Maraka 16

Yesu ŋmɛni bi ki

(Matiyu 28.1–8; Luki 24.1–12; Yuhana 20.1–10)

1 Nufaan jibi ki fwuudemaan ki kɔɔtɛ, Makidala Mariyamu fa Yakuba ɲiŋ Mariyamu, niŋ fa Salome i kinidifinŋ ŋuŋ ni sa, tu arì ta-a Yesu kwuu ki ɲinikɔri ta ki ru. 2Nufaan jibi ki sisarifuluntɔnŋ ki siira ki ru, kí i saali kiri ra saa ki shi sisɔli ki sun. 3Kí tirira ki, kí wuru arìmaŋ nanɔri-ra tu :

« Nkɛnŋ a ta faa sinaŋ ki kulunkulu san saali ki tɔnŋ ki ra yibɛɛ tɛ? »

4Kí ta-i myɛ saali ki tɛ waarinŋ wɔ̀ ru, kí tu arì maannashɛɛli, kí i ǹʼja tu niŋ faa ki kulunkulu sanmaan i saali ki tɔnŋ ki ra, faa ka dumiŋ ji gbɛ-ri kusɛbɛ.

5Kí i de ta ki ru, kí i ɲɔrɔkɔ bɛɛ sɔɔ ja arì pantɛ, jɛrɛbi sinaŋ fɔ i ji ntiŋ sun. Niŋ i bo kí kɛmikɔni kiri tɔnŋ sun kusɛbɛ.

6Nka ɲɔrɔkɔ ki tu kí tɛ : « Á fa kɛni kì. A ábɛɛ ji Nansarɛtitɔnŋ kiri wɔ Yesu ki ceeli-la, kí nwɔ̀ kpinkpi-i suu ki sun, ntiŋ kwumaŋ kì. Ntiŋ ŋmɛni-i. Kí ntiŋ bili wuru mani wɔ̀ ru, niŋ i kaa. 7Dɔnsaŋ, á ta ǹʼbi Pyɛɛri fa kalindaŋ pyɛ kiri tɛ tu, ntiŋ tiri ábɛɛ jɛŋ Galile sɔɔta ki ru. Ábɛɛ ra ta ntiŋ ja niŋ mani nu nmaŋ, miŋ tu ntiŋ ǹʼbi wuru ábɛɛ tɛ ɲaan wɔ̀ tɛ. »#Maraka 14.28.

8Mari kiri kɛnintɔnkɔni kiri i bili po san saali ki ru. Kí ta bi tɔri bi koŋ tɛ kì, sabu kí wuru kɛni-na.

Yesu wɔ yɛri ji bi ki Makidala Mariyamu wu

(Matiyu 28.9–10; Yuhana 20.11–18)

[9Yesu ŋmɛnimaan ki kɔɔtɛ, Nufaan jibi ki sisarifuluntɔnŋ ki siira ki ru jona, ntiŋ a yɛri ji-i Makidala Mariyamu wu. Ntiŋ ɲinijɛ jɔnpɔni kalikali po san wuru niŋ mari ki ru. 10Mariyamu i ta niŋ ɲaanbi Yesu wɔ cindaŋ kiri tɛ. Nini ɲaannuŋunumaan wuru-i kusɛbɛ, kí i ŋuntan-ni. 11Kí ǹʼnama-i waarinŋ wɔ̀ ru tu Yesu ɲaninkulutɔnŋ i, tu Mariyamu ntiŋ ja, kí bili niŋ na fyewu kì.

Yesu wɔ yɛri ji bi ki awɔ cindaŋ koŋ fuuli wu

(Luki 24.13–35)

12Niŋ kɔɔtɛ, Yesu wɔ kalindaŋ fuuli wuru tiri-ra saa fan, ntiŋ i a yɛri ji kí wu ɲaan tɔri tɛ. 13Kí i arì pwulu, kí i na niŋ bi cindaŋ pyɛ kiri tɛ, nini bili nini na sɛbɛ kì.

Yesu wɔ yɛri ji bi ki awɔ cindaŋ koŋ bwununtenŋ ki wu

(Matiyu 28.16–20; Luki 24.36–49; Yuhana 20.19–23; Mabikiri 1.6–8)

14Niŋ kɔɔtɛ, Yesu i a yɛri ji awɔ cindaŋ bwununtenŋ ki wu, ŋì i kí tu nufinŋ nu-a. Ntiŋ i jɛbi kí gbɛ arɔɔ bilinabalibi ki fa arɔɔ ɲakili furubi ki bira, sabu nwɔ̀ri ntiŋ ja-i a ŋmɛnimaan ki kɔɔtɛ, kí bili nini na kì.

15Ntiŋ tu kí tɛ : « Á ta juniɲa mani ki bataa ru, á i ta Wulujii ki sunjo konaŋ ki bataa tɛ. 16A konwɔtiŋ bili ǹʼna, ntiŋ i wu, nintiŋ a a mwu, nka koŋ woo koŋ bili ǹʼna kì, nintiŋ a a mwu kì. 17Nwɔ̀ri ra na bili ǹʼna, nini a na tɔ taanmashɛ wɔ̀ri ra, nini i kari i : Kí a na ɲinijɛ ri kalikali po san-ni konaŋ kiri ru míŋ tɔ ra. Kí i wulubi-ri shiya tɔri ru wulu lu. 18Kí a na myɛɛn ni pa-ri arì gbɛɛra, walima kí i baaju mwunu-ni, ŋì a bi tɔri ma kí wu kì. Kí a na arì gbɛ bili kiratɔnŋ ni sun, kí i Kirinŋ nafɛ-ri nini tɛ, kí i kí kene-ni. »

Yesu tunpa bi ki kirinpɔli ki ra

(Luki 24.50–53; Mabikiri 1.9–11)

19Ŋuntiŋ ki niŋ wulu ki bi kɔ-i awɔ kalindaŋ kiri tɛ mani wɔ̀ ru, ntiŋ i fɛshi san kí ra, ntiŋ i tiri kirinpɔli ki ru, ntiŋ i ta sɔɔ Tiŋ Kirinŋ pantɛ. 20Kalindaŋ kiri i ta Kirinŋ wɔ wulu ki sunjo mani kiri bataa ru. Ŋuntiŋ Yesu wuru ye-a kí tɛ niŋ baara ki ra. Ntiŋ i so wɔri kí tɛ, kí i so kabakobi ri ma-i arɔɔ Kirinŋ wulu ki sunjomaŋ ki ru, nwɔ̀ri i ǹʼji-a tu niŋ wulu ki sɛli i.]

Currently Selected:

Maraka 16: JOB

Highlight

Copy