Maraka 4
4
Yesu wɔ wulusuntalinŋ ki bilaŋ ɲɛɛntɔnŋ bi ki sun
(Matiyu 13.1–9; Luki 8.4–8)
1Yesu i konaŋ kiri kali ki tɔnpa sɛbɛ Galile baa ki tɔnŋ na. Konaŋ kiri i na arì rakɔli ntiŋ kɛlina. Konaŋ kiri na-i mwɔka jitan waarinŋ wɔ̀ ru, ntiŋ i de sɔɔ buŋ bɛɛ ru, konaŋ ki i tu tankpiŋ ki sun. 2Ntiŋ i kí kali bi mwɔɔnna bi sun wulusuntalinŋ ni wu. Ntiŋ i ǹʼbi kí tɛ awɔ kalinŋ ki ciiru tu : 3« Á á tɔɔnye! Koŋ bɛɛ ta-i awɔ bilantu ɲɛɛn, 4ŋì i ntiŋ tu bilantu ki ɲɛɛn-na, bilanaŋ kiri bɛɛ ri i ta fɛɛn saa tɔnŋ na, ɲaannaanŋ ni i nini shi fɔn. 5Bilanaŋ kiri bɛɛ ri i ta fɛɛn faa maŋ ni nu, fwuu mwɔɔnna mani wɔ̀ri ru kì. Nini i shɛnpo farɔn, sabu fwuu ki mwɔ-ni nmaŋ kì. 6Sunŋ ki na-i kwulu, yìrì bataa i wɔli wɔli, yìrì i furu, sabu kanaŋ ɲaansun wuru yìrì ra kì. 7Bilanaŋ tɔri ri i ta fɛɛn ɲiŋ ciitiŋ ni faninmwuŋ, niŋ cii kiri i jɔrɔkɔ, yìrì i bilaŋ shɛn ki fɔɔn, ǹʼso daŋ bo-i kì. 8Nka bilanaŋ tɔri ri i ta fɛɛn pwɔkulinŋ jii ru. Nini i shɛnpo, yìrì i kaarinŋ mwɔɔnna pa. Bilanaŋ tenŋ tenŋ kiri bɛɛ ri i arì bishi kɔniŋ fa byinŋ pa, ǹʼtɔri ri i arì bishi yaabyaŋ (60) pa, ǹʼtɔri ri i arì bishi yaataanŋ (100) pa. » 9Yesu i ǹʼbi kí tɛ sɛbɛ : « A wulu lama tɔɔn ni ji nwɔ̀tiŋ gbɛ, ntiŋ wulu lama dɛ! »
Yesu wɔ wulusuntalinŋ ki bi ŋuŋ ki
(Matiyu 13.10–17; Luki 8.9–10)
10Yesu po sanmaan ki konaŋ mwɔɔnna ki ɲaanfɛ, ntiŋ cɛfantɔnŋ kiri fa ntiŋ wɔ kalindaŋ kiri i ntiŋ nanɔri awɔ wulusuntalinŋ ki kɔri ki sun. 11Ntiŋ tu kí tɛ tu : « Kirinŋ wɔ Masabi ki ɲaantɔ gonto ki wɔri-i ábɛɛ kiri tɛ, nka ǹʼɲaan i bi-a koŋ tɔri kiri tɛ wulusuntalinŋ nu, 12nwɔma,
kí i maannashɛɛli, nka kí fa ǹʼja kì.
Kí i ǹʼnama, nka kí fa ǹʼdaŋ ki tɔ kì.
A niŋ ji-i kì, a kí ǹʼdaŋ ki tɔ, kí a ntɔri bi arɔɔ bijɛ kiri ra,
kí i na Kirinŋ tɛ, Kirinŋ ji-a kɔ́ɔ́ bijɛ kiri tu kí tɛ. »#Esayi 6.9–10.
Yesu awɔ wulusuntalinŋ ki kɔri ki bi-i
(Matiyu 13.18–23; Luki 8.11–15)
13Kɔɔtɛ Yesu tu : « Ábɛɛ ka wulusuntalinŋ ka kɔri ki tɔ kì wa? Niŋ na, ábɛɛ ra na wulusuntalinŋ pyɛ kiri kɔri kiri tɔ dɔɔkunŋ?
14Bilaŋ ɲɛɛntɔnŋ ki i bilanaŋ wɔ̀ ɲɛɛn-na, niŋ i Kirinŋ wɔ wulu ki i. 15Kirinŋ wɔ wulu ki ɲɛɛn waari ki ru, konaŋ kiri bɛɛ ri i miŋ tu saa tɔnŋ na ni, wulu ki ɲɛɛn-ɛ nwɔ̀ri ru. A niŋ koŋ kiri wulu ki rama, shitaanni ki i na-a ǹʼbataa kini po san kí ciiru shuu. 16Mìŋ ɲaan tenŋ ki tɛ, faa maŋ nu wɔ kiri, a nini niŋ wulu ki rama, kí i ǹʼpa-a ciirudibi wu farɔn, 17nka kanaŋ ɲaansun kí ra kì. Kí i bilinabi ki ma-a waarinŋ pyaanŋ nu, nka a yɛlinŋ bo kí sun, walima a koŋ ji kí cɔɔri-ra niŋ wulu ki bira, kí i bilinabi ki tɔnbo-a. 18Cii maŋ nu wɔ kiri i ji kpeeri i, nini i Kirinŋ wɔ wulu ki rama-a, 19nka juniɲa ka ru ciirufɔnɔbi kiri fa nafulu tɔ ki fa firi dintɛ bi jɛ kiri i na-a arì la niŋ wulu ki sun, fɔ ŋì so-a daŋ pa-i kì. 20Pwɔkulinŋ jii ru wɔ kiri, nini i Kirinŋ wɔ wulu ki rama-a, kí i ǹʼpa, kí i daŋ pa. Ǹʼbɛɛ i a bishi kɔniŋ fa byinŋ pa-a, ǹʼbɛɛ i yaabyaŋ pa-ri, ǹʼtɔri i a bishi yaataanŋ (100) pa-ri. »
Yesu wulusuntalinŋ wɔ̀ bi-i lanpaŋ cumaan bi ki sun
(Luki 8.16–18)
21Niŋ kɔɔtɛ, Yesu i ǹʼbi kí tɛ sɛbɛ tu : « Koŋ lanpaŋ cu-a, ŋi i finŋ la ǹʼsun, walima ŋi i ǹʼsɔɔ bilifinŋ fɛ kì. Ŋì cu sɔɔ-ra finŋ sun cuunŋ kì wa? 22Finŋ woo finŋ nadu-i, Kirinŋ a na niŋ bataa ji manisarinŋ tɛ. Gonto tɔri tenŋ nmaŋ, tu nwɔ̀ a na tu pobali manisarinŋ tɛ kì. 23Wulu lama tɔɔn ni ji nwɔ̀tiŋ gbɛ, ntiŋ wulu lama dɛ! »
24Yesu tu kí tɛ sɛbɛ : « Ábɛɛ i wulu wɔ̀ rama-a, á á paka tɔ niŋ kɛlina dɛ! Ábɛɛ i konaŋ kiri wɔ ki ki-a kifinŋ wɔ̀ sun, Kirinŋ a na ábɔɔ ki ki mìŋ kifinŋ tenŋ ki sun, fɔ ǹʼbɛɛ i bo ǹʼsun. 25Finŋ i nwɔ̀tiŋ gbɛ, ǹʼbɛɛ ra na bo nintiŋ wɔ ki sun, nka finŋ nwɔ̀ gbɛ kì, hali pyaanŋ wɔ̀ i ntiŋ gbɛ, niŋ a na mwu san ntiŋ wu. »
Finŋ daŋ ki falika ɲaan ki a yɛritɛ
26Yesu tu sɛbɛ : « Kirinŋ wɔ Masabi ki fa finŋ wɔ̀ po-i, niŋ i kaa. Ǹʼyɔ miŋ tu koŋ bɛɛ bilaŋ ɲɛɛn awɔ ji ru. 27Ntiŋ i ta a bili-li, ntiŋ i ɲinintan-ni cii ki ru, ntiŋ i ŋmɛni-ni siira jibi woo jibi. Ŋì i ntiŋ tu niŋ na, finŋ daŋ ki i na fali, ŋì i gbɛ, ntiŋ ǹʼɲaantɔ kì. 28Finŋ daŋ ki i fali po-a pwɔ ki ru a yɛrɛtɛ, ŋì i bali po, wwuu i na po ǹʼna, ŋì i faa daŋ na. 29A bilaŋ ki so waarinŋ wɔ̀ ru, ntiŋ i ǹʼtɛri-ra, sabu bilaŋ tɛri waari ki so-i. »
Wulusuntalinŋ wɔ̀ bi-i mutaridi daŋ ki bi ki sun
(Matiyu 13.31–32, 34; Luki 13.18–19)
30Yesu i ǹʼbi sɛbɛ : « Kirinŋ wɔ Masabi ki fa nfɛnŋ po? Yi a ǹʼfa nfɛnŋ pyi? 31Ǹʼyɔ miŋ tu mutaridi daŋ#4.31 mutaridi daŋ : Mutaridi ki i jirinaŋ i, nwɔ̀ i ji-a ŋuŋ u, ŋì i bo-ri nufinŋ sun. Ǹʼkuru-i Isirayɛlitɔnŋ kiri wɔ bilanaŋ kiri bataa wu.. Niŋ daŋ ki kuru-i pwɔkulinŋ sun finŋ daŋ ki bataa wu. 32Nka a ǹʼfiri, ǹʼyɔ shɛnpo-a, ŋì i gbɛ fwuude nankɔ ru wɛɛlafinŋ kiri bataa sun. Ŋì i kanŋ ni po-ri a ra, fɔ kirinpɔli la ɲaannaanŋ ni i arì foo bo-ri ǹʼshiifɛ. »
33Yesu konaŋ kiri kali-i wulusuntalinŋ mwɔɔnna wu. Ntiŋ wuru bi kiri ɲaanbi-a a ramatɔnŋ kiri tɛ bi ri wu, kí wuru nwɔ̀ri ɲaantɔ-a. 34Ntiŋ wuru wulubi-a konaŋ kiri tɛ wulusuntalinŋ bali kì. A ntiŋ fa awɔ kalindaŋ kiri ta-ri ji arì cinancinŋ mani wɔ̀ ru, ntiŋ wuru niŋ wulusuntalinŋ kiri kɔri kiri bi-a kí tɛ.
Yesu i kirinŋ faa sinaŋ ki kaalipa-a
(Matiyu 8.23–27; Luki 8.22–25)
35Mìŋ shikaŋ bilana ki ru, Yesu i ǹʼbi awɔ kalindaŋ kiri tɛ : « Yi fwuu po baa ki kuŋ nu. »
36Kí i konaŋ ki tu niŋ mani nu nmaŋ. Ntiŋ wuru buŋ wɔ̀ ru, kalindaŋ kiri i tiri ntiŋ wu niŋ nu. Buŋ tɔri ri wuru kɔ́ɔ́ ki cɛfan. 37Faa sinaŋ i jɔrɔkɔ, ŋì i ju ki saa bo-ri buŋ ki ru, buŋ ki i faamaŋ ceeli-li ju ki ra. 38Yesu bili wuru buŋ ki kɔɔtɛ maŋ ki ru, ntiŋ i ɲinintan-ni. Ntiŋ ŋuniŋ ki bilimaan wuru ŋununbilifinŋ bɛɛ sun.
Ntiŋ wɔ kalindaŋ kiri i ta ntiŋ ŋmɛni, kí i ǹʼbi ntiŋ tɛ tu : « Kalimɔɔ, yibɛɛ ra beeni ju ki ru kaa, niŋ ábɛɛ ŋununsuntiri-ra kì wa? »
39Yesu i ŋmɛni, ntiŋ i jɛbi faa ki gbɛ, ntiŋ i ǹʼbi jukwululuŋ kiri tɛ, tu nini arì sunjɛri.
Niŋ bimaan ki ra, faa ki i tu, jukwululuŋ kiri i sunjɛri pilɛ.
40Niŋ kɔɔtɛ, Yesu i ǹʼbi awɔ kalindaŋ kiri tɛ : « Nfɛnŋ na, ábɛɛ i kɛni-ni, hali jiŋ, ábɛɛ bili-i míŋ na sun kì wa? »
41Kɛmi sinaŋ i de kalindaŋ kiri ru, ǹʼbotɔnsun i kí fɔn pa, kí i arìmaŋ nanɔri-ri : « Ka koŋ ka koŋ kwuru danwɔ, fɔ faa ki fa jukwululuŋ kiri fɔn i ntiŋ wɔ wulu lama-ni, yìrì i ǹʼtu-ri ntiŋ wɔ ra? »
Currently Selected:
Maraka 4: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
