Markus 5

Yesus natian kalin smwangat yatak nof tomwat Gerasa sa

5:1-20

(Mat. 8:28-34; Luk. 8:26-39)

1Yesus nor Ni manglartar rti rsaran na twemul Galilea balisya na nus Gerasa. 2Noak ma Yesus ntompur nof sori, merwan sa ma smwangat yatak nsung i nma nof kubur ma nti nakmat I. 3-4Tomwate ne namin lan kubur. Ma lain yadin ma tomwatar rkete limany emany ror rewe, nempa bise ma nosit. Ma to tomwate fen lese ma bise ma nomat i, ma ntampu nal i. 5Ma lere nronram e, i nmpan a nol motak a na kubur ma lenir ma fwayak fwoik i, ma nal batyar la natutuk tenany. 6Lama nsalan Yesus nof dodo e, i nafla ma nakmat I ma nsatngur na sounlury. 7-8Ne Yesus natian smwangat yatak nof tomwate ne ma nfalak, “Hei smwangat yatak ko, mbwie mof tomwate ye!” Ne tomwate ne nafwayak, “Hei Yesus! Ratu Anaky Mangamin medase Ko! Mpweang ma mose farpe yakw? Kete mswiksa yakw nrela!” 9Ne Yesus nenrat i, “Ngaram ise?” Ne nfalak, “Legion, fali yadin kam.” 10Mpe smwangat yatkar a ne raloloi sir ma rtak desar Yesus nema kete natian sir nof ain a ne. 11Sesedin ain a ne babyar yadin ma ranriak nir tnyame na bubuar lebaban. 12Ne smwangat yatkar a ne rtak Yesus ma rfalak, “Mwinrang ma msung far babyar a ne nrela!” 13Mpe Yesus nyoding ma smwangat yatkar a ne rbie rof tomwate ne, ma rsung babyar a ne. Ne babyar a ne rafla ma rputuk rof tetebin far twemul dalam, ne rlonrur ma rmat. Babyar a ne monuk e ribun du. 14Mangajak babyar rsalan farane, sir rafla ma rti kotar ma pnuar na seriny baldu a ne ma rasaur ngrie ne. Lama tomwatar rdengar ansaur a ne rti ain a ne ma rsalan safe ma Yesus nose ne. 15Lama rait e rsalan tomwate ma luryain e smwangat yatkar rsung i a ne ma namtoran. I nfonak i ma ni andaun nangamon lo, mpe sir ramtaut. 16Ne tomwatar ma rsalan desar ngrie ne, rasaur ber tomwat walyetar. Sir rasaur na safe ma Yesus nose ber tomwate ma smwangat yatkar rsung i a ne, ma rasaur na safe ma nose ber babyar a ne nbal. 17Mpe tomwatar monuk ma ramin iane rtak desar Yesus ma weni nbie nof ain a ne. 18Noak ma Yesus nfangat kumal, tomwate ma smwangat yatkar a rbie rof i a ne, ntak Yesus ma nlarat I a nbal. 19Nempa Yesus to ninrang ma nfalak ber i, “Mbwali ko far nim das ma musaur ber nim dasdalam ma tomwatar na nim pnue ne. Ka mufbotin ber sir a na safe ma ninr Mangnrur Silai nose ber ko a ne, ma mfwalak feti I nfatutu Ni dalamy ngamone ber ko lo.” 20Ne tomwate ne nbali i ma nti kote Dekapolis ma nasaur safe-safe monuk ma Yesus nose ber i a ne. Mpe tomwatar monuk ma rdengar a ne rampriang.

Yesus nafmorip Yairus anaky ma nafngamone batar sa ma ni olimpane nma e to nater

5:21-43

(Mat. 9:18-26; Luk. 8:40-56)

21Mpene Yesus nor Ni manglartar rfangat kumal ma rbali sir far twemul balisya. Noak ma rait e tomwatar yadin a rma twemul seriny a ne lo, ne sir rkolu I. 22Ne tomwat sa ngarany Yairus nma ma nakmat Yesus. I ye neluk ulun na das sampayang na ain a ne. Noak ma nsalan Yesus e, i nsatngur na Yesus sounlury, 23ma ntak naloloi ma nfalak, “Maken, mtwi ningw das a fuky koli anakw bate nafanas ma ketla nmat. Mtwulung ma mtwi ma mswaup limam na i nrela nema nangamon ma kete nmat.” 24Mpe Yesus nti nor Yairus. Ma tomwatar yadin rlarat I ma rasesekan sir ma rlosir I. 25Na tomwat ngayadin, batar sa ma dare nbotin i. Bate ne ni maninik doan ngarak buti resin du lo. 26I nti nakmat dokterar yadin ma nfarobat ni maninik a ne lo. Ma nfenri monuk ni kabanir la nfarobat ni maninik a ne. Nempa to nangamon ma ni maninik a ne ntafal. 27I ndengar ma tomwatar yadin rasaur na safe ma Yesus nose ne lo. Mpa nmpan a nlarat tomwat ngayadin a ne ma nti nlosir Yesus, betno nasyol Ni rabit melawas. 28I nose farane fali ndaun feti, “Farlan kusyol Ni rabit melawas suin motak e kungamon lo.” 29Mpe ntabw nof a ne darany nater desar. Ma nrase feti i nangamon lo. 30Ma nof a ne nbal, Yesus nrase feti Ni fakoran nbie ma nafngamone tomwatar sa. Ne I nfon tomwat ngayadin a ne ma nenrat, “Ise ma nasyol Ningw rabit?” 31Ne Ni manglartar rfalak, “Maken, Ko mswalan ma tomwatar rasesekan sir ma rlosir Ko a ma, mwenrat feti ise nasyol Ko farpe?” 32Ne I nfon a nlole tomwatar ma nsalan feti ise ma nasyol I. 33Bate ne nfenai feti noak ma nasyol Yesus Ni rabit e nangamon desar, mpa i namtaut ma ngangasar. Ne i nti nsatngur na Yesus sounlury, ma nfalak safe-safe monuk ma diat i. 34Mpe I nfalak ber bate ne, “Ano, ko mulele Yakw mpa mungamon lo. Mbwali ko mor maline fali nim maninik a ne nlai lo!” 35Noak ma Yesus lolone natanuk e, tomwatar ketnir rof Yairus ni das rma ma rfalak ber i, “Angkam a nmat lo, mpa kete mufngol Tuangguru ma nti nim das lo!” 36Nempa Yesus nose felany ma to ndengar safe ma tomwatar a ne rfalak. Mpa nfalak ber Yairus, “Kete mumtaut, mulele motak!” 37Ne Yesus nti Yairus ni das ma to ninrang ma tomwat walyetar rlarat I, lan Petrus, Yakobus ma wainy Yohanes. 38Lama rait Yairus ni das, Yesus nsalan ma tomwatar rngelir, rtasing ma ralol e lirnir silai. 39Ne Yesus nti das dalam ma nfalak ber sir, “Safema mngyelir ma mtyasing, kanak ye to nmat nempa narwa motak!” 40Lama rdengar ma nfalak farane e, rmalip I. Mpe nluan sir monuk ma rti burit. Ma ntar kanak a ne enany amany ma Ni manglartar tel a ne ma rti kamar dalam. 41Mpene Yesus nomat kanak ne limany ma nfalak, “Talita kum!” Iane isiny feti, “Ano, mpwote ko!” 42Ntabw nof a ne kanak ne npote desar i ma nmpan. (Kanak ne ni ngarak buty resin du lo.) Mpe tomwatar monuk ma ramin iane rampriang desar. 43Nempa Yesus ntampu sir ma kete rasaur desar ngrie ne ber tomwatar. Ne nluan ma rfane i.

Currently Selected:

Markus 5: YMD

Highlight

Copy