Matiyu 19
19
Yesu wulu wɔ̀ bi-i fwuru ba bi ki sun
(Maraka 10.1–12)
1Yesu kɔ-i awɔ wulu kiri ra waarinŋ wɔ̀ ru, ntiŋ i po san Galile sɔɔta ki ru, ntiŋ i tiri Yude mani bɛɛ ru, ninwɔ̀ i Yurudɛn baa ki kuŋ nu. 2Konaŋ kwuru mwɔɔnna i arì bo ntiŋ cɛfan, ntiŋ i kɔ́ɔ́ kiratɔnŋ kiri kene niŋ mani nu nmaŋ.
3Niŋ mani nu, Farinsiyɛnŋ bɛɛ ri i arì kpari ntiŋ tɛ. Kí i ji ǹʼtɛ arì i ntiŋ tɔnsunpa, niŋ na, kí i ntiŋ nanɔri tu : « Ŋì i kɛɲɛ sariya ki wu, shuru ra so awɔ mari pani-i ŋuŋ ki bataa ra wa? »
4Yesu i kí rupwulu tu : « Sɛbɛ kiri i nwɔ̀ bi-a, ábɛɛ niŋ kali kì wa? Ábɛɛ ǹʼkali tu juniɲa tɔnpa waari ki ru, tu Kirinŋ finŋ kiri bataa po waarinŋ wɔ̀ ru, tu ‹ ŋì i konanmini namɔni ǹʼshuru fa ǹʼmari kì wa?#Tɔnpa ki 1.27; 5.2. › 5Tu niŋ kɔɔtɛ Kirinŋ i ǹʼbi tu : ‹ Niŋ ki ra, shuru i a san-a a tiŋ fa a ɲiŋ na, ŋì i ta a da awɔ mari ki ra, kí koŋ fuuli ki i dɛbɛ ji-a koŋ tenŋ i.#Tɔnpa ki 2.24. › 6Kí shɛɛli-la koŋ fuuli kili kì, kí i dɛbɛ ji-a koŋ tenŋ i. Niŋ ki ra, Kirinŋ nwɔ̀ri ji-i tenŋ i, koŋ tɔri tenŋ fa nini san arìmaŋ na kì. »
7Farinsiyɛnŋ kiri i Yesu ranɔri sɛbɛ tu : « Niŋ na, nfɛnŋ na Kirinŋ wɔ cintɔnŋ Musa i ǹʼbi tu, shuru ki kakan ntiŋ i fwuru ba sɛbɛ wɔri mari ki tɛ, tu ntiŋ i nmari pani?#Sariya kiri 24.1; Matiyu 5.31. »
8Yesu tu kí tɛ : « Ábɔɔ ciiru ɲakili furubi ki ncusun-i, Musa i a tu, tu ábɛɛ áwɔ mari kiri pani, a niŋ ji-i kì, juniɲa tɔnpa waari ki ru, niŋ bi-ri kì. » 9Ntiŋ tu kí tɛ : « Míŋ kɔniŋ i ǹʼbi-a ábɛɛ tɛ, ńʼtu koŋ woo koŋ i awɔ mari fwuru ba-a, ntiŋ i ǹʼtɔri cɛn, nintiŋ i nankulunbi ma-a, duu fwuru ba ki ŋuŋ ki ji tu mari ki wuru nankulunbi ma-a. »
10 Kalindaŋ kiri tu ntiŋ tɛ : « A shuru fa awɔ mari ki bi ki ji ninkunŋ, shuru ki i tu kakoŋ i, niŋ a pari dɛ! »
11Yesu tu kí tɛ : « Shuru kiri bataa ra so ji-i ka kalinŋ ka tɛ kì, duu Kirinŋ yɛrima ki ǹʼso ki wɔri-i nwɔ̀ri tɛ. 12Sababu mwɔɔnna i konaŋ kiri tu-a kakoŋ i : Ǹʼbɛɛ ri fa arɔɔ ji po-i, ǹʼtɔri ri wɔ i ji konanmini mwɔɔn i, ǹʼtɔri ri wɔ i ji kirinpɔlila Masabi ki cɛfan bi i. A nwɔ̀tiŋ ji-a so ji-i ka kalinŋ tɛ, ntiŋ i ji ǹʼtɛ. »
Yesu wɔ jubasanbi ki tiraŋ kiri tɛ
(Maraka 10.13–16; Luki 18.15–17)
13Jibi bɛɛ, koŋ bɛɛ ri i na daŋ ni#19.13 Niŋ daŋ kiri ru, ǹʼbɛɛ ri wuru bwɔ sun, ǹʼtɔri ri i ji jiri bwununtenŋ bishi kila-ri kɔ. wu Yesu tɛ sɛbɛ, nwɔma ntiŋ i a gbɛ bili kí sun#19.13 gbɛ bili koŋ sun : Niŋ wuru ji-a tu kí ntiŋ ɲaannashi cinŋ ki bɛɛ ra. Niŋ wuru ma-a ŋì i ji taanmashɛ ɛ, nwɔ̀ wuru ǹʼji-a tu, Kirinŋ kafinŋ wɔlinŋ, walima baraka, walima kenebi wɔri nintiŋ tɛ., ntiŋ i juba san kí tɛ. Nka kalindaŋ kiri i jɛbi-ri niŋ koŋ kiri gbɛ. 14Yesu tu kí tɛ : « Á ncusun tiraŋ kiri na míŋ tɛ, á fa kí suu míŋ tɛ na ki sun kì, sabu konwɔtiŋ ni i miŋ tu tiraŋ ni, kirinpɔlila Masabi ki i nini wɔ. »
15Ntiŋ i a gbɛ bili kí sun, ntiŋ i juba san kí tɛ, niŋ kɔɔtɛ, ntiŋ i po san niŋ mani nu.
Nafulutiŋ kiri fa kirinpɔlila Masabi ki bi ki
(Maraka 10.17–31; Luki 18.18–30)
16Jibi bɛɛ, shuru bɛɛ i a kpari Yesu tɛ, ntiŋ i nanɔri tan tu : « Yɔɔ kalimɔɔ, míŋ kakan ŋí i bi shɔɔrinŋ danwɔ ma, nwɔma ŋí i ɲaninkulutɔnbi kɔbali ki kila? »
17Yesu tu ntiŋ tɛ : « Nfɛnŋ na, miŋ míŋ nanɔri-ri bi shɔɔrinŋ bi sun? Kirinŋ tenŋ pe shɔ-i. A miŋ ji ǹʼtɛ ŋi i ɲaninkulutɔnbi kɔbali ki kila, miŋ kakan-i ŋi i Kirinŋ wɔ sariya kiri saa ki tiri. »
18Niŋ shuru ki tu : « Nini sariya danwɔ ri? »
Yesu tu ntiŋ tɛ tu : « Fa koŋ kilɛn kì, fa nankulunbi ma kì, fa kwunŋ tan kì, fa puru ye koŋ wu kì, 19nʼtiŋ ki fa nʼɲiŋ ki gbɛ, nʼkaashi ki bidi nʼtɛ miŋ tu nʼyɛrima ki.#Pobi ki 20.12–16; Sariya kiri 5.16–20; Sarakawɔrɔtɔnŋ kiri 19.18. »
20Niŋ ɲɔrɔkɔ ki tu Yesu tɛ : « Míŋ niŋ sariya kiri bataa rasɔɔ-ɔ. Míŋ kakan ŋí i nfɛnŋ ma sɛbɛ? »
21Niŋ na, Yesu tu ntiŋ tɛ : « A miŋ ji ǹʼtɛ ŋi i nafaa, tiri, ŋi i ta nʼgbɛfɛfinŋ kiri bataa ju, ŋi i ǹʼjalinŋ ki lu gbɛwɔ ri tɛ. A miŋ niŋ ma, miŋ a nafulu mwɔɔnna bo nʼjɛŋ kirinpɔli ki ra. Niŋ kɔɔtɛ, ŋi i na ǹʼpa míŋ cɛfan. »
22Ɲɔrɔkɔ ki niŋ wulu ki rama-i waarinŋ wɔ̀ ru, ntiŋ ciirudi kili kì, ntiŋ i tiri, sabu nafulutiŋ sinaŋ wuru-i.
23Yesu tu awɔ kalindaŋ kiri tɛ tu : « Sɛli ki ra, míŋ a ǹʼbi ábɛɛ tɛ, ńʼtu nafulutiŋ derama ki furu kirinpɔlila Masabi ki ru sa! » 24Ntiŋ tu : « Míŋ a ńʼpwulu ǹʼsun, ɲɔɔnmi demaŋ di-i mɛsɛni ta ra, ŋì i fwuu nafulutiŋ derama ki sun Kirinŋ wɔ Masabi ki ru. »
25Kalindaŋ kiri niŋ wulu kiri rama-i waarinŋ wɔ̀ ru, yìrì i kí ciiru daalinŋ kɔ, ŋì i gbɛde. Kí i ǹʼbi tu : « A ǹʼji niŋ ɲaan ki tɛ, nkɛnŋ a so a mwu-i? »
26Yesu i kí shɛɛli, ntiŋ i ǹʼbi kí tɛ : « Konanmini gbɛ, niŋ so-a ma-i kì, nka Kirinŋ gbɛ, bi bataa i so-a ma-i. »
27Niŋ ki ra, Pyɛɛri i wulu ki shi, ntiŋ i ǹʼbi tu : « Yibɛɛ ji? Á ǹʼshɛɛli, yibɛɛ yi kɔɔye-i bi bataa ra, yi i ǹʼpa ábɛɛ cɛfan, yibɔɔ ki a ji dɔɔkunŋ? »
28Yesu tu kí tɛ : « Sɛli ki ra, míŋ a ǹʼbi ábɛɛ tɛ, ńʼtu a finŋ bataa na ji ǹʼŋunaŋ i waarinŋ wɔ̀ ru, niŋ fa Koŋ Danshuru ki i na sɔɔ awɔ masawaalinŋ nɔɔritiŋ ki sun, ńʼtu ábɛɛ koŋ bwununfuuli wɔ̀ri ǹʼpa-i míŋ cɛfan, ńʼtu ábɛɛ yɛrima kiri ra na sɔɔ masawaalinŋ bwununfuuli sun, á i Isirayɛli shiya bwununfuuli ki wɔ kiti ki kwuru. 29Koŋ woo koŋ i a kaan-na awɔ fu tɛ, walima a tindaŋ ni tɛ, walima a narinmari ri tɛ, walima a tiŋ tɛ, walima a ɲiŋ tɛ, walima a daŋ ni tɛ, walima awɔ ji ri tɛ míŋ bira, nintiŋ a niŋ finŋ kiri bishi yaataanŋ taanŋ kila, ntiŋ i ji-a ɲaninkulutɔnbi kɔbali ki kila sɛbɛ. 30Nka jɛntɔnŋ kiri mwɔɔnna a ji kɔɔtɛtiiri i, kɔɔtɛtɔnŋ kiri mwɔɔnna i ji jɛntiiri i sɛbɛ. »
Currently Selected:
Matiyu 19: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
