Matiyu 28

Yesu ŋmɛni bi ki

(Maraka 16.1–10; Luki 24.1–12; Yuhana 20.1–10)

1 Nufaan jibi ki fwuudemaan ki, ku ki sunŋ jɔnɔ ki, sisɔli ki sun, Makidala Mariyamu niŋ fa a tɔɔmaŋ Mariyamu tɔri i tiri saali ki rashɛɛli. 2Mìŋ manaanŋ tenŋ ki ru, pwɔkulinŋ ki i sɛrɛsɛri kusɛbɛ, Ŋuntiŋ ki wɔ mɛlɛkɛn ki bɛɛ i jɛri po kirinpɔli ki ra, ŋì i na faa ki kulukulu san saali tɔnŋ ki ra, ŋì i sɔɔ ǹʼsun. 3Mɛlɛkɛn ki ɲaanfɛ ki wuru cucu-a, miŋ tu kirinŋani, ǹʼwɔ juulinŋ kiri i fɔɔ pɛlipɛli. 4Saali ki ɲaannasuutɔnŋ kiri kɛnika jɛ ki, nini i sɛrɛsɛri, kí i fɛɛn fwuniŋ sun, kí i ciri.

5Mɛlɛkɛn ki tu ka mari kari tɛ tu : « Á fa kɛni kì, sabu míŋ ǹʼtɔ-i ńʼtu ábɛɛ Yesu ceeli-la, kí nwɔ̀ kpinkpi-i suu ki sun. 6Ntiŋ kwumaŋ kì, ntiŋ ŋmɛni-i miŋ tu ntiŋ yɛrima ki ǹʼbi wuru ɲaan wɔ̀ tɛ. Á na ntiŋ bilimaŋ ki shɛɛli. 7Á á rukwulu tiri ǹʼbi ntiŋ wɔ kalindaŋ kiri tɛ tu ntiŋ ŋmɛni. Ntiŋ tu a ra tiri ábɛɛ jɛŋ Galile sɔɔta ki ru, ábɛɛ ra ta ntiŋ kila niŋ mani ki ru. Cinŋ wɔ̀ wuru míŋ gbɛ, ŋí i ǹʼbi ábɛɛ tɛ, niŋ wuru kaa. »

8Mari kiri kɛnimaan ki fa kí ciirudimaan kiri i arì rukwulu po saali ki ra, kí i bili tiri-ri niŋ wulu ki bi Yesu wɔ kalindaŋ kiri tɛ. 9Kí tirira ki, kí fa Yesu i ta fu, ntiŋ tu kí tɛ : « Á co! » Kí i arì kwushiri, kí i arì kɔlɔkɔli ntiŋ kanŋ kiri wu, kí i ntiŋ gbɛ. 10Yesu tu kí tɛ : « Á fa kɛni kì, á tiri ǹʼbi míŋ tindaŋ kiri tɛ, tu kí tiri Galile sɔɔta ki ru, tu kí a ta míŋ ja niŋ mani ki ru. »

Saali ki ɲaannasuutɔnŋ kiri wɔ wulu kiri

11Ŋì i mari kiri tu saa ki fan, saali ɲaannasuutɔnŋ kiri bɛɛ ri i de kili ki ru, bi woo bi ma-i, kí i ta niŋ bataa rakali Kirinŋ tɛ sarakawɔrɔtɔnŋ kiri ŋununtiŋ kiri tɛ. 12Sarakawɔrɔtɔnŋ kiri ŋununtiŋ kiri fa cɛɛnni kiri i ta arì manja niŋ bi kiri sun. Kí i wari mwɔɔnna wɔri saali ɲaannasuutɔnŋ kiri tɛ. 13Kí i ǹʼbi nini tɛ tu : « Á ǹʼbi-ri tu ábɛɛ tu ɲini sun, tu Yesu wɔ kalindaŋ kiri i na ntiŋ kwuu ki kwun shi cii ki ru, tu kí i tiri ǹʼwu. 14A niŋ bi kiri so masa ki sun waarinŋ wɔ̀ ru, yibɛɛ ra ǹʼɲaanbika shɔ ntiŋ tɛ, nwɔma ntiŋ fa ábɛɛ ɲaanfɛkwulu kì. »

15Saali ɲaannasuutɔnŋ kiri i niŋ wari ki mwu, kí i ǹʼma miŋ tu ǹʼbi de wuru kí daru ɲaan wɔ̀ tɛ. Saali ɲaannasuutɔnŋ kiri niŋ wulu wɔ̀ri bi-i, ninki i faa bi-a Yawutu kiri kanfɛ hali jiŋ.

Yesu yɛri ji bi ki awɔ kalindaŋ kiri wu

(Maraka 16.14–18; Luki 24.36–49; Yuhana 20.19–23; Mabikiri 1.6–8)

16Kalindaŋ bwununtenŋ ki i tiri Galile sɔɔta ki ru. Yesu tɔnŋ wɔ̀ wulu bi wuru kí tɛ, kí i tiri niŋ mani ki ru. 17Kí ta-i ntiŋ ja waarinŋ wɔ̀ ru, kí i ntiŋ gbɛ. Nka ǹʼbɛɛ ri wuru faa sii sii-ra. 18Yesu i a kpari kí tɛ, ntiŋ i ǹʼbi kí tɛ tu :

« Sotinbi ki bataa wɔri-i míŋ tɛ kirinpɔli ki ra niŋ fa pwɔkulinŋ ki sun. 19Niŋ ki ra, á ta juniɲa ki bataa ru, nwɔma mɔ́ɔ́n kalindaŋ ni i ji shiya kiri bataa ru, á i kí wu Tiŋ ki fa Danshuru ki niŋ fa Ɲiniwɔlinŋ ki tɔ ra. 20Míŋ finŋ woo finŋ ji-i ábɛɛ wu, á i kí kali nini bataa ra, tu kí tiri kɛɲɛ nini wu. Míŋ kɔniŋ a tu ábɛɛ fan jibi woo jibi, fɔ ka juniɲa ka i ta kɔ. »

Currently Selected:

Matiyu 28: JOB

Highlight

Copy