Markus 10
10
Yesus Ni anftutwar na ene sawe
10:1-12
(Mat. 19:1-9)
1Nof a ne Yesus nor Ni manglartar rti a rtate kote Kapernaum ma ral far wer Yordan balisya na propinsi Yudea. Na iane tomwatar yadin a nbal. Sir rma ma ramdir a rkolu I, mpa I naftutu sir farlan biase ma nose.
2Mpe tomwat Farisyar ketnir rma ma rateman Yesus ma rfalak, “Maken, nof kit ninr agame ni yayatrwar e merwanar sa bise ma nyebas sawany e?”
3Ne Yesus nfalak ber sir, “Na tetetkar ma Ratu nal ber Musa nfalak safe?”
4Ne sir rfalak, “Na tetetkar a ne Musa ninrang ma merwane nyebas sawany, nempa ka nose surat talak.”
5Ne Yesus nfalak, “Au botuan. Musa narengi tetetak ma farane ber a kmi fali ulmir arwaluk. 6Safo luryain ma Ratu nose saryamprene e, I nose bate ma merwane. 7Iane nwayat ma merwane ka nti a ntate enany amany ma nafsau nor sawany, 8nwayat ma radu a rmorip e lese. Mpa na Ratu sounlury e tomwatar to du lo, nempa lese motak. 9Mpa merwane ma bate ma Ratu nkete sir a ne lo, tomwatar to bise ma rakese sir.”
10Lama rbali sir far das e Yesus Ni manglartar renrat I na ngrie ne. 11Ne I nfalak ber sir, “Merwane ma nyebas sawany ma nafsau nor bat walyete, iane i nanronr. 12Ma farlan bate ma nyebas sawany ma nafsau nor merwan walyete, iane i nanronr a nbal.”
Yesus nberkat kangkir
10:13-16
(Mat. 19:13-15; Luk. 18:15-17)
13Na ler sa e, tomwatar ror angkir ber Yesus nema nasyol ma nberkat sir. Nempa Ni manglartar rarese tomwatar a ne. 14Noak ma Yesus nsalan farane, I nares ma nfalak ber Ni manglartar, “Msyalan lonri motak kangkir a ne rma ma rakmat Yakw! Ma kete myose mtyeri sir, fali tomwatar ma farlan kangkir ye ma keta reluk Ratu Ni tomwatar noak ma I neluk Rai ma nfarete saryamprene. 15Yakw kfwalak ber a kmi! Ni botuan e ka milele Ratu farlan kangkir ye ma to bise ma rkatar sir rof enir amnir. Ma farlan to myose farane keta to myeluk Ratu Ni tomwatar.” 16Lama Yesus nfalak farane I nkoke kangkir a ne ma nsaup limnir a na sir betno nberkat mpane sir.
Masumput desar ber mangoskai ma nti Ratu Ni ain farete
10:17-31
(Mat. 19:16-30; Luk. 18:18-30)
17Noak ma Yesus nor Ni manglartar raloran nir mpampane, tomwat sa nafla mpane nma ma nakmat Yesus. Ne i nsatngur a na sounlury ma nfalak, “Tuanggurw ngamone Ko, ka kose safe nema konri momorip dedesar?”
18Ne Yesus nfalak, “Safema ko mfwalak feti kungamon? To tomwate fen lese ma nangamon lan Ratu. 19Ko mufai monuk Ratu Ni faretar lo: ‘Kete mufen, kete munronr, kete mumnang, ka kete mweluk mangtungan lepusuk, kete mlwepusuk tomwatar ma mwal nir kabanir, ma ka mwalang anoi amoi.’”
20Tomwate ne nfalak, “Tuangguru, nof ningw tabweri e yakw kose klwarat faretar a ne lo.”
21Yesus nfon tomwate ne ma nlompang i. Ne I nfalak, “Bait sa nbal ma ka mose: Mtwi mfwenri monuk nim kabanir, betno mswaman dotyar a ne ber tomwatar ma rawatan, nema monri kabanir na surga. Ko mose farane betno mlwarat Yakw.” 22Lama tomwate ne ndengar ma Yesus nfalak farane, nawore i ma nbali i e dalamy suse desar fali naoskai resi.
23Ne Yesus nfon Ni manglartar ma ramdir a rkolu I a ne ma nfalak ber sir, “Masumput desar ber mangoskai ma neluk Ratu Ni tomwate na Ni ain farete!”
24Noak ma Yesus Ni manglartar rdengar safe ma I nfalak a ne sir rampriang. Nempa Yesus nfalak a nbal, “Angkur, masumput desar ber tomwatar ma reluk Ratu Ni tomwate na Ni ain farete! 25Merawe desar ma unta lese nsung nof nririmase matan, nlengan nof mangoskayar sa ma neluk Ratu Ni tomwate na Ni ain farete.”
26Ni manglartar rdengar ma Yesus nfalak farane sir rtafal ma rampriang. Ne rafalak ber sir, “Farlan farane e keta ise ma Ratu nfair i?”
27Ne Yesus nfon sir ma nfalak, “Tomwatar to bonir ral ma rfair a rbali sir, nempa Ratu boany nal. Fali Ratu bise ma nose safe-safe motak!”
28Ne Petrus nfalak ber Yesus, “Maken, no mswalan! Kam mnau kalin kam mamy kabanir monuk lo ma mlarat Ko.” 29Ne Yesus nfalak ber sir, “Ise ma nau kalin ni das, urany wainy, enany amany, angkir, nre lete aun fali nlarat Yakw ma fali nafwibar Ibar Ngamone, 30keta Ratu nal sewe ma nresy ntaul desar ber tomwate ne na ni momorip saryamprene. I keta nonri das, lete, urany wainy, enany amany, ma angkir. Nempa keta tomwatar rsil a rbabal i a nbal. Ma i keta nonri momorip dedesar nor Ratu na lere ma nma ne.” 31Nempa tomwatar yadin ma lere ye reluk tomwat silayar, keta famudi e reluk tomwatar ma to ubnir sasaf. Ma tomwatar ma lere ye to ubnir sasaf, keta famudi e reluk tomwat silayar.
Yesus natanuk na Ni mamate fen lain tel
10:32-34
(Mat. 20:17-19; Luk. 18:31-34)
32Noak ma Yesus nor Ni manglartar raloran nir mpampane far Yerusalem e, I namin lury. Ma Ni manglartar dalmir suse, ma tomwat walyetar ma rlarat I rof mudy a ne ramtaut a nbal. Ne Yesus ntar Ni manglarat buti resin du a ne ma rkese sir ma nfalak ber sir na safe ma keta I nkoman. 33“Mdyengar ma kfwalak, lere ye kit ti kote Yerusalem ye lo. Na iano keta tomwatar ranrenre Yakw, Tomwate Anaky ber mangsomp ulnir ma mangaftutu Musa ni faretar, ma keta ral tetetak mamate ber Yakw. Ma keta ranrenre Yakw nbal ber tomwatar ma to Yahudi sir, 34nema sir keta rkosy a rmalip Yakw, ma rdikat Yakw. Ma keta sir raus a rbabal Yakw ma rfen Yakw, nempa keta lerar tel e, Yakw kmworip a kbwali.”
Ise ma silai i nlengan nof Ni manglartar monuk
10:35-45
(Mat. 20:20-28)
35Mpene Yakobus ma Yohanes, Zebedeus angkir rma ma rakmat Yesus. Ne sir rfalak, “Tuangguru, kam mpeang ma mose kabanir sa ber kam.”
36Ne Yesus nfalak ber sir, “Kmi mpyeang ma kose safe ber a kmi?”
37Ne sir rfalak, “Noak ma mweluk Rai ma mfwarete mor Nim kuase e ka mwinrang ma kam mor Ko. Sa namin serim fian ma sa nbal namin serim bayal.”
38Nempa Yesus nfalak ber sir, “Kmi to mifai safe ma kmi mtyak. Kmi bomir myal ma mibare suse farlan ma Yakw kubare e?”
39Ne sir rfalak, “Au, kam bomyamar mal.” Ne Yesus nfalak ber sir, “Botuan feti keta kmi mibare suse farlan ma Yakw kwoman. 40Nempa Yakw to Ningw kuase ma ktwetak feti ise ma keta namtoran seringw fian nre seringw bayal. Iane lan Ratu ma Ni kuase, fali I ntetak nof luryain lo feti mpear ma keta ramtoran ain ma nau ber sir a ne.”
41Lama Ni manglarat walyete buti ne rdengar farane e sir rarese Yakobus ma Yohanes. 42Nempa Yesus ntar Ni manglartar monuk ma nfalak, “Kmi mifai feti mangfaret saryamprenar ma mangonbain silayar ma to ralele Ratu ne, sir rfarete nir nuse ma rtean sir. Ma mangonbain silayar a ne rfarete nir nuse rlarat nir suke.
43Nempa kmi e ka kete myose mbyalak sir. Mpa nof a kmi ye, ise ma nmpeang ma silai i, ka neluk mangkaryae ber a kmi. 44Ma farlan nof a kmi ye, ise nmpeang ma silai i, ka neluk mangkaryae ber a kmi. 45Fali Yakw, Tomwate Anaky kmwa saryamprene to feti ma tomwatar rlangun Yakw, nempa kmwa ma klwangun tomwatar. Ma Yakw kmwa kbwal ma kunrenre Yakw ma kmwat la ktwebus tomwatar monuk rof nir salar.”
Yesus nafngamone Bartimeus ma nabol
10:46-52
(Mat. 20:29-34; Luk. 18:35-43)
46Noak a ne Yesus nor Ni manglartar rait kote Yerikho. Ma noak ma sir rti a rtate kote ne tomwat ngayadin rlarat sir. Na iane tomwat matbolar sa namtoran dalamtene seriny ma natak. Tomwate ne ngarany Bartimeus. I ye Timeus anaky. 47Noak ma i ndengar feti Yesus tomwat Nasaret nlanre nof a ne, i nafwayak, “Yesus, Daud empuny! Mlwompang yakw!”
48Tomwatar yadin rarese i ma rtampu i nema nau. Nempa i ntafal ma nafwayak a nbal, “Daud empuny! Mlwompang yakw!”
49Mpe Yesus namdir a ntabu I ma nfalak, “Mtyar i a mya!” Ne tomwatar rtar matbole ne, ma rfalak ber i, “Ko mswenang mpa mumdir lo koli Yesus ntar ko.”
50Ne matbole ne nasnyalik desar ma npote i ma namdir. Ne nau kalin ni rabit melawas, ma nti nakmat Yesus.
51Ne Yesus nfalak ber i, “Mpweang ma Yakw kose safe ber ko?” Ne i nfalak, “Tuangguru, kmpweang ma kukeban.”
52Mpe Yesus nfalak ber i, “Farlan farane e mbwali ko lo! Fali mulele Yakw mpa mungamon.” Nof a ne nbal tomwate ne nakeban desar, ne nmpan a nlarat Yesus.
Currently Selected:
Markus 10: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
