Matius 20

Tnyanuk pupule na tomwatar ma rkarya na let anggur

20:1-16

1Yesus nfalak, “Noak ma Ratu neluk Rai ma nfarete tomwatar, iane farlan tnyanuk pupule na tomwate ma ni let anggur. Na ler sa noak ma lolone bobolisin e tomwate ma ni let anggur a ne nti nanriak tomwatar ma rkarya na ni let anggur. 2Ne lete nruany a ne ntungan tomwatar ketnir ma natanuk nor sir na nir karyae kotaky. Ma raktem a ryoding feti nir karyae lere lese ronri sewe dinar lese. Ne nluan sir ma rti rkarya na ni let anggur a ne. 3Ma bobolisin fafa jam sembilan e, i nti pasar ma nsalan tomwatar ketnir ma to nir karya. 4Mpa nfalak ber sir, ‘Mtyi ma mkyarya na ningw let anggur, ma keta kbwayar a kmi klwarat sewe ma biase tomwatar ronri.’ Mpe rti ma rkarya na let anggur a ne nbal. 5Ma na ler fardu langit e i nti nanriak tomwatar ma rkarya na ni let anggur a nbal. Ma ni lere da e i nose farane nbal. 6Noak ma lere ketla nfufw e i nti a nbal ma nanriak tomwatar. Ne i nsalan tomwatar ketnir ma to nir karya sasaf, mpa nfalak ber sir, ‘Ali to mkyarya e mampe mimtoran motak terik makrokap ye e?’ 7Ne sir rfalak, ‘Au, to kekes ma ral karyae ber kam.’ Ne nfalak ber sir, ‘Farane e mtyi mkyarya na ningw let anggur lo.’ 8Ni nronram e, lete nruany a ne nfalak ber tomwate ma najake ni lete ne, ‘Mtwar mangkaryayar a ne ma mwal sewe ber sir. Ka mwal sewe baluan ber ma rkarya famudi, betno mwal ber ma rkarya rbalun a ne.’#Im. 19:13; Ul. 24:15 9Ne sir ma rkarya na lere ma ketla nfufw a ne rma ma ral nir sewe. Ne leles mpane e ronri dinar lese. 10Mpene sir ma rkarya rof bobolisin a ne rma ma ral nir sewe nbal. Sir rafliak feti keta ronri nir sewe silai nof ma rkarya famudi ne. Nempa leles mpane ronri dinar lese. 11Noak ma ronri nir sewe ne, nroke nraki sir ber lete nruany a ne. 12Ma rfalak, ‘Sir ma rfamudy a ne rkarya lan jam lese. Ma kam ye mkarya mof bobolisin terik lere da ma lere ntun kam. Ma safema ko mbwayar sir e feleles nor kam?’ 13Nempa lete nruany a ne nfalak ber mangkarya sa nof sir a ne farye, ‘Awa, yakw to kfwule kmi, fali tfat ma lese lo feti sewe lere lese e dinar lese ma iane ma kal ber a kmi. 14Mpa mwal nim sewe ye ma mbwali ko. Ma ktwetak lo feti keta kal sewe ber tomwatar ma rma famudi ne feleles farlan sewe ma kal ber a kmi. 15Iane ningw doit mpa nof lan yakw lo. Nre kete ko dalam maninik feti yakw kfwatutu ningw dalangw ngamone ber sir ma rma famudi ne?’”

16Mpe Yesus nfalak a nbal, “Iane feleles farlan na ler famudi nbal. Tomwatar ma lere ye reluk tomwat silayar, keta famudi e reluk tomwatar ma to ubnir sasaf. Ma tomwatar ma lere ye to ubnir sasaf, keta famudi e reluk tomwat silayar.”#Mat. 19:30; Mrk. 10:31; Luk. 13:30

Yesus natanuk fen lain tel na Ni mamate

20:17-19

(Mrk. 10:32-34; Luk. 18:31-34)

17Na ler sa e Yesus nor Ni manglarat buti resin du rti kote Yerusalem. Na dalamtene let e I ntar a nkese sir ma nfalak, 18“Mdyengar ma kfwalak, lere ye kit ti kote Yerusalem ye lo. Na iano keta tomwatar ranrenre Yakw, Tomwate Anaky ber mangsomp ulnir ma mangaftutu Musa ni faretar, ma keta ral tetetak mamate ber Yakw. 19Ma keta ranrenre Yakw ber tomwatar ma to Yahudi sir, nema rkosy a rmalip Yakw, raus a rbabal Yakw ma rsangwalu Yakw. Nempa ni lerar tel e kmworip a kbwali.”

Ise ma nafufu i keta silai i a na Ratu sounlury

20:20-28

(Mrk. 10:35-45)

20Mpene Zebedeus sawany nor angkir rma ma rakmat Yesus. I nsatngur a na Yesus sounlury, ma ntak kabar sa nof I. 21Ne Yesus nfalak, “Ano, ali safe ye?” Ne bate ne nfalak, “Maken, noak ma Ko mweluk Rai ma mfwarete e ka mwinrang ma angkur du ye ror Ko. Sa namin serim fian ma sa namin serim bayal.” 22Nempa Yesus nfalak, “Kmi to mifai safe ma kmi mtyak a ne. Kmi bomir myal ma mibare suse farlan ma Yakw kubare e?” Ne sir rfalak, “Au, kam bomyamar mal.” 23Ne Yesus nfalak ber sir, “Botuan feti keta kmi mibare suse farlan ma kubare, nempa Yakw to Ningw kuase ma ktwetak feti ise ma keta namtoran seringw fian nre seringw bayal. Iane lan Amangw ma Ni kuase ma ntetak feti mpear ma ramtoran ain ma nau ber sir a ne.” 24Noak ma manglarat walyete buti rdengar farane, sir rarese tomwatar du ma awayar sir a ne. 25Mpa Yesus ntar Ni manglartar monuk ma nfalak, “Kmi mifai feti mangfaret saryamprenar ma to ralele Ratu ne, sir rfarete nir nuse ma rtean sir. Ma mangonbain silayar a ne rfarete nir nuse rlarat nir suke. 26Nempa kmi e kete myose mbyalak sir. Nof a kmi e ise ma nmpeang ma silai i, ka neluk mangkaryae ber a kmi. 27Ma farlan nof a kmi ye ise nmpeang ma silai i, ka neluk mangkaryae ber a kmi.#Mat. 23:11; Mrk. 9:35; Luk. 22:25-26 28Iane feleles farlan Yakw, Tomwate Anaky. Yakw kmwa saryamprene to feti ma tomwatar rlangun Yakw, nempa kmwa ma klwangun tomwatar. Ma Yakw kmwa ma kunrenre Yakw nbal ma kmwat la ktwebus tomwatar monuk rof nir salar.”

Yesus nafngamone matbolar du

20:29-34

(Mrk. 10:46-52; Luk. 18:35-43)

29Noak ma Yesus nor Ni manglartar rti a rtate kote Yerikho, tomwat ngayadin rlarat sir. 30Na iane matbolar du ramtoran dalamtene seriny. Noak ma rdengar feti Yesus nlanre nof a ne, sir rafwayak, “Yesus, Daud empuny! Mlwompang kam!” 31Tomwat ngayadin ma ramin iane rarese sir ma rtampu sir nema rnau. Nempa sir rtafal ma rafwayak a nbal, “Maken, Daud empuny! Mlwompang kam!” 32Ne Yesus namdir a ntabu I ma nfalak, “Mpyeang ma Yakw kose safe ber a kmi?” 33Ne sir rfalak, “Maken, kam mpeang ma makeban.” 34Mpe Yesus nlompang sir mpa nomat matnir. Nof a ne nbal radu a rakeban desar, ne rmpan a rlarat I.

Currently Selected:

Matius 20: YMD

Highlight

Copy