Matiyu 20
20
Ji ru cinŋ matɔnŋ kiri fa arɔɔ sali bi ki
1Yesu tu awɔ kalindaŋ kiri tɛ tu : « Kirinpɔlila Masabi ki i miŋ tu kanintiŋ wɔ̀ sɔli po-i siira jona, ntiŋ i cinŋ matiiri ceeli bo awɔ ji ru. 2Ntiŋ fa nini i fu warifɔ daŋ tenŋ na sunŋ ki ru. Ntiŋ i nini bo tiri awɔ ji ki ru. 3Sunŋ ki na-i kwulu pyaanniŋ, ntiŋ i po sɛbɛ, ntiŋ i ta fa ǹʼbɛɛ ri wu kili ki ru bari mamaŋ bɛɛ ru, kí wuru finŋ tɔri ma-a kì. 4Ntiŋ i ǹʼbi nini tɛ tu : ‹ Ábɛɛ yɛrima kiri tiri mɔ́ɔ́n ji ki ru, míŋ a ábɛɛ salika shɔ. ›
5Nini i tiri ntiŋ wɔ ji ki ru sɛbɛ. Sunŋ ki na-i so ŋununfaninmwuŋ waarinŋ wɔ̀ ru, ntiŋ i po sɛbɛ, ntiŋ i ta koŋ tɔri ri dɔri, tu kí na cinŋ ki ma koŋ jɔnɔ kiri fan awɔ ji ki ru, tu a ra kí salika shɔ. Kɔɔtɛ, ntiŋ i po sunŋ ki kɛlinyemaan na, ntiŋ i ta koŋ tɔri ri dɔri mìŋ ɲaan tenŋ ki tɛ, nini i na bo koŋ jɔnɔ kiri sun sɛbɛ. 6Sunŋ ki ji-i juu kɔ-a, ntiŋ i po sɛbɛ, ntiŋ i ta koŋ tɔri ri tu ja, ntiŋ tu nini tɛ : ‹ Nfɛnŋ na, ábɛɛ i sɔɔ butu-ri ka ɲaan ka tɛ cinŋ mabali? ›
7Kí tu : ‹ Sabu, koŋ yibɛɛ shi cinŋ na kì. › Ntiŋ tu kí tɛ : ‹ Niŋ na, ábɛɛ yɛrima kiri tiri cinŋ ma mɔ́ɔ́n ji ki ru sɛbɛ. › Nini i ta bo cinŋ matɔnŋ jɔnɔ kiri sun sɛbɛ.
8Gbɛsan waari ki so-i, jitiŋ ki i ǹʼbi awɔ nafulu lakparitɔnŋ ki tɛ tu : ‹ Cinŋ matɔnŋ kiri dɔri, ŋi i na kɔ́ɔ́ jalinŋ kiri wɔri kí tɛ, sali ki tɔnpa kɔɔtɛ wɔ̀ namaan kiri sun, ŋi i ta ǹʼnakɔ koŋ jɔnɔ namaan kiri sun. › 9Cinŋ matɔnŋ wɔ̀ri na-i sunŋ ki i ji juu-ra kɔ, nini i na, nafulu lakparitɔnŋ ki i warifɔ daŋ tenŋ tenŋ wɔri ta nini tenŋ tenŋ tɛ. 10Ntiŋ i sali ki tan ninkunŋ, fɔ ŋì i ta so koŋ jɔnɔ namaan kiri sun. Ǹʼwuru nini cirasun, tu arìbɛɛ sali ki kakan ŋì i mwɔ kɔɔtɛtɔnŋ kiri wɔ ki wu. Nka nafulu lakparitɔnŋ ki i warifɔ daŋ tenŋ tenŋ wɔri ta nini tenŋ tenŋ tɛ sɛbɛ.
11Kí ji-i arɔɔ sali kiri mwu-a waarinŋ wɔ̀ ru, kí i kanintiŋ ki ŋunuŋunu-ni. 12Kí i ǹʼbi-ri tu : ‹ Kari na-i kɔɔtɛ, kí i lɛɛri tenŋ baara bantenŋ ma, ábɛɛ i jalinŋ tɔnŋ tenŋ wɔri yibɛɛ fa kí bataa tɛ dɔɔkunŋ? Yibɛɛ kiri dumiŋ i ji sunŋ ki bataa ma cinŋ ki na sunŋ kwulu ki ra! ›
13Nka kanintiŋ ki i ǹʼbɛɛ tenŋ nupwulu, ntiŋ i ǹʼbi tu : ‹ Ńʼwɔ wɔshuru, míŋ fɛɛn miŋ sun kì dɛ! Miŋ fa míŋ fu-ri warifɔ daŋ tenŋ ki sun sunŋ tenŋ sali ki i kì wa? 14Nʼwɔ sali ki mwu, ŋi i tiri. Ǹʼdi-i míŋ tɛ, ŋí i mɔɔn sali ki bishi wɔri kɔɔtɛ natɔnŋ ki tɛ. 15Míŋ a so ńʼdintɛ bi ma-i ńʼwɔ nafulu ki wu kì wa? Miŋ i míŋ kari-ra ńʼwɔ shɔɔrinŋ mamaan ki bira wa? › »
16Niŋ kɔɔtɛ, Yesu tu : « Niŋ ɲaan ki tɛ, kɔɔtɛtɔnŋ kiri ra na ji jɛntiiri i, jɛntɔnŋ kiri i ji kɔɔtɛtiiri i. »
Yesu beŋ ki fa ntiŋ ŋmɛni bi ki bi kaan byantɔnŋ ki ntiŋ gbɛ
(Maraka 10.32–34; Luki 18.31–34)
17Yesu tirira ki tu-i Yerusalɛmu, ntiŋ i awɔ kalindaŋ bwununfuuli ki dɔri po arì cinŋ, ntiŋ i ǹʼbi kí tɛ saa ki fan tu :
18« Yi i tiri-ra Yerusalɛmu kaa, Koŋ Danshuru ki a ta de sarakawɔrɔtɔnŋ kiri ŋununtiŋ kiri fa sariya kalimɔɔ kiri gbɛfɛ. Nini i kiti ki fɛɛn ntiŋ sun, tu ntiŋ fa kilɛn kakan 19kí i ntiŋ de Kirinŋ tɔbali kiri gbɛfɛ, nwɔma nini i yɛtan bo ntiŋ sun, kí i ntiŋ bwɔ suulinŋ na, kí i ntiŋ kpinkpi suu sun. Niŋ kɔɔtɛ, ǹʼsunŋ byantɔnŋ ki, ntiŋ a ŋmɛni po san konkwuu kiri kanfɛ. »
Nsebede danshuru kiri ɲiŋ ki bi wɔ̀ rafɛ-i Yesu gbɛ
(Maraka 10.35–45; Luki 22.25–27)
20Niŋ kɔɔtɛ, Nsebede danshuru kiri ɲiŋ ki i a kpari Yesu tɛ a daŋ kiri wu, nmari i ta a kwushiri, nmari i ntiŋ nafɛ tu ntiŋ shɔ a sun.
21Yesu tu nmari tɛ : « Miŋ nfɛnŋ tɛ? »
Nmari tu : « Míŋ i ábɛɛ rafɛ-a, á á tɔnŋ wɔri ńʼtɛ, tu ábɛɛ na ta sɔɔ áwɔ masabi ki ru waarinŋ wɔ̀ ru, á i ncusun míŋ danshuru fuuli kari wɔ̀ri i kwumaŋ, koŋ tenŋ i sɔɔ á pantɛ, tu tenŋ i sɔɔ á nɔrintɛ. »
22Yesu i kí rupwulu tu : « Ábɛɛ i finŋ wɔ̀ rafɛ-a, ábɛɛ niŋ tɔ-a kì. Míŋ a na cɔɔri ɲaan wɔ̀ tɛ, ábɛɛ ra so niŋ cɔɔri ki kwun-i á ru wa? »
Kí tu : « Yibɛɛ ra so. »
23Yesu i kí rupwulu tu : « Sɛli yɛ, ábɛɛ ra mɔ́ɔ́n cɔɔri ki bishi kwun á ru, nka nwɔ̀ i míŋ pantɛ walima míŋ nɔrintɛ sɔɔbi ki i, míŋ niŋ wɔrɔtɔnŋ ki i kì. Niŋ sɔɔmaŋ kiri ra wɔri kpeeri tɛ, míŋ Tiŋ ki yìrì ramɔni sɔɔ-ɔ nwɔ̀ri jɛŋ. »
24Kalindaŋ byinŋ pyɛ kiri niŋ wulu ki rama-i waarinŋ wɔ̀ ru, nini tɔnŋ i kwulu tindaŋ fuuli kari cɛfan.
25Yesu i kí dɔri, ntiŋ i ǹʼbi kí tɛ : « Ábɛɛ i ǹʼtɔ-a tu juniɲa ka ru ŋununtiŋ kiri faan sɔɔ-ra arɔɔ konanbi ki sun, kí ru koŋ sinaŋ kiri i arɔɔ sotinbi ki ji-ri kí wu. 26Nka ǹʼkakan ŋì i ji ábɛɛ gbɛ ninkunŋ kì dɛ! A konwɔtiŋ ji ǹʼtɛ a i ji koŋ sinaŋ i ábɛɛ ru, tu nintiŋ ji á bataa tɛ cinŋ matɔnŋ i. 27Konwɔtiŋ i ǹʼtɛ a i ji ábɛɛ jɛntɔnŋ i, tu nintiŋ a yɛri ji ábɔɔ joŋ i. 28Mìŋ ɲaan tenŋ ki tɛ, Koŋ Danshuru ki na ŋuŋ ki tu konaŋ kiri baara ma a tɛ kì, nka ntiŋ na-i baara ma konaŋ kiri tɛ, niŋ fa ntiŋ a yɛri ki ɲini ki wɔri koŋ mwɔɔnna ŋunsan a. »
Ɲaanfwuu fuuli bɛɛ kene bi ki Yesu gbɛ
(Maraka 10.46–52; Luki 18.35–43)
29Yesu fa awɔ kalindaŋ kiri ji-i po-a Yeriko kili ki ru waarinŋ wɔ̀ ru, koŋ mwɔɔnna i ǹʼpa ntiŋ cɛfan. 30Ɲaanfwuu fuuli bɛɛ sɔɔ wuru saa ki tɔnŋ na. Nini ǹʼnama-i tu Yesu fwuude-a niŋ mani ki ru, kí i yaalinpo, kí i ǹʼbi-ri tu : « Ŋuntiŋ ki, Dawuda danshuru, yi sunmakwulupa. »
31Konaŋ ki i jɛbi-ri kí gbɛ, tu kí arì gbansan, nka kí i ǹʼbɛɛ bo-ri arɔɔ yaalinŋ ki sun tu : « Ŋuntiŋ ki, Dawuda nupo, yi sunmakwulupa! »
32Yesu i tu, ntiŋ i kí dɔri, ntiŋ i kí ranɔri tu : « Ábɛɛ i ǹʼtɛ míŋ i nfɛnŋ ma ábɛɛ tɛ? »
33Kí tu : « Ŋuntiŋ ki, á ncusun yibɛɛ ɲaninaŋ kiri i nawwulu. »
34Kí makwulu Yesu pa-i, ntiŋ i myɛ kí ɲaninaŋ kiri na, mìŋ manaanŋ tenŋ ki ru, kí ɲaninaŋ kiri i maannaja, kí i ǹʼpa ntiŋ cɛfan.
Currently Selected:
Matiyu 20: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
