Maraka 11

Yesu a de Yerusalɛmu sufaniŋ sun

(Matiyu 21.1–11; Luki 19.28–40; Yuhana 12.12–19)

1Yesu fa a cɛfantɔnŋ kiri ji-i juu myɛ na-a Yerusalɛmu tɛ, kí i so Bɛtifagɛ, fa Bɛtani kili kiri ra Olinfyetɔnŋ ki tɔntɛ. Yesu i awɔ kalindaŋ fuuli bo ta arì jɛŋ. 2Ntiŋ tu kí tɛ : « Á tiri á jɛŋ kili ki ra. Niŋ kili ki demantɔnŋ ki ra, ábɛɛ ra ta sufaniŋ kpirinŋ bulaaŋ bɛɛ kɔli ja, koŋ tunpa ja-i nwɔ̀ sun sun kì, á i ǹʼpili na ńʼtɛ. 3A koŋ ja ji á ranɔri, tu á ta-a nfɛnŋ ma ǹʼwu, á i ǹʼbi tu : ‹ Yibɛɛ ŋuntiŋ ki maku i ǹʼna. A ntiŋ kɔ ǹʼna, ntiŋ a ǹʼpwulu wɔri ábɛɛ tɛ. › »

4Yesu wɔ kalindaŋ kiri i tiri, kí i ta fa sufaniŋ kpirinŋ bulaaŋ ki kɔli-i fu bɛɛ tɔnŋ na saa ki kankantɛ. Kí ji-i ǹʼpili-la, 5koŋ wɔ̀ri wuru niŋ mani ki ru, nini i ǹʼbi : « Ábɛɛ ka sufaniŋ bulaaŋ ka pili-la nfɛnŋ na? »

6Yesu wulu wɔ̀ bi de wuru kí daru, kí i niŋ bi kí tɛ. Kí i ncusun kí i tiri ǹʼwu. 7Kí i tiri sufaniŋ bulaaŋ ki wu Yesu tɛ. Kí i arɔɔ juulinŋ kiri bo ǹʼbwɔ sun. Yesu i tunpa ǹʼsun.

8Koŋ mwɔɔnna i arɔɔ juulinŋ ni bili-li ntiŋ jɛŋ saa ki sun, ǹʼtɔri ri i da ri yali-li, kí i nini bili-li saa ki sun. 9Nwɔ̀ri ǹʼpa wuru Yesu jɛŋ, niŋ fa nwɔ̀ri ǹʼpa wuru ntiŋ kɔɔtɛ, nini wuru fali-la, kí i ǹʼbi-ri tu :

« Yibɛɛ i Kirinŋ gbɛ-a,

nwɔ̀tiŋ i na-a Ŋuntiŋ ki tɔ ra, Kirinŋ baraka de niŋ nu!

10Kirinŋ baraka de masabi naanna ki ru,

yibɛɛ tiŋ Dawuda wɔ masabi ki.

Sobataatiŋ Kirinŋ gbɛ kirinpɔlila mani narimaŋ kiri ru. »#Shu kiri 118.25.

11Yesu de-i Yerusalɛmu waarinŋ wɔ̀ ru, ntiŋ i ta Kirinfusinaŋ ki ru, ntiŋ i ǹʼmani ki bataa rufɔɔ. Niŋ kɔɔtɛ, ntiŋ fa awɔ cindaŋ bwununfuuli ki i tiri Bɛtani kili ki ra, sabu sunŋ ki wuru juu fyiri-ra kɔ.

Shɔ jirinŋ ki danka bi ki

(Matiyu 21.18–19)

12Niŋ sisarifuluntɔnŋ ki, kí ji-i po san-a Bɛtani waarinŋ wɔ̀ ru, bɛɛ i kwulu Yesu ra. 13Yesu i shɔ jirinŋ#11.13 shɔ jirinŋ : Isirayɛlitɔnŋ kiri wɔ shɔ ki ji i kaan-na. Nɛŋ i ji ǹʼdaŋ ki ru ŋì i fwuu yibɛɛ tɛ wɔ̀ kiri sun. cɔmaan bɛɛ ja mani narimaŋ nu, ntiŋ i ta ǹʼnashɛɛli daŋ kila bira ǹʼna. Nka ntiŋ so-i jirinŋ ki fɛ waarinŋ wɔ̀ ru, ntiŋ daŋ ja ǹʼna da ciniŋ kì, sabu shɔ jirinŋ kiri pa waari so-ri sun kì.

14Yesu i ǹʼbi shɔ jirinŋ ki tɛ : « Koŋ fa miŋ daŋ ki nu kili kì. »

Ntiŋ wɔ kalindaŋ kiri i niŋ nama.

Jɔɔ tantɔnŋ kiri kalikali bi ki Yesu gbɛ

(Matiyu 21.12–17; Luki 19.45–48; Yuhana 2.13–22)

15Kí so-i Yerusalɛmu, Yesu i ta Kirinfusinaŋ ki ra. Jɔɔ tantɔnŋ wɔ̀ri fa kusatɔnŋ wɔ̀ri wuru nmaŋ, ntiŋ i a bo nini kalikali sun. Ntiŋ i wari rucinitɔnŋ kiri wɔ tabali kiri curu fɛɛn, ntiŋ i kilaaŋ jutɔnŋ kiri wɔ sɔɔfinŋ kiri curu fɛɛn. 16Ntiŋ a tu koŋ i de jɔɔfinŋ wu Kirinfusinaŋ ki kaniŋ ki sun kili kì. 17Niŋ kɔɔtɛ, ntiŋ i kí kali tu : « Ǹʼsɛbɛ-i Kirinŋ wɔ wulu sɛbɛ ki ru tu : ‹ Mɔ́ɔ́n fu ki a na ji míŋ nafɛmaŋ i shiya ki bataa gbɛ. ›#Esayi 56.7; Yeremi 7.11. Nka ábɛɛ ǹʼji-i kwunŋ ni nadumaŋ i. »

18Kirinŋ tɛ sarakawɔrɔtɔnŋ ŋununtiŋ kiri fa Sariya kalimɔɔ kiri niŋ nama-i waarinŋ wɔ̀ ru, kí i kilɛnka ɲaan ceeli-li Yesu ra. Kí wuru kɛni-na Yesu jɛŋ, sabu ntiŋ wɔ kalinŋ tanka ɲaan ki di wuru konaŋ ki tɛ kusɛbɛ.

19Sunŋ ki fyiri-i waarinŋ wɔ̀ ru, Yesu fa awɔ kalindaŋ kiri i po san kili ki ru.

Yesu wɔ wulusuntalinŋ ki shɔ jirinŋ furumaan ki bi ki sun

(Matiyu 21.20–22)

20Niŋ sisarifuluntɔnŋ siira jona, Yesu fa awɔ kalindaŋ kiri fwuudera, kí i shɔ jirinŋ ki furumaan ja, fɔ ŋì i jɛri ǹʼkanaŋ kiri fan. 21Wulu wɔ̀ bi wuru shɔ jirinŋ ki tɛ, Pyɛɛri ɲakili i bo niŋ tɛ. Ntiŋ tu Yesu tɛ tu : « Kalimɔɔ, ábɛɛ shɔ jirinŋ wɔ̀ danka-i, á ǹʼfurumaan ki shɛɛli. »

22Yesu i ǹʼbi awɔ kalindaŋ kiri tɛ : « Á bili Kirinŋ na. 23Sɛli ki ra, koŋ finŋ woo finŋ a ǹʼbi ka tɔnŋ ka tɛ : ‹ Jɔrɔkɔ san ka mani ka ru, ŋi i ta nʼyɛri kee bo wɛɛlufinju ki ru ›, ntiŋ i bili ǹʼna, tu afinŋ nwɔ̀ ki bi tu niŋ a ma, a ntiŋ sii ǹʼna kì, niŋ a ma ntiŋ tɛ. 24Niŋ ki ra, míŋ a ǹʼbi ábɛɛ tɛ tu, a ábɛɛ ji Kirinŋ nafɛ-a finŋ ki bɛɛ bira, á i ǹʼbo á ciiru tu niŋ finŋ ki juu ábɛɛ gbɛ kɔ, Kirinŋ a niŋ finŋ ki wɔri ábɛɛ tɛ. 25Ábɛɛ ja jɔrɔkɔ tu, tu á ra Kirinŋ nafɛ, ábɛɛ ɲakili ja bo, tu koŋ pɔli ábɛɛ gbɛ, á niŋ pɔli ki tu ntiŋ tɛ, nwɔma ábɛɛ Tiŋ wɔ̀ i kirinpɔli ki ra, niŋ i ábɔɔ bijɛ kiri tu á tɛ. 26[Nka a ábɛɛ ji koŋ pyɛ kiri wɔ pɔli kiri tu-a kí tɛ kì, ábɛɛ tiŋ wɔ̀ i kirinpɔli ki ra, niŋ a ábɔɔ bijɛ kiri tu á tɛ kì.] »

Yesu wɔ faan ki pomaŋ ki bi ki

(Matiyu 21.23–27; Luki 20.1–8)

27Yesu fa awɔ kalindaŋ kiri i arì pwulu na Yerusalɛmu sɛbɛ. Ŋì i Yesu tu a maanni maanni de-a Kirinfusinaŋ ki ru, Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri, niŋ fa Yawutu cɛɛnni kiri i arì kpari ntiŋ tɛ. 28Kí i ntiŋ nanɔri : « Miŋ bi wɔ̀ri ma-a, miŋ yìrì ma-a sotinbi danwɔ wu? Nkɛnŋ niŋ sotinbi ki wɔri miŋ tɛ? »

29Yesu i kí rupwulu tu : « Míŋ a nanɔri tenŋ pe bantenŋ tan ábɛɛ ra, ábɛɛ ja ji niŋ nupwulu, míŋ a kila ŋí i ńʼwɔ sotinbi ki wɔrɔtɔnŋ ki bi ábɛɛ tɛ. 30Nkɛnŋ Wutɔnŋ Yuhana cin-ni, tu ntiŋ konaŋ kiri wu? Kirinŋ daa konaŋ ni? Á ńʼwɔ wulu ki rupwulu. »

31Niŋ na, kí i ǹʼbi arìmaŋ tɛ tu : « A yibɛɛ ǹʼbi tu Kirinŋ i, ntiŋ a yibɛɛ ranɔri tu nfɛnŋ na yibɛɛ bili Yuhana na kì. 32Nka yibɛɛ ǹʼbi tu konaŋ i, niŋ i ji-a juu. » Kí wuru kɛni-na konaŋ kiri jɛŋ, sabu konaŋ ki bataa gbɛ, Yuhana wuru Kirinŋ wɔ cintɔnŋ sɛlɛsɛli i. 33Niŋ ɲaan ki tɛ, kí i ǹʼbi Yesu tɛ tu : « Yibɛɛ ǹʼtɔ kì. »

Yesu tu : « Niŋ na, konwɔtiŋ sotinbi ki wɔri-i, míŋ i bi kari ma-ni, míŋ yɛrima ki a niŋ bi ábɛɛ tɛ kì. »

Currently Selected:

Maraka 11: JOB

Highlight

Copy