Matiyu 26
26
Jɛntɔnŋ kiri wɔ lude bi ki Yesu sun
(Maraka 14.1–2; Luki 22.1–2; Yuhana 11.45–53)
1Yesu kɔ-i awɔ wulu kiri bataa ra waarinŋ wɔ̀ ru, ntiŋ tu awɔ kalindaŋ kiri tɛ tu : 2« Ábɛɛ i ǹʼtɔ-a tu ǹʼpyɛ tu sunŋ fuuli, Jonbikɔ ɲaannabyɛ ki i so. Nwɔ̀ i Koŋ Danshuru ki i, kí a ta niŋ de konaŋ kiri gbɛfɛ, tu ntiŋ kpinkpi suu sun. »
3 Kirinŋ tɛ sarakawɔrɔtɔnŋ kiri ŋununtiŋ kiri fa Yawutu cɛɛnni kiri i ta arìmaŋ nakɔli Kirinŋ tɛ sarakawɔrɔtɔnŋ kiri ŋununtiŋ sinaŋ Kayifu wɔ mani nu. 4Kí i fu ǹʼsun, tu arì Yesu pa kɛrɛbi ra, arì i ntiŋ kilɛn. 5Nka kí tu arì fa ntiŋ pa ɲaannabyɛ ki waari ki ru kì, tu niŋ ji-i kì, tu konaŋ ki a na jɔrɔkɔ arìbɛɛ cɛfan.
Mari bɛɛ wɔ ŋuŋ kini jii bo bi ki Yesu sun
(Maraka 14.3–9; Yuhana 12.1–8)
6Jibi bɛɛ, Yesu wuru tuutiŋ Simɔŋ wɔ mani nu Bɛtani kili ki ra. 7Niŋ mani nu, mari bɛɛ i a kpari Yesu tɛ. Duŋ pyaanŋ bɛɛ i ji nmari gbɛɛra. Niŋ duaŋ ki ramɔni wuru kwɔ kpaafuru wu, ŋì i faa ŋuŋ kini jii bɛɛ ra. Niŋ ŋuŋ ki kpaafuru wuru kusɛbɛ. Nmari i Yesu tu nufinŋ ki nu-a, nmari i duaŋ ki ciiru ŋuŋ ki rupwulu bo ntiŋ ŋununu.
8Kalindaŋ kiri niŋ ja-i waarinŋ wɔ̀ ru, nini tɔnŋ i kwulu, kí i ǹʼbi-ri arìmaŋ tɛ tu : « Ka ŋuŋ kini jii ka ruli ŋuŋ ki ǹʼdanwɔ? » 9Kí tu : « Ŋuŋ kini jii ka wuru-ra so ju-i jalinŋ sinaŋ na, ŋì i wɔri gbɛwɔ kiri tɛ. »
10Nka, Yesu i niŋ tɔ, ntiŋ tu kí tɛ tu : « Nfɛnŋ na, ábɛɛ i nmari tɔnkɔli-li? Nmari nwɔ̀ ma-i míŋ tɛ, niŋ shɔ-i dɛ! 11Gbɛwɔ kiri i ábɛɛ fan ǹʼkaŋ waarinŋ bataa ru, nka míŋ kɔniŋ na tu ábɛɛ fan waarinŋ bataa ru kì. 12Nmari ŋuŋ kini jii ka bo-i míŋ sun, nwɔma a i míŋ namɔni bo ńʼkwuu ye ki jɛŋ. 13Sɛli ki ra, míŋ a ǹʼbi ábɛɛ tɛ, ńʼtu Kirinŋ wɔ Wulujii ki na sunjo juniɲa ki mani woo mani nu, ńʼtu mari ka mabi ki a na bi nmaŋ, konaŋ kiri i arì ɲakilila bo nmari bi tɛ. »
Yudasi Isikariyɔti wɔ Yesu janfa bi ki
(Maraka 14.10–11; Luki 22.3–6)
14Niŋ waari ru, Yudasi Isikariyɔti, ninwɔ̀ wuru Yesu wɔ kalindaŋ bwununfuuli ki bɛɛ tenŋ i, niŋ i ta Kirinŋ tɛ sarakawɔrɔtɔnŋ kiri ŋununtiŋ kiri tɛ, 15wú i kí ranɔri tu : « A míŋ Yesu de ábɛɛ gbɛfɛ, ábɛɛ ra nfɛnŋ wɔri míŋ tɛ? »
Kí i warifɔ daŋ kɔniŋ fa byinŋ wɔri wú tɛ. 16Ŋì i shi niŋ sun, Yudasi i tu ɲaan shɔɔrinŋ ceeli-la, wú a so Yesu de-i kí gbɛfɛ ɲaan wɔ̀ tɛ.
Yesu fa awɔ kalindaŋ kiri wɔ Jonbikɔ ɲaannabyɛ nufinŋ nu bi ki
(Maraka 14.12–21; Luki 22.7–14, 21–23; Yuhana 13.21–30)
17 Bwuru tuutuubali ɲaannabyɛ ki sunŋ jɔnɔ ki, Yesu wɔ kalindaŋ kiri i ntiŋ nanɔri tu : « Ábɛɛ i ǹʼtɛ yi i ta Jonbikɔ ɲaannabyɛ ki nufinŋ kiri ramɔni á tɛ da? »
18Yesu tu kí ta katiŋ tɛ kili ki ru, tu kí i ta ǹʼbi ntiŋ tɛ tu : « Kalimɔɔ ki tu ŋì na bi miŋ tɛ, tu afɔɔn waaci ki so, tu afinŋ ǹʼtɛ a i na Jonbikɔ ɲaannabyɛ ki nufinŋ ki nu miŋ gbɛ, a fa awɔ kalindaŋ kiri. » 19Yesu ǹʼbi-i ɲaan wɔ̀ tɛ, kalindaŋ kiri i ǹʼma mìŋ ɲaan ki tɛ, kí i ta nufinŋ kiri ramɔni.
20Bilana ki na-i so, Yesu fa awɔ cindaŋ koŋ bwununfuuli ki i ta sɔɔ nufinŋ nunama ki tɛ. 21Ŋì i kí tu nufinŋ ki nu-a, Yesu tu kí tɛ : « Sɛli ki ra, míŋ a ǹʼbi ábɛɛ tɛ, ńʼtu ábɛɛ ru koŋ tenŋ a míŋ janfa. »
22Niŋ i kalindaŋ kiri tɔnfɔɔ kusɛbɛ, kí bataa tenŋ tenŋ tu ntiŋ tɛ : « Ŋuntiŋ, míŋ yɛ wa? »
23Yesu tu kí tɛ : « Konwɔtiŋ gbɛ i míŋ fan kukulu tenŋ nu, nintiŋ ki a míŋ de konaŋ kiri gbɛfɛ. » 24Yesu tu sɛbɛ : « Sɛli ki ra, Koŋ Danshuru ki a beeni, miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ, ntiŋ bi ki sun, nka konwɔtiŋ a ntiŋ janfa, bɔni ki i nintiŋ wɔ. Hali niŋ shuru ki ji-ri kì, niŋ pari wuru ntiŋ sun. »
25Yudasi Isikariyɔti, ninwɔ̀ i ntiŋ janfatɔnŋ ki i, niŋ yɛri ki i nanɔri tan tu : « Yɔɔ kalimɔɔ, míŋ yɛ wa? » Yesu i wú rupwulu tu : « Miŋ yɛri ki i ǹʼbi-a kaa dɛ! »
Fani wɔlinŋ ki bi ki
(Maraka 14.22–26; Luki 22.15–20; Korɛntitɔnŋ kiri (1) 11.23–25)
26Ŋì i kí tu Jonbikɔ ɲaannabyɛ ki nufinŋ ki nu-a, Yesu i bwuru ki shi, ntiŋ i baraka bi Kirinŋ tɛ, ntiŋ i ǹʼnucɛn cɛn wɔri ta awɔ kalindaŋ kiri tɛ, ntiŋ i ǹʼbi : « Á ǹʼmwu, á i ǹʼnu, ka i míŋ firi ki i. »
27Niŋ kɔɔtɛ, ntiŋ i dunfɛnŋ kulu ki shi, ntiŋ i baraka bi Kirinŋ tɛ, ntiŋ i ǹʼwɔri kí tɛ, ntiŋ i ǹʼbi : « Á bataa ǹʼbɛɛ mwunu, 28sabu míŋ cunŋ ki yɛ, Kirinŋ wɔ tɔnwɔriki cɛ sɔɔ cunŋ ki, ninwɔ̀ kɔnkɔli-i koŋ mwɔɔnna bira, nwɔma kɔ́ɔ́ bijɛ kiri i tu kí tɛ. » 29Yesu tu kí tɛ : « Míŋ a ǹʼbi ábɛɛ tɛ, ńʼtu míŋ a dunfɛnŋ mwunu kili kì, fɔ jibi wɔ̀ míŋ fa ábɛɛ ra na ǹʼmwunu ńʼTiŋ ki wɔ Masabi ki ru, mwunuka ɲaan ŋunaŋ tɛ. »
Yesu tu Pyɛɛri a ǹʼbi tu afinŋ afinŋ tɔ-a kì
(Maraka 14.26–31; Luki 22.33–34; Yuhana 13.37–38)
30Niŋ kɔɔtɛ, kí Kirinŋ gbɛ shu kiri pɔri kɔ-i waarinŋ wɔ̀ ru, kí i po tiri Olinfyetɔnŋ ki sun.
31Niŋ mani nu, Yesu tu awɔ kalindaŋ kiri tɛ tu : « Jiŋ cii ki yɛri ki ru, ábɛɛ bataa ra á kaan míŋ tɛ, sabu ǹʼsɛbɛ-i Kirinŋ wɔ wulu sɛbɛ ki ru tu :
‹ Míŋ a na saa faa ki kilɛn,
saa kwuru ki i jeɲe. ›#Jakaliya 13.7. »
32Yesu tu sɛbɛ : « Nka, a míŋ na ŋmɛni po san konkwuu kiri kanfɛ, míŋ a na tiri ábɛɛ jɛŋ Galile sɔɔta ki ru. »
33Pyɛɛri i wulu ki shi niŋ na, ntiŋ i ǹʼbi tu : « Hali koŋ pyɛ kiri bataa ta arì kaan ábɛɛ tɛ, míŋ a ńʼkaan ábɛɛ tɛ fɛsɛfɛsɛ kì. »
34Yesu tu Pyɛɛri tɛ tu : « Sɛli ki ra, míŋ a ǹʼbi miŋ tɛ ńʼtu, jiŋ cii ki ru, ńʼtu ɲandaŋ kiri ra so bulu sun, ńʼtu miŋ a ǹʼbi kaan byaŋ nʼtu miŋ míŋ tɔ-a kì. »
35Pyɛɛri i a pwulu ǹʼsun sɛbɛ tu : « Hali míŋ fa ábɛɛ ji-a kilɛn yimaŋ fan, míŋ a ńʼkaan ábɛɛ tɛ fyewu kì. » Kalindaŋ pyɛ kiri bataa i mìŋ wulu tenŋ ki bi.
Yesu wɔ Kirinŋ nafɛ ki Gɛtisemanɛ
(Maraka 14.32–42; Luki 22.39–46)
36Niŋ kɔɔtɛ, Yesu fa awɔ kalindaŋ kiri i po ta mani bɛɛ ru, nwɔ̀ tɔ i tu Gɛtisemanɛ. Ntiŋ tu kí tɛ : « Á sɔɔ kwumaŋ, míŋ a ta jɛŋ, ŋí i ta Kirinŋ nafɛ. »
37Ntiŋ i tiri jɛŋ Pyɛɛri fa Nsebede danshuru fuuli ki wu a fan. Ciirufɔni i ntiŋ kila, ntiŋ gbɛɛra i tɛɛ kusɛbɛ. 38Ntiŋ i ǹʼbi kí tɛ tu : « Tɔnfɔɔ ki a míŋ kilɛn. Á tu á ɲaanna míŋ fan kwumaŋ, á fa ɲinintan kì. »
39Ntiŋ i ta jɛŋ pyaanniŋ, ntiŋ i a kwushiri, ntiŋ i a ɲaanfɛ ki cibi fwuniŋ sun, ntiŋ i Kirinŋ nafɛ, ntiŋ i ǹʼbi tu : « Míŋ Tiŋ, a ǹʼji-a so ma-i, á ka cɔɔri ka maŋ nari míŋ na. Nka niŋ fa a fɔn na, míŋ dintɛ bi ki fa ma kì, duu ábɛɛ dintɛ wɔ ki. »
40Ntiŋ i a pwulu na kalindaŋ kiri maŋ ki ru, ntiŋ i na kí kila ɲinintan-a. Ntiŋ tu Pyɛɛri tɛ tu : « Pyɛɛri, hali ábɛɛ so tu-i á ɲaanna ŋì i lɛɛri tenŋ kila míŋ fan kì wa? 41Á tu á ɲaanna, á i Kirinŋ nafɛ-ri, nwɔma shitaanni fa na á sunnɛɛn bo bijɛ ma sun kì, sabu konanmini ciiru ki faa-a bi shɔɔrinŋ ma ɲakili ki ra, nka yìrì ma ki faan ki firi ki ru kì. »
42Ntiŋ i a san kí tɔntɛ ǹʼkaan fuluntɔnŋ ki i, ntiŋ i ta Kirinŋ nafɛ tu : « Míŋ Tiŋ, a mwuka ɲaan ji míŋ na ka cɔɔri ka wu kì, fɔ duu ŋì i míŋ kila, ábɛɛ dintɛ bi ki ma. » 43Ntiŋ i a pwulu na fa kí wu ɲinintan-a sɛbɛ, sabu ɲini ki ta wuru kí ru, ŋì i kí ɲaninaŋ kiri pwun.
44Ntiŋ i a san kí ra sɛbɛ, ntiŋ i ta Kirinŋ nafɛmaŋ ki ru ǹʼkaan byantɔnŋ ki i, ntiŋ i ta rafɛ ki tan mìŋ wulu tenŋ ki wu. 45Ntiŋ a pwulu na-i kalindaŋ kiri maŋ ki ru, ntiŋ tu kí tɛ tu : « Ábɛɛ i ɲinintan-a á i á rufaan-ni wa? Waaci ki myɛ-i. Koŋ Danshuru ki a de bijɛmatɔnŋ kiri gbɛfɛ kaa. 46Á jɔrɔkɔ, yi tiri. Konwɔtiŋ a míŋ de kí gbɛfɛ, ninki i yiri-ra ka a! »
Yesu pa bi ki
(Maraka 14.43–50; Luki 22.47–53; Yuhana 18.2–11)
47Yesu tu-i niŋ wulu ki bi-a, ntiŋ wɔ kalindaŋ bwununfuuli ki ru, nwɔ̀ wuru dɔri-ra tu Yudasi, niŋ i na, konaŋ kwuru mwɔɔnna i ji ntiŋ cɛfan. Baamwuru ri fa juju ri wuru nini gbɛɛra. Kirinŋ tɛ sarakawɔrɔtɔnŋ kiri ŋununtiŋ kiri fa Yawutu cɛɛnni kiri wɔ cintɔnŋ ni wuru-i.
48Janfatɔnŋ ki taanmashɛ bi wuru kí tɛ tu : « A míŋ na ta konwɔtiŋ co bidintɛbi coolinŋ tanka ɲaan tɛ, nintiŋ ki i Yesu ki i, á ntiŋ pa. »
49Kí na-i so Yesu ri maŋ ki ru, wú i a kpari Yesu tɛ, wú tu : « Á co, Kalimɔɔ! » Wú i ntiŋ co bidintɛbi coolinŋ tanka ɲaan tɛ.
50Niŋ mani nu, Yesu tu wú tɛ : « Ńʼwɔ wɔshuru, miŋ na-i ŋuŋ wɔ̀ ra kwumaŋ, niŋ ma! »
Niŋ mani nu, koŋ pyɛ kiri i arì bo Yesu sun, kí i ntiŋ pa. 51Koŋ wɔ̀ri wuru Yesu fan, nini nu koŋ tenŋ i awɔ baamwuru ki sari, niŋ i ta Kirinŋ tɛ sarakawɔrɔtɔnŋ kiri ŋununtiŋ sinaŋ ki wɔ joŋ ki tɔɔn tenŋ tɛri san nmaŋ.
52Nka Yesu tu niŋ kalindaŋ ki tɛ : « Nʼwɔ baamwuru ki de a foo ki ru nmaŋ, sabu koŋ finŋ woo finŋ i kari tan-a baamwuru ra, niŋ bataa i beeni-a baamwuru sababu ra. 53Miŋ ǹʼtɔ-a tu míŋ a so ńʼTiŋ ki rafɛ-i, kí i mɛlɛkɛn kpaa tɔbali li bo na ye ńʼtɛ mìŋ dɔɔ kì wa? 54A niŋ ma, wulu wɔ̀ bi-i Kirinŋ wɔ wulu sɛbɛ kiri ru, tu ǹʼkakan ŋì i ma, niŋ a nafaa dɔɔkunŋ? »
55Niŋ ɲaan ki tɛ, Yesu i ǹʼbi konaŋ kwuru ki tɛ tu : « Ǹʼso-i ábɛɛ i na míŋ cɛfan baamwuru ri fa juju ri wu, tu á na-a míŋ pamaŋ nu, miŋ tu míŋ a ji koŋ kaanmaan wa? Míŋ wuru sɔɔ-ra jibi woo jibi Kirinfusinaŋ ki ra, ŋí i konaŋ kiri kali-li. Ábɛɛ míŋ pa kì, 56nka á bili ǹʼna tu ka bi kari bataa ma, nwɔma Kirinŋ wɔ cintɔnŋ kiri wulu wɔ̀ri bi-i arɔɔ sɛbɛ kiri ru, nini i nafaa. »
Niŋ mani nu, kalindaŋ kiri bataa i bili pani san Yesu ra, kí i ntiŋ tenŋ tu nmaŋ.
Yesu ta bi ki kitikwurutoŋ kwuru ki ɲaanfɛ
(Maraka 14.53–65; Luki 22.54–55, 63–71; Yuhana 18.12–14, 19–23)
57Yesu patɔnŋ kiri i tiri ntiŋ wu Kirinŋ tɛ sarakawɔrɔtɔnŋ kiri ŋununtiŋ sinaŋ Kayifu wɔ mani nu. Sariya kalimɔɔ kiri fa cɛɛnni kiri rakɔlimaan ki wuru niŋ mani nu. 58Pyɛɛri i tu gbiila, ntiŋ i a da tiri-ri kí cɛfan, fɔ ntiŋ i ta so Kirinŋ tɛ sarakawɔrɔtɔnŋ ki wɔ kaniŋ ki sun. Ntiŋ i ta sɔɔ kaniŋ ki ɲaannasuutɔnŋ kiri tɔntɛ, nwɔma a i bi ka rakɔka ɲaan ki ja.
59Kirinŋ tɛ sarakawɔrɔtɔnŋ kiri ŋununtiŋ kiri fa Yawutu kiri wɔ kitikwurutoŋ kwuru ki wuru mani ceeli-la Yesu mwɔɔn nu, nwɔma arì i ntiŋ kilɛn. 60Shɛɛri purubitɔnŋ mwɔɔnna i puru ri ye Yesu wu, nka kí Yesu kila nini wɔ wulu kiri tɔri tenŋ nu kì.
Niŋ bataa kɔɔtɛ, koŋ fuuli bɛɛ ri i jɔrɔkɔ, kí i ǹʼbi tu : 61« Wú ǹʼbi-i yibɛɛ ɲaanna tu : ‹ Míŋ a so Kirinfusinaŋ ka gwu-i, ŋí i ǹʼtan sunŋ byaŋ ciiru. › »
62Niŋ ɲaan ki tɛ, Kirinŋ tɛ sarakawɔrɔtɔnŋ kiri ŋununtiŋ sinaŋ ki i jɔrɔkɔ tu, ntiŋ i Yesu ranɔri tu : « Koŋ kari i wulu wɔ̀ bi-a miŋ bi sun, miŋ tu dɔɔkunŋ? »
63Yesu i a gbansan, ntiŋ finŋ tɔri bi kì. Kirinŋ tɛ sarakawɔrɔtɔnŋ kiri ŋununtiŋ ki tu ntiŋ tɛ sɛbɛ tu : « Ǹʼma Kirinŋ ɲaninkulutɔnŋ ki tɔ ki bira, a minki ji Kirinŋ Ɲaannakonshimaan ki i, Kirinŋ Danshuru ki i, ǹʼfɔɔ bi yi tɛ. »
64Yesu i ntiŋ nupwulu tu : « Miŋ yɛrima ki i ǹʼbi-a kaa dɛ! Ŋì i bo niŋ bataa sun, ŋì i shi dɔnsaŋ, ábɛɛ ra na Koŋ Danshuru ki sɔɔmaan ki ja Sobataatiŋ ki pantɛ. Niŋ kɔɔtɛ, á i ǹʼyirira ja kirinpɔli la loŋ kiri faninmwuŋ. »#Shu kiri 110.1; Daɲɛli 7.13.
65Niŋ ma-i, Kirinŋ tɛ sarakawɔrɔtɔnŋ kiri ŋununtiŋ sinaŋ ki tɔnkwulumaan ki i awɔ juulinŋ kiri gbɛri san a sun, ntiŋ i ǹʼbi tu : « Wú Kirinŋ tɔ ki li-i, yibɛɛ maku shɛɛri danwɔ ra kili?#Sarakawɔrɔtɔnŋ kiri 21.10. Ábɛɛ yɛrima kiri Kirinŋ tɔ li wulu ka rama-i wú tɔnŋ na kɔ! Ábɛɛ tu dɔɔkunŋ? »
66Konaŋ kiri tu : « Wú fa kilɛn kakan-i. »
67Niŋ ɲaan ki tɛ, konaŋ kiri bɛɛ ri i arì lɛju cu-ri Yesu ɲaanfɛ, kí i ntiŋ bwɔ-ri gbɛŋuŋ na. Ǹʼtɔri ri i ntiŋ bwɔ-ri, kí i ntiŋ nanɔri-ri tu : 68« Heyi! Kirinŋ Ɲaannakonshimaan ki, konwɔtiŋ miŋ bwɔ-i, nintiŋ bi yi tɛ! »
Pyɛɛri a ǹʼbi tu afinŋ Yesu tɔ-a ki
(Maraka 14.66–72; Luki 22.56–62; Yuhana 18.15–18, 25–27)
69Pyɛɛri sɔɔmaan ki tu-i, Kirinŋ tɛ sarakawɔrɔtɔnŋ kiri ŋununtiŋ ki wɔ kaniŋ ki sun, jonmari bɛɛ i a kpari ntiŋ tɛ, nmari i ǹʼbi tu : « Miŋ yɛri ki wuru Galiletɔnŋ kiri wɔ Yesu ki fan. »
70Nka Pyɛɛri i a sɔsɔ ǹʼna konaŋ ki bataa ɲaanna, ntiŋ i ǹʼbi mari ki tɛ tu : « Míŋ mɔɔn wulu ki tamaŋ tɔ-a kì. »
71Niŋ kɔɔtɛ, Pyɛɛri i de ta-ri pomaŋ tɔnŋ ki ra, jonmari tɔri i ntiŋ ja, niŋ i ǹʼbi niŋ mani nu tɔnŋ kiri bataa ɲaanna ntiŋ tɛ tu : « Ka shuru ka i Nansarɛtitɔnŋ kiri wɔ Yesu fan tɔnŋ ki bɛɛ ɛ. »
72Pyɛɛri i ǹʼsɔsɔ sɛbɛ. Ntiŋ i a kɔni, ntiŋ i ǹʼbi tu : « Míŋ yɛri shuru ka tɔ-a kì! »
73Waaci pyaanŋ kɔɔtɛ, niŋ mani nu tɔnŋ kiri i ǹʼbi Pyɛɛri tɛ sɛbɛ tu : « Sii ǹʼna ǹʼnu kì, miŋ i kí fan, sabu mɔɔn wuluju ki i ǹʼji-a. »
74Niŋ mani nu, Pyɛɛri i a kɔni, fɔ ntiŋ i a yɛri danka, ntiŋ i ǹʼbi : « Ábɛɛ i koŋ wɔ̀ wulu bi-a, míŋ ntiŋ tɔ-a kì. »
Mìŋ manaanŋ tenŋ ki ru, ɲandaŋ kiri i bulu.
75Pyɛɛri ɲakili i bo Yesu wɔ wulu bimaan ki tɛ a tɛ tu : « Ɲandaŋ kiri ra so bulu sun jiŋ, miŋ a ǹʼbi kaan byaŋ, ńʼtu miŋ míŋ tɔ-a kì. » Pyɛɛri i po taanna, ntiŋ i ta ŋuntan kusɛbɛ.#Maraka 14.30.
Currently Selected:
Matiyu 26: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
