Maraka 3

Yesu wɔ koŋ kene bi ki Nufaan jibi ki sun

(Matiyu 12.9–14; Luki 6.6–11)

1Jibi tɔri sun sɛbɛ, Yesu i de Yawutu kiri wɔ kalinfu bɛɛ ru. Shuru bɛɛ wuru nmaŋ, niŋ gbɛ tenŋ ki furumaan wuru-i. 2Koŋ wɔ̀ri wuru nmaŋ, nini wuru Yesu pɛrɛkɛ-a, tu ntiŋ koŋ kene Nufaan jibi ki sun, arì i pɔlimaŋ kila ntiŋ na.

3Yesu i ǹʼbi shuru gbɛ tenŋ furumaantiŋ ki tɛ tu : « Jɔrɔkɔ, ŋi i tu koŋ bataa ɲaanfɛ kwumaŋ. » 4Yesu i ǹʼbi kí tɛ tu : « Míŋ i ábɛɛ ranɔri-ra, ŋì i kɛɲɛ sariya ki wu, bi shɔɔrinŋ ma ki shɔ Nufaan jibi ki sun daa, bijɛ? Ŋi i koŋ mwu, walima ŋi i koŋ kilɛn? » Kí i arì gbansan.

5Yesu tɔnkwulumaan ki i kí bataa ɲaanfɛ shɛɛli tiri, kɔ́ɔ́ nutɔnubi ki fa kɔ́ɔ́ tɔɔnnufurubi ki i ntiŋ yaa kusɛbɛ. Ntiŋ i ǹʼbi shuru ki tɛ : « Nʼgbɛ ki rusɛni. »

Wú a gbɛ ki rusɛni-i, gbɛ ki i kene. 6Mìŋ manaanŋ tenŋ ki ru, Farinsiyɛnŋ kiri i po tiri. Kí fa Ɛrɔdi wɔ konanbi ki i ta arì manja, nwɔma arì i kilɛnka ɲaan ceeli Yesu ra.

Konaŋ mwɔɔnna na bi ki Yesu tɛ

7Yesu fa awɔ kalindaŋ kiri po san-i niŋ mani nu, kí i tiri Galile baa ki tɔnŋ na. Konaŋ mwɔɔnna i tiri ntiŋ fan. Niŋ konaŋ kiri ru, ǹʼbɛɛ ri wuru po-a Galile sɔɔta ki yɛrima ki ru, ǹʼbɛɛ ri i po-ri Yude sɔɔta ki ru, 8niŋ fa Yerusalɛmu fa Idumɛ kɛniŋ ki ru. Ǹʼtɔri i po-ri Yurudɛn baa ki kɔɔtɛ kɛniŋ kiri ru, niŋ fa Tiiri fa Sidɔnŋ tɔntɛ kili kiri ra sɛbɛ. Niŋ konaŋ mwɔɔnna ki ta wuru Yesu cɛfan, sabu kí ntiŋ wɔ kabakobi mamaan kiri wulu lama wuru-i.

9Yesu tu awɔ kalindaŋ kiri tɛ : « Á buŋ pyaanŋ ki bɛɛ bo ńʼtɔntɛ, nwɔma a konaŋ ki na ńʼfɔɔnka jitan, ŋí i de niŋ nu. » 10Ntiŋ i koŋ mwɔɔnna kene wɔ̀ tan wuru-i, niŋ ki ra, kiratɔnŋ kiri bataa wuru arì rukwulu tiri-ra ntiŋ tɛ, nwɔma arì i arì gbɛ pa ntiŋ na.

11Ɲinijɛtiŋ kiri ntiŋ ja-i waarinŋ wɔ̀ ru, kí i arì fɛɛn-ni ntiŋ kanŋ fɛ, kí i fali-li tu : « Miŋ i Kirinŋ Danshuru ki i! »

12Nka Yesu i ǹʼbi furu kí tɛ tu : « Míŋ i koŋ wɔ̀, á fa niŋ bi koŋ tɛ kì. »

Yesu wɔ cindaŋ bwununfuuli ki ɲaannashi bi ki

(Matiyu 10.1–4; Luki 6.12–16)

13Niŋ kɔɔtɛ, Yesu i tunpa tɔnŋ bɛɛ sun, ntiŋ i awɔ kalindaŋ kiri dɔri. Kí i na ntiŋ tɛ. 14Ntiŋ i koŋ bwununfuuli ɲaannashi kí ru, ntiŋ i nini dɔri tu awɔ cindaŋ ni, nini i tu ntiŋ fan, kí i ta-ri Kirinŋ wɔ wulu ki sunjo-ri. 15Ntiŋ i sotinbi wɔri kí tɛ, kí i so-ri ɲinijɛ kiri kalikali po san-i konaŋ kiri ru. 16Ntiŋ koŋ bwununfuuli wɔ̀ri ɲaannashi-i, nini tɔ kiri wuru kari i :

Simɔŋ, Yesu nwɔ̀ tɔye-i tu Pyɛɛri,

17niŋ fa Nsebede danshuru fuuli ki Yakuba fa Yuhana, Yesu i nini dɔri tu Bowanɛrisɛsi. Niŋ kɔri ki i tu, koŋ wɔ̀ri fa kirinfali po-i.

18Niŋ fa Andire,

fa Filipu,

fa Baritelemi,

Matiyu ŋì i bo Toma sun,

Alife danshuru Yakuba,

Tade,

niŋ fa Simɔŋ, nwɔ̀ wuru dɔri-ra tu Nselɔti#3.18 Nselɔti : Kɔri ki tu tinkili gbɛrinpatɔnŋ i.,

19niŋ fa Yudasi Isikariyɔti, nwɔ̀ na-i Yesu janfa.

Yesu wɔ mani nu tɔnŋ kiri ta bi ki ntiŋ pa

20Niŋ mamaan ki kɔɔtɛ, Yesu i jɛri ta kulu#3.20 kulu : Niŋ wuru Yesu jifinŋ kiri wɔ mani wulu bi-a ki.. Konaŋ mwɔɔnna i ta ntiŋ cɛfan niŋ mani nu sɛbɛ, fɔ ntiŋ fa awɔ kalindaŋ kiri wuru waaci kila-a, kí i nuŋ nu kì. 21Yesu wɔ mani nu tɔnŋ kiri niŋ nama-i waarinŋ wɔ̀ ru, kí i ta, tu arì ra ta ntiŋ pa tiri arì fan faan sun, sabu kí wuru ǹʼbi-a, tu julu a ji bo ntiŋ nu.

Yesu wɔ sotinbi ki pomaŋ ki

(Matiyu 12.22–23; Luki 11.14–23; 12.10)

22 Sariya kalimɔɔ wɔ̀ri po yiri wuru Yerusalɛmu, nini tu : « Bɛlinsebulu#3.22 Bɛlinsebulu i shitaanni tɔ ki bɛɛ ɛ. Ta shitaanni tɔ ki fɛ, ŋi i ka mani ka kɔri ki bataa kila. i wú ru, ɲinijɛ kiri ŋununtiŋ ki! Wú i ɲinijɛ kiri kalikali po san-a konaŋ ki ru Bɛlinsebulu wɔ so ki wu, ninwɔ̀ i ɲinijɛ kiri bataa ŋununtiŋ ki i. »

23Niŋ bimaan ki ra, Yesu i kí dɔri, ntiŋ i na ka wulusuntalinŋ ka bi kí tɛ tu : « Shitaanni a so shitaanni kalikali-i dɔɔkunŋ? 24Masabi woo masabi, a ǹʼkɛlinŋ tenŋ jɔrɔkɔ ǹʼkɛlinŋ tenŋ ki cɛfan, niŋ masabi ki a li. 25Kaniŋ woo kaniŋ, a ǹʼnu tɔnŋ kiri ji arìmaŋ kari-ra, niŋ kaniŋ ki a gwu. 26Á ǹʼtɔ tu shitaanni yɛri ki jɔrɔkɔmaan ji-i a yɛri ki cɛfan, tu ǹʼwɔ masabi ki rukilamaan a, ŋì a so sɔɔ-ɔ kì, ǹʼwɔ masabi ki a kɔ.

27Koŋ so-a de-i shurukoŋ wɔ fu ru, ŋi i ntiŋ gbɛfɛfinŋ ni shi kì, fɔ miŋ ntiŋ pa kɔli-i sun. A miŋ ntiŋ pa kɔli waarinŋ wɔ̀ ru, miŋ i so-a ntiŋ wɔ fu ki ru finŋ kiri bataa kini-i.

28Sɛli ki ra, míŋ i ǹʼbi-a ábɛɛ tɛ, ńʼtu konanmini wɔ bijɛ kiri bataa so-a tu-i ntiŋ tɛ, ŋì i ta bo ntiŋ wɔ Kirinŋ tɔ li wulu kiri sun. 29Nka koŋ woo koŋ Ɲiniwɔlinŋ ki tɔ ki li, niŋ bijɛ ki tu-a nintiŋ tɛ fyewu kì. Ntiŋ wɔ bijɛ ki a tu ntiŋ ŋununu waarinŋ bataa ru. » 30Yesu niŋ wulu ki bi wuru niŋ koŋ kiri tɛ, sabu kí ǹʼbi wuru tu ɲinijɛ ntiŋ nu.

Yesu ɲiŋ ki fa ntiŋ tindaŋ kiri

(Matiyu 12.46–50; Luki 8.19–21)

31Yesu wuru mani wɔ̀ ru, ntiŋ ɲiŋ ki fa ntiŋ pwaŋ kiri i ta niŋ mani nu, kí i ta tu tanŋ ki ra, kí i koŋ cin ntiŋ dɔri. 32Koŋ mwɔɔnna sɔɔ wuru niŋ mani nu, kí i Yesu rakwunu. Ǹʼbɛɛ ri i ǹʼbi ntiŋ tɛ : « Miŋ ɲiŋ ki fa nʼpwaŋ kiri tu-i tanŋ ki ra, kí i ǹʼtɛ á i á manja. » 33Yesu i kí rupwulu : « Nkɛnŋ fa nkɛnŋ míŋ ɲiŋ ki fa ńʼpwaŋ kiri? » 34Ntiŋ i a kankanfantɔnŋ kiri shɛɛli ta, ntiŋ tu : « Míŋ ɲiŋ ki fa ńʼpwaŋ kiri i kari kwumaŋ. 35Míŋ ɲiŋ ki fa ńʼpwanmari kiri fa ǹʼshuru kiri i kpeeri i, nwɔ̀ri i Kirinŋ dintɛ bi ki ma-a. »

Currently Selected:

Maraka 3: JOB

Highlight

Copy