Marcos 4
4
Apietkeskama Jesús aniep aniapom
1Apketlhekmoskamo lhnak mokhom Jesús akieto nekha alvata, ka apkelvai'o lhnak enenlhet'avok ma'a apkeleltemo ellailhok ania'a aktaqmanma. Lhna ngkanek enianantek Jesús loma nemmen akiavai'a. Ka apnaiakmo lhnak ma'a, koka nekha iemmen noka apkelanvai'ak enenlhet'avok ma'a. 2Ka apketlhekmoskamo lhnak ma'a ngkeskama qaselha apietkeskama:
3—¡Eltaqmelkaso no apkellailhemo! Apkelhaikama lhnak aktek lhema enenlhet apkanmo m'a. 4Moklhem'a aktek nak mpalveiakmok takhalhet amai, ka alvai'o lhnak anata tko'ok, aktoiangko nhan ma'a. 5Mo'ok aktek noka mpalveiakmok alhievak'akha lhepop takhalhet metaimong. Kolhvave kankek nak ntekteiapma niekhe m'a ngkanek aselhtek nak lhepop aktek mang nak na nkaptonnek ma'a. 6Netamen akteiapmo lhnak aknem, aliemai'o m'a, aletsepmo nhan apkanmalhkek ma'a, ngkanek mamma aikapmen'ok. 7Mo'ok aktek nak na mpalveiakmok takhalhet menevke aktek aknaikamok konne lhepop, ka aktengamo lhnak lheme menevke m'a. Nkelapekhek nak anammalhka, lhna songkek mankoilhek ma'a. 8Koka mo'ok aktek noka mpalveiakmok aktaqmelakha lhepop, ntasek ankek nak aktekteiapma m'a, lhema apvathetma apaktek na ngvaiakmok 30 apaktek, po'ok nak na 60 apaktek, kakpota nhan 100 apaktek ma'a.
9¡Eltaqmelkaso no apkellailhemo apaiko'ok anak! —lhna aptemak apkellanemo Jesús ma'a.
10Ka apkeltaqhekho lhnak enenlhet'avok ma'a, moklhem'a lhnoka apkelaimommakpok ma'a kakpota nhan apkeltamesaikamok. Ka apkelelmalhneiangka lhnak apkeleltemo elpeiveskasekhak aktemakha apietkeskama m'a, ngkanek mang nak eliamok ma'a. 11Ka apkellatemmoiangka lhnak Jesús, lhna aptemak:
—Nnek allangko eliangvomhok ketlhengkap qaselha akielhammalhka aktemakha aptema Apveske Eniapom Neten. Koka enenlhet'avok anak melpalhakvaiam nnek akmangka nema akietkeskama. 12Kakpota ellanho niekhe koka malha melvet'o ntahak ma'a, apkellailhave niekhe, koka malha melleng'o ntahak kakpota melpengkamek apvalho'ok akieto apnakha Apveske, mangkolhek na altemeskesangkankek apkellanekamok la ngkollatsekama m'a.#4:12 Isaias 6:9-10
Apkelpeiveskasekha Jesús aptemakha apietkeskama enenlhet aniep aniapom
13Meliehe ketlhengkap astakha lhkek asietkeskama, meliehek kelha nhan lhamakho asietkeskama ta mokhom. 14Ka enenlhet lhek apkanma aktek apietkesammap apkeltennaikama ania'a aktaqmanma aniem'o Eniapom Neten. 15Moklhem'a enenlhet ngva'ak ma'a aknemo m'a aktek lhek akpalleiam amai. Apkellailhemo ania'a koka kolhvave kankek na ngva'ak Satanas ka akmenielhkaso ania'a lhkek apkellailhemo. 16-17Moklhem'a nhan enenlhet ngva'ak aknemo m'a aktek lhek akpalleiam alhievak'akha lhepop takhalhet metaimong. Apkellailhemo ania'a, nkelpaihakhek na apvalho'ok aniem'o ania'a nak, kolhvave kankek apkenmak takha ania'a, ka alpekhengka nhan apvalho'ok. Koka kolhvave kankek na ngva'ak akientalhnema apkakhaikamok aniem'o enenlhet. Ka apkelieniakho apkelieploma Eniapom Neten ngkanek mangkolvaiakmok konne aikapmen'ok. 18-19Moklhem'a enenlhet na ngva'ak aknemo m'a aktek lhek akpalleiam takhalhet menevke aktek aknaikamok konne lhepop. Apkellailhave niekhe ania'a aktaqmanma, koka vanlha nhan atlheianma mota apvalho'ok patakkom, kakpota nhan apkeleltemo ngkoitek ngkeskama qaselha apanko'ok. Ka ngkanek elvangkamangkok ania'a nak, mamma apkellanekamok qaselha altaqmanma. 20Kakpota nhan moklhem'a enenlhet ngva'ak aknemo m'a aktek lhek akpalleiam takhalhet aktaqmelakha lhepop. Apkellailhavek ania'a, apkenmek na takha, ngva'ak na aktema ngkeskama akielhna m'a, moklhem'a 30 akielhna, po'ok na 60, po'ok na 100 akielhna —lhna aptemak apkelpeiveskasakho apietkeskama Jesús.
Apietkeskama Jesús talha alhankok
21Lhna aptemak mokhom Jesús:
—Nengapommatkaskek hata nke talha alhankok, ¿envanke i'e ampekkenek koneng asota', nlho ka la koneng nenietnemakha la'a, he?
¡Mma'! Neten nelhanmak ma'a kakpota nkotsakse lhma, 22kakpota lhamakho qaselha aknaikamok anak ienaqtesakha lhma' ngkolvetalhka ta. Kakpota nhan lhamakho alposemmalhka nak qaselha, nkolhnangkongvatak hata alhnakhoho. 23¡Eltaqmelkaso no apkellailhemo apaiko'ok anak!
24Koka lhna aptemak mokhom Jesús apkellanemo:
—Eltaqmelkaso no apkellailhemo, apkellangkek hata nkek ketsek qaselha po'ok, netamen ngkolhek hata akneso nema akiaqmongkasekha ketsek qaselha m'a. Koka apkellangkek hata nkek akiavai'a qaselha apanko'ok po'ok. Netamen hata nhan ma'a ngkolhek akneso nema akiaqmongkasekha akiavai'a qaselha, tep ankek hata ngkotnek nema aikamok qaselha m'a. 25Akietno la qaselha lhema enenlhet, tep ankek hata ngkotnek aplhevekha. Koka metko la qaselha lhema enenlhet, ngkolhek hata aklekkasakho ketsek qaselha apankok la'a —lhna aptemak.
Apietkeskama Jesús akvanekamok aktek
26Lhna aptemak mokhom Jesús:
—Aktemakha aptema Apveske Eniapom Neten asietkeskama malha lhema enenlhet la apkanma aktek. 27Apteianvekho m'a pelhasep, netamen aplhatekhai'o aknem ankek, ngkeltekteiapmek koka ankek aktek apkanma. Netamen aktengamo nhan, koka enenlhet meihok aktengamo ankavek ma'a. 28Lhepop akto aktepkeskama nkek nenganma, amanie sekhe nkotiepok alhkapok, netamen alhvaseksek kakpota nhan mokhom akielhna m'a. 29Netamen ngvakmek hata nkek akmokhetmakha akielhna m'a, eliaqtemenek hata nhan akieplomo pelettav akhalhema apmaikama ngkanek ngvakmek aknem apnaklhemakha m'a —lhna aptemak Jesús ma'a.
Apietkeskama Jesús mostaza aktek
30Lhna aptemak mokhom Jesús:
—¿Ko la atnek asietkeskama aktemakha aptema Apveske nak Eniapom Neten, he? 31Aietkesek malha aktonak mostaza aktek anak, ketse kankek niekhe m'a, mangkolhnok mo'ok iamet la aktek. 32Ntektepkek ma'a, ngvanenie', nkeliekangvakhek aktemo lhemek iamet, ngkelpaihengvakmek na aktengok, kakpota nkolpaklhenek na anata tko'ok ma'a, kakpota nhan nkolielhanenvomok peskeska ankok —lhna aptemak Jesús.
33Nlhanie kankek nak aktemakha apietkeskama Jesús kakpota eliangvomhok enenlhet'avok. 34Vanlha lhnak aplheianmo mota apietkeskama napaqtavek ma'a. Lhnoka apkakhangko la lheme apkeltamesaikamok, elpeiveskasekhak nak akietemo nkek aktemakha apietkeskama m'a.
Apmaskeskama Jesús alhkaiam iemmen akiennaktema
35Pelhasep nak aptemak apnemakha Jesús av'alhok loma nemmen akiavai'a m'a, lhna aptemak apkellanemo apkeltamesaikamok:
—¡Nok, angeliekak sanga akiavai'a nak! —lhna aptemak.
36Ka aptemo lhnak akpaiveskekha' apkellanei'o enenlhet'avok Jesús ma'a, apketlhengamo lhnak ma'a. Napokha enenlhet nak na apkelkanantemak aklhamakha loma nemmen ma'a. 37Mpelapkeskankek nak akteiapmo alhkaiam iemmen akiennaktema nkek ma'a. Ntalhnengkek nak av'alhok loma nemmen iemmen alakhaiam, nkaikama lhnak aklanai'a av'alhok ma'a. 38Apteianmek noka Jesús konne loma nemmen takhalhet apteiammekamok ma'a akieto ataqla. Kolhvavek ankek nak apnaklhatekhaskekhak apkeltamesaikamok ma'a, lhna aptaiangkok:
—¡Hengetlhekmoskama, mamma apkelan'o lheiap, nemmak'ak angelvaivangkok! —lhna aptaiangkok ma'a.
39Netamen apkenmekho lhnak neten Jesús ma'a, apnaveskangkek nak alhkaiam iemmen kakpota nhan alvata, lhna aptemak:
—¡Kolvanmekha! ¡Vanlha kotnamok! —lhna aptemak ma'a.
Kolhvave kankek nak mmaskemak alhkaiam iemmen, nkelvenekhavek na lhma m'a. 40Netamen lhna aptemak apkellanemo apkeltamesaikamok:
—¿Sek la kto apkenmenangko nak ke, he? ¡Mokhom anak apkeliaskeiam ketlhengkap! —lhna aptemak.
41Apkenmenaiangkek nak apkeltamesaikamok Jesús, ka apkelpaqmeteiangka lhnak ma'a:
—¿Se lha enenlhet hengka ie, he? Ngvakhave nak alhkaiam iemmen, kakpota nhan alvata asekhai'o apaivoma —lhna aptaiangkok ma'a.
Currently Selected:
Marcos 4: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
