Maraka 7

Ladaŋ kiri bi ki

(Matiyu 15.1–9)

1 Farinsiyɛnŋ bɛɛ ri fa Sariya kalimɔɔ bɛɛ ri i po Yerusalɛmu, kí i ta arìmaŋ nakɔli Yesu maŋ ki ru. 2Kí i ǹʼja tu Yesu wɔ kalindaŋ kiri bɛɛ ri nufinŋ ki nu-a arì gbɛɛra nɔɔmaan ni wu, niŋ kɔri ki i ji tu kí arì gbɛɛra wu, ŋì i kɛɲɛ ladaŋ kiri wu kì.

3Farinsiyɛnŋ kiri fa Yawutu pyɛ kiri bataa nufinŋ nu-a arì gbɛɛra wuka shɔbali, ŋì i kɛɲɛ arì tiŋ cɛɛnni kiri wɔ ladaŋ kiri wu kì. 4A kí po ku ru, kí nufinŋ nu-a arì wubali kì. Kí i arì tiŋ cɛɛnni kiri wɔ ladaŋ na bi mwɔɔnna tɔri ri ma-a miŋ tu wuka ɲaan wuru mwunukulu kiri, fa peeduŋ kiri fa finŋ wɔ̀ri ramɔni-i daɲa ra, niŋ fa bilifinŋ kiri ra kí gbɛ.

5Farinsiyɛnŋ kiri fa Sariya kalimɔɔ kiri i Yesu ranɔri tu : « Nfɛnŋ na, mɔɔn kalindaŋ kiri yibɛɛ tiŋ cɛɛnni kiri wɔ ladaŋ kiri rasɔɔ-ra kì, kí i nufinŋ ki nu-ni arì gbɛɛra nɔɔmaan ni wu? »

6Yesu tu kí tɛ : « Ábɛɛ wulufuulibitɔnŋ kari! Esayi cintɔnbi wulu bi-i ábɛɛ bi sun! Ntiŋ ǹʼsɛbɛ-i tu Kirinŋ tu :

‹ Ka konaŋ kari i míŋ gbɛ-a arì tɔnŋ na,

nka kí ciiru ki maŋ nari-i míŋ na.

7Kí i míŋ gbɛ-a mani tawɔ ru,

sabu kí i arìmaŋ kali-la bi wɔ̀ri ra, nini i konanmini wɔ ladaŋ sɔɔmaan ni bantenŋ ni. ›#Esayi 29.13. »

8Yesu tu kí tɛ sɛbɛ : « Ábɛɛ i Kirinŋ wɔ sariya kiri tu-a nmaŋ, á i konanmini wɔ ladaŋ kiri bantenŋ ma-ni. »

9Yesu tu kí tɛ sɛbɛ : « Ábɛɛ á kaanka ɲaantɔ-i Kirinŋ wɔ cinŋ bimaan kiri tɛ, á i á tiŋ cɛɛnni kiri wɔ ladaŋ kiri ma-ni kɛ! 10Musa tu : ‹ Nʼtiŋ ki fa nʼɲiŋ ki gbɛ. › Ntiŋ tu sɛbɛ : ‹ Konwɔtiŋ wulu kulinŋ bi a tiŋ walima a ɲiŋ tɛ, nintiŋ fa kilɛn kakan-i. ›#Pobi ki 20.12; Sariya kiri 5.16; Pobi ki 21.17; Sarakawɔrɔtɔnŋ kiri 20.9. 11Nka ábɛɛ i konaŋ ki kali-la, tu konwɔtiŋ ǹʼbi a tiŋ walima a ɲiŋ tɛ tu : ‹ Míŋ wuru-ra so finŋ wɔ̀ wɔri-i ábɛɛ tɛ, niŋ i kɔrɔbanŋ#7.11 kɔrɔbanŋ : Niŋ i Arameyɛnwulu. ›, niŋ kɔri ki tu niŋ wɔri saraka Kirinŋ tɛ, 12niŋ na ábɛɛ ncusun-a, ntiŋ i ye a tiŋ ki walima a ɲiŋ ki tɛ kili kì. 13Niŋ ɲaan ki tɛ, ábɛɛ i Kirinŋ wulu ki bo-a á tiŋ cɛɛnni kiri wɔ ladaŋ kiri tɛ. Á i niŋ bishi mwɔɔnna tɔri ri ma-ni. »

Finŋ wɔ̀ri i so-a koŋ nɔɔ-ɔ

(Matiyu 15.10–20)

14Niŋ kɔɔtɛ, Yesu i konaŋ ki dɔri sɛbɛ, ntiŋ i ǹʼbi kí tɛ : « Á bataa á tɔɔnyeka shɔ mɔ́ɔ́n wulu kari tɛ, á i yìrì ɲaantɔ. 15Finŋ woo finŋ i de-a konanmini ciiru, niŋ tɔri tenŋ so-a ntiŋ nɔɔ-ɔ kì. Nka finŋ wɔ̀ i po-a ciiru ki ru, ninki i koŋ nɔɔ-ra. 16[A wulu lama tɔɔn ji konwɔtiŋ gbɛ, ntiŋ wulu lama dɛ!] »

17Waarinŋ wɔ̀ ru Yesu a san-i konaŋ ki tɔntɛ, ntiŋ i de kulu, ntiŋ wɔ kalindaŋ kiri i ntiŋ nanɔri ka wulusuntalinŋ ka kɔri ki sun. 18Ntiŋ tu kí tɛ : « Ábɛɛ yɛrima kiri i koŋ ɲakili bali li sɛbɛ wa? Á ǹʼtɔ tu konanmini finŋ woo finŋ nu bo-a a ciiru, tu niŋ so-a ntiŋ nɔɔ-ɔ kì. 19Sabu niŋ i de-a ntiŋ ciiru tɔnŋ ki ru kì, nka ŋì i de-a ntiŋ wula ki ru, kɔɔtɛ ntiŋ i ta ǹʼkee ɲiŋ nu. »

Niŋ ɲaan ki tɛ, Yesu i ǹʼji tu nufinŋ bataa fɔɔmaan a.

20Ntiŋ tu sɛbɛ : « Finŋ wɔ̀ i po-a konanmini ciiru ki ru, ninki i ntiŋ nɔɔ-ra. 21Sabu ɲakilila jɛ ki bataa i po-a ciiru tɔnŋ ki ra, ŋì i konanmini ki po bo-ri kakaalibi ki fa kwunbi ki fa koŋ kilɛnbi ki 22fa nankulunbi ki fa fyikatinbi ki fa ɲaannajuubi ki fa juubi ki fa namarinŋ ki fa tɛnbi ki fa kiilinŋ ki fa ɲakili balibi ki sun. 23Niŋ bijɛ kiri bataa i po-a konanmini ciiru ki ru, niŋ kiri i ntiŋ nɔɔ-ri. »

Kɛniŋ tɔri ru mari bɛɛ bili bi ki Yesu ra

(Matiyu 15.21–28)

24Niŋ kɔɔtɛ, Yesu i po san niŋ mani nu, ntiŋ i ta Tiiri sɔɔta ki ru. Ntiŋ i ta jɛri kaniŋ bɛɛ sun. Ntiŋ wuru ǹʼtɛ koŋ i ǹʼtɔ tu afinŋ kulu nmaŋ kì, nka konaŋ kiri i na ǹʼtɔ. 25Mari bɛɛ wuru nmaŋ, ɲinijɛ wuru niŋ mari ki danmari ru. Nmari Yesu na wulu ki rama-i waarinŋ wɔ̀ ru, nmari i ta a fɛɛn ntiŋ kanŋ fɛ. 26Niŋ mari ki wuru Yawutu kì. Jɛ wuru-i, nwɔ̀ ji wuru Fenisi sɔɔta ki ru, Siri kɛniŋ ki ru. Nmari i Yesu rafɛ tu ntiŋ ɲinijɛ ki kwɔ po san a danmari ki ru. 27Nka Yesu i ǹʼbi nmari tɛ tu : « Ncusun tiraŋ kiri nufinŋ ki nu kí i pyii sun, sabu ǹʼshɔ koŋ i tiraŋ kiri wɔ nufinŋ ki shi, ŋi i ǹʼkee bo kwulanaŋ ni tɛ kì. »

28Mari ki i ntiŋ nupwulu tu : « Sɛli yɛ Ŋuntiŋ, nka niŋ fa a fɔn na, kwulanaŋ kiri i tiraŋ kiri wɔ nufinŋ bwulubwulu fɛɛnmaan ki nu-a. »

29Niŋ wulu ki bimaan ki sun, Yesu tu : « Mari ki, ka wulu bimaan ka bira, nʼpwulu tiri kulu, ɲinijɛ ki po san-i miŋ danmari ki ru kɔ. »

30Mari ki i a pwulu, nmari i ta fa a danmari ki bili wu bilifinŋ sun, ɲinijɛ ki po sanmaan ki ǹʼnu.

Yesu wɔ shuru bubu tɔɔnkpilinŋ ki kene bi ki

31Yesu i po san Tiiri sɔɔta ki ru, ntiŋ i ta de Sidɔnŋ kili ki kɛlintɛ, ntiŋ i Dekapɔli sɔɔta ki rukwuru, ntiŋ i a pwulu na Galile baa ki tɔnŋ na. 32Kí i na shuru bubu tɔɔnkpilinŋ bɛɛ wu Yesu tɛ, kí i ntiŋ nafɛ tu ntiŋ a gbɛ bili wú sun.

33Yesu i ta weŋ ki wu kɛlinsun, ntiŋ i a san konaŋ ki ra. Ntiŋ i a gbɛnaŋ kiri de weŋ ki tɔɔnta kiri tɛ, ntiŋ i a lɛju myɛ wú nɛninɛŋ ki ra. 34Niŋ kɔɔtɛ, Yesu i kirina shɛɛli, ntiŋ i a sifwuu ki cɛɛn, ntiŋ i ǹʼbi weŋ ki tɛ : « Efata! » Niŋ kɔri ki i tu : « Á á rawwulu! »

35Mìŋ manaanŋ tenŋ ki ru, weŋ ki tɔɔn kiri i nawwulu, wú i wulu lama, wú nɛninɛŋ ki i rapili, wú i wulubi fɔɔ.

36Yesu i ǹʼbi furu konaŋ ki bataa tɛ, tu kí fa niŋ bi ki bi koŋ tɛ kì, nka a ntiŋ ǹʼbi-ri ninkunŋ waarinŋ wɔ̀ ru, niŋ wuru ǹʼbɛɛ bo-a ǹʼsunjo ki sun kí gbɛ. 37Konaŋ ki ciiru daalinŋ kɔmaan ki wuru ǹʼbi-a tu : « Ntiŋ i bi woo bi ma-a, ǹʼbataa shɔ-i haali. Ntiŋ i tɔɔnkpilinŋ kiri tɔɔn kiri rawwulu-la, ntiŋ i bubu kiri tɔnŋ napili-li. »

Currently Selected:

Maraka 7: JOB

Highlight

Copy