Maraka 10
10
Yesu wulu wɔ̀ bi-i fwuru ba bi ki sun
(Matiyu 19.1–12; Luki 16.18)
1Yesu po san-i niŋ mani nu, ntiŋ i ta Yude sɔɔta ki ru, ntiŋ i de ta Yurudɛn baa ki sunfalimwuŋ. Konaŋ ki i na a rakɔli ntiŋ tonfan sɛbɛ. Ntiŋ i kí kali, miŋ tu ntiŋ wuru dali-la ntiŋ i ǹʼma-ni ɲaan wɔ̀ tɛ.
2 Farinsiyɛnŋ bɛɛ ri i arì kpari ntiŋ tɛ, kí i ji ǹʼtɛ arì i ntiŋ tɔnsunpa, kí tu : « Ǹʼfu-i koŋ i awɔ mari pani wa? »
3Yesu tu kí tɛ : « Kirinŋ wɔ cintɔnŋ Musa wɔ sariya ki ǹʼdanwɔ bi ábɛɛ tɛ ǹʼsun? »
4Kí i ntiŋ nupwulu tu : « Kirinŋ wɔ cintɔnŋ Musa tu shuru ki so-a fwuru ba sɛbɛ ramɔni-i, ntiŋ i niŋ wɔri awɔ mari ki tɛ, fwuru ki i ba. »#Sariya kiri 24.1.
5Yesu tu kí tɛ : « Ábɔɔ ciiru ɲakili furubi ki ncusun-i Musa i niŋ sariya ki sɛbɛ sɔɔ ábɛɛ tɛ. 6A niŋ ji-i kì, juniɲa tɔnpa waari ki ru, Kirinŋ konanmini namɔni-i, ŋì i kí ji shuru fa mari. 7Niŋ ki ra, shuru ra na a san a tiŋ fa a ɲiŋ na, ntiŋ i ta da awɔ mari ki ra. 8Kí koŋ fuuli ki i ji-a koŋ tenŋ i. Niŋ ɲaan ki tɛ, kí ji-a koŋ fuuli kili kì, fɔ koŋ tenŋ i.#Tɔnpa ki 1.27; 2.24. 9Kirinŋ nwɔ̀ri ji-i tenŋ i, koŋ tɔri tenŋ fa nini san arìmaŋ na kì. »
10Yesu fa awɔ kalindaŋ kiri na-i de kulu waarinŋ wɔ̀ ru, kí i ntiŋ nanɔri fwuru ba bi ki sun sɛbɛ. 11Ntiŋ tu kí tɛ : « Koŋ woo koŋ i awɔ mari fwuru ba-a, ntiŋ i ǹʼtɔri cɛn, nintiŋ i nankulunbi ma-a, ntiŋ i bijɛ ma-ni awɔ mari jɔnɔ ki wu. 12Mìŋ ɲaan tenŋ ki tɛ, a mari ja ji a kaan awɔ shuru tɛ, nmari i cɛn shuru tɔri sun, niŋ mari ki i nankulunbi ma-a. »
Yesu wɔ juba ki tiraŋ kiri tɛ
(Matiyu 19.13–15; Luki 18.15–17)
13Jibi bɛɛ, konaŋ kiri i na daŋ bɛɛ ri wu Yesu tɛ sɛbɛ, nwɔma ntiŋ i a gbɛ pa kí ra, nka kalindaŋ kiri i jɛbi kí gbɛ.
14Yesu niŋ ja-i waarinŋ wɔ̀ ru, ntiŋ tɔnŋ i kwulu. Ntiŋ i ǹʼbi kalindaŋ kiri tɛ tu : « Á ncusun tiraŋ kiri na míŋ tɛ, á fa kí suu míŋ tɛ na ki sun kì, sabu Kirinŋ wɔ Masabi ki i kíbɛɛ bishi kiri wɔ. » 15Ntiŋ tu sɛbɛ : « Sɛli ki ra, míŋ i ǹʼbi-a ábɛɛ tɛ, ńʼtu, koŋ woo koŋ Kirinŋ wɔ Masabi ki pa-a, miŋ tu daŋ i kì, nintiŋ a de ǹʼnu fyewu kì. »
16Niŋ kɔɔtɛ, ntiŋ i daŋ kiri fɔn tenŋ tenŋ shi a kuŋ na, ntiŋ i a gbɛ bili kí sun, ntiŋ i juba san kí tɛ.
Nafulutiŋ ki bi ki
(Matiyu 19.16–30; Luki 18.18–30)
17Jibi bɛɛ, ŋì i Yesu tu tiri-ra saa ki fan, shuru bɛɛ i bili na a kwushiri ntiŋ fɛ, niŋ i ntiŋ nanɔri tu : « Kalimɔɔ shɔɔrinŋ, míŋ kakan ŋí i nfɛnŋ ma, nwɔma ŋí i ɲaninkulutɔnbi kɔbali ki kila? »
18Yesu tu ntiŋ tɛ : « Nfɛnŋ na, miŋ míŋ dɔri-ri tu kalimɔɔ shɔɔrinŋ i? Koŋ shɔɔrinŋ tɔri tenŋ nmaŋ Kirinŋ tenŋ pe ciniŋ kì. 19Miŋ i Kirinŋ wɔ sariya bimaan kiri tɔ-a, ǹʼtu : ‹ Fa koŋ kilɛn kì, fa nankulunbi ma kì, fa kwunŋ tan kì, fa puru ye koŋ wu kì, fa fɛɛn koŋ sun kì, nʼtiŋ ki fa nʼɲiŋ ki gbɛ. › »#Pobi ki 20.12–16; Sariya kiri 5.16–20.
20Niŋ shuru ki tu Yesu tɛ : « Míŋ niŋ sariya kiri bataa rasɔɔ kabi ŋí i ji faa daanwulu. »
21Niŋ na, Yesu i ntiŋ shɛɛli bidintɛbi wu, ntiŋ i ǹʼbi tu : « Bi tenŋ cin-i faa miŋ na. Tiri, ŋi i ta nʼgbɛfɛfinŋ kiri bataa ju, ŋi i ǹʼjalinŋ ki lu gbɛwɔ ri tɛ. A miŋ niŋ ma, miŋ a nafulu mwɔɔnna bo nʼjɛŋ Kirinŋ wɔ Masabi ki ru. Niŋ kɔɔtɛ, ŋi i na ǹʼpa míŋ cɛfan. »
22Shuru ki niŋ wulu ki rama-i waarinŋ wɔ̀ ru, ntiŋ ciirudi kili kì, sabu nafulutiŋ sinaŋ wuru-i.
23Yesu i a ɲaannu pwulu, ntiŋ i kalindaŋ kiri shɛɛli, ntiŋ i ǹʼbi tu : « Nafulutiŋ derama ki furu-i Kirinŋ wɔ Masabi ki ru sa! » 24Niŋ wulu ki i bo kalindaŋ kiri bataa tɔnŋ sun. Yesu i ǹʼbi sɛbɛ tu : « Míŋ daŋ ni, Kirinŋ wɔ Masabi ki ru demaŋ di kì dɛ! 25Ɲɔɔnmi demaŋ di-i mɛsɛni ta ra, ŋì i fwuu nafulutiŋ derama ki sun Kirinŋ wɔ Masabi ki ru. »
26Kalindaŋ kiri ciiru daalinŋ i kɔ, ŋì i gbɛde. Kí i ǹʼbi-ri arìmaŋ faninmwuŋ tu : « A ǹʼji niŋ ɲaan ki tɛ, nkɛnŋ a so a mwu-i? »
27Yesu i kí shɛɛli, ntiŋ tu kí tɛ : « Konanmini gbɛ, niŋ so-a ma-i kì, nka Kirinŋ gbɛ, bi bataa i so-a ma-i, sabu Kirinŋ waa-ra bi tɔri ra kì. »
28Niŋ wulu ki bimaan ki sun, Pyɛɛri tu Yesu tɛ : « Yibɛɛ ji? Á ǹʼshɛɛli, yibɛɛ finŋ bataa tu-i nmaŋ, yi i ǹʼpa ábɛɛ cɛfan. »
29Yesu tu ntiŋ tɛ : « Sɛli ki ra, míŋ i ǹʼbi-a ábɛɛ tɛ, ńʼtu koŋ woo koŋ awɔ kaniŋ, walima a tindaŋ ni, walima a narinmari ri, walima a jifinŋ ni fa a daŋ ni, walima awɔ ji ri tu-i nmaŋ míŋ fa Kirinŋ wɔ Wulujii ki bira, 30sii ǹʼna ǹʼnu kì, ntiŋ a niŋ bataa bishi yaataanŋ taanŋ (100) tɔri ri kila ka juniɲa ka ru kwumaŋ. Ntiŋ a na kaniŋ ni fa tindaŋ ni fa narinmari ri, fa jifinŋ ni fa a daŋ ni fa ji ri kila, ntiŋ i ɲaanfɛkwulu kila sɛbɛ. Niŋ bataa kɔɔtɛ, ntiŋ a ɲaninkulutɔnbi kɔbali ki kila siri. 31Nka dɔnsaŋ, jɛntɔnŋ ki mwɔɔnna a na ji kɔɔtɛtɔnŋ i, kɔɔtɛtɔnŋ ki mwɔɔnna i ji jɛntɔnŋ i. »
Yesu beŋ ki fa ntiŋ ŋmɛni bi ki ɲaanbi kaan byantɔnŋ ki
(Matiyu 20.17–19; Luki 18.31–34)
32Yesu wuru awɔ kalindaŋ kiri jɛŋ, kí i tiri-ri Yerusalɛmu. Kalindaŋ kiri ciirufɔnimaan wuru-i, kɛmi i ji kí fa ntiŋ cɛfantɔnŋ kiri ru sɛbɛ. Yesu i ta awɔ kalindaŋ bwununfuuli ki wu arì cinancinŋ, bi wɔ̀ri wuru-ra na ntiŋ kila, ntiŋ i nini ɲaanbi-ri kí tɛ tu : 33« Yibɛɛ i tunpa ta-a Yerusalɛmu kaa. Niŋ mani nu, kí a ta Koŋ Danshuru ki de sarakawɔrɔtɔnŋ ŋununtiŋ kiri fa sariya kalimɔɔ kiri gbɛfɛ, kí a ta kiti ki fɛɛn ntiŋ sun, tu ntiŋ fa kilɛn kakan kí i ntiŋ de Kirinŋ tɔbali kiri gbɛfɛ. 34Nini a yɛtan bo ntiŋ sun, kí i lɛju cu ntiŋ sun, kí i ntiŋ bwɔ suulinŋ na, kí i ntiŋ kilɛn. Ntiŋ kilɛn ki sunŋ byantɔnŋ ki, ntiŋ a ŋmɛni. »
Kalindaŋ fuuli Yesu rafɛ-i bi wɔ̀ ra
(Matiyu 20.20–28)
35Nsebede danshuru Yakuba fa Yuhana i arì kpari Yesu tɛ, kí i ǹʼbi ntiŋ tɛ tu : « Kalimɔɔ, yibɛɛ ra finŋ bɛɛ rafɛ ábɛɛ gbɛ, yibɛɛ i á rafɛ-a, á á tu á i niŋ ma yi tɛ. »
36Yesu i kí ranɔri tu : « Ábɛɛ i ǹʼtɛ míŋ nfɛnŋ ma ábɛɛ tɛ? »
37Kí i ntiŋ nupwulu tu : « Á á tu, yibɛɛ ru, koŋ tenŋ i sɔɔ á pantɛ, tenŋ i sɔɔ á nɔrintɛ áwɔ masabi ki nɔɔri ki ru. »
38Nka Yesu tu kí tɛ tu : « Ábɛɛ i finŋ wɔ̀ rafɛ-a, ábɛɛ niŋ tɔ-a kì. Ɲaanfɛkwulu bi wɔ̀ fa yɛlinŋ wɔ̀ a sɔɔ míŋ sun, niŋ bishi a kwun ábɛɛ ru wa? Míŋ a wu ɲaan wɔ̀ tɛ, ábɛɛ ra so wu-i niŋ ɲaan ki tɛ wa? »
39Kí i ntiŋ nupwulu tu : « Aawe, yibɛɛ ra so. »
Yesu tu kí tɛ : « Sɛli yɛ, ɲaanfɛkwulu bi wɔ̀ fa yɛlinŋ wɔ̀ a na míŋ kila, nini bishi ri a ábɛɛ kila. Á i wu míŋ wuka ɲaan ki tɛ. 40Nka á i sɔɔ míŋ pantɛ walima ńʼnɔrintɛ, míŋ niŋ ɲaanpotɔnŋ ki i kì. Kirinŋ niŋ mani kiri ramɔni-i nwɔ̀ri tɛ, niŋ mani kiri ra wɔri nini tɛ. »
41Kalindaŋ koŋ byinŋ pyɛ kiri niŋ wulu ki rama-i waarinŋ wɔ̀ ru, kí tɔnŋ i kwulu Yakuba fa Yuhana cɛfan. 42Niŋ na, Yesu i kí bataa dɔri, ntiŋ i na ǹʼbi kí tɛ tu :
« Á ǹʼtɔ tu juniɲa ka ru ŋununtiŋ kiri faan sɔɔ-ra arɔɔ konanbi ki sun, kí ru koŋ sinaŋ kiri i arɔɔ sotinbi ki ji-ri kí wu. 43Nka ǹʼkakan ŋì i ji ábɛɛ gbɛ ninkunŋ kì dɛ! A konwɔtiŋ ji ǹʼtɛ a i ji koŋ sinaŋ i ábɛɛ kanfɛ, tu nintiŋ ji ábɛɛ bataa tɛ cinŋ matɔnŋ i. 44Konwɔtiŋ ji ǹʼtɛ a i ji ábɛɛ ŋununtiŋ i, tu nintiŋ ji á bataa wɔ joŋ i, 45sabu Koŋ Danshuru ki na ŋuŋ ki tu konaŋ kiri baara ma a tɛ kì, nka ntiŋ na-i baara ma konaŋ kiri tɛ, niŋ fa ntiŋ i a yɛri ki ɲini ki wɔri koŋ mwɔɔnna ŋunsan a. »
Ɲaanfwuu Baritimɛ kene bi ki
(Matiyu 20.29–34; Luki 18.35–43)
46Yesu fa awɔ kalindaŋ kiri i ta so Yeriko kili ki ra. Kí pora ki niŋ kili ki ru, konaŋ mwɔɔnna i ji kí fan, ɲaanfwuu bɛɛ sɔɔmaan wuru saa ki tɔnŋ na, wú i konaŋ ni nafɛ-ri. Niŋ ɲaanfwuu ki wuru Timɛ danshuru Baritimɛ ɛ. 47Niŋ ɲaanfwuu ki ǹʼnama-i waarinŋ wɔ̀ ru tu Nansarɛtitɔnŋ kiri wɔ Yesu ki i, wú i yaalinpo tu :
« Dawuda nupo Yesu, á míŋ sunmakwulupa! »
48Koŋ mwɔɔnna i fali-li ɲaanfwuu ki sun, kí i jɛbi-ri wú gbɛ, tu wú a gbansan.
Nka wú i ǹʼbɛɛ bo-ri awɔ yaalinŋ ki sun, wú tu : « Dawuda nupo, á míŋ sunmakwulupa! »
49Yesu i tu. Ntiŋ tu kí wú dɔri na a tɛ.
Kí i ɲaanfwuu ki dɔri, kí i ǹʼbi wú tɛ tu : « Nʼbanba! Jɔrɔkɔ, kí i miŋ dɔri-ra. »
50Ɲaanfwuu ki i awɔ jɛrɛbi ki kee, wú i see tu a kanŋ sun. Wú i tiri ta Yesu tɛ.
51Yesu i wú ranɔri tu : « Miŋ ǹʼtɛ míŋ i nfɛnŋ ma miŋ tɛ? » Wú i ntiŋ nupwulu : « Kalimɔɔ, míŋ maannaja sɛbɛ. »
52Yesu tu wú tɛ : « Tiri, mɔɔn bilinabi ki nʼkene-i. » Mìŋ manaanŋ tenŋ ki ru, wú i maannaja, wú i ǹʼpa Yesu cɛfan saa ki fan.
Currently Selected:
Maraka 10: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
