Markus 3

Yesus nafngamone tomwat sa ma limany balisyae namlukut na Yahudyar nir ler Sanari

3:1-6

(Mat. 12:9-14; Luk. 6:6-11)

1Na ler sa e Yesus nti das sampayang. Na iane tomwat sa ma limany fian namlukut. 2Ne tomwat Farisyar ketnir rmpeang ma ranriak Yesus Ni sale mpa ranaumat I, ma rsalan feti keta nafngamone tomwate ne na ler Sanari nre tate. 3Ne Yesus nfalak ber tomwate ma limany namlukut a ne, “Mwa ma mumdir lury ye!” 4Ne Yesus nfalak ber sir, “Nof Musa ni tetetkar e tose safe na ler Sanari? Tose ngamone tomwatar nre tose yatak sir? Tulung tomwatar nema kete rmat nre tfen sir?” Nempa sir ramlin motak. 5Mpe Yesus nfon a nlole tomwatar ma ramin iane ma nares desar. Ma I dalamy maninik sir a nbal fali to nir lolompang ber tomwatar. Ne I nfalak ber tomwate ma limany namlukut a ne, “Mkwonrar limam!” Ne tomwate ne nkonrar limany ma nof a ne nangamon desar. 6Ne tomwat Farisyar ketnir rti a rtate das sampayang ne, ma rti rakmat Herodes ni tomwatar, ma raktem a rsayak ma rfen Yesus.

Yesus nafngamone tomwatar yadin na twemul Galilea

3:7-12

7Mpene Yesus nor Ni manglartar rti a rtate ain a ne ma rti twemul Galilea. Tomwatar yadin rlarat I. Sir a ne rma rof propinsi Galilea ma Yudea. 8Ma ketnir a nbal e rof Yerusalem, Idumea, twemul Yordan balisya, ma ketnir e rof Tirus ma Sidon. Sir monuk rma ma rakmat Yesus fali rdengar kabanir monuk ma I nose ne lo. 9Noak ma tomwatar rtafal ma yadin, I nluan Ni manglartar ma rsalan soryar sa ber I nema tomwatar kete rsekan I. 10Fali luryain e, I nafngamone tomwatar yadin lo nwayat ma mangafansar monuk rasesekan sir ma rasyol I. 11Ma tomwatar ketnir ma smwangat yatkar rsung sir a ne ramin iane nbal. Noak ma rsalan Yesus e, rsatngur desar a na sounlury ma rafwayak, “Ko ye Ratu Anaky!” 12Nempa Yesus nose nteri sir ma rasaur na I ber tomwat walyetar.

Yesus nfil Ni manglartar buti resin du

3:13-19

(Mat. 10:1-4; Luk. 6:12-16)

13Na ler sa e, Yesus nti lenir sa. Ma nribut tomwatar ma nmpeang ma nfil sir a ne ma rlarat I. Mpe sir rlarat I. 14Ne I nfil tomwate buti resin du ma reluk Ni mangsiduk ma ror I, nema nsiduk sir ma rafwibar Ibar Ngamone. 15Ma I nal kuase ber sir a nbal ma ratian smwangat yatkar. 16Tomwate buti resin du ma nfil sir a ne ngarnir farye: Simon ma Yesus nafngare i a na Petrus, 17Yakobus ma Yohanes Zebedeus angkir. (Radu ye ma Yesus nafngare sir a na Boanerges. Boanerges ye isiny feti, “Tomwate ma farlan tarpake.) 18Ma Andreas, Filipus, Bartolomeus, Matius, Tomas, Yakobus Alfeus anaky, Tadeus, Simon ma nof faburat Zelot, 19ma Yudas Iskariot ma keta nfenri Yesus.”

Yesus Ni kuase nlengan nof Beelzebul

3:20-30

(Mat. 12:22-32; Luk. 11:14-23)

20Ne Yesus nor Ni manglartar rbali sir far das ma ramin a ne. Mpe tomwatar yadin rma ma rafburat sir na das a ne nbal, nwayat ma to let ber Yesus nor Ni manglartar ma rtame. 21Yesus wanir rose ma rma ma ral I fali rdengar ma tomwatar ketnir rfalak feti I nfukat lo. 22Ma mangaftutu Musa ni faretar ketnir ma rma rof Yerusalem a ne rfalak, “Beelzebul ma neluk smwangat yatkar nir ulun a ne nsung I lo! Ma i ma nal kuase ber I ma natian smwangat yatkar.” 23Lama Yesus ndengar farane, I ntar tomwatar a ne ma nfalak tnyanuk pupule ber sir farye: “Ali smwangat yatkar nir ulun bise ma natian a nbali smwangat yatak walyetar e? 24Contoh sa farye: Farlan tomwatar na ain faretar sa raale sir ma rakes rasam sir, keta ain farete ne namsos. 25Ma farlan tomwatar rkafre a na nir dasdalmir, keta nir dasdalam a ne namsos. 26Feleles farlan smwangat yatkar nir ulun ni ain farete nbal. Farlan smwangat yatkar na nir ain farete ne raale sir ma rakes rasam sir, keta nir ain farete ne to dodo ma namsos. 27Smwangat yatkar nir ulun a ne farlan tomwat makornar sa. Farlan tose ma ti tomwate ne ni das dalam ma tal ni kabanir, ka tkete i a fuky, betno bise ma tal ni kabanir a ne. Mpa farlan Yakw kutian smwangat yatkar iane nfatutu feti Ningw kuase nlengan nof sir. 28Mdyengar safe ma kfwalak ye, ni botuan e farlan tomwatar rose sale ma rfalak ngribatin yatkar ber tomwat walyetar, keta Ratu nlure sir. 29Nempa farlan tomwatar rfalak ngribatin yatkar ber Ratu Smwangtany, Ratu keta to nlure sir terik ma dedesar. Ma nir salar a ne dedesar ma ramin.” 30Yesus nfalak farane fali tomwatar ketnir a rfalak feti smwangat yatak a nsung I.

Yesus enany ma wanir

3:31-35

(Mat. 12:46-50; Luk. 8:19-21)

31Noak a ne Yesus enany ma wanir rma ma rakmat I. Nempa ramdir motak burit, ma rfalak ber tomwatar ma rtar I. 32Na iane tomwatar yadin ramtoran ma rkolu I. Ne sir rfalak ber I, “Maken, anoi ma wamyar a ramin burit a no. Sir rma ma ranriak Ko.” 33Yesus nfalak ber sir, “Au, nempa mifai nre tate feti Yakw enangw ma wangur a ne ber mpear?” 34I nsalan tomwatar ma ramtoran a rkolu I a ne ma nfalak, “Kmi monuk ye ma myeluk enangw ma wangur.” 35Fali tomwatar ma rose rlarat Ratu Ni mpempeang sir a ne ma reluk enangw, urangw ma waingw.

Currently Selected:

Markus 3: YMD

Highlight

Copy