Matiyu 22
22
Yesu wulusuntalinŋ wɔ̀ bi-i maannaanŋ pofurunku ki bi ki sun
(Luki 14.15–24)
1Yesu i wulusuntalinŋ tɔri bi konaŋ kiri tɛ sɛbɛ, ntiŋ tu : 2« Kirinpɔlila Masabi ki fa finŋ wɔ̀ po-i, niŋ i kaa : Masashuru bɛɛ a danshuru wɔ maannaanŋ pofurunku si-i. 3Ntiŋ nufinŋ ki wulu ki bi wuru nwɔ̀ri tɛ, ntiŋ i a tɛ baara matɔnŋ kiri bo tiri nini dɔri, nka nini arì tu kí i na kì. 4Niŋ na, ntiŋ i a tɛ baara matɔnŋ tɔri ri bo tiri, tu kí ta ǹʼbi koŋ dɔrimaan kiri tɛ tu : ‹ Míŋ ńʼwɔ nufinŋ sinaŋ ki ramɔni-i. Míŋ ǹʼbi-i ńʼtu kí ńʼwɔ naan tuula bulaaŋ kiri fa nafulufinŋ caantiŋ kiri kilɛn. Bi ki bataa ramɔni-i kɔ, á na nufinŋ ki nu. ›
5Niŋ koŋ dɔrimaan kiri niŋ dɔri ki ji bi sinaŋ i kì, koŋ fɔn i tiri a ɲaanna mani ni nu. Ǹʼbɛɛ ri i tiri juu, ǹʼtɔri ri i tiri jɔɔ tanmaŋ nu. 6Kí pyɛ kiri i masa ki tɛ baara matɔnŋ kiri cɔɔri kusɛbɛ, fɔ kí i kí kilɛn.
7Niŋ mamaan ki i masa ki tɔnkwulu. Ntiŋ i awɔ karidaŋ kiri bo tiri ka koŋ kilɛntɔnŋ kari kilɛn, ntiŋ i tuu bo kɔ́ɔ́ kili ki ru. 8Niŋ kɔɔtɛ, ntiŋ i ǹʼbi awɔ baara matɔnŋ kiri tɛ : ‹ Nufinŋ ki ramɔni kɔ-i kɔ, ka koŋ dɔrimaan kari fa ǹʼkakan-ni kì. 9Á tiri saa ŋuniŋ kiri ra, á fa koŋ finŋ woo finŋ ta fu, á i nini dɔri na nufinŋ ki tɛ. › 10Masa ki tɛ baara matɔnŋ kiri i tiri saa kiri fan, kí fa koŋ finŋ woo finŋ fu-i, koŋ jɛ bo koŋ shɔɔrinŋ sun, kí i nini bataa rakɔli na. Niŋ ɲaan ki tɛ, fu ki i faa konaŋ ki ra.
11Masa ki i de, ntiŋ i ta fu ki ru tɔnŋ kiri shɛɛli, ntiŋ i weŋ bɛɛ ja, pofurunku nu juulinŋ wuru nwɔ̀ sun kì. 12Ntiŋ tu niŋ tɛ : ‹ Ńʼwɔ wɔshuru, miŋ ji dɔɔkunŋ, ŋi i de, pofurunku nu juulinŋ dumiŋ miŋ sun kì? › Wulu kila niŋ koŋ ki daru kì.
13Niŋ ki ra, masa ki tu awɔ baaradaŋ kiri tɛ, tu kí weŋ ki pa, kí i wú kanŋ kiri fa wú gbɛ kiri kɔli, kí i wú kee bo taanna mancinŋ ki ru, ŋuntan ki fa ɲiinnaŋ nataa wulu ki a na ji niŋ mani nu. »
14Niŋ kɔɔtɛ Yesu tu : « Koŋ mwɔɔnna dɔri-i, nka koŋ mwɔɔnna ɲaannashi kì. »
Yesu wɔ kalinŋ ki ɲinisa sali bi ki sun
(Maraka 12.13–17; Luki 20.20–26)
15Niŋ ɲaan ki tɛ, Farinsiyɛnŋ kiri i tiri arì manja, nwɔma arì i Yesu pa a yɛrima ki daru wulu wu. 16Kí i arɔɔ kalindaŋ kiri bɛɛ ri fa Ɛrɔdi wɔ konanbi kiri bɛɛ ri cin tiri ntiŋ tɛ.#22.16 Niŋ konaŋ kiri wuru ntiŋ wɔ pariti ki ru tiiri i. Nini i ta ǹʼbi ntiŋ tɛ tu : « Yɔɔ kalimɔɔ, yibɛɛ ǹʼtɔ-i tu ábɛɛ sɛli ki bi-a. Koŋ tɔri tenŋ jɛŋ kɛmi ncusun-a ábɛɛ i á san áwɔ sɛli ki sun kì, sabu ábɛɛ koŋ san-a koŋ nu kì. Ábɛɛ i konaŋ ki kali-la Kirinŋ saa wɔ̀ ra, niŋ fɔɔmaan yɛ. 17Yibɛɛ i ábɛɛ ranɔri-ra : ‹ ǹʼfu-i koŋ i ɲinisa sali wɔri-ri Ɔrɔmu#22.17 Ɔrɔmu : Ɔrɔmu i kili sinaŋ bɛɛ tɔ ɔ, nwɔ̀ wuru Itali kɛniŋ ki masakili ki i. Ŋì i Yesu tu pwɔkulinŋ sun, Ɔrɔmutɔnŋ kiri juniɲa nu konaŋ mwɔɔnna bo wuru arì sun. Mìŋ ɲaan tenŋ ki tɛ, Isirayɛlitɔnŋ kiri wuru kɔ́ɔ́ sɔɔta ki ru kili kiri bɛɛ ri ra, kí i faan sun cinŋ ki ma-ni Ɔrɔmu masa ki tɛ. Niŋ ki wuru ncin-a Ɔrɔmutɔnŋ kiri bidi-ri Isirayɛlitɔnŋ kiri tɛ kì. A konwɔtiŋ bi shɔɔrinŋ ma-ni Ɔrɔmu kili ki ru, kí wuru sɛbɛ wɔri-ra nʼtɛ, nwɔ̀ wuru ǹʼji-a tu miŋ kili ki jidaŋ yɛrima ki i. Niŋ na kiti kwuru bi miŋ kila-ri, nʼwuru so-a Ɔrɔmu masa ki dɔri-i, tu nʼwɔ kiti ki ta kwuru ntiŋ ɲaanfɛ. Pooli niŋ sɛbɛ ki kila wuru-i, niŋ ki ra, ntiŋ i Ɔrɔmu masa ki dɔri awɔ kiti kwurumaanna ki sun, nwɔma awɔ kiti ki i ta kwuru ntiŋ ɲaanfɛ. masa Sensaari tɛ daa, walima ǹʼfu kì? › »
18Yesu wuru kí ciiru daalinŋ ki tɔ-a, niŋ ki ra, ntiŋ tu kí tɛ : « Ábɛɛ wulufuulibitɔnŋ kari, nfɛnŋ na ábɛɛ i míŋ tɔnsunpa-ri? 19Ábɛɛ i ɲinisa ki sali-la jalinŋ wɔ̀ wu, á niŋ bɛɛ ji míŋ wu. »
Kí i wari peeraŋ tenŋ ji ntiŋ wu.
20Ntiŋ i kí ranɔri tu : « Nkɛnŋ miniŋ fa ntiŋ tɔ ka wari ka sun? »
21Kí tu : « Masa Sensaari. »
Yesu tu : « A niŋ ji-i, á masa ki wɔ ki wɔri masa ki tɛ, á i Kirinŋ wɔ ki wɔri Kirinŋ tɛ. »
22Kí niŋ wulu ki rama-i waarinŋ wɔ̀ ru, niŋ i bo kí tɔnŋ sun, kí i Yesu tu nmaŋ, kí i tiri.
Konkwuu kiri ŋmɛnibi ki
(Maraka 12.18–27; Luki 20.27–40)
23 Sadusiyɛnŋ kiri wuru kpeeri i, nwɔ̀ri bili-li konkwuu kiri ŋmɛnibi ki ra kì. Nini bɛɛ ri i arì kpari Yesu tɛ, kí i ntiŋ nanɔri : 24« Kalimɔɔ, Kirinŋ wɔ cintɔnŋ Musa ǹʼsɛbɛ tu-i sariya sɛbɛ ki ru yibɛɛ tɛ tu : ‹ A shuru mari cɛn, ntiŋ i beeni daŋ kilabali awɔ mari ki ra, tu ntiŋ pwaŋ ki kakan niŋ i mari ki shi, nwɔma ciniŋ i kila a wɔrinŋ ki ra.#Sariya kiri 25.5–6. › 25Nka, yibɛɛ gbɛ, tindaŋ jɔnpɔni wuru yibɛɛ kanfɛ, kí ru cɛɛnni ki i na mari bɛɛ cɛn, niŋ i na beeni, niŋ i daŋ kila mari ki ra kì, ntiŋ pwaŋ ki i mari ki kila. 26Tindaŋ fuluntɔnŋ ki wɔ ki i ji mìŋ ɲaan tenŋ ki tɛ, ŋì i bo ǹʼbyantɔnŋ ki sun, fɔ ŋì i ta so tindaŋ jɔnpɔnɔtɔnŋ ki sun. 27Kíbɛɛ bataa beenimaan ki kɔɔtɛ, mari ki yɛrima ki i na beeni. 28Niŋ ɲaan ki tɛ, a konkwuu kiri na ŋmɛni, mari ki a na ji nkɛnŋ wɔ ka koŋ jɔnpɔni ka ru? Sabu kí fɔn bataa ǹʼkila de-i arɔɔ mari i. »
29Yesu i kí rupwulu tu : « Ábɛɛ fɔni-i, sabu ábɛɛ Kirinŋ wɔ sɛbɛ ki ru wulu ki tɔ-a kì, á dumiŋ ǹʼwɔ sotinbi ki tɔ-a kì. 30Niŋ ji-i kì, a konaŋ kiri na ŋmɛni, shuru ri fa mari ri arìmaŋ cɛn-a kili kì, kɔ́ɔ́ ɲaninkulutɔnbi ki i ji-a miŋ tu kirinpɔlila mɛlɛkɛn ni.
31Nwɔ̀ i konkwuu kiri ŋmɛnibi ki i, ábɛɛ ka mani ka kali ja Kirinŋ wɔ wulu sɛbɛ ki ru sun kì wa? Kirinŋ tu ábɛɛ tɛ tu : 32‹ Míŋ i Aburahamu wɔ Kirinŋ ki i, ŋí i ji Ishaka wɔ Kirinŋ ki i, niŋ fa Yakuba wɔ Kirinŋ ki i.#Pobi ki 3.6, 15–16. › Niŋ i ǹʼji-a tu Kirinŋ konkwuu kiri wɔ Kirinŋ i kì, duu ɲaninkulutɔnŋ ni wɔ. »
33Koŋ finŋ woo finŋ niŋ wulu kiri rama-i, Yesu wɔ kalintanka ɲaan ki i bo kí bataa tɔnŋ sun.
Sariya kiri bataa ru sinaŋ ki bi ki
(Maraka 12.28–34; Luki 10.25–28)
34Farinsiyɛnŋ kiri na-i ǹʼtɔ tu Yesu wulu kɔ Sadusiyɛnŋ kiri daru waarinŋ wɔ̀ ru, nini i arì rakɔli na. 35Sariya kalimɔɔ sinaŋ bɛɛ wuru kí ru, niŋ i ji ǹʼtɛ á i Yesu kɔrɔbɔ, niŋ i ntiŋ nanɔri tu : 36« Kalimɔɔ, sariya kiri bataa ru sinaŋ ki ǹʼdanwɔ? »
37Yesu i ntiŋ nupwulu tu : « NʼŊuntiŋ Kirinŋ ki bidi nʼtɛ, nʼciiru ki bataa wu, nʼɲini ki bataa wu, niŋ fa nʼɲakili ki bataa wu.#Sariya kiri 6.5. 38Sariya kiri ru jɔnɔ ki fa yìrì ru sinaŋ ki i niŋ i. 39Sariya fuluntɔnŋ i nmaŋ, nwɔ̀ fa ǹʼjɔnɔ ki po-i, niŋ tu : ‹ Nʼkaashi ki bidi nʼtɛ miŋ tu nʼyɛrima ki. ›#Sarakawɔrɔtɔnŋ kiri 19.18. 40Sariya ki pyɛ ki bataa fa cintɔnŋ kiri wɔ kalinŋ ki bataa i kila-a ka sariya fuuli ka ru. »
Kirisa fa Dawuda bi ki
(Maraka 12.35–37; Luki 20.41–44)
41Ŋì i Farinsiyɛnŋ kiri rakɔlimaan ki tu, Yesu i kí ranɔri tu : 42« Ábɛɛ nfɛnŋ bi-a Kirinŋ Ɲaannakonshimaan ki bi sun? Ábɛɛ ɲaanna tu nkɛnŋ nupo i? » Kí tu : « Masa Dawuda nupo yɛ. »
43Yesu tu kí tɛ : « A niŋ ji-i, nfɛnŋ na, Ɲiniwɔlinŋ ki baraka ra, Dawuda i Kirinŋ Ɲaannakonshimaan ki dɔri tu a Ŋuntiŋ? Sabu Dawuda tu :
44‹ Ŋuntiŋ Kirinŋ ǹʼbi-i míŋ Ŋuntiŋ ki tɛ tu :
“Na sɔɔ ńʼpantɛ,
fɔ míŋ na miŋ ɲa kiri pa de nʼkanŋ fɛ waarinŋ wɔ̀ ru.” ›#Shu kiri 110.1.
45A Masa Dawuda ji Kirinŋ Ɲaannakonshimaan ki dɔri a Ŋuntiŋ, ntiŋ a so ji-i ntiŋ nupo o dɔɔkunŋ? »
46Koŋ tɔri tenŋ so ntiŋ wɔ wulu ki rupwuluka kila-i kì, niŋ na, ŋì i shi niŋ shikaŋ sun, koŋ tɔri jɛɛn ntiŋ i Yesu ranɔri kili kì.
Currently Selected:
Matiyu 22: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
