Matiyu 18
18
Koŋ wɔ̀ gbɛ-i kirinpɔlila Masabi ki ru
(Maraka 9.33–37; Luki 9.46–48)
1 Kalindaŋ kiri i arì kpari Yesu tɛ, kí i ntiŋ nanɔri tu : « Nkɛnŋ konaŋ kiri bataa ru koŋ sinaŋ ki i kirinpɔlila Masabi ki ru? »
2Niŋ waari ru, Yesu i daŋ pyaanŋ bɛɛ dɔri, ntiŋ i na niŋ tu kí faninmwuŋ, 3ntiŋ i ǹʼbi tu : « Sɛli ki ra, míŋ a ǹʼbi ábɛɛ tɛ ńʼtu, a ábɛɛ á rapwulu ji miŋ tu daŋ pyaanŋ ni kì, ńʼtu ábɛɛ ra de kirinpɔlila Masabi ki ru fyewu kì. 4Konwɔtiŋ i a yɛri sunjɛri-ra miŋ tu ka daŋ pyaanŋ kaa, nintiŋ ki gbɛ-i kirinpɔlila Masabi ki ru. 5Koŋ woo koŋ i ka daŋ ka bishi paka shɔ-a míŋ bira, nintiŋ míŋ paka shɔ-i. »
Bi wɔ̀ i koŋ bo-a bijɛ ki ru
(Maraka 9.42–48; Luki 17.1–2)
6Yesu tu sɛbɛ : « Ka tiraŋ kari wɔ̀ri bili-i míŋ na, koŋ woo koŋ i ji-a sababu, ntiŋ i niŋ bɛɛ tenŋ ŋununli, ntiŋ i ǹʼfɔni, sana ntiŋ i niŋ ma, a kí kwɔtuntuŋ sinaŋ kɔli-li ntiŋ yɛɛra, kí i ta ntiŋ kee bo wɛɛlufinju ki ru, niŋ wuru-ra pari ntiŋ sun. 7Ŋì a juu juniɲa nu tɔnŋ ni na, nwɔ̀ri ji-i sababu kí i konaŋ ni ŋununli. Ŋununlibi ki a tu mabali kì, nka koŋ woo koŋ i ji-a sababu ŋì i ma, ŋì a juu nintiŋ na dɛ!
8Niŋ na, a miŋ gbɛ tenŋ ki, walima miŋ kanŋ tenŋ ki ji-a ji sababu miŋ i bijɛ ma, ǹʼkwuru kee mani narimaŋ nu, sabu ŋi i ta de nʼgbɛ tenŋ, walima nʼkanŋ tenŋ wu alijina ki ru, niŋ pari-i miŋ sun nʼgbɛ fuulitiŋ, walima nʼkanŋ fuulitiŋ ki keemaan wu tuu byibali ki ru.
9Mìŋ ɲaan tenŋ ki tɛ, a miŋ ɲaninaŋ tenŋ ki ji-a ji sababu miŋ i bijɛ ma, ǹʼkaanni kee mani narimaŋ nu, sabu ŋi i ta de nʼɲaniŋ tenŋ i ɲaninkulutɔnbi ki ru, niŋ pari-i miŋ ɲaninaŋ fuulitiŋ ki keemaan wu jaanama tuu ki ru.
10Á á yɛri paka shɔ, á fa daŋ pyaanŋ ka bɛɛ bikwɔ á sun kì, míŋ a ǹʼbi ábɛɛ tɛ, ńʼtu kɔ́ɔ́ mɛlɛkɛn kiri míŋ Tiŋ Kirinŋ ɲaanfɛ kirinpɔli ki ra waarinŋ bataa ru. 11[Sabu Koŋ Danshuru ki na-i koŋ fɔnimaan kiri ceeli, ntiŋ i kí mwu.] »
Saa fɔnimaan bi ki
(Luki 15.3–7)
12Yesu tu kí tɛ : « Ábɛɛ nfɛnŋ miiri-ra ka sun? A saa yaataanŋ (100) ji konwɔtiŋ gbɛ, a saa tenŋ fɔni san yìrì ra tɔnŋ ki ru, ntiŋ i saa yaapyiiraŋ fa bwununtenpɔni ki (99) tu-a tɔnŋ ki ru nmaŋ, ntiŋ i ta niŋ tenŋ ki ceeli kì wa? 13A ntiŋ ta ǹʼja waarinŋ wɔ̀ ru, sɛli ki ra, míŋ a ǹʼbi ábɛɛ tɛ, ńʼtu, ntiŋ i ciirudibi sinaŋ wɔ̀ kila-a ǹʼbira, ńʼtu ntiŋ niŋ kila-a saa yaapyiiraŋ fa bwununtenpɔni ki bira kì. 14Mìŋ ɲaan tenŋ ki tɛ, ábɛɛ Tiŋ wɔ̀ i kirinpɔli ki ra, niŋ ǹʼtɛ, hali tenŋ pe i fɔni san ka tiraŋ kari ra kì. »
Pɔli tu maŋ tɛ bi ki
15Yesu tu awɔ kalindaŋ kiri tɛ sɛbɛ : « A miŋ tindaŋ ki pɔli miŋ gbɛ, ta niŋ ɲaanbi ntiŋ tɛ, ńʼtenŋ fa ntiŋ tenŋ. A ntiŋ a tu mɔɔn wulu ki ra, ntiŋ wɔ tindanbi ki a tu a ɲaan tɛ. 16Nka, a ntiŋ a tu, ntiŋ i a tɔɔncu miŋ tɛ kì, koŋ tenŋ walima koŋ fuuli bo ńʼsun, á i ta wulubi ntiŋ tɛ, nwɔma bi ki i ɲaanpo shɛɛri fuuli walima shɛɛri byaŋ wɔ wulu bimaan sun.#Sariya kiri 19.15. 17A ntiŋ a kaan nini wɔ wulu lama, ta ǹʼbi bilinatɔnŋ kwuru ki tɛ. A ntiŋ a kaan bilinatɔnŋ kwuru ki wɔ wulu lama, ntiŋ bo bilinabali li walima ɲinisarakɔlɔtɔnŋ kiri fan.
18Sɛli ki ra, míŋ a ǹʼbi ábɛɛ tɛ, ńʼtu a ábɛɛ finŋ woo finŋ kɔli pwɔkulinŋ ki sun, tu niŋ a kɔli kirinpɔli ki ra, a ábɛɛ finŋ woo finŋ pili pwɔkulinŋ ki sun, niŋ a pili kirinpɔli ki ra. »
19Yesu tu sɛbɛ : « Míŋ a ǹʼbi ábɛɛ tɛ, ńʼtu a ábɛɛ koŋ fuuli fumaan ki fu bi woo bi sun, ka pwɔkulinŋ ka sun, á i ǹʼnafɛ, ńʼtu míŋ Tiŋ Kirinŋ wɔ̀ i kirinpɔli ki ra, niŋ a niŋ ma ábɛɛ tɛ. 20Sabu a koŋ fuuli walima koŋ byaŋ ja arìmaŋ nakɔli mani woo mani nu, míŋ tɔ ki bira, míŋ i kí faninmwuŋ. »
Yesu wɔ wulusuntalinŋ ki, bi tu maŋ tɛ bi ki sun
21Niŋ ɲaan ki tɛ, Pyɛɛri i nanɔri tan tu : « Ŋuntiŋ ki, míŋ kakan ŋí i ńʼtindaŋ ki wɔ pɔli ki tu ntiŋ tɛ kaan jinŋ? Fɔ kaan jɔnpɔni wa? »
22Yesu tu : « Aayi, míŋ a ǹʼbi ńʼtu fɔ kaan jɔnpɔni ki, nka ńʼtu fɔ kaan yaabyaŋ fa byinŋ (70) sɔɔmaŋ jɔnpɔni.
23Ábɛɛ ǹʼshɛɛli, kirinpɔlila Masabi ki fa finŋ wɔ̀ po-i, niŋ i kaa : Masa bɛɛ jɔrɔkɔ-i tu a ra a tɛ baara matɔnŋ kiri ra kɔni kiri ɲaan shɛɛli. 24Ntiŋ niŋ baara ki tɔnpa-i waarinŋ wɔ̀ ru, kí i na ntiŋ tɛ baara matɔnŋ bɛɛ wu ntiŋ tɛ, ninwɔ̀ ra kɔni ki so wuru waa mwɔɔnna#18.24 Niŋ jalinŋ ki wuru-ra so koŋ tenŋ wɔ jiri mwɔɔnna sali sun. sun. 25Miŋ tu jalinŋ ka salika ɲaan dantenŋ wuru niŋ baara matɔnŋ ki gbɛ kì, ntiŋ ŋuntiŋ ki tu kí ntiŋ fa awɔ mari ki fa arì daŋ kiri bataa pa ju joŋ ni i, niŋ fa tu kí i ntiŋ gbɛfɛfinŋ kiri bataa ju, awɔ kɔni ki i na sali.
26Baara matɔnŋ ki i a kwushiri a ŋuntiŋ ki fɛ, ŋi i ntiŋ nafɛ tu : ‹ Á á tɔnsunfili, á i míŋ sunsuu, míŋ a ábɔɔ kɔni ki bataa ceeli, ŋí i ǹʼsali. › 27Baara matɔnŋ ki makwulu i a ŋuntiŋ ki pa, ŋuntiŋ ki i awɔ kɔni ki fɛɛn, ntiŋ i baara matɔnŋ ki pani.
28Niŋ baara matɔnŋ ki po-i, niŋ fa a kaashi ki bɛɛ i ta fu, ntiŋ wɔ jalinŋ pyaanŋ#18.28 Niŋ wuru-ra fwuu koŋ tenŋ wɔ sunŋ tenŋ sali sun kì. kɔni wuru ninwɔ̀ ra. Ntiŋ i niŋ fɔɔn a yɛ sun, ntiŋ i nfaanna niŋ sifwuu rabyi-i, ntiŋ tu niŋ tɛ : ‹ Ńʼwɔ kɔni ki sali wɔri ńʼtɛ kaa dɔɔ! ›
29Ntiŋ kaashi ki i a fɛɛn ntiŋ kanŋ fɛ, niŋ i ntiŋ nafɛ tu : ‹ Nʼtɔnsunfili, ŋi i míŋ sunsuu, míŋ a mɔɔn kɔni ki bataa ceeli, ŋí i ǹʼsali. ›
30Wúfinŋ i a kaan rafɛ ki mwu, wú ǹʼtu niŋ sun kì, wú i ta a kaashi ki bo nkasu ru tu fɔ awɔ kɔni ki sali jibi.
31Baara matɔnŋ pyɛ kiri niŋ bi kiri ja-i waarinŋ wɔ̀ ru, niŋ i furu nini sun kusɛbɛ, kí i ta yìrì bataa rakali arì ŋuntiŋ ki tɛ. 32Niŋ ma-i, ŋuntiŋ ki i baara matɔnŋ ka dɔri na a tɛ, ntiŋ tu wú tɛ : ‹ Baara matɔnŋ juumaan, míŋ miŋ na kɔni ki bataa fɛɛn-ɛ, sabu miŋ míŋ nafɛ-i tu míŋ ǹʼtu nʼtɛ. 33Miŋ kakan-ni, ŋi i nʼkaashi ki sunmakwulupa, miŋ tu míŋ ǹʼma-i miŋ tɛ ɲaan wɔ̀ tɛ kì wa? › 34Ŋuntiŋ ki tɔnkwulumaan i niŋ baara matɔnŋ ki pa bo nkasu ru, nwɔma ntiŋ i cɔɔri niŋ mani nu, fɔ a ra kɔni ki sali jibi. »
35Yesu tu : « Mìŋ ɲaan tenŋ ki tɛ, a ábɛɛ bataa tenŋ tenŋ ji a tindaŋ ki wɔ pɔli ki tu-a ntiŋ tɛ, á ciiru ki bataa wu kì, míŋ Tiŋ wɔ̀ i kirinpɔli ki ra, niŋ a na ábɛɛ ma mìnkunŋ. »
Currently Selected:
Matiyu 18: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
