Matiyu 24

Yerusalɛmu gwu bi ki

(Maraka 13.1–2; Luki 21.5–6)

1Yesu po san-i Kirinfusinaŋ ki ru. Ntiŋ tirira ki, ntiŋ wɔ kalindaŋ kiri i arì kpari ntiŋ tɛ, kí i ǹʼbi-ri ntiŋ tɛ tu : « Ábɛɛ Kirinfusinaŋ ki tanka ɲaan ki fa ǹʼshɔka ki shɛɛli. » 2Yesu i kí rupwulu tu : « Ábɛɛ ɲaniŋ i ka bataa ra kɛ, sɛli ki ra, míŋ a ǹʼbi ábɛɛ tɛ, ńʼtu kwɔ a na tu kwɔ sun ka kwɔ kari ru kì, ǹʼbataa ra na warinka san amaŋ sun. »

Cɔɔri bi wɔ̀ri ra ma juniɲa kɔ ki jɛŋ

(Maraka 13.3–13; Luki 21.7–19)

3Yesu ta-i sɔɔ Olinfyetɔnŋ ki sun, ntiŋ wɔ kalindaŋ kiri i arì kpari ntiŋ tɛ arì cinancinŋ, kí i ntiŋ nanɔri tu : « Á niŋ bi kiri ma waaci ki bi yi tɛ. Taanmashɛ wɔ̀ri a na ábɛɛ na waari ki fa juniɲa nakɔ waari ki ji, á nini bi yi tɛ. »

4Yesu i kí rupwulu tu : « Á á ɲakili tu á yɛri ra, nwɔma koŋ fa na á sunnɛɛn, ntiŋ i á bo fɔni saa sun kì. 5Sabu, koŋ mwɔɔnna a na na, kí i míŋ tɔ ye arì yɛri ra, tu arìbɛɛ Kirinŋ Ɲaannakonshimaan ki i. Kí a na koŋ mwɔɔnna sunnɛɛn fɔni. 6Ábɛɛ ra na kari tan shinwulu kiri fa kari wulu kiri rama-ni. Á fa na á ɲakili ki ɲaanmi kì, sabu niŋ bi kiri kakan-i yìrì i ma, nka niŋ a na ji juniɲa ki kɔ ki i sun kì. 7Shiya ki bɛɛ ra na jɔrɔkɔ ǹʼtɔri cɛfan, kí i arìmaŋ kari-ri, kɛniŋ fa kɛniŋ i bo arìmaŋ na, bɛɛ ki fa fwuniŋ sɛrɛsɛri ki i ji pwɔkulinŋ ki mani mwɔɔnna nu. 8Niŋ bi kiri bataa ra na ji cɔɔri bi kiri tɔnpa ki i, miŋ tu mari wɔ daŋ ji ciiyaa tɔnpamaanna.

9Kí a na ábɛɛ wɔri á ɲa kiri tɛ, kí i á ɲaanfɛkwulu, kí i á kilɛn. Shiya kiri bataa ra na ábɛɛ bikwɔ arì sun, míŋ tɔ ki bira. 10Niŋ waaci ki ru, koŋ mwɔɔnna a na bilinabi ki tonbo, kí i arì san arìmaŋ cɛfan, kí i arì yɛri bikwɔ arìmaŋ sun. 11Cintɔnŋ purubitɔnŋ mwɔɔnna na po, kí i konaŋ mwɔɔnna fɔni. 12Bijɛ ki mwɔka jɛ ki a na, koŋ mwɔɔnna wɔ bidintɛbi ki rakuru. 13Nka, konwɔtiŋ a na tu bilinabi ki ru ka bi kari bataa ciiru, fɔ ŋì i ta so ǹʼnakɔɔra ki sun, Kirinŋ a nintiŋ mwu. 14Ka Wulujii ka a na sunjo kirinpɔlila Masabi ki bi sun juniɲa mani ki bataa ru, nwɔma konaŋ ki bataa i ǹʼnama. Niŋ kɔɔtɛ, juniɲa ki a kila ŋì i kɔ. »

Ɲaanfɛkwulu bi sinaŋ wɔ̀ a na ma

(Maraka 13.14–23; Luki 21.20–24)

15Yesu tu : « Finŋ nɔɔmaan li tantɔnŋ wɔ̀ bikwɔ-i Kirinŋ sun, cintɔnŋ Daɲɛli ninwɔ̀ wulu bi-i, a ábɛɛ na niŋ ja Kirinfusinaŋ ki Maniwɔlinŋ ki ru. » (Mani ka kalitɔnŋ ki a banba, ntiŋ i ǹʼɲaantɔ.) 16« Niŋ waari ru, a konwɔtiŋ na ji Yude sɔɔta ki ru, tu niŋ bili tiri tɔnŋ maŋ kiri ru. 17Konwɔtiŋ na ji tanka sun, nintiŋ fa na jɛri kili, tu a i na-a finŋ tɔri shi fu ki ciiru kili kì. 18Konwɔtiŋ na ji juunŋ, ntiŋ fa na a pwulu, tu a ra na awɔ jɛrɛbi sinaŋ shi kulu kì.

19Niŋ waari ki ru, mari ciitiŋ kiri fa mari wɔ̀ri i ɲɛŋ wɔri-ra daŋ ni tɛ, nini a na cɔɔri kusɛbɛ. 20Á Kirinŋ nafɛ-ri, nwɔma ábɛɛ bili jibi ki fa na fu shii sinaŋ waari ki wu kì, walima Nufaan jibi sun kì. 21Niŋ a na ji cɔɔri sinaŋ i, nwɔ̀ bishi ma ja-i sun kì, ŋì i shi juniɲa tɔnpa ki sun, ŋì i na bo niŋ shikaŋ sun, niŋ fa ǹʼbishi tɔri dumiŋ a na ja kili kì.

22A niŋ cɔɔri kiri waaci kiri ji wuru rabwunu-ni kì, koŋ wuru-ra a mwu kì. Nka Kirinŋ nwɔ̀ri ɲaannashi-i, ŋì niŋ cɔɔri kiri waaci kiri rabwunu-i nini bira.

23A koŋ na ǹʼbi ábɛɛ tɛ tu : ‹ Á ǹʼshɛɛli, Kirinŋ Ɲaannakonshimaan ki i kwumaŋ › walima ‹ ǹʼyɔ kaa keŋ ›, á fa na bili ntiŋ na kì. 24Sabu purubitɔnŋ ni a na jɔrɔkɔ, kí i ǹʼbi-ri tu arìbɛɛ Kirinŋ Ɲaannakonshimaan ki i, cintɔnŋ purubitiiri i na jɔrɔkɔ sɛbɛ, nini i taanmashɛ ri fa kabakobi ri ma-ni, nwɔma arì i konaŋ ki bataa fɔni, fɔ ŋì i ta bo Kirinŋ wɔ konanbi ki sun, a kí ji wuru-ra so niŋ na kɔniŋ. 25Dɔnsaŋ, bi wɔ̀ri ra na ma, míŋ i nini jɛnbi-i ábɛɛ tɛ kɔ.

26Niŋ na, a kí na ǹʼbi ábɛɛ tɛ tu Kirinŋ Ɲaannakonshimaan ki jaŋ faninmwuŋ, á fa ta nmaŋ kì. A kí ǹʼbi tu : ‹ Ǹʼshɛɛli, ŋì a radu-i kwumaŋ ›, á fa bili ǹʼna kì. 27Sabu kirinŋ ki i ŋani-na sunfalimwuŋ, ŋì i ta po sunfyirimwuŋ ɲaan wɔ̀ tɛ, Koŋ Danshuru ki ra ji ninkunŋ, a na shikaŋ ki ru. 28Finŋ kwuu ki i mani wɔ̀ ru, juba kiri i arì rakɔli-la niŋ mani ki ru. »

Koŋ Danshuru ki na bi ki

(Maraka 13.24–27; Luki 21.25–28)

29« Niŋ waaci ki ru cɔɔri ki fwuudemaan ki kɔɔtɛ shuu,

sunŋ ki a na ji mancinŋ i,

sarinŋ fani na po ɲɛ ki ru kì,

sɔriniŋ kiri i saa yiri-ri kirina, yìrì i na fɛɛn fɛɛn-ni,

kirinpɔlila sotinbi kiri i sɛrɛsɛri.

30Niŋ waaci ki ru, Koŋ Danshuru ki taanmashɛ ki a na ja kirinpɔli ki ra. Niŋ waari ru, konaŋ ki a na ŋuntan-ni kusɛbɛ. Kí i Koŋ Danshuru ki yirira ja kirinpɔli ki ra, sotinbi fa nɔɔri sinaŋ wu. 31Koŋ Danshuru ki a na awɔ mɛlɛkɛn kiri cin bwuru fyɛ wulu sinaŋ wu, yìrì i ǹʼwɔ koŋ ɲaannashimaan kiri rakɔli bo arìmaŋ sun, ŋì i po juniɲa nɔnkɔnŋ pyiiraŋ ki ra. »

Kalinŋ wɔ̀ wɔri-i ŋì i kɛɲɛ shɔ jirinŋ ki ɲaan ki wu

(Maraka 13.28–31; Luki 21.29–33)

32« Á bi kiri shɛɛli shɔ jirinŋ ki bi sun, a ǹʼji cɔ-a waarinŋ wɔ̀ ru, ŋì i da ŋunaŋ ni po-ri a ra, ábɛɛ i ǹʼtɔ-a niŋ na tu yili ki myɛ-ɛ.#24.32 Ǹʼbɛɛ ri i ka mani ka rakali ka ɲaan ka tɛ tu : Á bi kiri shɛɛli shɔ jirinŋ ki bi sun, a ǹʼji cɔ-a waarinŋ wɔ̀ ru, ábɛɛ i ǹʼtɔ-a tu ǹʼpa ki myɛ. 33Mìŋ ɲaan tenŋ ki tɛ, a ábɛɛ na niŋ bi kiri ja juu ma-a waarinŋ wɔ̀ ru, á ǹʼtɔ tu Koŋ Danshuru ki na ki myɛ kɔ, tu ntiŋ demantɔnŋ ki ra. 34Sɛli ki ra, míŋ a ǹʼbi ábɛɛ tɛ ńʼtu jiintɔnŋ ki bataa ra beeni kɔ ka bi kari mabali, yìrì i ǹʼnafaa kì. 35Kirinpɔli ki fa pwɔkulinŋ kiri a fwuude, nka mɔ́ɔ́n wulu ki a fwuude kì. »

Kirinŋ tenŋ i juniɲa nakɔ waaci ki tɔ-a

(Maraka 13.32–37; Luki 17.26–30, 34–36)

36Yesu tu : « Nwɔ̀ i niŋ jibi ki fa niŋ ma waari ki bi ki i, hali kirinpɔlila mɛlɛkɛn kiri fa Koŋ Danshuru ki niŋ tɔ-a kì, duu Tiŋ Kirinŋ tenŋ pe.

37Bi wɔ̀ri ma-i Nawu wɔ sunŋ ki ra, nini bishi kiri ra na ma Koŋ Danshuru ki na jibi kiri ra. 38Ju sinaŋ ki na ki jɛŋ, konaŋ ki wuru nufinŋ sinaŋ kiri nu-a, kí i mwunufinŋ ki mwunu-ni, niŋ fa kí i cɛn ni tan-ni, fɔ ŋì i ta so Nawu de jibi ki sun kwurinŋ sinaŋ ki ru. 39Kí wuru arì miiri-ra bi tɔri ra kì, fɔ ju ki i na kí haliki. Koŋ Danshuru ki na shikaŋ ki a na ji mìŋ ɲaan tenŋ ki tɛ.

40Mìŋ ɲaan ki tɛ, shuru fuuli a na ji arìmaŋ fan ji tenŋ nu, tenŋ ki a na shi san tenŋ ki ra. 41Mari fuuli a na tu finŋ ɲɛ-a arìmaŋ fan mani tenŋ nu, tenŋ ki a na shi san tenŋ ki ra.

42Niŋ ki ra, á tu á ɲaanna waarinŋ bataa ru, sabu ábɛɛ Ŋuntiŋ ki na jibi ki tɔ-a kì. 43Á ǹʼtɔ tu futiŋ ki ji wuru kwunŋ ki na waari ki tɔ-a cii ki ru, ntiŋ wuru-ra tu a ɲaanna, nwɔma a i kwunŋ ki suu awɔ fu ki buŋ ki yali ki sun. 44Niŋ ki ra, ábɛɛ yɛrima kiri ramɔnimaan i ji waarinŋ bataa ru, sabu ábɛɛ ɲakili waaci wɔ̀ ra kì, Koŋ Danshuru ki a na niŋ waaci ki ru. »

Joŋ jɛ ki fa nʼshɔɔrinŋ ki bi ki

(Luki 12.41–48)

45Yesu tu : « Ŋununtiŋ ki i joŋ telimaan ɲakilitiŋ wɔ̀ shi sɔɔ-ra awɔ joŋ pyɛ kiri ŋununu, tu ntiŋ nufinŋ ki wɔri kí tɛ a wɔri waaci ru, niŋ joŋ danwɔ? 46Ŋununtiŋ ki i na-a fa joŋ wɔ̀ wu baara ki ma-a, miŋ tu ǹʼbiye wuru ntiŋ gbɛsun ɲaan wɔ̀ tɛ, niŋ i koŋ fɛrɛmaan. 47Sɛli ki ra, míŋ i ǹʼbi-a ábɛɛ tɛ, ńʼtu ŋununtiŋ ki a na niŋ sɔɔ a gbɛfɛfinŋ kiri bataa ŋununu. 48Nka, a niŋ joŋ ki ji koŋ sɔŋ jɛ ɛ, ntiŋ i ǹʼbo a ciiru tu, afinŋ ŋununtiŋ ki ra na dɔnsaŋ sun kì, 49ntiŋ a kaashi kiri bwɔ-ri, ntiŋ i tu nufinŋ sinaŋ nu ki ra, niŋ fa lɔ mwunu ki ra lɔrutɛfɛ kiri fan. 50Niŋ joŋ ki ɲakili jibi wɔ̀ fa waarinŋ wɔ̀ ra kì, ntiŋ ŋununtiŋ ki ra na niŋ i. 51A niŋ ma, ŋununtiŋ ki ra niŋ joŋ ki bwɔ, ntiŋ i bo wulufuulibitɔnŋ kiri fan. Ntiŋ a ŋuntan-ni, niŋ fa ntiŋ i a ɲiinnaŋ nataa-ri niŋ mani nu. »

Currently Selected:

Matiyu 24: JOB

Highlight

Copy