Maraka 12
12
Yesu wulusuntalinŋ wɔ̀ bi-i jikaantɔnŋ jɛ kiri bi sun
(Matiyu 21.33–46; Luki 20.9–19)
1Niŋ kɔɔtɛ Yesu i wulusuntalinŋ ni bi-ri kí tɛ tu : « Koŋ bɛɛ ɛrɛnsɛnŋ ji bo-i, ntiŋ i ǹʼnakuuli. Ntiŋ i ta san, ntiŋ i ɛrɛnsɛnŋ ju sanmaŋ ki ramɔni, ntiŋ i nangbaalinŋ bwɔ ǹʼɲaannasuutɔnŋ kiri tɛ. Niŋ kɔɔtɛ, ntiŋ i ɛrɛnsɛnŋ ji ki wɔri bunsanŋ na baara matɔnŋ bɛɛ ri tɛ. Ntiŋ i tiri wɔru. 2Ɛrɛnsɛnŋ kilɛn waari ki na-i so, ntiŋ i awɔ joŋ ki bɛɛ bo na ɛrɛnsɛnŋ ji ki baara matɔnŋ kari tɛ, tu kí awɔ ɛrɛnsɛnŋ kilɛn lu ki wɔri a tɛ. 3Kí i niŋ joŋ ki pa, kí i ǹʼbwɔ, kí i ǹʼgbɛwɔ bo tiri. 4Ɛrɛnsɛnŋ jitiŋ ki i joŋ tɔri bo na kí tɛ, kí i niŋ bwɔ a ŋununa, kí i wú ki, kí i wú rufyɛ. 5Jitiŋ ki i koŋ tɔri bo ta kí tɛ sɛbɛ, kí i niŋ kilɛn. Ntiŋ i joŋ mwɔɔnna tɔri cin ta kí tɛ. Kí i ǹʼbɛɛ ri bwɔ, kí i ǹʼbɛɛ ri kilɛn.
6Danshuru tenŋ wɔ̀ tu-i jitiŋ ki gbɛ, ninwɔ̀ bidi wuru ntiŋ tɛ kusɛbɛ, ntiŋ i niŋ bo ta kí tɛ ǹʼnakɔɔra ki i. 7Nka ɛrɛnsɛnŋ ji ki baara matɔnŋ kiri i ǹʼbi arìmaŋ tɛ tu : ‹ Mìŋ ka i kanishitɔnŋ ki i, á na, yi wú kilɛn, nwɔma kani ki i ji yi wɔ. › 8Kí i ntiŋ pa, kí i ntiŋ kilɛn, kí i ntiŋ kwuu ki kee ɛrɛnsɛnŋ ji ki kɔɔtɛ. »
9Yesu tu : « Niŋ na, ɛrɛnsɛnŋ jitiŋ ki a na nfɛnŋ ma? Ntiŋ a ta ɛrɛnsɛnŋ ji ki baara matɔnŋ kari bataa kilɛn, ntiŋ i baara matɔnŋ tɔri ri ceeli bo ɛrɛnsɛnŋ ji ki ru. 10Ábɛɛ ka mani ka kali Kirinŋ wɔ wulu sɛbɛ ki ru kì wa? Ǹʼbi-i tu :
‹ Fu tantɔnŋ kiri arì kaan-a kwɔ wɔ̀ tɛ,
Kirinŋ ninki ji-i awɔ fu ki nɔnkɔnŋ sun kwɔ shɔɔrinŋ ki i.#Shu kiri 118.22–23.
11Niŋ bi kiri bataa po-i Ŋuntiŋ ki ru,
yìrì i ji botɔnsunbi ri i yibɛɛ ɲaanna. › »
12Yawutu jɛntɔnŋ kiri wuru paka ɲaan ceeli-la Yesu ra, sabu kí ǹʼtɔ wuru tu Yesu ka wulu ka bi wɔri-ri arìbɛɛ tɛ. Nka, kí wuru kɛni-na konaŋ ki jɛŋ, niŋ ki ra, kí i tiri, kí i ntiŋ tu nmaŋ.
Yesu wulu wɔ̀ bi-i lanpoŋ sali bi ki sun
(Matiyu 22.15–22; Luki 20.20–26)
13Kí i ta Farinsiyɛnŋ kiri fa Ɛrɔdi wɔ tondaŋ kiri bɛɛ ri bo na Yesu tɛ, nwɔma nini i na wulu curu de ntiŋ daru, arì i so pa ŋuŋ kila-i ntiŋ na. 14Kí i na ǹʼbi ntiŋ tɛ : « Kalimɔɔ, yibɛɛ ǹʼtɔ-i tu ábɛɛ sɛli ki bi-a. Koŋ tɔri tenŋ jɛŋ kɛmi ncusun-a ábɛɛ i a san áwɔ sɛli ki sun kì, sabu ábɛɛ koŋ san-a koŋ nu kì. Ábɛɛ i konaŋ ki kali-la Kirinŋ saa wɔ̀ ra, niŋ fɔɔmaan yɛ. Yibɛɛ i ábɛɛ ranɔri-ra, ǹʼfu-i koŋ i ɲinisa sali wɔri-ri Ɔrɔmu masa Sensaari tɛ daa, walima ǹʼfu kì? Yi kakan yi i ǹʼsali daa, walima yi kakan yi i ǹʼsali kì? »
15Yesu i ǹʼtɔ tu wulufuulibitiiri i, ntiŋ tu kí tɛ tu : « Nfɛnŋ na, ábɛɛ i míŋ tɔnsunpa-ri. Á na warifɔ peeraŋ tenŋ wu ńʼtɛ, ŋí ǹʼshɛɛli. »
16Kí i na wari peeraŋ tenŋ wu. Yesu i ǹʼmwu, ntiŋ i kí ranɔri : « Nkɛnŋ miniŋ fa nkɛnŋ gbɛta wari ki sun kaa? »
Kí i ntiŋ nupwulu tu Ɔrɔmu masa ki wɔ i.
17Niŋ na, Yesu i ǹʼbi kí tɛ tu : « Á masa ki wɔ ki wɔri masa ki tɛ, á i Kirinŋ wɔ ki wɔri Kirinŋ tɛ. »
Niŋ wulu ki i bo kí tɔnŋ sun kusɛbɛ.
Koŋ beenimaan kiri ŋmɛni bi ki
(Matiyu 22.23–33; Luki 20.27–40)
18 Sadusiyɛnŋ kiri wuru kpeeri i, nwɔ̀ri bili-li konkwuu kiri ŋmɛnibi ki ra kì. Nini bɛɛ ri i arì kpari Yesu tɛ, kí i ntiŋ nanɔri : 19« Kalimɔɔ, Kirinŋ wɔ cintɔnŋ Musa ǹʼsɛbɛ tu-i sariya sɛbɛ ki ru yibɛɛ tɛ tu : ‹ A shuru mari cɛn, ntiŋ i beeni daŋ kilabali awɔ mari ki ra, tu ntiŋ pwaŋ ki kakan niŋ i mari ki shi, nwɔma ciniŋ i kila a wɔrinŋ ki ra. ›#Sariya kiri 25.5–6. 20Niŋ ɲaan ki tɛ, danshuru jɔnpɔni wuru koŋ bɛɛ gbɛ. Kí wɔrinŋ cɛɛnni ki i mari bɛɛ cɛn. Nka niŋ i beeni niŋ fa mari ki daŋ kila kì. 21Nwɔ̀ gban-i wɔrinŋ ki ra, niŋ i mari ki kila, niŋ i beeni, niŋ daŋ kila ǹʼgbɛ kì. Danshuru byantɔnŋ ki i mìŋ mari tenŋ ki kila, niŋ i ji mìŋ ɲaan tenŋ ki tɛ, fwurututu, 22danshuru jɔnpɔni kari bataa i na mari tenŋ ka shi de, kí i na beeni niŋ ɲaan ki tɛ, ǹʼtɔri tenŋ daŋ kila mari ki gbɛ kì. Niŋ bataa kɔɔtɛ, mari ki yɛrima ki i na beeni. 23Niŋ na, konkwuu kiri ra na ŋmɛni jibi wɔ̀, mari ka a ji ǹʼdanwɔ tenŋ wɔ sa? Sabu, kí fɔn bataa ǹʼkila de-i arɔɔ mari i. »
24Yesu tu kí tɛ : « Ka mani ka i ábɛɛ fɔni-na, sabu ábɛɛ Kirinŋ wɔ sɛbɛ ki ru wulu ki tɔ-a kì, á dumiŋ ǹʼwɔ sotinbi ki tɔ-a kì. 25A konkwuu kiri na ŋmɛni, shuru ri fa mari ri arìmaŋ cɛn-a kì. Kí i ji-a miŋ tu kirinpɔlila mɛlɛkɛn ni. 26Ŋì i bi tu konkwuu kiri ra ŋmɛni, sɔsɔɔlinŋ niŋ nu kì. Jirinŋ doaŋ tuunɛninɛntiŋ ki wulu bi-i Kirinŋ wɔ cintɔnŋ Musa wɔ sɛbɛ ki ru mani wɔ̀ ru, ábɛɛ niŋ mani ki kali kì wa? Ǹʼsɛbɛ-i niŋ mani nu tu Kirinŋ ǹʼbi tu : ‹ Míŋ i Aburahamu wɔ Kirinŋ i, Ishaka wɔ Kirinŋ i, niŋ fa Yakuba wɔ Kirinŋ i. ›#Pobi ki 3.2–6, 15–16. » 27Yesu tu sɛbɛ : « Kirinŋ konkwuu ri wɔ Kirinŋ i kì, ɲaninkulutɔnŋ ni wɔ yɛ. Niŋ na, ábɛɛ fɔnika jitan-i. »
Kirinŋ wɔ cinŋ bimaan ki ru sinaŋ ki
(Matiyu 22.34–40; Luki 10.25–28)
28 Sariya kalimɔɔ bɛɛ a tɔɔnye wuru niŋ wulu kiri tɛ, ntiŋ i ǹʼja tu Yesu Sadusiyɛnŋ kiri rupwuluka shɔ. Ntiŋ i a kpari Yesu tɛ, ntiŋ i Yesu ranɔri tu : « Sariya kiri bataa ru sinaŋ ki ǹʼdanwɔ? »
29Yesu i ntiŋ nupwulu tu : « Sariya kiri bataa ru sinaŋ ki i kaa : ‹ Á á tɔɔnye Isirayɛlidaŋ ni, Ŋuntiŋ ki, yibɔɔ Kirinŋ ki i tenŋ pe e. 30Ŋuntiŋ Kirinŋ bidi nʼtɛ, nʼciiru ki bataa wu, nʼɲini ki bataa wu, nʼɲakili ki bataa wu, niŋ fa nʼfaan ki bataa wu. ›#Sariya kiri 6.4–5. 31Ǹʼfuluntɔnŋ ki i ji kaa : ‹ Nʼkaashi ki bidi nʼtɛ miŋ tu nʼyɛrima kì. ›#Sarakawɔrɔtɔnŋ kiri 19.18. Sariya tɔri bi gbɛ Kirinŋ ɲaanfɛ, ŋì i ka fuuli kari po kì. »
32 Sariya kalimɔɔ ki i ǹʼbi Yesu tɛ : « Niŋ i sɛli i, kalimɔɔ, Ŋuntiŋ Kirinŋ tenŋ pe i Kirinŋ, niŋ kɔɔtɛ Kirinŋ tɔri nmaŋ kili kì.#Sariya kiri 4.35. 33Koŋ bataa kakan-i ŋi i Kirinŋ bidi nʼtɛ, nʼciiru ki bataa wu, nʼɲakili ki bataa wu, niŋ fa nʼfaan ki bataa wu, niŋ fa ŋi i nʼkaashi ki bidi nʼtɛ miŋ tu nʼyɛrima ki, niŋ pari-i ŋɔnɔsaraka fa saraka bataa wu. »#Ose 6.6.
34Yesu i ǹʼja tu ntiŋ wulu ki rupwulu ɲakilitinbi wu, niŋ na, ntiŋ tu : « Miŋ myɛ Kirinŋ wɔ Masabi ki tɛ. » Niŋ kɔɔtɛ, koŋ tɔri tenŋ jɛɛn ntiŋ i Yesu ranɔri kili kì.
Kirinŋ Ɲaannakonshimaan ki fa masa Dawuda bi ki
(Matiyu 22.41–46; Luki 20.41–44)
35Ŋì i Yesu tu konaŋ ki kali-la Kirinfusinaŋ ki ru, ntiŋ i kí ranɔri tu : « Nfɛnŋ na, Sariya kalimɔɔ kiri i ǹʼbi-ri tu Kirinŋ Ɲaannakonshimaan ki Dawuda nupo o? 36Sabu ŋì i Dawuda faamaan ki tu Ɲiniwɔlinŋ ki ra, niŋ yɛrima ki ǹʼbi-i tu :
‹ Ŋuntiŋ Kirinŋ ǹʼbi-i míŋ Ŋuntiŋ ki tɛ,
“na sɔɔ ńʼpantɛ,
fɔ míŋ na miŋ ɲa kiri pa de nʼkanŋ fɛ waarinŋ wɔ̀ ru.” ›#Shu kiri 110.1.
37A Dawuda yɛrima ki ji ntiŋ dɔri-ra a Ŋuntiŋ i, ntiŋ a so ji-i Dawuda nupo o dɔɔkunŋ sɛbɛ? »
Konaŋ mwɔɔnna wuru a tɔɔnye-a Yesu wɔ wulu kiri tɛ ciirudibi wu.
Yesu wɔ wulu kiri sariya kalimɔɔ kiri bi ki sun
(Matiyu 23.1–36; Luki 20.45–47)
38Ntiŋ wuru konaŋ ki kali-la nwɔ̀ ra, niŋ i kaa : « Á á yɛri cɔye sariya kalimɔɔ kiri ra. Jɛrɛbi sinaŋ bo ki di-i kí tɛ. Niŋ fa kí i ǹʼtɛ konaŋ ki i arì koŋ sinanbi coolinŋ tan-ni furuba maŋ kiri ru. 39Kí i koŋ sinaŋ sɔɔfinŋ kiri ceeli-la kalinfu kiri fa furuba maŋ kiri ru, niŋ fa nuŋ numaŋ sinaŋ kiri ru. 40Kí i kanimari kiri gbɛfɛfinŋ kiri bataa mwu san-a kí wu, niŋ kɔɔtɛ, kí i cin-ni Kirinŋ nafɛ ki ra, nwɔma arì i arì yɛri ji koŋ sɔbɛ ri konaŋ ki ɲaanna. Kɔ́ɔ́ kiti ki ra na juu kusɛbɛ. »
Kanimari ki wɔ Kirinŋ kafinŋ ki
(Luki 21.1–4)
41Yesu i sɔɔ Kirinfusinaŋ ki ru, ntiŋ i konaŋ ki shɛɛli-li arɔɔ wari kiri bo-a Kirinŋ wɔ kafinŋ bofinŋ ki ru. Nafulutiŋ mwɔɔnna i wari mwɔɔnna bo niŋ kafinŋ bofinŋ ki ru. 42Kanimari gbɛwɔ bɛɛ i na wari myɛɛnniŋ fuuli bo, nwɔ̀ wuru fu-a tama tenŋ bishi i.
43Niŋ na, Yesu i ka kanimari ka ji kalindaŋ kiri wu, ntiŋ i ǹʼbi : « Sɛli ki ra, míŋ i ǹʼbi-a ábɛɛ tɛ, ńʼtu ka kanimari gbɛwɔ ka jalinŋ wɔ̀ bo, ńʼtu ǹʼmwɔ koŋ bataa wɔ wu. 44Koŋ pyɛ kiri ǹʼbɛɛraaŋ po san-i arɔɔ nafulu kiri ra, kí i ǹʼwɔri. Nka ka kanimari ka fa awɔ gbɛwɔbi ki sun, nmari a kani ki bataa shi wɔri-i, nmari finŋ tɔri dantenŋ tu a gbɛ, nwɔ̀ i nufinŋ i kili kì. »
Currently Selected:
Maraka 12: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
