Maraka 6

Nansarɛtitɔnŋ kiri bili Yesu ra ki

(Matiyu 13.53–58; Luki 4.16–30)

1Yesu po-i niŋ mani nu, ntiŋ i ta a rakili kili ki ra sɛbɛ, ninwɔ̀ i Nansarɛti. Ntiŋ fa awɔ kalindaŋ kiri i ta arìmaŋ fan. 2Nufaan jibi ki sun, ntiŋ i de Yawutu kiri wɔ kalinfu ki ru, ntiŋ i konaŋ kiri kali-li.

Niŋ i bo ntiŋ wɔ wulu lamatɔnŋ kiri bataa tɔnŋ sun kusɛbɛ. Kí i tu arìmaŋ nanɔri-ra tu : « Wú po ka bi kari bataa wu da? Wú po ka ɲakilitinbi ka wu da? Ka botɔnsunbi kari bataa so-a ma-i wú gbɛ dɔɔkunŋ? 3Taa Mariyamu danshuru jirinŋ sɛritɔnŋ ki i ji-i kili wa? Wú tindaŋ kiri, Yakuba fa Yose fa Yude niŋ fa Simɔŋ i kì wa? Wú narinmari kiri yibɛɛ fan kwumaŋ kì wa? »

Ninki ɲakilila ki ncusun kí i so bili-i ntiŋ na kì.

4Nka Yesu tu kí tɛ : « Cintɔnŋ ki fyɛbi kila-a mani tɔri ru kì, duu a yɛri ki wɔ kili ki ra, niŋ fa a tindaŋ kiri kanfɛ. »

5Yesu botɔnsunbi tɔri ma niŋ mani kili kì, duu ntiŋ i a gbɛ bili kiratɔnŋ bɛɛ ri sun, nini i kene. 6Nansarɛtitɔnŋ kiri wɔ bilinabalibi ki i bo Yesu tɔnŋ sun kusɛbɛ.

Yesu wɔ kalindaŋ bwununfuuli ki cin bi ki

(Matiyu 10.5–15; Luki 9.1–6)

Niŋ kɔɔtɛ, Yesu i ta konaŋ kiri kali tonfan kili kiri ra. 7Yesu awɔ kalindaŋ bwununfuuli ki dɔri-i, ntiŋ i kí bo ta koŋ fulunfulunŋ i, ntiŋ i so wɔri kí tɛ, kí i so ɲinijɛ kiri kalikali-i.

8Ntiŋ tu kí tɛ : « A ábɛɛ ji ta-a wɔ ki ru, á bali bantenŋ shi. Á fa saa tiri fani, walima wɔru ta shii shi kì. Á fa jalinŋ bo á gbɛ kì. 9Á kari ri ye á kanŋ kiri ra, nka á fa jɛrɛbi fuluntɔnŋ shi kì. »

10Ntiŋ tu kí tɛ sɛbɛ : « Ábɛɛ so kili wɔ̀ ra, ábɛɛ ta jɛri kaniŋ wɔ̀ sun, á tu niŋ mani nu, fɔ á po san jibi ki i ta so niŋ kili ki ra. 11A kili wɔ̀ ra tiiri ta arì kaan ábɛɛ jɛri ki sun arì gbɛ, kí i arì kaan arì tɔɔnye ábɛɛ tɛ, ábɛɛ pora ki niŋ kili ki ra, á á kanŋ na fwuu kiri tuntu#6.11 Kanŋ na fwuu kiri tuntu : Niŋ kɔri ki i tu kalindaŋ kiri fa niŋ kili ki ru tɔnŋ kiri ra dɛbɛ finŋ tɔri tenŋ sun kili kì, hali kanŋ na fwuu kiri fɔn. bo niŋ mani nu nmaŋ. Niŋ a ji taanmashɛ ɛ, nwɔ̀ a ji ábɛɛ shɛɛri niŋ koŋ kiri bi sun. »

12Niŋ ɲaan ki tɛ, kalindaŋ kiri i po tiri kili kiri ra. Kí i ta ǹʼsunjo tu konaŋ kiri ntɔri bi arɔɔ bijɛ kiri ra, tu kí i na Kirinŋ tɛ. 13Kí i ɲinijɛ mwɔɔnna kalikali po san konaŋ ki ru, kí i ŋuŋ bo kiratɔnŋ mwɔɔnna ŋununu, kí i kí kene.

Yuhana beŋ ki

(Matiyu 14.1–12; Luki 9.7–9)

14Masa Ɛrɔdi i na Yesu wulu ki rama, sabu ntiŋ tɔ ki po wuru kusɛbɛ mani ki bataa ru. Konaŋ kiri bɛɛ ri wuru ǹʼbi-a tu, Wutɔnŋ Yuhana wɔ̀ beeni, tu niŋ ŋmɛni po san konkwuu kiri ru. Tu niŋ ki ra, ntiŋ i so-ri ka botɔnsunbi kari ma-i.

15Ǹʼtɔri ri i ǹʼbi-ri tu Kirinŋ wɔ cintɔnŋ Eli#6.15 Eli : Ǹʼbɛɛ ri i Eli dɔri-ra tu Iliya. i. Ǹʼtɔri ri i ǹʼbi-ri sɛbɛ tu Kirinŋ wɔ fɔlɔfɔlɔ cintɔnŋ ki bɛɛ tenŋ i.

16Ɛrɔdi niŋ nama-i waarinŋ wɔ̀ ru, ntiŋ tu : « Yuhana wa? Mínki yɛrima ki ǹʼbi tu kí wú ŋuniŋ ki kwuru kì wa? Nka dɔnsaŋ, wú ŋmɛni po san-i konkwuu kiri ru wa? »

17-18Ɛrɔdi yɛrima ki ǹʼbi wuru tu Yuhana ta pa, kí i ntiŋ kɔli bo nkasu ru, sabu Yuhana jɛbi wuru ntiŋ gbɛ tu : « Ŋì i kɛɲɛ sariya ki wu, miŋ kakan ŋi i nʼtindaŋ ki wɔ mari ki cɛn ji nʼwɔ kì. » Yuhana niŋ bi wuru-i, sabu Ɛrɔdi a tindaŋ Filipu wɔ mari Ɛrɔdiyadi cɛn ji wuru awɔ mari i. 19Ɛrɔdiyadi tɔnŋ i kwulu Yuhana cɛfan haali. Nmari wuru ǹʼtɛ Yuhana i kilɛn, nka nmari yɛrima ki wuru-ra so kì. 20Ɛrɔdi yɛrima ki wuru kɛni-na Yuhana jɛŋ, sabu ntiŋ ǹʼtɔ wuru tu Yuhana Kirinŋ wɔ wɔlinŋ telimaan a. Niŋ ki ra, Ɛrɔdi fani wuru a ɲakili tu-a Yuhana na. Ǹʼdi wuru Ɛrɔdi tɛ, ntiŋ i Yuhana wɔ wulu kiri rama, nka a ntiŋ wulu ki tɔnpa-ri, Ɛrɔdi ciiru ɲakili ki wuru ɲaanmi-a.

21Nka jibi bɛɛ, Ɛrɔdiyadi i demaŋ kila. Masa Ɛrɔdi ji ki jirirakwunu jibi ki so-i, ntiŋ i awɔ faan ki jɛntɔnŋ kiri fa awɔ surudashi ŋununtiŋ kiri fa Galile koŋ sinaŋ kiri dɔri, ntiŋ i nufinŋ sinaŋ si kí tɛ. 22Ɛrɔdiyadi danmari ki i ta wɔshɛ nini ɲaanfɛ. Niŋ i di masa Ɛrɔdi fa awɔ koŋ dɔrimaan kiri tɛ. Niŋ ma-i, masa ki tu maannaanŋ ki tɛ : « Finŋ woo finŋ di miŋ tɛ, ǹʼbi ńʼtɛ, míŋ a niŋ wɔri miŋ tɛ. » 23Masa ki i a kɔni, ntiŋ i ǹʼbi maannaanŋ ki tɛ tu : « Miŋ finŋ woo finŋ nafɛ míŋ gbɛ, míŋ a ǹʼwɔri miŋ tɛ, hali niŋ ji mɔ́ɔ́n masabi ki kɛlinŋ tenŋ ki i. »

24Maannaanŋ ki i po, niŋ i ta a ɲiŋ ki ranɔri tu : « Ŋí nfɛnŋ nafɛ? »

Nmari tu : « Wutɔnŋ Yuhana ŋuniŋ ki. »

25Mìŋ manaanŋ tenŋ ki ru, maannaanŋ ki i a rukwulu tiri masa ki tɛ, nmari i ta ǹʼbi tu : « Míŋ i ǹʼtɛ ábɛɛ i Wutɔnŋ Yuhana ŋuniŋ ki wɔri míŋ tɛ kulu ciiru kaa dɔɔ! »

26Niŋ wulu ki i kwɔ masa ki sun kusɛbɛ, nka miŋ tu ntiŋ a kɔni wuru awɔ koŋ dɔrimaan kiri ɲaanna, ntiŋ so a kaan-a kì. 27Mìŋ manaanŋ tenŋ ki ru, ntiŋ i surudashi tenŋ cin, tu niŋ i ta Wutɔnŋ Yuhana ŋuniŋ ki kwuru na. Surudashi ki i po tiri nkasufu ki ru, niŋ i ta Yuhana ŋuniŋ ki kwuru. 28Ntiŋ i ǹʼbo kulu lu, ŋì i na wɔri maannaanŋ ki tɛ, níŋ i ta ǹʼwɔri a ɲiŋ ki tɛ. 29Yuhana wɔ kalindaŋ kiri niŋ nama-i waarinŋ wɔ̀ ru, kí i ta ntiŋ kwuu ki shi, kí i ta ǹʼye.

Yesu wɔ nufinŋ wɔri bi ki koŋ waa taanŋ tɛ

(Matiyu 14.13–21; Luki 9.10–17; Yuhana 6.1–14)

30Yesu wɔ cindaŋ kiri konaŋ ki kali-i, kí i bi wɔ̀ri ma, kí arì pwulu na-i ntiŋ tɛ waarinŋ wɔ̀ ru, kí i nini bataa rakali ntiŋ tɛ.

31Yesu tu kí tɛ : « Á ngban yi tiri po san kwumaŋ, yi i ta yi cinancinŋ, nwɔma ábɛɛ i so á rufaan-a pyaanniŋ. »

Ntiŋ niŋ bi wuru-i, sabu koŋ mwɔɔnna wuru ta-a kí tɛ, ǹʼbɛɛ ri wuru tiri-ra, ǹʼtɔri ri i na-ni, fɔ ntiŋ fa awɔ kalindaŋ kiri wuru waaci kila-a kí i nufinŋ nu kì. 32Kí i de buŋ bɛɛ ru, kí i tiri arì cinancinŋ mani nu, kí i ta po san buŋ ki ru mani nu, koŋ myɛ-ni mani wɔ̀ ru kì. 33Koŋ mwɔɔnna i kí tirira ki ja buŋ ki ru, kí i ǹʼtɔ tu kíbɛɛ kiri, kí i kí tamaŋ ki tɔ. Kí i bili tiri arì kanŋ na, kí i po kili kiri bataa ra, kí i ta Yesu fa awɔ kalindaŋ kiri jɛnkwuru niŋ mani nu.

34Yesu po san-i buŋ ki ru waarinŋ wɔ̀ ru, ntiŋ i konaŋ kari ja. Kí makwulu i ntiŋ pa, sabu niŋ konaŋ kiri wuru miŋ tu saa ri, neetɔnŋ nwɔ̀ri ra kì. Ntiŋ i a bo kí kali sun bi mwɔɔnna bi sun. 35Sunŋ ki na-i kɔ, Yesu wɔ kalindaŋ kiri i arì kpari ntiŋ tɛ, kí tu ntiŋ tɛ : « Sunŋ ki kɔ-i kɔ, yibɛɛ dumiŋ ji jaŋ faninmwuŋ kwumaŋ, 36á saa ki wɔri konaŋ ki tɛ, kí i ta tonfan kili kiri fa jasa kiri bɛɛ ri ra, kí i ta nufinŋ ceeli sa arì tɛ. »

37Nka Yesu tu kí tɛ : « Ábɛɛ yɛrima kiri nufinŋ wɔri kí tɛ ni! » Kí i ntiŋ nupwulu tu : « Yi ta warifɔ daŋ yaabyinŋ (200) de bwuru ru, yi i na niŋ wɔri kí tɛ wa? » 38Yesu i kí ranɔri tu : « Bwuru ŋuŋ jinŋ ábɛɛ gbɛ? Á ta ǹʼnufɔɔ. »

Kí ta-i ǹʼnufɔɔ, kí i arì pwulu na ǹʼbi ntiŋ tɛ tu : « Bwuru ŋuŋ taanŋ fa yɛrinŋ daŋ fuuli. »

39Niŋ ma-i, Yesu tu kí konaŋ ki sɔɔ sɔɔ ta ǹʼkwuru sun ǹʼkwuru sun, ɲiŋ cɔ ki sun. 40Konaŋ ki i sɔɔ ta ǹʼkwuru sun ǹʼkwuru sun, ǹʼbɛɛ ri koŋ yaataanŋ taanŋ i (100), ǹʼtɔri ri koŋ yaafuuli fa byinŋ byinŋ i (50). 41Niŋ kɔɔtɛ, Yesu i bwuru ŋuŋ taanŋ ki fa yɛrinŋ daŋ fuuli ki shi, ntiŋ i a ŋuniŋ fɛshi, ntiŋ i kirina shɛɛli, ntiŋ i baraka bi Kirinŋ tɛ. Ntiŋ niŋ ma-i, ntiŋ i bwuru ki rucɛn cɛn, ntiŋ i ǹʼwɔri awɔ kalindaŋ kiri tɛ, tu kí ǹʼlu ta konaŋ ki tɛ. Ntiŋ i yɛrinŋ daŋ fuuli ki shi lu kí tɛ sɛbɛ. 42Konaŋ ki bataa i nuŋ ki nu, kí i pyii. 43Bwuru bwulu wɔ̀ri fa yɛrinŋ pyɛ wɔ̀ri tu-i, kalindaŋ kiri i nini nakɔli, kí i shɛɛrinŋ bwununfuuli faa niŋ wu. 44Koŋ wɔ̀ri niŋ bwuru ki nu wuru-i, nini nu shuru kiri wuru koŋ waa taanŋ a (5.000).

Yesu tiri bi ki ju ki sun

(Matiyu 14.22–33; Yuhana 6.15–21)

45Mìŋ manaanŋ tenŋ ki ru, Yesu i ǹʼbi awɔ kalindaŋ kiri tɛ tu kí de buŋ ki ru, tu kí i baa ki fwuu tiri-ri a jɛŋ Bɛtisayida, tu afinŋ a saa ki wɔri-ri konaŋ ki tɛ. 46Ntiŋ na-i konaŋ ki bosaara waarinŋ wɔ̀ ru, ntiŋ i ta Kirinŋ nafɛ tɔnŋ bɛɛ sun.

47Cii ki i so, ŋì i kalindaŋ kiri tu ju ki ɲaanna buŋ ki ru, Yesu tenŋ i ji tankpiŋ ki sun. 48Ntiŋ i ǹʼja tu kalindaŋ kiri yɛli buŋ bili ki ra, sabu faa ki wuru kí ŋununafu-a. Ɲandanbulu ki sun, Yesu i tiri ta ju ki sun, ntiŋ i ta awɔ kalindaŋ kiri maŋ ki ru. Ntiŋ wuru juu-ra fwuude kí sun kɔ. 49Kalindaŋ kiri ntiŋ tirira ki ja-i ju ki sun waarinŋ wɔ̀ ru, kí wuru ǹʼbi-a tu konminiŋ na ji-i, kí i yaalinpo, 50sabu kí bataa ɲaniŋ wuru ntiŋ na, ŋì i kí minincɛn.

Mìŋ manaanŋ tenŋ ki ru, Yesu i wulubi kí tɛ tu : « Á á ɲakili kiri sɔɔ tenŋ sun, MÍŊ YƐ, á fa kɛni kì. »

51Niŋ kɔɔtɛ, ntiŋ i de buŋ ki ru kí fan, faa ki i tu. Daŋ i kɔ ntiŋ wɔ kalindaŋ kiri sun, 52sabu botɔnsunbi wɔ̀ ma wuru bwuru bi ki sun, kí niŋ kɔri tɔ-ri kì. Kí ciiru ɲakili ki ralamaan wuru-i.

Yesu kiratɔnŋ kiri bɛɛ ri kene-i Genesarɛti sɔɔta ki ru

(Matiyu 14.34–36)

53Yesu fa awɔ kalindaŋ kiri baa ki fwuu-u, kí i de Genesarɛti sɔɔta ki ru, kí i buŋ ki tu baa ki tɔnŋ na. 54Kí po san-i buŋ ki ru mani wɔ̀ ru, niŋ mani nu tɔnŋ kiri i Yesu tɔ. 55Kí i bili de sɔɔta ki mani ki bataa ru, kí i arɔɔ kiratɔnŋ kiri shi ta-ri bilifinŋ ni nu ntiŋ tɛ. A kí ntiŋ wulu lama-ni mani woo mani nu, kí wuru ta-a ntiŋ cɛfan. 56A Yesu ta-ri mani woo mani nu, kili sinaŋ kiri fa kili pyaanŋ kiri ra, konaŋ kiri wuru ta-a kiratɔnŋ kiri wu furuba maŋ kiri ru, kí i ntiŋ nafɛ-ri tu ntiŋ ncusun arɔɔ kiratɔnŋ kiri arì gbɛ pa a sunjuulinŋ ki tɔnŋ ki bantenŋ na. Koŋ woo koŋ myɛ-ni niŋ na, nini bataa wuru kene-a.

Currently Selected:

Maraka 6: JOB

Highlight

Copy