Matiyu 23
23
Yesu wulu wɔ̀ bi-i Sariya kalimɔɔ kiri fa Farinsiyɛnŋ kiri bi sun
(Maraka 12.38–40; Luki 11.39–52; 20.45–47)
1Niŋ kɔɔtɛ, Yesu i wulubi konaŋ kwuru kiri fa awɔ kalindaŋ kiri tɛ. Ntiŋ tu : 2« Sariya kalimɔɔ kiri fa Farinsiyɛnŋ kiri wɔ baara ki i konaŋ ki kalimaanna ki i Musa wɔ sariya ki ra. 3Kí finŋ woo finŋ bi á tɛ, á niŋ bataa ma, á i niŋ saa ki bataa tiri, nka á fa tiri kɛɲɛ kí yɛrima kiri mabi kiri wu kì dɛ! Sabu kí i nwɔ̀ bi-a, kí niŋ ma-a kì.
4Kí i shii sinaŋ pwunmaan kiri kɔli sɔɔ-ra konaŋ kiri ŋununu, nka kí yɛrima kiri jɛɛn-na, kí i hali arì gbɛnaŋ tenŋ pa yìrì ra kì. 5Kí i bi finŋ woo finŋ ma-a, kí i niŋ ma-a, nwɔma konaŋ kiri i arìbɛɛ shɛɛli. Niŋ ki ra, kí i Kirinŋ wɔ wulu ki daki ji-a sɛmɛnaŋ tuyituyi ri i, kí i niŋ kɔli-li arì cunu, niŋ fa kí i arɔɔ juulinŋ kiri tɔnŋ na yaaraŋ kiri ji ǹʼŋmaniŋmani ni i. 6A koŋ kí dɔri nuŋ numaŋ nu, walima a kí ta Yawutu kiri wɔ kalinfu kiri ru, koŋ sinaŋ sɔɔmaŋ kiri bidi-i kí tɛ jɛŋ ki ru. 7Ǹʼdi-i kí tɛ, konaŋ kiri i kí co-ri furuba maŋ kiri ru, niŋ fa tu koŋ bataa i arì dɔri-ri tu ‹ Kalimɔɔ ›. »
8« Ábɛɛ kɔniŋ fa ǹʼceeli tu konaŋ kiri i ábɛɛ dɔri tu kalimɔɔ kì, sabu kalimɔɔ tenŋ pe i ábɛɛ gbɛ, ábɛɛ bataa i ji ámaŋ tindaŋ. 9Á fa koŋ dantenŋ dɔri ka pwɔkulinŋ ka sun tu á tiŋ i kì, sabu Tiŋ tenŋ pe i ábɛɛ ra, ábɛɛ Tiŋ wɔ̀ i kirinpɔli ki ra. 10Á fa ǹʼceeli koŋ dantenŋ i ábɛɛ dɔri tu Ŋununtiŋ i kì, sabu Ŋununtiŋ tenŋ pe i ábɛɛ ra, niŋ i Kirisa. 11Ábɛɛ ru koŋ sinaŋ ki kakan-i ntiŋ i ji ábɛɛ tɛ baara matɔnŋ i. 12Koŋ woo koŋ i a yɛri gbɛ-a, Kirinŋ a nintiŋ sunjɛri. Nka koŋ woo koŋ i a yɛri sunjɛri-ra, Kirinŋ a nintiŋ gbɛ. »
Yesu wɔ wulu ki Sariya kalimɔɔ kiri, fa Farinsiyɛnŋ kiri wɔ wulufuulibi ki bi sun
(Maraka 12.40; Luki 11.39–52; 20.45–47)
13Yesu tu : « Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ i wulufuulibitɔnŋ ni i, sabu ábɛɛ i kirinpɔlila Masabi ki tɔnŋ nala-a konaŋ ki jɛŋ, ábɛɛ yɛrima kiri dumiŋ de-a ǹʼnu kì, nwɔ̀ri fani i ǹʼtɛ arì i de, á ncusun-a nini i de kì.
14[Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ i wulufuulibitɔnŋ ni i, sabu ábɛɛ i kanimari kiri gbɛfɛfinŋ kiri bataa mwu san-a kí wu, á i cin-ni Kirinŋ nafɛ ki ra, nwɔma konaŋ kiri i á ja, ábɔɔ kiti ki a na juu. »]
15Ntiŋ tu sɛbɛ : « Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ i wulufuulibitɔnŋ ni i. Ábɛɛ i mani ŋmani kiri tiri-ra, fwuniŋ ki fa ju ki sun, nwɔma á i koŋ tenŋ kila de áwɔ tagbɛ ki ru, nka a ábɛɛ ntiŋ kila, ábɛɛ i niŋ ji-a jaanamadaŋ i, ntiŋ i fwuu ábɛɛ sun kaan fuuli.
16Bɔni i ábɛɛ tɛ, ábɛɛ jɛntɔnŋ ɲaanfwuu kiri! Ábɛɛ tu : A konwɔtiŋ a kɔni Kirinfusinaŋ ki wu, tu niŋ kɔniŋ i kì, nka tu konwɔtiŋ i a kɔni-na Kirinfusinaŋ ki ciiru sɛniŋ ki wu, tu ninki kɔniŋ ki i. 17Ábɛɛ i myɛɛn ni fa ɲaanfwuu ri ncinŋ! Kirinfusinaŋ ki fa a ciiru sɛniŋ ki, ǹʼdanwɔ gbɛ? Sɛniŋ ki gbɛ daa, Kirinfusinaŋ ki wɔ̀ i sɛniŋ ki ji-a finŋ wɔlinŋ i, ninki gbɛ? 18Niŋ fa ábɛɛ i ǹʼbi-a tu : A konwɔtiŋ a kɔni Kirinŋ tɛ sarakawɔrɔmaŋ ki wu, tu niŋ kɔniŋ i kì, nka tu a ntiŋ a kɔni Kirinŋ tɛ sarakawɔrɔmaŋ ki sun saraka ki wu, tu niŋ kɔniŋ sɛlɛsɛli ki i. 19Ábɛɛ ɲaanfwuu kari! Ǹʼdanwɔ gbɛ? Saraka ki gbɛ daa, walima Kirinŋ tɛ sarakawɔrɔmaŋ ki wɔ̀ i saraka ki ji-a finŋ wɔlinŋ i, ninki gbɛ? 20A koŋ i a kɔni Kirinŋ tɛ sarakawɔrɔmaŋ ki wu, finŋ woo finŋ i ǹʼsun, ntiŋ a kɔni-i ǹʼfa nini bataa wu. 21A koŋ i a kɔni Kirinfusinaŋ ki wu, nintiŋ a kɔni-i Kirinfusinaŋ ki fa Kirinŋ yɛrima ki wu, ninwɔ̀ sɔɔ ǹʼnu sɛbɛ. 22A konwɔtiŋ a kɔni kirinpɔli ki wu, ntiŋ a kɔni-i Kirinŋ wɔ masawaalinŋ ki wu, niŋ fa Kirinŋ yɛrima ki wu, ninwɔ̀ sɔɔ waalinŋ ki sun.
23Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ wulufuulibitɔnŋ kiri! Sabu ábɛɛ cɛrukɔli-i yaa san ki ra, fɔ á i áwɔ nankɔ ru finŋ pyaanŋ kiri bataa tenŋ tenŋ fa arì bishi finŋ kiri bataa yaa san-ni, nka finŋ wɔ̀ gbɛ-i sariya ki ru, ninwɔ̀ i telibi ki fa sunmakwulupabi ki fa dariwulutinbi ki i, ábɛɛ niŋ bo-i á kɛlinsun. Ábɛɛ kakan wuru-i, á i niŋ bi sinaŋ kiri ma sun, á i kila, á i bi pyɛ kiri ma bo nini sun.
24Ábɛɛ wɔ̀ri i ɲaanfwuu ri i, ábɛɛ tu ábɛɛ saa ki ji-a kpeeri wu. Ábɛɛ i á mwunu ju ki rufɔɔka shɔ-a, sabu ábɛɛ i ǹʼtɛ hali shii pyaanŋ i tu ábɛɛ mwunu ju ki ru kì, nka ábɛɛ i ɲɔɔnmi fɔn-ni.#23.24 Shii kiri fa arì bishi finŋ kiri wuru finŋ nɔɔmaan ni i kíbɛɛ gbɛ, nka ɲɔɔnmi ki wɔ nɔɔbi ki juu wuru nini wɔ kiri wu. »
25Ntiŋ tu : « Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ wulufuulibitɔnŋ kari! Ábɛɛ i jaakilaŋ ki fa tasa ki kɔɔsun ki wuka shɔ-a, nka yìrì ciiru kiri faamaan i ji-i ábɔɔ finŋ daalimaan kiri fa áwɔ fyikatinbi finŋ ceelimaan kiri ra. 26Ábɛɛ Farinsiyɛnŋ ɲaanfwuu kari! Á áwɔ jaakilaŋ kiri fa áwɔ tasa kiri ciiru kiri wu fɔɔka shɔ, a niŋ ma, yìrì kɔɔsun kiri ra fɔɔ. »
27Yesu tu kí tɛ sɛbɛ tu : « Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ wulufuulibitɔnŋ kari! Ábɛɛ i miŋ tu saali li, nwɔ̀ri kɔɔsun kiri sunkɔrika shɔ-i, kí i yìrì sunfɔɔ, nka yìrì ciiru kiri faamaan i ji-i koŋ wɔ kiri fa nɔɔ kwuru ki bataa ra. 28Ábɛɛ i mìŋ ɲaan ki tɛ, a ŋi i ábɛɛ ja á kɔɔsun kiri ru, ŋi i ǹʼbi-a tu ábɛɛ koŋ telimaan ni, nka ábɛɛ ciiru kiri faa wulu fuuli ki fa juubi kwuru ki bataa ra.
29Bɔni i ábɛɛ sariya kalimɔɔ kiri fa ábɛɛ Farinsiyɛnŋ kiri tɛ, ábɛɛ wulufuulibitɔnŋ kari! Ábɛɛ i Kirinŋ wɔ cintɔnŋ kiri saali kiri tanka shɔ-a, á i koŋ telimaan beenimaan kiri saali kiri sunyeka shɔ-ri, 30á i ǹʼbi-ri tu : ‹ A yibɛɛ ji wuru yi tiŋ cɛɛnni kiri wɔ sunŋ ki ra, yibɛɛ wuru-ra yi tu, yi i Kirinŋ wɔ cintɔnŋ kiri kilɛn kí fan kì. › 31Niŋ ɲaan ki tɛ, ábɛɛ yɛrima kiri i á tu-a ǹʼna, tu ábɛɛ á tiŋ kiri nupo kiri, nini wɔ̀ri Kirinŋ wɔ cintɔnŋ kiri kilɛn-i. 32Niŋ na, ábɛɛ tiŋ cɛɛnni kiri bi wɔ̀ cɛtu-i, á niŋ nakɔ sa!
33Ábɛɛ myɛɛn juumaan kari! Ábɛɛ fɔnfɔniŋ daŋ kari! Ábɛɛ cirasun tu ábɛɛ ra á mwu jaanama ki wu dɔɔkunŋ? 34Niŋ ki ra, míŋ a na cintɔnŋ ni fa ɲakilitiŋ ni fa kalimɔɔ ri cin na ábɛɛ tɛ. Ábɛɛ ra na ǹʼbɛɛ ri kilɛn, á i ǹʼtɔri ri kpinkpi suu sun, á i ǹʼbɛɛ ri bwɔ suulinŋ na áwɔ kalinfu kiri ru, á i ta-ri kí cɛfan kili kiri ra, á i kí makwulujuu-ri, 35nwɔma ábɛɛ cintɔnŋ pɔlibali finŋ woo finŋ kilɛn-i pwɔkulinŋ ki sun, nini bataa tenŋ tenŋ cunŋ ki i ranɔri ábɛɛ ra, ŋì i shi Abɛli cunŋ ki sun, ninwɔ̀ wuru koŋ telimaan a, ŋì i ta bo Barashi danshuru Jakaliya cunŋ ki sun, ábɛɛ ninwɔ̀ kilɛn-i Maniwɔlinŋ ki fa Kirinŋ tɛ sarakawɔrɔmaŋ ki faninmwuŋ. 36Sɛli ki ra, míŋ i ǹʼbi-a ábɛɛ tɛ, ńʼtu jiintɔnŋ ki a ta ranɔri ka koŋ kilɛnmaan kari bataa cunŋ ki bi sun. »
Yesu wɔ wulu kiri Yerusalɛmu kili ki bira
(Luki 13.34–35)
37Yesu tu : « Heyi! Yerusalɛmutiiri, Yerusalɛmutiiri, ábɛɛ wɔ̀ri i Kirinŋ wɔ cintɔnŋ kiri kilɛn-a, ŋì nwɔ̀ri cin na-i á tɛ, á i nini jɛri-ri kwɔ ra fɔ á i kí kilɛn-ni, waaci mwɔɔnna, míŋ wuru ǹʼtɛ, ŋí i ábɛɛ rakɔli bo ámaŋ sun, miŋ tu ɲaŋ ɲiŋ i a daŋ ni nakɔli-la a cibi fɛ ɲaan wɔ̀ tɛ, nka ábɛɛ á tu kì. 38Dɔnsaŋ, á ǹʼshɛɛli, Kirinŋ a na ábɛɛ tu á cinancinŋ, áwɔ mani ki i ji mani wɔ ɔ.
39Sɛli ki ra, míŋ i ǹʼbi-a ábɛɛ tɛ, ńʼtu ábɛɛ ɲaniŋ na tu míŋ na kili kì, fɔ ŋì i ta so waarinŋ wɔ̀ ru, ábɛɛ na ǹʼbi tu : ‹ Nwɔ̀tiŋ i na-a Ŋuntiŋ ki tɔ ra, Kirinŋ baraka de niŋ nu! › »
Currently Selected:
Matiyu 23: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
Free Reading Plans and Devotionals related to Matiyu 23
Matthew | Reading Plan + Study Questions
Matthew Explained Part 4 | The Passion Of The King
Pioneer: Taking New Ground Together, Part 4
