Marcos 6

Apvekha Jesús natemma Nazaret

1Apteiapmek nak mokhom Jesús ma'a, apmeiekho lhnak apvanekanlha, apketlhelhma'ak nak na apkeltamesaikamok ma'a. 2Aknem sabado nennekhelha lhna ntemak ma'a, ka apketlhekmoskamo lhnak Jesús apkaqnekhelha judios ma'a. Mang na ntek enenlhet'avok apkellailhemo m'a, mpelapkeskankek nak apkellengai'a aktemakha apketlhekmoskama, lhna aptaiangkok:

—¿Ko le lha aniem'akha lhamakho aktemakha hengetlhekmoskama nak, he? ¿Ko la ampai'akha apiangveiakmo nak ha'e? ¿Se lha nhan aikamok apmopvana elanak qaselha hempelapkeskama nak? 3¡Ieee! Neliavek ennengko'o ha'e, asota apkellanai'a. María atka m'a, ka apkelialheng'a m'a Santiago, José, Judas kakpota nhan Simon, nkellomaka nhan apkelialheng'a hengke'e nellokha nak —lhna aptaiangkok enenlhet'avok.

Mang na songkek enmaiangkok takha Jesús ma'a, 4ka aptemo lhnak Jesús apkellanemo m'a:

—Lhema apkeltennasemmap ania'a la'a ngkolhek ak'o lhamakho iokhalhma, koka mangkolhek ak'o akieto la apvanekanlha kakpota nhan apaivoma lhema la'a —lhna aptemak.

5Mang nak elanai'ak qaselha hempelapkeskama m'a, vanlha lhnak apnengkanmo apmeiok takhaplhet'ok moklhem'a anmaska apiempeiok la'a, ka apkeltaqmelkeskaiakmo lhnak na m'a. 6Niemaskangkek nak apvalhok Jesús, lhna songkek apkeliaskeiakmo enenlhet ma'a. Nkatepelha' natemma lhnak aplomaka mota Jesús ma'a apketlhekmoskamo enenlhet'avok ma'a.

Apkelapaskama Jesús apkeltamesaikamok eleltennaksek ania'a aktaqmanma

7Ka apkellaveiangka lhnak Jesús 12 apkeliekieskama sekhek nak ma'a apkeltamesaikamok, apkellapaskamo lhnak na mok apqanet. Apkellaiangko lhnak na apkenmopvanka'a kakpota eltemeskasenta koneng kasekapok av'alho'ok alpaiseiam. 8-9Lhna aptemak na apkellanemo apaivoma apkellaskama m'a:

—Melletsav ankek aptekamok apketlhengo ta, patakkom, po'ok apkelentalhnema. Vanlha toka elletso'ok apnakteto apmanko'ok, kakpota nhan iamet apkelteiasekamok anak apmaniaie'. 10Hata apkelentalhno ta lhema pa'at, eniakhengvom hata m'a akvakmo apkelentepakho ta m'a natemma nak. 11Mang hata nkek enmakpok takha m'a, kakpota nhan mankonmak'o la ellailhok apketlhekmosekamok, elpalesemma ta lhepop aktek apmanko'ok napaqtavek ma'a apkelvetaskeskama nkovak hata akiaqmoienta m'a —lhna aptemak Jesús apkeleltennaskamo apkeltamesaikamok.

12Ka apketlhengamo lhnak ma'a, apkeleltennaseiangka lhnak enenlhet'avok apkeleltemo eliaqmongkasekhak mo'ok apvalho'ok ma'a. 13Kanhan apkelentepkaseiangko lhnak lhamakho aktemakha kasekapok av'alho'ok, apkeleltelhnaskesaiangko lhnak na aceite ankok anmaska apiempeiok ma'a, ka apkeltaqmalveiakmo nhan ma'a.

Apmatnama Juan apkellavkeskama iemmen na niapom

14Netamen aplengai'o lhnak na apiav'akha apveske Herodes ania'a aplhenammap Jesús ma'a, lhamakho aktemakha qaselha hempelapkeskama apkellanai'a m'a. Moklhem'a enenlhet nak aptaiangkok apkelpaqmeiasma:

—Juan annenga apkellavkeskama iemmen na aniapom ma'a, aplhatekhangveiakmek apieseksek apkenmaskengvaiakmo m'a ka ngkanek ngkolhek apmopvana m'a —lhna aptaiangkok.

15Koka po'ok enenlhet lhna aptemak:

—Have Juan ma'a, Elias apkeltennasemmap ania'a annenga m'a —lhna aptemak.

—Have Elias ma'a, po'ok apkeltennasemmap ania'a kelhaha —lhna aptemak na po'ok enenlhet.

16Koka lhna aptemak Herodes:

—Juan annenga m'a, ka skeltemo lhta ngkolhek akiaqtemeno apiaspok, koka aplhatekhangvakmek mokhom ma'a apieseksek apkenmaskengvaiakmo m'a —lhna aptemak.

17Neksa aptema apkemhama apmanie lhnoka Herodes ma'a, apmekho lhnak Herodias, apialheng Felipe lhnak aptava m'a. 18Ka apkelpalhengkaseiangka lhnak Juan ma'a, lhna aptemak:

—¡Mankoltemak ley emekhak aptava la apialheng! —lhna aptemak apkanemo m'a.

19Ka aklomo lhnak ma'a Herodias, mmahai'avek nak ngkaqhek Juan koka mang nak ngkomovanak ma'a 20ngkanek apkai'avek na mota Herodes Juan. Aptaqmelkeskangkek nak ma'a, apiamavek nak na apto enenlhet apeivomo, melanai'a nhan ngkolatsekama, akpelapkeskamo mota nhan aplengai'a apketlhekmoskama m'a.

21Lhema aknem na ntemak ma'a, Herodes apkelanei'o akiavai'a aktaqmelaikama lhma' aknem apteiaianlha'. Apkellanemo lhnak elpasengvak apkelveskaie, soldados, kakpota nhan enenlhet nema apkelletsekama apkelleniem'o iokhalhma Galilea. Ka aklheianmo lhnak av'alhok Herodias, lhna ntemak:

—Nietave kanke nak altok ematong Juan —lhna ntema av'alhok ma'a.

22-23Neksa aptaveikokha lhnak ma'a, aktalhnengvai'o Herodias atka, ka alankai'o lhnak napaqtavek enenlhet'avok ma'a. Nkelleklemavek ankek nak apvalho'ok, lhna aptemak apkanemo Herodes ngkelvana atkok anak:

—Henmalhnama no akteniakha la'a, angvangkok hatelha akvakmo nekha atkok qaselha ehenkok akieto astemakha nak apveske, have niapak —lhna aptemak Herodes.

24Kolhvavek ankek nak nteiapmak ngkelvana tkok, akmeiekho aknakha ngken, lhna ntemak:

—Me, ¿se lha qaselha anmalhnama Herodes ke, he? —lhna ntemak anemo ngken ma'a.

—Koniakha, konmalhnama ta apqatek Juan apkellavkeskama iemmen aniapom —lhna ntema ngken ma'a.

25Kolhvavek ankek nak mmeiekhak apnakha apiav'akha apveske, lhna ntemak ma'a:

—Hengkes kolhvave nak apqatek Juan apkellavkeskama iemmen aniapom akieplomo aphak —lhna ntemak.

26Aiosek ankek na ntemak apvalhok Herodes aplengai'o akpaivoma ngkelvana tkok anak. Koka apeneskangkek nak apaivoma, mang nak nkomahai'ak eliennengkesek napaqtavek enenlhet'avok ma'a. 27-28Ka apkapaskamo lhnak lhema soldado akieto nengaqlhengkasemmalhkelha kakpota eiaqtemangvakhak apiaspok Juan, kakpota epekkenek na lhema aphak, apkangkongvekho lhnak na ngkelvana tkok. Netamen angkongvekho lhnak na ngken ma'a. 29Koka apkellengai'ak nak na ania'a Juan apkeltamesaikamok ma'a, ka apkenmeiekho lhnak elvakhak Juan aphapak, apkellaqlhenkeskekho nhan nemakha akpekkanveianlha enghapak.

Jesús apkellaikamok aptekamok apentalhnema enenlhet'avok

30Netamen ma'a apkelvektamo lhnak mokhom apkelapaskamo apnakha Jesús ma'a, apkeleltennaseiangka lhnak lhamakho aktemakha qaselha apkellanai'a. 31Mang na ntek enenlhet apkelketansema Jesús m'a, mamma lhnak apkeliamposammakpelha la m'a. Apkenmahai'ak nak niekhe eltavokhak ma'a, lhna ngkanek aptemo lhnak Jesús ma'a:

—Nok akieto metkelha temma kakpota angeliamposalhkak ma'a —lhna aptemak.

32Apkenmeiekhek nak ma'a metkelha temma, apkelkanantemo lhnak lhema loma nemmen akiavai'a m'a. 33Koka apkeliamavek nak enenlhet'avok apmak'akha emhangkok Jesús, ka apkenmeiekho lhnak apkeletkekho apmeiakhelha, apmaniaie lhnak apkelvekhak ma'a. 34Ka apteiapveiakmo lhnak Jesús loma nemmen, apvet'o lhnak apentalhnema enenlhet, apkelietnai'avek nak napaqta'a lhna songkek enenlhet malha nepkesek metka allanekama. Ka apketlhekmoskamo lhnak lhamakho aktemakha qaselha aktaqmanma. 35Ienaqteskangkek nak ma'a, lhna aptaiangkok apkeltamesaikamok:

—Jesús, ienaqteske', mamma temma ngke'e. 36Eltennasamok enenlhet anak enmeiakha ta m'a, elteniangkok aptekamok nkatepelha la natemma kakpota nhan natemma apketko'ok la'a —lhna aptaiangkok ma'a.

37—Mma', ellamok aptekamok ketlhengkap —lhna aptemak Jesús ma'a.

—Have', mangapvankek angenmangkok pan, apentelhek enenlhet anak, ngkeskama patakkom nkaimelhka, malha 200 denario la'a#6:37 Aknemo koka m'a akianmoma lhema anio la nemmakmekama akvesai'a nak ma'a 200 denarios. —lhna aptaiangkok apkeltamesaikamok ma'a.

38Lhna aptemak mokhom Jesús apkellanemo:

—¿Se lha pan apnangkok ketlhengkap ke, he?

—Vanlha 5 pan kakpota nhan hanet kelasma —lhna aptaiangkok ma'a.

39Ka apkelapaskamo lhnak apkeltamesaikamok ellaneskesek apkakhaikamok enenlhet takhalhet pa'at alielsellemo m'a, 40akvakmo apasmekha apkakhaikamok 50 kakpota nha 100. Ntemengkek nak ma'a. 41Netamen apkenmamo lhnak Jesús 5 pan kakpota nhan hanet kelasma, apkammelhmo lhnak neten, aptemo lhnak na gracias Eniapom Neten ma'a. Netamen apkeliaptemo lhnak pan Jesús kakpota nhan kelasma, apkellaiangko lhnak apkeltamesaikamok kakpota ennaskangkok ma'a. 42Aptoiangkek nak ma'a akvakmo apkeliaqkanakmo. 43Ka apkeliakhekho lhnak 12 iama posak apkelaimommap pan kanhan kelasma, 445.000 nak apkelennava'ak aptoiangkok aptekamok ma'a.

Jesús aplhengama takhalhet iemmen alvata

45Netamen apkeltemo lhnak Jesús elkanetvakha apkeltamesaikamok loma nemmen akiavai'a kakpota eliekak ma'a alvata, elvakhok na natemma Betsaida. Apnekhek noka Jesús ma'a nekha alvata kakpota elpaivesangkok enenlhet'avok ma'a. 46Netamen nak ma'a apmeiekho lhnak Jesús neten metaimong akhaiam kakpota enmalhnak ma'a. 47Pelhasep nak aptemak ma'a, akvaiakmo lhnak aiseksek anke alvata loma nemmen apkelkanantema apkeltamesaikamok, koka Jesús aplomaka lhnak mokhom akieto m'a metaimong akhaiam. 48Apvetai'ak nak Jesús akientalhnema apkeliaqhapekamok loma nemmen ma'a, alhkaiam akiennaktema lhna songkek ma'a. Mmopeiakmek nalhma atsai'a m'a, apmeiekho lhnak Jesús aplhengamo takhalhet iemmen. Ketsek nak apiekai'ak apketlhengakha apkeltamesaikamok ma'a, 49ka apkelvetai'o lhnak nema aklheiam takhalhet iemmen ma'a, atlheianmo lhnak apvalho'ok enghangok ma'a. Ka alpaiheiangka lhnak apatno'ok ma'a 50aniem'o apkellai'a aktakha apkelvetai'a. Koka kolhvave kankek nak aptemak Jesús apkellanemo m'a:

—¡Moltama apvalho'ok, manghellaga', ko'o hengke'e! —lhna aptemak ma'a.

51Ka apkanantemo lhnak Jesús loma nemmen, mmaskenkek nak na alhkaiam ma'a. Avanhek ankek na ntemak alpelapkeskama apkelvetai'a apkeltamesaikamok ma'a. 52Mang nak eliangveiakmok mokhom, apkelvetai'ak na niekhe' aplhamasekho pan, mokhom noka aliennaktema apvalho'ok ma'a.

Apkeltaqmelkeskaiam Jesús anmaska apiempeiok akieto Genesaret

53Ka apkelvaiakmo lhnak na temma Genesaret, apnaktetemo lhnak na loma nemmen nekha alvata m'a. 54Ka apkelenteiapmo lhnak konne loma nemmen ma'a, kolhvavek ankek nak apkeliekpelkemak enenlhet'avok ma'a. 55Apkeletkaikokho lhnak moklhem'a iokhalhma m'a kakpota ellaqlosengvakhak anmaska apiempeiok ma'a. Netamen apkelletsekho lhnak ieplomo nema altankeskama apvaianlha la Jesús ma'a. 56Lhamakho natemma, apiav'akha temma, aknakha nhan aniep aptalhnengvaianlha la Jesús, apnengkenaiangko lhnak anmaska apiempeiok nekha amai, apkeleltemo lhnak enmangvomok ketsek ankek nepva'a la apkaqlammap. Lhnak apto la apmangveiam ma'a, aptaqmelekhek na mota m'a.

Currently Selected:

Marcos 6: TMF

Highlight

Copy