Maraka 15

Kí ta-i Yesu wu Pilati ɲaanfɛ

(Matiyu 27.1–2, 11–14; Luki 23.1–5; Yuhana 18.28–38)

1Kabi siira jona, Kirinŋ tɛ sarakawɔrɔtɔnŋ kiri ŋununtiŋ kiri fa cɛɛnni kiri fa sariya kalimɔɔ kiri fa Yawutu kiri wɔ kitikwurutoŋ kwuru ki bataa i manja tan. Kí i Yesu kɔli, kí i ta ntiŋ de faantiŋ Pilati gbɛfɛ.

2Pilati i Yesu ranɔri tu : « Minki i Yawutu kiri wɔ masa ki i wa? »

Yesu i ntiŋ nupwulu tu : « Ábɛɛ yɛri ki ǹʼbi-i kaa dɛ! »

3Kirinŋ tɛ sarakawɔrɔtɔnŋ kiri ŋununtiŋ kiri i wulu mwɔɔnna bi ntiŋ sun, tu ntiŋ pɔli nwɔ̀ri ru. 4Pilati tu ntiŋ tɛ sɛbɛ : « Miŋ wulu ki rupwulu-la kì wa? Kí i wulu wɔ̀ri bi-a miŋ mwɔɔn nu, miŋ tɔɔn yìrì ru kì wa? »

5Nka Yesu wulu tɔri bi kili kì. Niŋ i bo Pilati tɔnŋ sun.

Kiti ki fɛɛn bi ki Yesu sun

(Matiyu 27.15–26; Luki 23.13–25; Yuhana 18.39 ŋì i ta bo 19.16)

6Jiri woo jiri, a Paki ɲaannabyɛ ki so-ri, a Yawutu kiri nkasudaŋ wɔ̀ rafɛ-ri Pilati gbɛ, ntiŋ wuru niŋ pani-na. 7Shuru bɛɛ wuru nmaŋ, nwɔ̀ tɔ wuru tu Barabasi, niŋ fa a kaashi koŋ kaanmaan kiri wuru nkasu ki ru, sabu kí koŋ kilɛn wuru-i. 8Konaŋ ki i ta Pilati tɛ, kí i ta ǹʼbi ntiŋ tɛ tu : « Jiri woo jiri, ábɛɛ ji-a bi wɔ̀ ma-a yibɛɛ tɛ Paki ɲaannabyɛ ki sun, á niŋ ma yi tɛ. »

9Pilati i kí ranɔri tu : « Ábɛɛ i ǹʼtɛ míŋ i Yawutu kiri wɔ masa ki pani wa? »

10Pilati ǹʼtɔ wuru tu Kirinŋ tɛ Sarakawɔrɔtɔnŋ kiri ŋununtiŋ kiri Yesu de afinŋ gbɛfɛ ɲaannajuubi ra. 11Nka Kirinŋ tɛ sarakawɔrɔtɔnŋ kiri i konaŋ ki ruye, tu kí Barabasi rafɛ Pilati gbɛ, tu ntiŋ niŋ pani.

12Pilati i konaŋ ki ranɔri sɛbɛ tu : « Ábɛɛ i koŋ wɔ̀ dɔri-ra tu Yawutu kiri wɔ masa, ŋí nfɛnŋ ma niŋ wu? »

13Kí i fali kí i ǹʼbi tu : « Á wú kpinkpi suu sun! »

14Pilati i kí ranɔri sɛbɛ tu : « Wú bijɛ danwɔ ma? »

Kí i fali, ŋì i fwuu a jɔnɔ ki sun tu : « Á wú kpinkpi suu sun! »

15Pilati wuru ǹʼtɛ a i konaŋ ki dintɛ bi ki wɔ̀ ma, niŋ na, ntiŋ i Barabasi pani. Ntiŋ i kí po Yesu bwɔ sun suulinŋ na, ntiŋ i niŋ de surudashi kiri gbɛfɛ tu, kí ta ntiŋ kpinkpi suu sun.

Yesu cɔɔri bi ki surudashi kiri gbɛ

(Matiyu 27.27–31; Yuhana 19.2–3)

16Surudashi kiri i ta Yesu wu Yude sɔɔta ki jɛntɔnŋ ki wɔ mani ki ciiru. Kí i surudashi kwuru pyɛ kiri bataa rakɔli niŋ mani nu. 17Kí i jɛrɛbi kilɛn bo Yesu yɛɛra, kí i cii tan ye ntiŋ ŋununa bunfila a.

18Niŋ kɔɔtɛ, kí i tu ntiŋ co-a tu : « Á daali, Yawutu ri wɔ masa. »

19Kí i tu kí i ntiŋ bwɔ-ri a ŋuniŋ ki ra bali la, kí i lɛju ki bo-ri ntiŋ sun, niŋ fa kí i arì kwushiri-ri ntiŋ fɛ, miŋ tu kí a ji ntiŋ gbɛ-a. 20Kí yɛ ki tan bo kɔ-i ntiŋ sun waarinŋ wɔ̀ ru, kí i jɛrɛbi sinaŋ kilɛn ki san ntiŋ sun, kí i ntiŋ yɛri ki wɔ juulinŋ kiri bo ntiŋ sun nmaŋ. Kí i po tiri ntiŋ wu kpinkpimaŋ ki ru.

Yesu kpinkpi bi ki suu ki sun

(Matiyu 27.32–44; Luki 23.26–43; Yuhana 19.17–27)

21Kí tirira ki Yesu wu kpinkpimaŋ ki ru, kí i shuru bɛɛ yirira ja awɔ juunŋ. Niŋ shuru ki tɔ wuru tu Simɔŋ. Sirɛnitɔnŋ wuru-i. Alɛkisandiri fa Urufusu tiŋ ki wuru-i. Surudashi kiri i niŋ karaba tu niŋ Yesu kpinkpisuu ki shi. 22Kí i ta Yesu wu mani bɛɛ ru, nwɔ̀ tɔ i tu Gologota, ninwɔ̀ kɔri ki i tu Ŋununwɔmaŋ i. 23Kí i jaŋ bɛɛ ɲaanmi dunfɛnŋ wu, kí i niŋ wɔri ntiŋ tɛ, tu ntiŋ ǹʼmwunu. Nka Yesu a tu ntiŋ i ǹʼmwunu kì.

24Niŋ kɔɔtɛ, kí i ntiŋ kpinkpi suu ki sun, kí i baalinŋ bili, nwɔma arì tenŋ tenŋ ki fɔn i arì kila wɔ tɔ ntiŋ wɔ juulinŋ kiri ra. 25Kí i ntiŋ kpinkpi suu ki sun sunŋ nukwulu ki sun.

26Kí i ntiŋ kpinkpi ŋuŋ ki sɛbɛ tu

Yawutu kiri wɔ masa ki.

27Kí i bi kulinŋ matɔnŋ fuuli kpinkpi suu tɔri ri sun ntiŋ kankantɛ. Tenŋ kpinkpi wuru ntiŋ pantɛ, tenŋ i ji ntiŋ nɔrintɛ. [ 28Niŋ ɲaan ki tɛ, Sɛbɛ ki nwɔ̀ bi-i tu : « Ǹʼbo-i bi kulinŋ matɔnŋ kiri fan », niŋ wulu ki i nafaa.]#Esayi 53.12; Luki 22.37.

29Saa fwuudetɔnŋ kiri wuru arì ŋuniŋ kiri ruti-a, kí i Yesu ki-ri tu : « Dɔnsaŋ, minwɔ̀ ǹʼbi-i tu miŋ a so Kirinfusinaŋ ki gwu-i, ŋi i tan ǹʼŋunaŋ i sunŋ byaŋ ciiru, 30nʼyɛri mwu, jɛri san kpinkpisuu ki sun ni! »

31Mìŋ ɲaan tenŋ ki tɛ, Kirinŋ tɛ sarakawɔrɔtɔnŋ kiri ŋununtiŋ kiri fa Sariya kalimɔɔ kiri yɛrima kiri i yɛtan bo-ri Yesu sun, kí i ǹʼbi-ri arìmaŋ tɛ tu :

« Wú koŋ mwɔɔnna mwu-i, nka wú so a yɛri mwu-i kì! 32A wú ji Kirinŋ Ɲaannakonshimaan ki i, Isirayɛli wɔ masa ki, tu wú jɛri san kpinkpisuu ki sun, a niŋ ma, yibɛɛ niŋ ja, yibɛɛ ra bili wú ra! »

Kí bi kulinŋ matɔnŋ wɔ̀ri kpinkpi wuru suu ki sun Yesu tɔntɛ, nini yɛrima kiri wuru ntiŋ ki-a.

Yesu beŋ ki

(Matiyu 27.45–56; Luki 23.44–49; Yuhana 19.28–30)

33Sunŋ ki so-i ŋununu waarinŋ wɔ̀ ru, mancinŋ i bo kɛniŋ ki mani ki bataa ru, fɔ ŋì i so sunŋ ki lɛɛri byantɔnŋ ki sun. 34Sunŋ ki lɛɛri byantɔnŋ ki nafaa waarinŋ wɔ̀ ru, Yesu i fali faanna, ntiŋ i ǹʼbi arɔɔ wulu ki ru tu : « Eloyi, Eloyi, lama sabakatani? » Niŋ kɔri ki tu : « Ńʼwɔ Kirinŋ, ńʼwɔ Kirinŋ, nfɛnŋ na ábɛɛ i míŋ tenŋ tu? »#Shu kiri 22.2.

35Koŋ wɔ̀ri wuru niŋ mani nu, nini bɛɛ ri niŋ fali wulu ki rama-i waarinŋ wɔ̀ ru, kí tu : « Á ǹʼshɛɛli, wú i Kirinŋ wɔ cintɔnŋ Eli#15.35 Eli : nʼbɛɛ ri tu Iliya. dɔri-ra. » 36Niŋ koŋ kiri ru, koŋ tenŋ i bili ta fwuu shi, ntiŋ i ǹʼde dunfɛnŋ lɔmaan nu, ntiŋ i ǹʼye bali ŋmani na, ntiŋ i ǹʼcu Yesu tɔnŋ ki fɛ, tu ntiŋ ǹʼmwunu. Niŋ shuru ki tu : « Yi tu, yi i ǹʼshɛɛli, a Eli ji-a na wú jɛri san kpinkpisuu ki sun. »

37Nka, Yesu i fali faanna, ntiŋ i ɲinisan.

38Kirinfusinaŋ ki faninmwuŋ juulinŋ ki i gbɛri san amaŋ na ǹʼfaninmwuŋ fuuli, #15.38 Juulinŋ ki gbɛri-i a faninmwuŋ fuuli. Niŋ kɔri ki i tu Yesu ra bilinatɔnŋ kiri bataa ra so de-i, kí i saraka wɔri Kirinŋ tɛ. Tu Yesu beŋ ki saa wɔri a ra bilinatɔnŋ kiri bataa tɛ tu kí i so Kirinŋ sun. ŋì i shi cuunŋ fɔ fwuniŋ sun.

39Surudashi jalitiŋ wɔ̀ tu wuru Yesu ɲaanfɛ, niŋ ntiŋ beenika ki ja-i waarinŋ wɔ̀ ru, niŋ i ǹʼbi tu : « Sɔsɔɔlinŋ ǹʼnu kì, koŋ ka wuru Kirinŋ Danshuru ki yɛrima ki i ncinŋ. »

40Mari bɛɛ ri tu wuru mani narimwuŋ sɛbɛ, kí i bi kiri shɛɛli-li. Niŋ mari kiri ru, Makidala Mariyamu wuru nmaŋ, ǹʼfa Mariyamu, ninwɔ̀ wuru Yakuba pyaanŋ fa Yose ɲiŋ i, niŋ fa Salome. 41Waarinŋ wɔ̀ ru Yesu wuru Galile sɔɔta ki ru, niŋ mari kiri ǹʼpa wuru ntiŋ cɛfan, kí i ye-ri ntiŋ tɛ. Mari mwɔɔnna tɔri ri wuru kí fan, nwɔ̀ri na wuru Yesu fan Yerusalɛmu.

Yesu kwuu ye bi ki

(Matiyu 27.57–61; Luki 23.50–56; Yuhana 19.38–42)

42-43Bilana ki so-i, Yusufu wɔ̀ wuru po-a Arimate kili ki ru, niŋ i a ŋununfuru, ntiŋ i ta Yesu kwuu ki rafɛ Pilati gbɛ, sabu niŋ sisarifuluntɔnŋ ki wuru-ra ji Nufaan jibi ki i. Yusufu wuru tumaŋ sinaŋ nu Yawutu kiri wɔ kitikwurutoŋ ki ru. Mìntiŋ yɛri ki wuru Kirinŋ wɔ Masabi ki na ki saarashɛɛli-la. 44Yesu beenimaan ki jona ninkunŋ, niŋ i bali Pilati ra. Ntiŋ i surudashi jalitiŋ ki dɔri, ntiŋ i na niŋ nanɔri a Yesu beeni waari ki ji cin kɔ. 45Pilati surudashi jalitiŋ ki dariwulu lama-i waarinŋ wɔ̀ ru, ntiŋ i kila ntiŋ i a tu, tu Yusufu ta Yesu kwuu ki shi. 46Yusufu i bininkanŋ fɔ sa, ntiŋ i ta Yesu kwuu ki jɛri san kpinkpisuu ki sun, ntiŋ i ǹʼsunye, ntiŋ i ta ǹʼye ta ru, ntiŋ ninwɔ̀ san wuru faa ru. Ntiŋ i faa sinaŋ bɛɛ kulunkulu la ta ki tɔnŋ na.

47Makidala Mariyamu fa Yose ɲiŋ Mariyamu wuru kí shɛɛli-la Yesu kwuu ki yemaŋ ki ru.

Currently Selected:

Maraka 15: JOB

Highlight

Copy