Matius 21

Tomwat ngayadin rdangin Yesus noak ma nti Yerusalem

21:1-11

(Mrk. 11:1-10; Luk. 19:28-38; Yoh. 12:12-15)

1Noak a ne Yesus nor Ni manglartar ketla rait kote Yerusalem. Ne sir rwelat pnu Betfage ma namin lenran Zaitun a ne. Na iane Yesus nluan Ni manglartar du ma rmpan a rbalun. 2Ne nfalak ber sir, “Mtyi pnue luri no, keta myait e mkyeban keledai bate ma rkete i ma anaky nlosir i. Mtyatar i ma myor sir a mya.” 3Ma farlan tomwatar renrat a kmi, ka mfyalak ber sir, “Mangnrur Silai nmpeang ma nfangat i, nempa keta nasnyalik ma nor i a nbali.”

4Safe-safe monuk a ne rbotin nema Ratu nafdiat safe ma luryain e nfalak ber nabi. Ratu nfalak farye,

5“Ka mfyalak ber tomwatar ma ramin kote Yerusalem feti:

Msyalan! Lere ye mir Rai nma ber a kmi lo,

I to nafdas i ma nfangat keledayar sa,

ma keledai ne iane keledai anak sa.”#Za. 9:9

6Mpe manglartar du a ne rti ma rose rlarat safe ma Yesus nfalak ber sir a ne. 7Ne ronr keledai bate nor anaky a ne ber Yesus. Ne rafin keledai ne feuny ror nir rabit melaswar, betno Yesus nfangat keledai ne. 8Na dalamtene let ma nal far Yerusalem e tomwatar yadin ma rlarat Yesus a ne rbelar nir rabit melaswar. Ma ketnir a nbal e rpet katutun rangsir ma rele na dalamtene ma keta Yesus nlanre#21:8 Noak a ne tomwatar rbelar nir rabit melaswar ma rele katutun rangsir a na dalamtene ma ralang Yesus ma keta nlanre nof a ne. . 9Ma tomwatar ma rmpan a rbalun rof Yesus ma ketnir ma rlarat rof mudy a ne rfalak ror lirnir silai,

“Mya ma tdangin Daud empuny,

ka weni Ratu ninr Mangnrure nberkat ninr Rai ma nma nor Ratu Ni kuase.

Mpa mya ma tdangin Ratu Mangamin Medase!”#Mzm. 118:26

10Noak ma Yesus nait kote Yerusalem, nuse mayoi mayai ma raenrat sir feti ali ise ye?

11Ne tomwat ngayadin ma rmpan ror Yesus a ne rfalak, “I ye Yesus. I ye nabi ma nof kote Nasaret na Galilea.”

Yesus natian tomwatar ma rafenry kabain na Ratu Ni Das Silai

21:12-17

(Mrk. 11:15-19; Luk. 19:45-48; Yoh. 2:13-16)

12Ne Yesus nti Ratu Ni Das silai ni latyompur ma natian tomwatar monuk ma rma rafenry kabain, ma rabel a na iane. I nbal medar ma biase tomwatar rpaki la rtukar dotyar a na. Ma ntuni bangkwar ma tomwatar rpaki la rfenri manik merpatyar a ne. 13Ne I nfalak ber sir, “Na Kitap Lelerap dalam rarengi farye: Yakw Ningw das ye ain ma rsampayang a na. Nempa kmi myose ain ye ma neluk mangamnang anir!”#Yes. 56:7; Yer. 7:11

14Ne matbolar ma sabaloyar rti rakmat Yesus na Ratu Ni das Silai ne, ma nafngamone sir. 15Nempa noak ma mangsomp ulnir ma mangaftutu musa ni faretar rsalan kabain mpasalnar ma Yesus nose ne sir rares desar. Ma sir rares a nbal ma rdengar kangkir ma rfalak ror lirnir silai na Ratu Ni das Silai ni latyompur farye: “Mya ma tdangin Daud empuny!”

16 # Mzm. 8:3 Mpa renrat Yesus, “Ko mdwengar safe ma kangkir a ne rfalak e?” Yesus nfalak, “Au, Yakw kdwengar. Botuan feti kmi mbyaca na Kitap Lelerap dalam lo nre feti, ‘Boloka kangkir ma darwewear motak nempa Ratu nfatutu sir ma rdangin I lo.’”

17Ne I nti a ntate tomwatar a ne, ma nti pnu Betania ma narwa iane.

Yesus nangoak katutun ara

21:18-22

(Mrk. 11:12-14; 11:20-24)

18Ni bobolisin desar e Yesus nor Ni manglartar rbali sir far Yerusalem. Na dalamtene let e I nkoman ma namlafar. 19Ne I nsalan katutun ara sa na dalamtene seriny. I nti katutun a ne sepany ma nsalan bunir, nempa to nbae buany fen lese nbal lan donyar e. Mpa nfalak ber katutun a ne, “Nof lere ye keta to mubu terik ma dedesar!” Ne katutun a ne nmat desar.

20Noak ma Ni manglartar rsalan farane, sir rampriang desar ma rfalak, “Safema metryat motak e katutun ara ne nmat desar ye?”

21Ne Yesus nfalak, “Mdyengar fen ngamone safe ma kfwalak, farlan milele Ratu myor dalmir kateman ma to myor lan dalmir tubun, keta bise ma myose mbyalak safe ma Yakw kose ber katutun ara ne.” To lan iane nempa bise ma mfyalak ber bubuar ye, “Mbwie mof ye ma muyebas far tasik dalam! Ne keta nbie desar.#Mat. 17:20; 1Kor. 13:2 22Ma safe-safe motak ma mtyak a na mir sampangar a ne keta Ratu nal ber a kmi, lan feti milele I botuan.”

Mangfaret Yahudyar renrat Yesus na Ni kuase

21:23-27

(Mrk. 11:27-33; Luk. 20:1-8)

23Ne Yesus nti Ratu Ni Das Silai ma naftutu tomwatar na iane. Mpe mangsompar ulnir ma mangfaret Yahudyar rma ma rakmat I. Ne rfalak ber I, “No mfwalak ber kam feti Ko Nim kuase safe la mose kabanir monuk ye? Ma ise ma nal kuase ne ber Ko?”

24Ne Yesus nfalak ber sir, “Yakw kose ma kwenrat a kmi a nbal. Farlan mbyali myal e la kufbwotin ber a kmi feti Yakw kal ise ni kuase ma kose kabanir a ne. 25No mfyalak feti ise ma nal kuase ber Yohanes la nadiris tomwatar? Ratu nre tomwate?”

Lama rdengar ma Yesus nfalak farane mangsomp ulnir ma mangfaret Yahudyar a ne raale andaun. Sir rfalak, “Farlan kit tfalak feti, ‘Ratu ma nal Ni kuase ber Yohanes keta I nfalak, safema kmi to milele Yohanes?’ 26Nempa farlan kit tfalak feti, ‘Tomwate ma nal kuase ber Yohanes, kit tamtaut tomwat ngayadin a ne feti keta rarese kit, fali rdaun feti Yohanes ye nabyar sa i.’” 27Mpa rfalak, “Kam to mafai.” Ne Yesus nfalak ber sir, “Farane e to kfwalak ber a kmi a nbal feti ise ma nal kuase la kose kabanir monuk ye.”

Tnyanuk pupule na maken sa nor angkir du

21:28-32

28Ne Yesus nfalak a nbal ber mangsompar ulnir ma mangfaret Yahudyar, “Nof mir andaun e ansaur ye farpe? Maken sa anaky merwanar du. I nfalak ber anaky keyai farye: Amo, lere ye mtwi mkwarya na let anggur.” 29Ne anaky ne nfalak, “Keta to ktwi!” Nempa ndaun a nbali mpa nti nkarya na let anggur a ne. 30Ne nti nfalak ber anaky kedua farane nbal. Mpe anaky kedua ne nfalak, “Au maken la ktwi!” Safo i to nti. 31Mpa nof kangkir du a ne ise ma nlarat amany ni mpempeang? Ne mangsompar ulnir ma mangfaret Yahudyar rfalak, “Kanak keyai.” Mpe Yesus nfalak ber sir, “Yakw kfwalak ber a kmi, ni botuan e mangtak ulbatyar ma bat yatkar a ne keta rbalun rof a kmi ma reluk Ratu Ni tomwatar noak ma I neluk Rai ma nfarete tomwatar. 32Fali Yohanes mangadiris nma ma nfatutu dalamten malonri ber a kmi e to milele i. Nempa mangtak ulbatyar ma bat yatkar e ralele i. Ma boloka kmi msyalan ma rtate nir salar, nempa kmi to mtyate mir salar ma to milele safe ma nfalak.”#Luk. 3:12; 7:29-30

Tnyanuk pupule na tomwatar ma rkarya na let anggur

21:33-46

(Mrk. 12:1-12; Luk. 20:9-19)

33Ne Yesus nfalak, “Tnyanuk pupule sa nbal farye: Ler sa e tomwatar sa ntanam anggur na ni lete, ma nose fakar a nbebar. Ne i nkal lobang ma nose ain ma keta nferas anggur a na, ma nafdiri menara nbal na lete dalam ber mangajakar ma rajake lete ne. Lama nose monuk kabanir a ne, nsewe tomwatar ketnir ma rajake lete ne betno i nti nus walyete.”#Yes. 5:1-2 34Nait ni tewat ma rtikar anggur bunir e lete nruany a ne nluan ni mangkaryayar ma rti rakmat tomwatar ma nsewe sir ma rajake ni lete ne nema ral ni wayat. 35Nempa sir romat ni mangkaryayar a ne. Sir rbabal ketnir, sir rfen ketnir, ma ketnir a nbal e rakjai rfen sir. 36Mpe nluan ni mangkarya walyetar a nbal ma yadin sir a rlengan rof baluan a ne. Nempa rose mangkaryayar a ne feleles farlan ma rose ber tbwarnir ma rma baluan a ne. 37Mpa famudi e lete nruany a ne nluan anaky ma nti nakmat sir, fali ndaun feti keta ralang i. 38Nempa noak ma tomwatar ma rajake lete ne rsalan lete nruany anaky ma nma e rafalak ber sir, “Kanak ye lo ma keta nonri monuk lete ye. Mpa mya ma tfen i, nema tonri monuk ni lete ye.” 39Mpe romat i ma rakei i far kakyelap betno rfen i.

40Ne Yesus nenrat sir, “Noak ma lete nruany a ne nbali i e keta nose farpe tomwatar ma rajake ni lete ne?”

41Ne sir rfalak, “Botuan feti keta nma e nfen tomwat yatkar a ne. Ma keta nal ni lete ne ber tomwat walyetar ma rajake. Tomwatar a ne ma keta ral ni wayat noak ma rtikar anggur buany.”

42Yesus nfalak ber sir, “Botuan feti kmi mbyaca ayat ye na Kitap Lelerap dalam lo nre feti,

‘Bati ma tuknar a ryebas i,

lere ye neluk baty fakoran lo.’

Safe-safe monuk a ne diat nlarat Ratu ninr Mangnrure Ni mpempeang,

Ma safe ma tsalan a ne nangafel desar.”#Mzm. 118:22-23

43Yesus nfalak a nbal, “Mpa mdyengar ma kfwalak, luryain e Ratu nfil a nkese kmi ma myeluk Ni tomwatar nempa lere ye to nfil a kmi ma myeluk Ni tomwatar lo, nempa nfil nus walyetar ma reluk Ni tomwatar. Sir a ne ma keta rose rlarat Ratu Ni faretar.” 44[Tomwatar ma to rlangun Yakw keta suse desar ber sir farlan ma rfufw a na bati, nre farlan bati ntait sir mpa keta rapris farlan ompak ma knryai.]

45Noak ma mangsomp ulnir ma tomwat Farisyar rdengar tnyanuk pupular ma Yesus nfalak a ne, sir rafai desar feti Yesus natanuk e snyain sir. 46Iane nwayat ma rareke ma romat I. Nempa sir ramtaut tomwat ngayadin a ne fali tomwatar rdaun feti Yesus ye nabi I.

Currently Selected:

Matius 21: YMD

Highlight

Copy