Markus 4

Tnyanuk pupule na tomwate ma nyefar fini

4:1-9

(Mat. 13:1-23; Luk. 8:4-15)

1Na ler sa e, Yesus nti twemul Galilea ma naftutu na iane nbal. Na iane tomwatar yadin desar rma ma rafburat sir ma rkolu I. Iane nwayat ma nfangat kumal ma nloi na iane ma namtoran. Ma tomwat ngayadin a ne ramdir twemul seriny. 2Ne Yesus naftutu ngriar yadin ber sir nor tnyanuk pupule. I nfalak farye: 3“Mdyengar fen ngamone! Na ler sa e, mangosbo sa nti letar ma nyefar fini. 4Noak ma nyefar finyar a ne, ketnir rfufw a na lalate, ne mangkyar rma ma rane rafere. 5Ketnir e rfufw a na ompak bati, ne manrilak ma ratrump fali ompak manisik. 6Nempa noak ma lere mefanas e, raplai ma rmangret fali wakrir rsaup ompak das motak. 7Ketnir a nbal e rfufw a na skiki kakari dalam, ne ratrump ror skiki-kakari ne mpa rmpalam sir nwayat ma rmat ma to rabu. 8Nempa ketnir a nbal e rfufw a na ompak mpariang. Ma ratrump e rangafel terik ma silayar ma rabu. Ketnir e bunir buty tel, ketnir e buty nem, ma ketnir a nbal e rati.” Ma bunir a ne yadin nlengan nof finyar ma ryefar a ne. 9Ne nfalak a nbal, “Ka mdyengar fen ngamone safe ma kfwalak ye.”

Yesus nfalyole tnyanuk pupule isiny na tomwate ma nyefar fini

4:10-20

10Noak ma tomwatar monuk rbali sir ma Yesus koko I e, Ni manglartar numur tomwatar ketnir ma ramin a ne rti rakmat I. Ne sir renrat, “Maken, tnyanuk pupule ne isiny farpe?” 11Ne Yesus nfalak ber sir, “Ratu nal andaun ngamone ber a kmi lo ma mkyaul myal safe ma tomwatar to rafai fuky. Iane feti keta Ratu neluk Rai ma nfarete tomwatar na saryamprene felan farpe. Nempa ber tomwat walyetar e, Yakw kuftutu ngrie ne kor tnyanuk pupule.”

12Nema

boloka rsalan nempa to rafai

ma boloka rdengar nempa to rkaul ral isiny.

Ratu nose farane nema kete rma ma rakmat I ma nlure nir salar.

13Ne Yesus nfalak ber sir, “Farlan kmi to mkyaul myal tnyanuk pupule ye keta tnyanuk pupul walyetar e farpe nbal?” 14Tnyanuk pupule ne isiny farye: Mangosboe ma nyefar finyar a ne nfatutu tomwate ma nafwibar Ratu Ni ngribatnir. 15Tomwatar ketnir sir farlan finyar ma rfufw na lalate ne. Sir a ne ma rdengar Ratu Ni ngribatnir, nempa smwangat yatkar nir ulun nma ma nal ngribatnir a ne nof dalmir nwayat ma ramlufe lo. 16Ma tomwatar ketnir e sir farlan finyar ma rfufw na ompak bati. Sir a ne ma rdengar Ratu Ni ngribatnir, ma rlangun desar ror dalmir senange. 17Nempa Ratu Ni ngribatnir a ne to nawakar na dalmir mpa ralele Ratu e to dodo. Ma noak ma rkoman suse nre tomwatar rsil a rbabal sir fali rlarat Ratu Ni ngribatnir a ne, keta sir ratliur Ratu desar. 18Ma tomwatar ketnir e sir farlan finyar ma rfufw na skiki-kakari dalam. Sir a ne ma rdengar Ratu Ni ngribatnir, 19nempa dalmir suse ma rdaun lan nir momorip, nir anoskai ma nir makeus. Kabanir monuk a ne rose rteri nir andanwar lo, mpa to rdaun Ratu Ni ngribatnir a ne nwayat ma to rose ral nir adat ngamonar. 20Ma finyar ma rfufw na ompak mpariang a ne, farlan tomwatar ma rdengar Ratu Ni ngribatnir ror dalmir kateman. Ma sir rose rlarat Ngribatnir a ne mpa na nir momorip e, rose lan kabain ngamonar. Ketnir e rose lan rufuky, ketnir e rose far dengan, ma ketnir a nbal e rose dedesar.

Tnyanuk pupule na damar ma rsungap

4:21-25

(Luk. 8:16-18)

21Ne Yesus nfalak a nbal ber sir, “Tomwatar to rtutun damar betno ral ngusi la rsungap, nre rnau na koi lebaban. Nempa ka rtikloi damar a ne na impan nema idak das dalam.” 22Iane feleles farlan Ratu Ni ngribatnir a nbal. Ratu keta nafbotin safe-safe monuk ma luryain e namudim. Ma safe-safe monuk ma luryain e tomwatar to rafai keta I nfatutu ber sir. 23Mpa ka mdyengar fen ngamone safe ma kfwalak ye.

24Ne Yesus nfalak a nbal, “Ka mdyaun fen ngamone safe ma kfwalak ye. Farlan mdyengar fen ngamone Ratu Ni ngribatnir a ne keta mkyaul myal. Ma keta Ratu nose nbal ma mtyafal ma mkyaul myal Ni ngribatnir a ne ma nangafel. 25Fali tomwate ma ndengar fen ngamone keta ntafal ma nkaul nal. Nempa tomwate ma to nmpeang ma ndengar Ni ngribatnir, ma boloka nkaul nal lan rufuky, keta Ratu nkokap ni andaun a ne ma ntafal ma to nafai sasaf.”

Tnyanuk pupule na finyar ma ratrump

4:26-29

26Mpe Yesus nfalak tnyanuk pupule nbal ber sir farye, “Keta Ratu neluk Rai ma nfarete tomwatar iane feleles farlan tomwatar sa ma nyefar fini na ni lete. 27Lerar e i nkarya ma nronmar e narwa. Ma finyar a ne ratrump ma rma das terik ma medasar. Nempa i to nafai feti safe nose ma finyar a ne ratrump ma medasar. 28Ompak ye ma nose ma finyar a ne ratrump ma rabu. Noak ma finyar a ne ratrump, luryain e radone, rafsang sir ma rabu e sarnir silayar desar. 29Noak ma bunir a ne rwabar lo, keta tomwate ne ntikar bunir a ne fali iane ni tewat ma ntikar bunir a ne lo.”

Tnyanuk pupule na sasawi batin

4:30-34

(Mat. 13:31-32; Luk. 13:18-19)

30Yesus nfalak a nbal, “Noak ma Ratu neluk Rai ma nfarete saryamprene ye, keta felan farpe? Ma keta kal safe la kfwalyole ngrie ne? 31Noak ma Ratu neluk Rai ma nfarete na saryamprene ye, iane farlan sasawi batin ma tomwatar sa nyefar na ni lete. Boloka sasawi batin ye marumat desar nof safe-safe monuk batnir ma ramin saryamprene ye, 32nempa nait ma natrump e, silai nlengan nof sayorar monuk. Ma nafsang i nwayat ma mangkyar rti ramin sangnir a ne ma rose nir ngengyar a na.”#4:32 Sasawi ye to feleles nor sasawi ma namin Tanempar. Sasawi na Palestina ye batin atakanak nempa natrump e bise ma neluk katutun ma mangkyar rose nir ngengyar a na.

33Yesus nal tnyanuk pupular yadin na Ratu ma naftutu sir nlarat safe ma sir bise ma rkaul ral. 34Yesus naftutu tomwatar a ne nor lan tnyanuk pupule. Nempa noak ma koko I nor Ni manglartar e, I nfalyole mpane ansarwar isnir ber sir.

Yesus nafline mnaur uman

4:35-41

(Mat. 8:23-27; Luk. 8:22-25)

35Na lere ne nbal noak ma ketla lere nfufw, Yesus nfalak ber Ni manglartar, “Mya ma ti twemul balisya.” 36Mpe Yesus Ni manglartar rti a rtate tomwat ngayadin a ne, ma rti rfangat kumal ma Yesus namin a ne ma raktem Yesus a rti. Na twemul a ne sory walyetar ramin a nbal. 37Noak ma lolone let, metryat e mnaur uman nma twemul a ne. Ma ner silayar rtef kumal a ne nwayat ma weye nti dalam ma ketla nfen. 38Noak a ne Yesus narwa kumal mangtan mudy ma nalun bantal. Ne Ni manglartar rpangun I ma rfalak, “Tuangguru, mpwote Ko! Mswalan lonri motak ma tatloram e?” 39Ne Yesus npote I ma ntampu mnaur ma nerar ma rafefar a ne ma nfalak, “Dengan lo! Miter lo!” Ne mnaur ma nerar a ne rtolar sir ma twemul a ne namlin desar. 40Ne Yesus nfalak ber Ni manglartar a ne, “Safema mimtaut? Ali kmi to milele Yakw e?” 41Mpe sir ramtaut desar ma rafalak ber sir, “Botuan e Tomwate ye ise I, mampe mnaur ma nerar ye rlarat Ni farete?”

Currently Selected:

Markus 4: YMD

Highlight

Copy