Markus 11

Tomwat ngayadin rdangin Yesus noak ma nti Yerusalem

11:1-11

(Mat. 21:1-9; Luk. 19:28-38; Yoh. 12:12-15)

1Noak a ne Yesus nor Ni manglartar ketla rait kote Yerusalem. Ne sir rwelat pnu Betfage ma pnu Betania na lenran Zaitun a ne. Na iane Yesus nluan Ni manglartar du ma rmpan a rbalun. 2Ne Yesus nfalak ber sir, “Mtyi pnue luri no, keta myait e mkyeban keledai anak ma rkete i. Keledai ne to rfangat desar i a fuky. Mtyatar ma myor i a mya. 3Ma farlan tomwatar renrat a kmi feti safema mtyatar keledai ne ka mfyalak, Mangnrur Silai nmpeang ma nfangat i, ma keta nasnyalik ma nonry i a nbali.”

4Ne manglartar du a ne rti e rtungan keledai anak ma rkete i a na fofolat fakar burit, na dalamtene seriny, mpe rtatar i. 5Ne tomwatar ketnir ma ramin iane renrat sir, “Hei kmi myose safe ne? Safema mtyatar keledai ne?”

6Ne sir rfalak rlarat safe ma Yesus nfalak ber sir a ne. Mpe tomwatar a ne rsalan lonri ma ror keledai anak ne. 7Ne sir ronr keledai anak a ne ber Yesus. Noak ma sir rait e sir rnau nir rabit melaswar la rafin keledai ne feuny betno Yesus nfangat. 8Ne tomwatar yadin ma rlarat Yesus ne, rbelar nir rabit melaswar na dalamtene. Ma ketnir a nbal e rpet kanur donyar rof nir letar ma rbelar na dalamtene dalam. 9Tomwatar ma rmpan a rbalun rof Yesus ma ketnir ma rlarat rof mudy a ne rfalak dedesar ror lirnir silai, “Mya o, mya ma tdangin Ratu! Ka weni Ratu ninr Mangnrure nberkat ninr Rai ma nma nor Ratu Ni kuase!”

10“Ka weni Ratu nberkat I ma to dodo e nfarete kit. I keta nfarete farlan empninrar ray Daud luryain a ne. Mpa mya tdangin Ratu Mangamin Medase!”

11Lama rait Yerusalem, Yesus nti Ratu Ni Das Silai ni latyompur. Ne I nsalan kabanir monuk ma tomwatar rose na Ratu Ni Das Silai seriny baldu a ne. Nempa ketla nronram lo, mpa nor Ni manglartar buti resin du a ne rti pnu Betania.

Yesus nangoak katutun ara

11:12-14

(Mat. 21:18-19)

12Ni bobole ne, Yesus nor Ni manglartar rof pnu Betania rti Yerusalem. Na dalamtene let e Yesus nkoman ma namlafar. 13Nof dodo e I nsalan katutun ara sa ma donyar yadin desar. Ne I nti nsalan feti bunir a ramin nre tate. Nempa noak ma nti e, to nbae sasaf lan donyar, fali to ni tewat ma nabu a fuky. 14Mpa nangoak katutun a ne ma nfalak, “Ntabw nof lere ye to tomwate fen lese nbal ma nane buam lo!” Ne Ni manglartar rdengar ma nfalak farane.

Yesus natian tomwatar ma rafenry kabain na Ratu Ni Das Silai

11:15-19

(Mat. 21:12-13; Luk. 19:45-48; Yoh. 2:13-16)

15Lama Yesus nor Ni manglartar rait Yerusalem, I nti Ratu Ni Das Silai Ni latyompur. Na iane I natian tomwatar monuk ma rafenry kabanir. I nbal tomwatar ma rtukar dotyar a ne nir medar. Ma ntuni bangkwar ma tomwatar rpaki la rfenri manik merpatyar a ne. 16Ma I to ninrang tomwate fen lese nbal ma nonry kabanir nlanre Ratu Ni Das Silai Ni latyompur a ne. 17Ne I naftutu tomwatar na iane ma I nfalak, “Ali to mifai e feti na Kitap Lelerap dalam Ratu nfalak feti: Yakw Ningw Das ye ain ber nusar monuk na saryamprene ma rsampayang a na; nempa kmi myose ain a ne ma neluk mangamnang anir!” 18Noak ma mangsompar ulnir, ma mangaftutu Musa ni faretar rdengar safe ma Yesus nose ne, sir rareke ma rfen I. Nempa sir ramtaut fali rsalan tomwatar yadin ma rsenang ma rdengar Ni anftutwar a ne. 19Noak ma ketla nronram e, Yesus nor Ni manglartar rti a rtate kote Yerusalem a ne.

Yesus naftutu kit ma ka talele botuan Ratu na ninr sampangar

11:20-26

(Mat. 21:20-22)

20Ni bobolisin e, Yesus nor ni manglartar rlanre rof katutun ara ne. Ne sir rsalan e katutun ara ne namangw terik wakrir lo. 21Ne Petrus nanremi safe ma maniap e Yesus nfalak ber katutun ara ne. Mpa nfalak ber Yesus, “Tuangguru, mswalan! Katutun ara ma mungoak a ne namangw lo.” 22Ne Yesus nfalak ber sir, “Ka milele botuan Ratu!” 23Mdyengar fen ngamone safe ma kfwalak ye! Farlan milele botuan Ratu, bise ma mfyalak ber bubuar a ne, mbwie mof ye ma mtwi muyebas far tasik dalam. Mpe keta bubuar a ne nbie desar lan feti milele myor dalmir kateman feti safe ma mfyalak a ne keta diat desar. 24Mpa ka minremi! Safe-safe motak ma mtyak myof Ratu na mir sampayang a ne, ka milele botuan feti Ratu nal ber a kmi lo, mpe keta myonri safe ma mtyak a ne. 25Ma noak ma msampayang ma minremi feti tomwatar sa ma nose sale ber a kmi e, ka mlyure tomwate ne fuky. Farlan kmi myose farane keta Amir ma namin surga nlure mir salar a nbal. 26[Nempa farlan to mlyure tomwat walyetar keta Amir ma namin surga to nlure mir salar a nbal.]

Mangfaret Yahudyar renrat Yesus na Ni kuase

11:27-33

(Mat. 21:23-27; Luk. 20:1-8)

27Ne Yesus nor Ni manglartar rbali sir far kote Yerusalem. Noak ma Yesus nmpan na Ratu Ni Das Silai ni latyompur, mangsomp ulnir ketnir, mangaftutu Musa ni faretar, ma mangfaret Yahudyar rma ma rakmat Yesus. 28Ne rfalak ber Yesus, “No mfwalak ber kam feti Ko Nim kuase safe la mose kabanir monuk ye? Ma ise ma nal kuase ne ber Ko?” 29Nempa Yesus nfalak ber sir, “Yakw kose ma kwenrat a kmi a nbal. Farlan mbyali myal e la kufbwotin ber a kmi feti Yakw kal ise Ni kuase ma kose kabanir a ne. 30No mfyalak, ise ma nal kuase ber Yohanes la nadiris tomwatar? Ratu nre tomwate?” 31Lama rdengar ma Yesus nfalak farane mangsomp ulnir ma mangfaret Yahudyar a ne raale andaun. Sir rfalak, “Farlan kit tfalak feti ‘Ratu ma nal Ni kuase ber i’ keta nfalak, ‘Safema kmi to milele i?’ 32Nempa farlan tfalak feti, ‘Tomwate ma nal kuase ber i,’ keta tomwat ngayadin a ne rarese kit, fali rdaun feti Yohanes ye nabyar sa i.” 33Mpa rfalak, “Kam to mafai.” Ne Yesus nfalak ber sir, “Farane e to kfwalak ber a kmi a nbal feti ise ma nal kuase la kose kabanir monuk ye.”

Currently Selected:

Markus 11: YMD

Highlight

Copy