Matiyu 27
27
Kí tiri-i Yesu wu Pilati tɛ
(Maraka 15.1; Luki 23.1–2; Yuhana 18.28–32)
1Siira jona ki ru, sarakawɔrɔtɔnŋ ŋununtiŋ kiri fa Yawutu cɛɛnni kiri i arì manja, kí i fu ǹʼsun tu arì Yesu kilɛn. 2Kí i ntiŋ kɔli, kí i tiri ntiŋ wu kɛnintiŋ Pilati tɛ.
Yudasi beŋ ki
(Mabikiri 1.18–19)
3Yudasi wɔ̀ Yesu wɔri wuru-i, wúfinŋ ǹʼtɔ-i tu kí a ntiŋ kilɛn waarinŋ wɔ̀ ru, wú i ntɔri bi awɔ bi kulinŋ ki ra. Kí warifɔ kɔniŋ fa byinŋ wɔ̀ wɔri wuru wú tɛ, wú i a pwulu tiri niŋ wu Kirinŋ tɛ sarakawɔrɔtɔnŋ ŋununtiŋ kiri fa Yawutu cɛɛnni kiri tɛ. 4Wú i ta ǹʼbi kí tɛ tu : « Míŋ bijɛ ma-i, ŋí i koŋ pɔlibali ki pa wɔri beŋ ki tɛ. »
Nini tu wú tɛ : « Yibɔɔ saa niŋ na kì, niŋ i mɔɔn bi i. »
5Yudasi i wari ki kee bo Kirinfusinaŋ ki ru nmaŋ, wú i tiri, wú i ta yaa bo a yɛɛra.
6Sarakawɔrɔtɔnŋ kiri ŋununtiŋ kiri i wari ki rakɔli, kí tu : « Ka wari ka ra so bo-i Kirinfusinaŋ ki wɔ jalinŋ kɛsu ki ru kili kì, sabu cunŋ sa yɛ. »
7Kí i manja tan, kí i fu ǹʼsun, tu arì niŋ wari ki sɔɔ arì i duŋ namɔnɔtɔnŋ ki wɔ ji ki sa, arì i niŋ ji jɛ ri wɔ saali i. 8Niŋ ki ra, niŋ ji ki tɔ ki i dɔri-ra hali jiŋ tu cunŋ ji.
9 Cintɔnŋ Yeremi wulu wɔ̀ bi wuru-i, niŋ ji-i sɛli ka ɲaan ka tɛ tu :
« Kí warifɔ kɔniŋ fa byinŋ ki mwu-i,
Isirayɛlidaŋ kiri fu wuru ninwɔ̀ sun.
Niŋ i ji ntiŋ sa a.
10Kí i duŋ namɔnɔtɔnŋ ki wɔ ji ki sa niŋ wu,
miŋ tu Ŋuntiŋ ki ǹʼbi wuru míŋ tɛ ɲaan wɔ̀ tɛ. »#Jakaliya 11.12–13; Yeremi 18.2–3; 19.1–2; 32.6–15.
Yesu ranɔri bi ki Pilati gbɛ
(Maraka 15.2–15; Luki 23.3–5, 13–25; Yuhana 18.29–40; 19.4–16)
11Ŋì i Yesu tu kɛnintiŋ Pilati ɲaanfɛ, niŋ i ntiŋ nanɔri tu : « Minki i Yawutu kiri wɔ masa ki i wa? »
Yesu i ntiŋ nupwulu : « Minki i ǹʼbi-a kaa dɛ! »
12Sarakawɔrɔtɔnŋ kiri ŋununtiŋ kiri fa Yawutu cɛɛnni kiri i puru ri ye Yesu wu, nka ntiŋ kí rupwulu kì.
13Niŋ na, Pilati tu ntiŋ tɛ : « Kí i nwɔ̀ bataa bi-a miŋ mwɔɔn nu, miŋ niŋ nama-a kì wa? »
14Nka Yesu wulu dantenŋ bi kili kì, niŋ i bo kɛnintiŋ ki tɔnŋ sun.
15Jonbikɔ ɲaannabyɛ ki tɛ, jiri woo jiri, kɛnintiŋ ki wuru dali-la, ntiŋ i nkasudaŋ tenŋ pani-ni, kɛnindaŋ kiri wuru ninwɔ̀ rafɛ-a ntiŋ gbɛ. 16Niŋ waari ru, nkasudaŋ tɔtiŋ bɛɛ wuru nmaŋ, ntiŋ tɔ ki i ji tu Barabasi.
17Konaŋ ki rakɔlimaan ki tu-i, Pilati i kí ranɔri tu : « Ŋí ǹʼdanwɔtiŋ pani ka koŋ fuuli ka ru, Barabasi daa, walima Yesu wɔ̀ i dɔri-ra tu Kirisa? »
18Sabu Pilati ǹʼtɔ wuru tu kí Yesu pa na afinŋ tɛ ɲaannajuubi ra.
19Pilati sɔɔmaan ki tu-i kitikwurumaŋ ki ru, ntiŋ wɔ mari ki i koŋ cin ǹʼbi ntiŋ tɛ tu : « Fa ncusun nʼkanŋ i de ka koŋ telimaan ka wɔ bi ru kì dɛ! Sabu cii ru ciŋ, miŋ cɔɔri-i kusɛbɛ jii ru ntiŋ bira. »
20Nka sarakawɔrɔtɔnŋ kiri ŋununtiŋ kiri fa Yawutu cɛɛnni kiri i konaŋ ki ruye, tu kí ǹʼbi tu Barabasi pani, tu Yesu i kilɛn.
21Kɛnintiŋ ki i kí ranɔri sɛbɛ tu : « Ka koŋ fuuli ka ru, ŋí ǹʼdanwɔ tenŋ pani? »
Kí i ǹʼnupwulu tu : « Barabasi. »
22Kɛnintiŋ ki i kí ranɔri tu : « Niŋ na, ŋí nfɛnŋ ma Yesu ki wu, ninwɔ̀ i dɔri-ra tu Kirisa? »
Kí bataa i ntiŋ ǹʼnupwulu tu : « Á wú kpinkpi suu sun. »
23Kɛnintiŋ ki i kí ranɔri sɛbɛ tu : « Wú bijɛ danwɔ ma? »
Kí i fali ŋì i fwuu a jɔnɔ ki sun tu : « Á wú kpinkpi suu sun! »
24Kɛnintiŋ ki na-i ǹʼja tu konaŋ ki a tɔɔnye-a afinŋ tɛ kili kì, niŋ fa ǹʼbɛɛ i bo ta-ri kí fali wulu ki sun, ntiŋ i ju shi, ntiŋ i a gbɛ fuuli ki rawu konaŋ ki bataa ɲaanna, ntiŋ i ǹʼbi tu : « Míŋ ńʼkanŋ po san-i ka koŋ telimaan ka kilɛn bi ki ru ábɛɛ fan. Ntiŋ yɛkɛ ki bataa ji ábɔɔ nmaŋ. »
25Konaŋ ki bataa tu : « Aawe, niŋ koŋ ki yɛkɛ ki fɛɛn yibɛɛ fa yi daŋ kiri sun. »
26Niŋ na, kɛnintiŋ ki i Barabasi pani. Ntiŋ i Yesu wɔri, tu kí ntiŋ bwɔ suulinŋ na, niŋ kɔɔtɛ, ntiŋ tu kí ta ntiŋ kpinkpi suu ki sun.
Yesu cɔɔri bi ki surudashi kiri gbɛ
(Maraka 15.16–20; Yuhana 19.2–3)
27Kɛnintiŋ ki wɔ surudashi kiri i tiri Yesu wu ntiŋ wɔ kaniŋ ki jɛntɛ, kí i arì kaashi surudashi pyɛ kiri dɔri na ntiŋ nakwunu. 28Kí i ntiŋ sunjuulinŋ kiri san ntiŋ sun, kí i jɛrɛbi sinaŋ kilɛn bɛɛ bo ntiŋ sun. 29Kí i cii tan ye ntiŋ ŋununa bunfila a, kí i ɲɔɔnni bali ye ntiŋ panŋ gbɛ ki ra. Niŋ kɔɔtɛ, kí i arì kwushiri-ri ntiŋ fɛ, kí i yɛtan bo-ri ntiŋ sun tu : « Á coolinŋ ki mwu, Yawutu kiri wɔ masa! » 30Kí i tu-ri, kí i lɛju cu-ri ntiŋ sun, kí i ntiŋ gbɛfɛ ɲɔɔnni bali ki mwu, kí i ntiŋ bwɔ-ri a ŋuniŋ ki ra niŋ wu. 31Kí yɛ ki tan bo kɔ-i ntiŋ sun waarinŋ wɔ̀ ru, kí i jɛrɛbi sinaŋ kilɛn ki san ntiŋ sun, kí i ntiŋ yɛri ki wɔ juulinŋ kiri bo ntiŋ sun nmaŋ, kí i po tiri ntiŋ wu kpinkpimaŋ ki ru.
Yesu kpinkpi bi ki
(Maraka 15.21–32; Luki 23.26–43; Yuhana 19.17–27)
32Surudashi kiri tirira ki Yesu wu kpinkpimaŋ ki ru, kí fa shuru bɛɛ i ta fu, nwɔ̀ wuru Sirɛnitɔnŋ i, kí i ntiŋ dɔri-ri tu Simɔŋ. Kí i niŋ karaba, tu niŋ Yesu kpinkpisuu ki shi. 33Kí i ta so mani bɛɛ ru tu Gologota, niŋ kɔri ki i tu Ŋununwɔmaŋ i. 34Kí so-i niŋ mani ki ru waarinŋ wɔ̀ ru, kí i finŋ saamaan bɛɛ bo dunfɛnŋ nu, kí i ǹʼwɔri Yesu tɛ. Ntiŋ ǹʼnɛɛ-ɛ waarinŋ wɔ̀ ru, ntiŋ i a kaan mwunu.
35Yesu kpinkpi-i suu ki sun waarinŋ wɔ̀ ru, kí i baalinŋ bili, kí i ntiŋ wɔ juulinŋ kiri lu arìmaŋ tɛ.#Shu kiri 22.19. 36Niŋ kɔɔtɛ, kí i sɔɔ, kí i ntiŋ ɲaannasuu-ri.
37Kí Yesu kpinkpi ŋuŋ ki sɛbɛ lɔ wuru ntiŋ ŋununu ka ɲaan ka tɛ tu : Ka i Yesu, Yawutu kiri wɔ masa ki. 38Kí kakaali fuuli kpinkpi wuru suu tɔri ri sun Yesu kankantɛ, koŋ tenŋ wuru ntiŋ pantɛ, tenŋ i ji ntiŋ nɔrintɛ.
39Saa fwuudetɔnŋ kiri wuru ntiŋ ki-a, kí i arì ŋuniŋ nuti-ri. 40Kí i fali-li, kí i ǹʼbi-ri tu : « Dɔnsaŋ, minwɔ̀ ǹʼbi-i, tu miŋ a so Kirinfusinaŋ ki gwu-i, ŋi i ǹʼtan ǹʼŋunaŋ i sunŋ byaŋ ciiru, nʼyɛri mwu ni! A miŋ ji Kirinŋ Danshuru ki i, jɛri san kpinkpisuu ki ra kɛ! »
41Sarakawɔrɔtɔnŋ kiri ŋununtiŋ kiri fa sariya kalimɔɔ kiri fa Yawutu cɛɛnni kiri i yɛtan bo-ri Yesu sun sɛbɛ, kí i ǹʼbi-ri tu : 42« Wú koŋ tɔri kiri mwu-i, wú i waa-ri a yɛri ki mwu-i wa? Wú ǹʼbi tu afinŋ Isirayɛli wɔ masa ki i kì wa? Wú jɛri san kpinkpisuu ki sun, yibɛɛ ra bili wú ra. 43Wú a gbɛ bili-i Kirinŋ sun. A wú bi ji di Kirinŋ tɛ, ŋì wú mwu ni, sabu wú tu afinŋ Kirinŋ Danshuru ki i! »
44Kí bi kulinŋ matɔnŋ wɔ̀ri kpinkpi wuru suu ki sun Yesu tɔntɛ, nini yɛrima kiri wuru ntiŋ ki-a.
Yesu beŋ ki
(Maraka 15.33–41; Luki 23.44–49; Yuhana 19.28–30)
45Sunŋ ki so-i ŋununu waarinŋ wɔ̀ ru, mancinŋ i bo kɛniŋ ki mani ki bataa ru, fɔ ŋì i lɛɛri byaŋ ma.
46Sunŋ ki lɛɛri byantɔnŋ ki rafaa waarinŋ wɔ̀ ru, Yesu i fali faanna, ntiŋ i ǹʼbi arɔɔ wulu ki ru tu : « Eli, Eli, lama sabakatani? » Niŋ kɔri ki tu : Ńʼwɔ Kirinŋ, ńʼwɔ Kirinŋ, nfɛnŋ na ábɛɛ i míŋ tenŋ tu?
47Koŋ wɔ̀ri wuru niŋ mani nu, nini bɛɛ ri niŋ fali wulu ki rama-i waarinŋ wɔ̀ ru, kí tu : « Wú i Kirinŋ wɔ cintɔnŋ Eli#27.47 Eli : Ǹʼbɛɛ ri i Eli dɔri-ra tu Iliya. dɔri-ra! »
48Mìŋ manaanŋ tenŋ ki ru, koŋ tenŋ i bili ta fwuu shi, ntiŋ i ǹʼde dunfɛnŋ lɔmaan nu, ntiŋ i na niŋ ye bali la, ntiŋ i ǹʼcu Yesu tɔnŋ ki fɛ, tu ntiŋ niŋ mwunu. 49Ntiŋ kaashi kiri tu : « Á ncusun yi ǹʼshɛɛli, a Eli ji-a na wú mwu! »
50Yesu i fali faanna, ntiŋ i kila ntiŋ i a ɲini ki wɔri.
51Mìŋ waarinŋ tenŋ ki ru, Kirinfusinaŋ ki faninmwuŋ juulinŋ ki i gbɛri san amaŋ na ǹʼfaninmwuŋ fuuli, ŋì i shi cuunŋ fɔ fwuniŋ sun. Pwɔkulinŋ ki i sɛrisɛri, faa kiri i rukila san arìmaŋ na. 52Saali kiri tɔnŋ kiri i nawwulu, Kirinŋ wɔ wɔlinŋ kiri kwuu kiri mwɔɔnna i ŋmɛni. 53Kí i po san arì saali kiri ru. Yesu ŋmɛnimaan ki kɔɔtɛ, kí i de Yerusalɛmu kili wɔlinŋ ki ru, kí i arì yɛri ji koŋ mwɔɔnna wu.
54Surudashi ŋununtiŋ wɔ̀ fa awɔ surudashi wɔ̀ri wuru Yesu ɲaannasuu-ra, nini pwɔkulinŋ ki sɛrɛsɛrɛka ɲaan ki fa niŋ bi mamaan kiri ja-i waarinŋ wɔ̀ ru, kɛmi sinaŋ i de kí ru. Kí tu : « Sɛli sɛli ki ra, koŋ ka wuru Kirinŋ Danshuru ki yɛrima ki i ncinŋ. »
55Mari wɔ̀ri ǹʼpa yiri wuru Yesu cɛfan, ŋì i po fɔ Galile sɔɔta kiri ru, kí i ntiŋ maku shɔ-ri, nini mwɔɔnna tu wuru mani narimaŋ nu, kí i bi kari shɛɛli-li. 56Niŋ mari kiri bɛɛ ri wuru kari i : Makidala Mariyamu, Yakuba fa Yusufu ɲiŋ Mariyamu, ŋì i bo Nsebede danshuru kiri ɲiŋ ki sun.
Yesu kwuu ye bi ki
(Maraka 15.42–47; Luki 23.50–56; Yuhana 19.38–42)
57Bilana ki so-i waarinŋ wɔ̀ ru, jalintiŋ bɛɛ i na, ntiŋ i po Arimate kili ki ru, ntiŋ tɔ ki i ji Yusufu, ntiŋ wuru Yesu wɔ kalindaŋ ki bɛɛ ɛ. 58Ntiŋ i ta Yesu kwuu ki rafɛ Pilati gbɛ. Pilati i a tu, kí i konkwuu ki wɔri ntiŋ tɛ. 59Yusufu i tiri Yesu kwuu ki sunminimini juulinŋ fɔ ŋunaŋ wu. 60Ntiŋ i ta ǹʼye saali ŋunaŋ nu, ntiŋ i ninwɔ̀ san wuru a yɛri tɛ, faayɛli lu. Ntiŋ i faa sinaŋ tɔri kulunkulu la ǹʼtɔnŋ ki ra, ntiŋ i tiri kulu. 61Makidala Mariyamu niŋ fa Mariyamu tɔ tɔri ki sɔɔ wuru saali ki ɲaninkileŋ nu.
Yesu saali ki ɲaannasuu bi ki
62Niŋ sisarifuluntɔnŋ ki gban wuru Nufaan jibi ki jɛnsɔɔ jibi ki ra, Sarakawɔrɔtɔnŋ kiri ŋununtiŋ kiri fa Farinsiyɛnŋ kiri i arìmaŋ nakɔli tiri pilati tɛ. 63Kí i ta ǹʼbi ntiŋ tɛ tu : « Ŋuntiŋ, yibɛɛ ɲakilila bo-i ǹʼtɛ, tu purubitɔnŋ ka i ǹʼbi-ri, tu afinŋ ja na beeni, tu ǹʼsunŋ byantɔnŋ ki, afinŋ kwuu ki ra ŋmɛni. 64Niŋ ki ra, yibɛɛ i ǹʼceeli-la miŋ gbɛ tu a saa wɔri, kí i saali ki tɔnŋ ki ɲaannasuu fɔ sun byaŋ. Nwɔma wúwɔ kalindaŋ kiri fa na ta konkwuu ki kwun shi, kí i ǹʼbi konaŋ kiri tɛ, tu ǹʼŋmɛni kì. Niŋ puru ki a na pyiri, ŋì i fwuu ǹʼjɔnɔ ki sun dɛ. »
65Pilati tu : « Surudashi ri i ábɛɛ gbɛ, á kí bo kí i saali ki ɲaannasuu, miŋ tu ábɛɛ ǹʼtɛ ŋì i ji ɲaan wɔ̀ tɛ. »
66Niŋ ma-i, kí i ta taanshɛ ye saali ki tɔnŋ naye faa ki ra. Kí i surudashi kiri bɛɛ ri bo nmaŋ, nini i saali ki ɲaannasuu-ri.
Currently Selected:
Matiyu 27: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
