Matiyu 25

Yesu wulusuntalinŋ wɔ̀ bi-i maannaannaanŋ byinŋ bi ki sun

1Yesu i ka wulusuntalinŋ ka bi awɔ kalindaŋ kiri tɛ tu : « Kirinpɔlila Masabi ki bi ki a na ji miŋ tu maannaannaanŋ byinŋ bɛɛ ri bi, nwɔ̀ri arɔɔ sifilɛn ni cu-i tu arì ta-a marishinŋ bɛɛ ŋununafu. 2Niŋ maannaannaanŋ kiri ru, koŋ taanŋ wuru ɲakili bali li i, koŋ taanŋ ki i ji koŋ ɲakilitiŋ ni i. 3Maannaanŋ taanŋ ɲakili bali kiri arɔɔ sifilɛn cumaan kiri shi-i, nka kí ŋuŋ shi bo arì gbɛ kì. 4Nka ɲakilitiŋ kiri i arɔɔ sifilɛn cumaan kiri shi, kí i saaki, kí i ŋuŋ shi bo arì gbɛ finŋ tɔri ri ru.

5Marishinŋ ki na-i cin ntiŋ i na-a kì, ɲini i kwulu maannaanŋ kiri ra, kí bataa i ɲinintan. 6Wɔkila ki ru, fali wulu i po tu : ‹ Marishinŋ ki i kaa, á ta ǹʼŋununafu! ›

7Maannaannaanŋ kiri bataa i ŋmɛni, kí i arì bo arɔɔ sifilɛn kiri ramɔni sun. 8Niŋ mani nu, maannaanŋ ɲakili bali kiri i ǹʼɲakilitiŋ kiri rafɛ-ri tu : ‹ Á áwɔ ŋuŋ kiri pyaanŋ wɔri yi tɛ, sabu yibɔɔ sifilɛn kiri i ǹʼtɛ arì byi dɛ! ›

9Nka ɲakilitiŋ kiri tu kí tɛ tu : ‹ Aayi! Yibɔɔ kiri ra yi fa ábɛɛ po kì, á bili ta ǹʼbɛɛ sa ŋuŋ jutɔnŋ kiri gbɛ. ›

10Kíbɛɛ tirimaan ki tu-i ŋuŋ samaŋ ki ru, marishinŋ ki i na. Maannaanŋ wɔ̀ri ramɔnimaan wuru-i, marishinŋ ki fa nini i de cɛn fu ki ru, kí i fu ki tɔnŋ ki sɔɔn. 11Niŋ kɔɔtɛ, maannaanŋ taanŋ kari arì pwulu yiri-i, kí tu marishinŋ ki tɛ : ‹ Yi ŋuntiŋ, yi ŋuntiŋ, á fu ki tɔnŋ nawwulu yi tɛ! ›

12Nka ŋuntiŋ ki i kí rupwulu tu : ‹ Sɛli ki ra, míŋ i ǹʼbi-a ábɛɛ tɛ, míŋ ábɛɛ tɔ-a kì. › »

13Niŋ ki ra, Yesu tu awɔ kalindaŋ kiri tɛ tu : « Á tu á ɲaanna, sabu ábɛɛ Kirinŋ Danshuru ki na jibi ki tɔ-a kì, á fani ǹʼwaaci ki tɔ-a kì. »

Yesu wulusuntalinŋ wɔ̀ bi-i joŋ koŋ byaŋ bi ki sun

(Luki 19.11–27)

14Yesu tu sɛbɛ tu : « Kirinpɔlila Masabi ki i miŋ tu shuru bɛɛ po tirira wɔru, ntiŋ i awɔ joŋ kiri dɔri, ntiŋ i awɔ nafulu ki biye kí gbɛsun. 15Ntiŋ i sɛniŋ ŋuŋ taanŋ wɔri tenŋ tɛ, ntiŋ i ǹʼfuuli wɔri tenŋ tɛ, ntiŋ i ǹʼŋuŋ tenŋ wɔri kí byantɔnŋ tɛ. Ntiŋ i kí bataa wɔ wɔri, ŋì i kɛɲɛ kí fɔn tenŋ tenŋ ki wɔ so ki wu, niŋ kɔɔtɛ, ntiŋ i tiri.

16Sɛniŋ ŋuŋ taanŋ ki wɔri-i joŋ wɔ̀ tɛ, niŋ i baara ma niŋ wu, niŋ i sɛniŋ ŋuŋ taanŋ tɔri kila bo ǹʼsun. 17Sɛniŋ ŋuŋ fuuli ki wɔri wuru nwɔ̀ tɛ, niŋ fani i ǹʼma mìŋ ɲaan tenŋ ki tɛ, niŋ i sɛniŋ ŋuŋ fuuli tɔri kila bo awɔ ki sun. 18Nka sɛniŋ ŋuŋ tenŋ ki wɔri wuru nwɔ̀ tɛ, niŋ i ta ta san, niŋ i a ŋuntiŋ ki wɔ nafulu ki radu niŋ nu.

19Niŋ ɲaan ki tɛ, ŋì i na cin, jibi bɛɛ, joŋ kiri ŋuntiŋ ki i a pwulu na. Ntiŋ pwulumaan ki ra, ntiŋ awɔ nafulu ki wɔri wuru awɔ joŋ wɔ̀ri tɛ, ntiŋ i nini dɔri. Ntiŋ tu kí fɔn tenŋ tenŋ na awɔ nafulu ki rapwuluka ɲaan ki bi a tɛ. 20Sɛniŋ ŋuŋ taanŋ ki wɔri wuru joŋ wɔ̀ tɛ, niŋ i na niŋ fa sɛniŋ ŋuŋ taanŋ tɔri wu, niŋ i ǹʼbi tu : ‹ Míŋ ŋuntiŋ, ábɛɛ sɛniŋ ŋuŋ taanŋ wɔri wuru míŋ tɛ, ŋuŋ taanŋ tɔri i kaa, míŋ niŋ kila bo-i ǹʼsun. ›

21Joŋ ki ŋuntiŋ ki tu : ‹ Niŋ shɔ-i, miŋ ji-i joŋ sɔbɛ ɛ, koŋ a bili nwɔ̀ ra. Finŋ pyaanŋ wɔri-i miŋ tɛ, miŋ i ǹʼji tu koŋ a so bili-i miŋ na niŋ bi ru, niŋ ki ra, míŋ a finŋ sinaŋ ni biye miŋ gbɛsun. Na, nʼfa nʼŋuntiŋ ki á yoori ámaŋ fan! › 22Mìŋ ɲaan tenŋ ki tɛ, sɛniŋ ŋuŋ fuuli ki wɔri wuru joŋ wɔ̀ tɛ, niŋ yɛri ki i na arì ŋuntiŋ ki tɛ, niŋ i na ǹʼbi tu : ‹ Ŋuntiŋ, ábɛɛ sɛniŋ ŋuŋ fuuli biye tu wuru míŋ gbɛsun, nka ŋuŋ fuuli tɔri i kaa, míŋ niŋ kila bo-i ǹʼsun. ›

23Joŋ ki ŋuntiŋ ki tu : ‹ Niŋ shɔ-i, miŋ ji-i joŋ sɔbɛ ɛ, koŋ a bili nwɔ̀ ra. Finŋ pyaanŋ wɔri-i miŋ tɛ, miŋ i ǹʼji tu koŋ a so bili-i miŋ na niŋ bi ru, niŋ ki ra, míŋ a finŋ sinaŋ ni biye miŋ gbɛsun. Na, nʼfa nʼŋuntiŋ ki á yoori ámaŋ fan! ›

24Niŋ kɔɔtɛ, sɛniŋ ŋuŋ tenŋ ki wɔri wuru nwɔ̀ tɛ, niŋ yɛri ki i na arì ŋuntiŋ ki tɛ, niŋ i na ǹʼbi : ‹ Ŋuntiŋ, míŋ ǹʼtɔ wuru ńʼtu ábɔɔ bi furu haali! Ábɛɛ bilaŋ firi ji wɔ̀ ru kì, ábɛɛ i bilaŋ nakɔli-la niŋ nu, á bilaŋ ɲɛɛn ji wɔ̀ ru kì, á i bilaŋ tɛri-ra niŋ nu. 25Niŋ ki ra, míŋ i kɛni, ábɛɛ sɛniŋ wɔ̀ wɔri wuru míŋ tɛ, ŋí i niŋ nadu ta ru. Ábɔɔ sɛniŋ ki i kaa, á ǹʼmwu. ›

26Nka joŋ ki ŋuntiŋ ki tu : ‹ Joŋ kulinŋ jurubitiŋ! Miŋ ǹʼtɔ wuru tu míŋ bilaŋ firi ji wɔ̀ ru kì, tu míŋ bilaŋ nakɔli-la niŋ nu, tu míŋ finŋ ɲɛɛn ji wɔ̀ ru kì, tu ŋí i bilaŋ tɛri-ri niŋ nu, 27niŋ na, nfɛnŋ na miŋ so ta-i mɔ́ɔ́n nafulu ki wɔri jalinŋ marimaŋ nu kì? A miŋ ji wuru niŋ ma-ni, míŋ namaan ki wuru-ra ji ta-a ńʼwɔ jalinŋ ki shi, ŋí i ǹʼtɔnɔ ki shi bo ǹʼsun kì wa? 28Joŋ kiri ŋuntiŋ ki tu konaŋ kiri niŋ joŋ ki wɔ sɛniŋ ŋuŋ tenŋ ki mwu san wú wu, tu kí i ǹʼwɔri sɛniŋ ŋuŋ byinŋ tiŋ ki tɛ. › »

29Yesu tu sɛbɛ : « Sabu, finŋ i nwɔ̀ gbɛ, ǹʼbɛɛ ra wɔri nintiŋ tɛ, ŋì i bo ntiŋ gbɛfɛ wɔ ki sun, ŋì i mwɔ, nka finŋ nwɔ̀tiŋ gbɛ kì, ntiŋ gbɛfɛ wɔ ki a mwu san ntiŋ wu. 30Ntiŋ tu : ‹ Á joŋ kulu bali ka pa kee taanna mancinŋ ki ru nmaŋ, yaalinŋ ki fa ɲiinnaŋ nataa ki i mani wɔ̀ ru. › »

Kiti rakɔɔra ki bi ki

31Yesu tu : « Waarinŋ wɔ̀ ru, a Koŋ Danshuru ki na na awɔ nɔɔri ki ru, ntiŋ fa awɔ mɛlɛkɛn kiri bataa, ntiŋ a na sɔɔ awɔ masawaalinŋ nɔɔritiŋ ki sun. 32Juniɲa nu konaŋ kiri bataa ra na nakɔli ntiŋ ɲaanfɛ. Ntiŋ a na konaŋ kiri rukila, miŋ tu finŋ faa i saa kiri fa baa kiri kila san-a arìmaŋ na ɲaan wɔ̀ tɛ. 33Ntiŋ a na koŋ telimaan kiri bo a pantɛ, ntiŋ i koŋ juumaan kiri bo a nɔrintɛ.

34Nwɔ̀ri i ntiŋ pantɛ, masa ki a na ǹʼbi nini tɛ tu : ‹ Á na, míŋ Tiŋ Kirinŋ wɔ juba ki i ábɛɛ wɔ̀ri tɛ. Kirinŋ masabi wɔ̀ ramɔni-i kabi juniɲa cɛtu waari ki ru, á na niŋ shi kani. 35Sabu, jibi wɔ̀ bɛɛ ki wuru míŋ wu, ábɛɛ nufinŋ wɔri-i míŋ tɛ, jumwunu ki wuru míŋ wu jibi wɔ̀, á i ju wɔri ńʼtɛ. Míŋ wuru jɛ ɛ, ábɛɛ i míŋ jɛri áwɔ mani ki ru. 36Míŋ sunwɔ wuru-i, ábɛɛ i juulinŋ bo míŋ sun. Míŋ kenemaan wuru-i kì, ábɛɛ i ta míŋ shɛɛli. Míŋ wuru nkasu ru, ábɛɛ i ta míŋ shɛɛli. ›

37Niŋ na, koŋ telimaan kiri ra na nanɔri tan tu : ‹ Ŋuntiŋ, yibɛɛ ábɛɛ bɛɛkɔni ki ja jibi danwɔ, yi i nufinŋ wɔri á tɛ? Yibɛɛ ábɛɛ jumwunukɔni ki ja jibi danwɔ, yi i ju wɔri á tɛ? 38Jibi danwɔ yibɛɛ ábɛɛ ja jɛ ɛ, yi i á jɛri yɔɔ mani nu? Walima jibi danwɔ yibɛɛ ábɛɛ sunwɔ ki ja, yi i juulinŋ bo á sun? 39Jibi danwɔ yibɛɛ ábɛɛ kiratɔnŋ ja, walima á i ji nkasu ru, yi i ta á shɛɛli? ›

40Masa ki a na nini nupwulu tu : ‹ Sɛli ki ra, míŋ a ǹʼbi ábɛɛ tɛ, ńʼtu a ábɛɛ ji niŋ bi shɔɔrinŋ ki bishi ma, hali míŋ tindaŋ kiri bataa ru pyaanŋ ki tɛ, ábɛɛ ǹʼma-i míŋ yɛrima ki tɛ niŋ i. ›

41Niŋ kɔɔtɛ, nwɔ̀ri i ntiŋ nɔrintɛ, masa ki a na ǹʼbi nini tɛ tu : ‹ Á á san míŋ ɲaanfɛ, ábɛɛ koŋ dankamaan kari! Á tiri tuu byibali ki ru, ninwɔ̀ ramɔni-i shitaanni fa awɔ mɛlɛkɛn kiri tɛ! 42Sabu, bɛɛ kwulu wuru míŋ na, ábɛɛ nufinŋ wɔri míŋ tɛ kì. Jumwunu wuru míŋ wu, ábɛɛ ju wɔri míŋ tɛ kì. 43Míŋ wuru jɛ ɛ, ábɛɛ á tu míŋ jɛri áwɔ mani nu kì. Míŋ sunwɔ wuru-i, ábɛɛ juulinŋ bo míŋ sun kì. Míŋ kene-ni kì, míŋ wuru nkasu ru, nka ábɛɛ ta míŋ shɛɛli kì. ›

44Niŋ na, nini yɛrima kiri ra na Ŋuntiŋ ki ranɔri tu : ‹ Ŋuntiŋ ki, yibɛɛ ábɛɛ bɛɛkɔni ki ja, yi i á jumwunukɔni ki ja, yi i á ja jɛ ɛ, yi i á sunwɔ ki ja, yi i á kiratɔnŋ ja, walima yi i á ja nkasu ru jibi danwɔ, yi i bi tɔri ma kì? ›

45Masa ki a na nini nupwulu tu : ‹ Sɛli ki ra, míŋ a ǹʼbi ábɛɛ tɛ, ńʼtu a ábɛɛ ji niŋ bi shɔɔrinŋ ki bishi ma, hali míŋ tindaŋ kiri bataa ru pyaanŋ ki bɛɛ tɛ kì, ábɛɛ ǹʼma míŋ yɛrima ki tɛ niŋ i kì. ›

46Niŋ konaŋ kiri ra tiri ɲaanfɛkwulu kɔbali ki ru, nka koŋ telimaan kiri i tiri ɲaninkulutɔnbi kɔbali ki ru. »

Currently Selected:

Matiyu 25: JOB

Highlight

Copy