufu nbali i ma neluk tomwat biase. Ma ka i neluk mangkaryae ma nlangun tomwatar monuk.” 36Mpe Yesus nkolat kanak sa ma nluan ma namdir twalelenir, betno nkoke kanak ne ma nfalak ber sir, 37“Tomwate ma nlangun kangkir sa farlan kanak ye, fali i nalele Yakw, iane feti nlangun Yakw. Ma tomwate ma nlangun Yakw, i to nlangun lan Yakw nempa i nlangun Ratu ma nsiduk Yakw nbal.”

Tomwate ma to nbangal Yesus i a ne nor I

9:38-41

(Luk. 9:49-50)

38Ne Yohanes nfalak ber Yesus, “Tuangguru, kam msalan tomwat sa nal Ko ngaram la natian kalin smwangat yatak. Mpa kam mose mteri tomwate ne, fali i to nlarat kit.”

39Nempa Yesus nfalak, “Kete myose mtyeri i, fali tomwatar to ral ngarangw la rose kabain mpasalnar, betno rbal sir ma rafmpusuk ngarangw.” 40Tomwate ma to nbangal kit, i a ne tbwarninrar. 41Mdyengar fen ngamone safe ma kfwalak ye, “Ni botuan e ise ma nlangun a kmi ma nose krawe ma myenum fali nafai feti Ray Silai Ni manglarat ber a kmi, keta Ratu nal sewe ber i.”

Kete myayat ma tomwatar rfufw far sale dalam

9:42-50

(Mat. 18:6-9; Luk. 17:1-2)

42Ne Yesus nfalak a nbal, “Ise ma nwayat ma kangkir sa nof kangkir ma ralele Yakw ye nfufw far sale, ni ngafele e rkete baty silayar sa na tomwate ne nawan, ma ryebas i far tasik dalam. 43Ma farlan limir a rwayat ma myose sale e, mtyukar kalin limir a ne ma myebas! Fali ni ngafele e myorip myor Ratu na surga myor lan limir balin, nlengan nof ma limir du a ramin nempa mtyi au ma nfolur dedesar. 44[Na iano ultar to rmat ma au nfolur dedesar.] 45Ma farlan emir rwayat ma myose sale, mtyukar kalin! Fali ni ngafele e myorip myor Ratu na surga myor lan emir balin, nlengan nof ma emir du a ramin, nempa ryebas a kmi far neraka. 46[Na iano ultar to rmat ma au nfolur dedesar.] 47Farlan matmir rwayat ma myose sale, myakil kalin. Fali ni ngafele e myorip myor Ratu na surga myor matmir balin, nlengan nof matmir du a ramin nempa ryebas a kmi far neraka.

48[Na iano ultar to rmat ma au nfolur dedesar.]

49Tomwatar ma ralele Ratu ka rkoman susar yadin nema ranglerap. Ma susar ma rkoman a ne feleles farlan sire ma tomwatar ka rnau na binatngar isnir betno rloik ber Ratu neluk snyompe.

50Botuan feti sire nangafel ma nose ma tnyamar namnir, nempa farlan sire mamal e, to bise ma miftelas a mbyali. Mpa kmi a nbal ka myorip e farlan sire, nema mir momorip ne ubany ber tomwatar. Ma ka myorip e sa nangamon nor sa.”

Currently Selected:

Markus 9: YMD

Highlight

Copy