Maraka 5

Yesu ɲinijɛtiŋ bɛɛ kene-i

(Matiyu 8.28–34; Luki 8.26–39)

1Yesu fa awɔ kalindaŋ kiri i ta so Galile baa ki kɔɔtɛ, Gerasatɔnŋ#5.1 Gerasa wuru kili bɛɛ tɔ ɔ. kiri sɔɔta ki ru. 2Yesu jɛri po san-i buŋ ki ru mani wɔ̀ ru, shuru bɛɛ i bili po yiri saali kiri ru, niŋ i ntiŋ ŋununafu. Ɲinijɛ wuru niŋ shuru ki ru, 3fɔ wú i san-ni saali li lu. Koŋ tɔri tenŋ wuru so-a wú pa kɔli-i kì. Hali a kí wú kɔli-li peejɔlɔkɔ ra, wú wuru ǹʼcɛn san-a a ra. 4Jɔlɔkɔ kiri wuru ye-a wú gbɛ kiri fa wú kanŋ kiri na kaan mwɔɔnna, nka wú wuru yìrì cɛn cɛn san-a a ra. Koŋ wuru so-a wú sunnari-i kì. 5Niŋ shuru ki wuru a maanni de-a saali kiri fa tɔnŋ kiri nu, cii fa sunŋ. Wú wuru yaalinpo de-a, wú i a yɛri sunmɛni-ni kwɔ kiri ra.

6Niŋ weŋ ki Yesu ja-i waarinŋ wɔ̀ ru, wú i bili, wú i a saa fɛɛn ntiŋ kanŋ fɛ, 7wú i ǹʼbi faanna : « Nfɛnŋ míŋ fa miŋ faninmwuŋ Yesu, Kirinsinaŋ Danshuru? Míŋ i miŋ nafɛ-a, ǹʼma Kirinŋ bira, fa ńʼɲaanfɛkwulu kì. »

8Shuru ki wuru niŋ bi-a, sabu Yesu wuru ǹʼbi-a tu ɲinijɛ ki po san wú ru.

9Yesu i nanɔri tan tu : « Miŋ tɔ ki dɔɔkunŋ? »

Wú tu : « Míŋ tɔ ki i tu : ‹ Kwurusinaŋ ›, sabu yibɛɛ mwɔ-i. » 10Yìrì i Yesu rafɛ ǹʼmwɔɔnna, tu ntiŋ fa arì kwɔ po san niŋ kɛniŋ ki ru kì.

11Cɛ kwuru sinaŋ bɛɛ wuru a nu-a tɔnŋ ki kankanŋ nu nmaŋ. 12Ɲinijɛ kiri i Yesu rafɛ tu : « Yi bo tiri de ka cɛ kari ru. »

13Yesu i a tu niŋ na. Mìŋ manaanŋ tenŋ ki ru, ɲinijɛ kiri i po san koŋ ki ru, yìrì i ta de cɛ kiri ru. Cɛ kwuru ki bataa i giri jɛri tɔnŋ ki jɛrimaŋ jɛ ki ru, yìrì i ta arì fɛɛn baa ki ru, yìrì bataa i beeni. Niŋ cɛ kiri wuru-ra waafuuli (2.000) bishi po.

14Cɛ faa kiri niŋ bi mamaan kiri ja-i waarinŋ wɔ̀ ru, kí i bili ta niŋ nakali kili ki fa a tonfan jasa kiri ra. Konaŋ kiri i po, kí i ta bi mamaan ki shɛɛli. 15Kí so-i Yesu maŋ ki ru waarinŋ wɔ̀ ru, ɲinijɛ mwɔɔnna kiri wuru koŋ wɔ̀ ru, kí i ta fa niŋ sɔɔ wu ntiŋ tɔntɛ, juulinŋ i ji ntiŋ sun, niŋ fa a ɲakili ki rafaamaan i ji-i. Kɛmi i de kí bataa ru. 16Bi wɔ̀ri ma-i ɲinijɛtiŋ ki fa cɛ kiri wu, koŋ wɔ̀ri nini ja-i, nini wuru ǹʼɲaanbi-a koŋ pyɛ kiri tɛ. 17Niŋ na, konaŋ kiri i Yesu rafɛ tu ntiŋ a yɛkɛtu, ntiŋ i po san arɔɔ sɔɔta ki ru.

18Yesu deera ki buŋ bɛɛ ru, ɲinijɛtiŋ bwuumaan ki i ntiŋ nafɛ, tu a ra ta ntiŋ fan. 19Yesu a tu kì. Nka, ntiŋ tu weŋ ki tɛ : « Nʼpwulu nʼwɔ konanbi ki tɛ, Ŋuntiŋ Kirinŋ miŋ sunmakwulupa-i, ŋì i bi sinaŋ ma miŋ tɛ ɲaan wɔ̀ tɛ, ŋi i ta niŋ nakali nʼwɔ mani nu tɔnŋ kiri tɛ. »

20Niŋ ɲaan ki tɛ, Yesu bi sinaŋ wɔ̀ ma wuru ntiŋ tɛ, ntiŋ i ta niŋ nakali Dekapɔli#5.20 Dekapɔli kɔri ki i tu kili byinŋ. Niŋ mani ki i Galile baa ki woroduu fa ǹʼsunfalimwuŋ kɛlintɛ. sɔɔta ki mani ki bataa ru. Niŋ wulu kiri botɔnsun i arì ramatɔnŋ kiri bataa pa.

Yayirɔsi danmari ki kene bi ki, niŋ fa mari wɔ̀ a gbɛ pa-i Yesu ra

(Matiyu 9.18–26; Luki 8.40–56)

21Yesu de-i buŋ ki ru, ntiŋ a pwulu na baa ki kɛlinŋ tɔri ki ra waarinŋ wɔ̀ ru, konaŋ kiri i na ntiŋ nakwunu. Kí wuru baa ki tɔnŋ na.

22Yawutu kiri wɔ kalinfu ki jɛntɔnŋ bɛɛ i na Yesu tɛ. Niŋ tɔ ki wuru tu Yayirɔsi. Ntiŋ Yesu ja-i waarinŋ wɔ̀ ru, ntiŋ i na a kwushiri Yesu fɛ, 23ŋi i ntiŋ nafɛ kusɛbɛ tu : « Míŋ danmari ki i nfaanna beeni, míŋ i ábɛɛ rafɛ-a, á na á gbɛ bili ǹʼsun, nwɔma ŋì i kene, ŋì i tu a ɲaanna. »

24Yesu i ta ntiŋ fan. Konaŋ kwuru mwɔɔnna i a bo ntiŋ cɛfan, fɔ kí i ntiŋ fɔɔn-ni a kɛlinŋ ki fɔn tɛ.

25Mari bɛɛ wuru konaŋ ki ru nmaŋ, juwu kɔbali kira bo wuru nmari sun. Niŋ kira ki jiri bwununfuuli kila wuru nmari ra kɔ. 26Nmari yɛlinŋ mwɔɔnna tan wuru janmatɔnŋ kiri gbɛfɛ, nmari i a gbɛfɛ jalinŋ ki bataa kɔ nini tɛ, nka ǹʼtɔri tenŋ so ǹʼbɛɛ san-i nmari wɔ kira ki ra kì, a ǹʼkɛɛ ji-i kì. 27Nmari Yesu wulu ki rama-i, nmari i a kpari Yesu tɛ, nmari i po ntiŋ kɔɔtɛ konaŋ ki faninmwuŋ, nmari i a gbɛ pa ntiŋ sunjuulinŋ ki tɔnŋ ki ra. 28Sabu, nmari ǹʼbo wuru a ciiru, tu afinŋ so myɛ bantenŋ tan-i Yesu sunjuulinŋ ki ra, tu afinŋ a kene.

29Nmari so-i a gbɛ pa-i Yesu sunjuulinŋ ki ra mani wɔ̀ ru, mìŋ manaanŋ tenŋ ki ru, juwu ki i tu, mari ki i ǹʼtɔ a firi ki ra tu afinŋ kene. 30Mìŋ manaanŋ tenŋ ki ru, Yesu i ǹʼtɔ a yɛrɛtɛ tu sotinbi ki bɛɛ po san afinŋ nu. Ntiŋ i a ɲaannupwulu konaŋ ki faninmwuŋ, ntiŋ i nanɔri tan tu : « Nkɛnŋ a gbɛ pa mɔ́ɔ́n juulinŋ kiri ra? »

31Ntiŋ wɔ kalindaŋ kiri bataa tu : « Ábɛɛ konaŋ ki ja-a á fɔɔn-na á kɛlinŋ ki fɔn tɛ, á i nanɔri tan-ni tu nkɛnŋ myɛ ábɛɛ ra wa? » 32Nka Yesu wuru a kankanfantɔnŋ kiri shɛɛli-la, nwɔma a i niŋ matɔnŋ ki tɔ.

33Bi wɔ̀ ma wuru mari ki wu, nmari yɛrima ki niŋ tɔ wuru-i. Nmari kɛnintɔnkɔni ki i sɛrɛsɛri na a fɛɛn Yesu kanŋ fɛ, nmari i sɛli ki bataa bi ntiŋ tɛ. 34Niŋ na, Yesu tu nmari tɛ : « Ńʼdanmari, mɔɔn bilinabi ki nʼmwu-i, kene, Kirinŋ de nʼshɔɔrinŋ wu. »

35Ŋì i Yesu tu niŋ wulu ki bi-a, kpeeri i po Yayirɔsi wɔ mani ki ru, kí i na ǹʼbi ntiŋ tɛ : « Miŋ danmari ki beeni-i kɔ, miŋ faa kalimɔɔ ki yɛli-la nfɛnŋ na? »

36Yesu i niŋ bimaan ki rama, nka ntiŋ a tɔɔncu ǹʼfɛ kì, ntiŋ i ǹʼbi Yayirɔsi tɛ : « Fa kɛni kì, bilinabi ki bantenŋ ma. »

37Yesu ncusun koŋ i ta a fan kili kì, duu Pyɛɛri, Yakuba niŋ fa a tindaŋ Yuhana. 38Kí ta-i so Yayirɔsi wɔ mani ki ru waarinŋ wɔ̀ ru, Yesu i koŋ mwɔɔnna kila nmaŋ. Koŋ bataa wuru a makwulu wulu bi-a, kí i ŋuntan-ni, niŋ fa kí i yaalinpo-ri.

39Yesu i de fu ki ru, ntiŋ tu kí tɛ : « Ábɛɛ wulu ki mwɔ-a nfɛnŋ na, á i ŋuntan-ni? Daŋ ki beeni kì, ǹʼyɔ ɲinintan-a. » 40Konaŋ ki i yɛtan bo ntiŋ sun. Niŋ mani nu, ntiŋ i konaŋ ki bataa po taanna. Yayirɔsi danmari ki wuru fudaŋ wɔ̀ ru, Yesu i de niŋ nu, ntiŋ fa awɔ kalindaŋ koŋ byaŋ ki, fa daŋ ki tiŋ ki fa ǹʼɲiŋ ki.

41Ntiŋ i maannaannaanŋ ki pa a gbɛ sun, ntiŋ i ǹʼbi ǹʼtɛ arɔɔ wulu ki ru tu : « Talita, kumu! » Niŋ kɔri ki i ji tu : Maannaannaanŋ, míŋ i bi-a miŋ tɛ, jɔrɔkɔ!

42Mìŋ manaanŋ tenŋ ki ru, maannaannaanŋ ki i jɔrɔkɔ, ŋì i a bo tiri sun. Ǹʼshi ki wuru jiri bwununfuuli i. Koŋ wɔ̀ri wuru nmaŋ, niŋ i bo nini bataa tɔnŋ sun, ŋì i gbɛde. 43Nka Yesu i ǹʼbi furu kí tɛ, tu kí fa bi mamaan ka tɔri tenŋ nakali koŋ tɛ kì. Niŋ kɔɔtɛ, ntiŋ tu kí nufinŋ wɔri ǹʼtɛ.

Currently Selected:

Maraka 5: JOB

Highlight

Copy