Marcos 5
5
Enenlhet akmaikama keliaqhameio' iokhalhma Gerasa
1Jesús kakpota nhan apkeltamesaikamok apkeliekai'o lhnak alvata Galilea, apkelvekho lhnak halep akieto natemma akvesai'a Gerasa. 2Ka apteiapmo lhnak Jesús loma nemmen ma'a, apteteskai'o lhnak na lhema enenlhet apkeniemai'o m'a aiseksek nemakha aknengkanveianlha enghapak. Akmaikama lhnak kasekapok av'alhok akpaiseiam ma'a. 3Aplomakha apankek nak ma'a, mamma nkek nak nkopathetek nkaqhok na knonemaie cadena. 4Metka nnelha lhna niekhe nema aknaktetema apmankok kakpota nhan apmeiok, koka apkelietepkeskangkek na mota knonemaie cadena, mamma nkek nak ngkomangkok ma'a. 5Apiaihekama lhnak aknem, pelhasep, akieto akhaiam lhepop aiseksek nemakha aknengkanveianlha enghapak. Apvenekama lhna mota m'a, aptekpommakpek na mota apankek metaimong akiaqiema. 6Apvetai'ak nak mokhe enenlhet anak Jesús, ka apketameiangko lhnak ma'a, apkelteklhekvai'o lhnak aptapno'ok nalhepop napaqtek ma'a, 7lhna aptemak apkelpalhemaiangka m'a:
—¡Jesús, Eniapom Neten Apketka apto apnema netne kanke nak, manghelanaktes, manghetneskes aslengaiangko akientalhnema. Askenmalhnakkek lheiap akieplomo apvesai'a Eniapom Neten! 8Lhna ntemak kasekapok av'alhok akpaiseiam ngkanek Jesús apkelpalhengkaseiangka m'a, lhna aptemak:
—¡Koieniekha ham enenlhet anak kasekapok av'alhok akpaiseiam! —lhna aptemak.
9Koka lhna aptemak mokhom apkelmalhneiangka Jesús:
—¿Ko la akvesai'a lheia'?
—Ko'o asvesai'a kempokhakme, nenlhanie panke ennengko'o —lhna ntemak.
10Ngkaiosekama lhnak mangkoltemo etepkesek eniapaksek mo'ok iokhalhma m'a. 11Nengaqtek nak na metaimong akhaiam apkellomakha lhnak apentalhnema ietapomap aptoiangko aptekamok ma'a, 12lhna ntemak allanemo Jesús ma'a:
—Hengellapes koka angelentalhnengvomok ietapomap anak ha'e —lhna ntaiangkok ma'a.
13Apkasekhai'avek nak Jesús ma'a, nkelenteiapmek nak kasekapok av'alhok alpaiseiam ma'a, alentalhnengvaiakmo lhnak ietapomap apvalho'ok. Malha lhnak 2 mil ietapomap ma'a, ka apkeniaiangko lhnak apkelvaivantamo akieto sanga akiavai'a, apkelvaiveiangko nhan, apkeletsepmo lhnak na m'a. 14Netamen nak ma'a, apkellelto apkellanekama ietapomap apkeletkekho lhnak natemma kakpota nhan natemma apketko'ok, apkeletkaseikokho lhnak ania'a m'a. Ka apkenmeiekho lhnak enenlhet kakpota elvetangvakhak aktemakha akvetammalhka m'a. 15Neksa apkelvekha lhnak ma'a apnakha Jesús, apkelvetai'o nhan aptaqmalveiam aknaikamok lhek apvalhok kasekapo' av'alho'ok kempokhakme aklhamakma. Aptalhnekhek nak aptalhnema m'a, apnekhek nak na apankek ma'a, aptaqmelkasemmakpek nak na m'a. Apkellai'ak nak apkelvetai'o enenlhet. 16Netamen apkeleltennaseiangka lhnak mokhom ania'a m'a aktemakha apkelvetai'a aptaqmalveiam enenlhet akmaikama kasekapok av'alho'ok alpaiseiam kanhan ietapomap. 17Netamen enenlhet'avok apkellapioseiangka lhnak apkelapaseiangka Jesús emhangkok mo'ok iokhalhma.
18Ka apkanetvekho lhnak Jesús loma nemmen ma'a, koka akmaikama lhnak kasekapok av'alhok apmahai'avek nak eieplakha niekhek ma'a. 19Koka Jesús lhna aptemak apkanemo:
—Have', etaqhekha apnemakha lheiap, eleltennasamo ta apnemolhema kakpota nhan enenlhet lhamakho aktemakha apasmoma Apveske —lhna aptemak.
20Ka apmeiekho lhnak ma'a, apsavhomavek nak lhamakho iokhalhma Decapolis#5:20 Lhema iokhalhma akiavai'a, nnaiangkek nak konne 10 temma m'a., apkeleltennaseiangka ania'a aktakha apasmoma Jesús. Alpelapkeskamo lhnak apkellengai'a lhamakho enenlhet'avok ma'a.
Jairo apketka ngkelvana kakpota nhan ngkelvana akmangveiam Jesús apkaqlammap
21Apvekho lhnak mokhom Jesús loma nemmen apkanantema mo'ok nekha alvata, apteiapvekho lhnak nekha nkek iemmen, ngkanek aplhaniek nak enenlhet apketlheiam ma'a. 22Ka apvai'o lhnak na lhema apkemhama apmanie nemaknekhelha judios apvesai'a Jairo apnakha Jesús ma'a, apkelpalengvai'o lhnak apkenmangkelha, lhna aptemak:
23—Eietno neha'at, mmak'ak lhek ngkotsepok eietka. ¡Nok, enengken hata apmeiok takhalhet kakpota mangkotsepe, ngkoloka ta mokhom! —lhna aptemak Jairo.
24Ka apieplekho lhnak Jesús ma'a, apkelieplekhek nak na enenlhet'avok, nnengkek nak akiaqhapeiangko Jesús ma'a. 25Nlomaka lhnak na m'a lhema ngkelvana akiavai'a akteiapma ema ankok apieseksek enenlhet'avok, 12 iantelhkapa lhna ntemak aklengaiangko m'a. 26Avanhek na ntemak alhakhama patakkom akteniai'a aktaqmalveiam aniekhe m'a. Apkellanei'avek na niekhe apkellanai'a po'ok, koka mang nak ngkotaqmalveiakmok ma'a. Apkeliangveskaiakmek nak akmaska aiempek ma'a, nsavhomakiek nak alhakhama anko'ok altemo nkotaqmelekha niekhe. 27-28Nlengai'ak nak aplhenammap Jesús ma'a, nlheianmek nak av'alhok:
—Vanlha amangvomok apkaqlammap anak Jesús, ataqmelekhak hata —lhna ntemak aklhenaikama av'alhok ma'a.
Ka akvetai'o lhnak Jesús ma'a, aliaiesaiangko lhnak apieseksek enenlhet'avok, akteteskaiakmo lhnak akieto apkapok, ka akmangveiakmo lhnak apkaqlammap ma'a. 29Kolhvavek nak mmaskemak akteiapma akiavai'a ema ankok ma'a, nengaiangkek nak aiempek aktaqmalveiakmo m'a. 30Kolhvavek nak aplengaiangko Jesús akteiapmo apmopvana, ka apengkammakpo lhnak ma'a, apkellan'o enenlhet'avok, lhna aptemak apkellanemo:
—¿Se lha akmangvo'o askaqlammalhka nak ke? —lhna aptemak ma'a.
31—Selhaha, apentelhek enenlhet anak hengke'e —lhna aptaiangkok apkeltamesaikamok ma'a.
32Ka apkellanei'o lhnak mokhom Jesús napokhav'ak enenlhet'avok apkelanvai'a m'a, kakpota eihok akto akmangveiam. 33Nkelpelhiennongkek noka ai'a ngkelvana lhnak ma'a, nkai'avek nak aktemakha akvetai'a m'a. Ka akteteskaiakmo lhnak, nkeltanentaniek nak atapno'ok nalhepop apkenmangkelha Jesús, ka altennaskamo lhnak iokhalhmek ma'a aktemakha akvetai'a m'a.
34Netamen lhna aptemak apkanemo Jesús:
—Eietka, ntaqmelakhek lheia aniem'o mangkoiaskeiam. ¡Kotaqhekha metka aktaikama av'alhok, mmaskek akmaska aiempek lheia! —lhna aptemak Jesús.
35Neksa apaqmetkeskama lhnak ngkelvana Jesús, apkelvai'o lhnak enenlhet apkelleniem'o Jairo apnemakha, lhna aptaiangkok:
—¡Jairo, ngkaqhok emhangkok hengetlhekmoskama m'a, nketsepkek lhek apketka! —lhna aptaiangkok ma'a.
36Aplengai'avek nak Jesús ma'a, lhnak aptemak apkanemo Jairo:
—¡Meniaga', mei'askem koka! —lhna aptemak.
37Ka apmahai'o lhnak eniakha Jesús Jairo apnemakha, vanlha lhnak apkeltemo apketlhelhma'ak Pedro, Jacobo kanhan Juan, Jacobo apialheng. Mang nak eltemok elieplakhak aplhamakho enenlhet. 38Neksa apkelvekha lhnak Jairo apnemakha m'a, niapqalhemmalhkek nak ngkeskama nkek ma'a. 39Ka aptalhnemo lhnak Jesús av'alhok pa'at, lhna aptemak apkellanemo:
—¿Se lha ntak apkeliapqalho nak ke? Mangkotsepak ngkelvana atkok anak, ntenke' —lhna aptemak Jesús.
40Apvannammakpek noka Jesús ma'a, ka apkeltemo lhnak elentepok lhamakho enenlhet ma'a, vanlha lhnak apkeltemo nkakhangkokha ngkana'ak ngkelvana atkok anak kakpota nhan apketlhelhma'ak. Ka apkelteteskaiakmo lhnak akietnakha ngkelvana atkok, 41apmamo lhnak na amek Jesús, lhna aptemak apkanemo:
—¡Talita, kum! —lhna aptemak.
Nemaltema koka ¡lheia ngkelvana tkok, kotnemekha neten! 42Kolhvave kankek nak nnekhak neten ma'a ngkelvana tkok, ka aklhengamo lhnak na m'a. 12 lhnak ngvaiakmok iantelhkapa nkok ma'a, avanhek nak aliemaskama apvalho'ok enenlhet'avok ma'a. 43Koka mang nak eltemo Jesús elpaiaksek ania'a, apkeltemo nhan ngkolhek angko aktoma ngkelvana atkok ma'a.
Currently Selected:
Marcos 5: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
