Luki 18
18
Yesu wulusuntalinŋ wɔ̀ bi-i kitikwurutɔnŋ ki fa kanimari ki bi ki sun
1Yesu wulusuntalinŋ ka bi-i awɔ kalindaŋ kiri tɛ, nwɔma ntiŋ i ǹʼji kí wu, tu konaŋ kakan ŋi i Kirinŋ nafɛ-ri waarinŋ bataa ru, tu koŋ fa jurubi de a yɛri ru kì. 2Ntiŋ tu kí tɛ : « Kitikwurutɔnŋ bɛɛ wuru kili bɛɛ ra, ntiŋ wuru kɛni-na Kirinŋ jɛŋ kì, niŋ fa ntiŋ wuru sunu ja-a koŋ nu kì. 3Mìŋ kili tenŋ ki ru, kanimari bɛɛ wuru nmaŋ. Bi bɛɛ i de nmari fa kilidaŋ ki bɛɛ faninmwuŋ. Nmari i tu nmari i na-ni kitikwurutɔnŋ ka tɛ, nwɔma awɔ bi ki i so ɲaanpo-i a fa a karishi ki faninmwuŋ. 4Mari ki i na cin niŋ tiri ki ra, kitikwurutɔnŋ ki nmari wɔ bi ki ɲaanpo-a kì, nka nmari i tu ntiŋ ɲaanfɛkwulu-la nmaŋ. Ǹʼna-i so waaci bɛɛ ru, kitikwurutɔnŋ ki i ǹʼbi a ciiru : ‹ Sɛli yɛ, míŋ kɛni-na Kirinŋ jɛŋ kì, ńʼdumiŋ koŋ gbɛ-a kì, 5nka míŋ a ka kanimari ka wɔ bi ki ɲaanpo, niŋ ji i kì, nmari ra tu na-a míŋ ɲaanfɛkwulu-li waarinŋ bataa ru. › »
6Niŋ na, Ŋuntiŋ ki tu kí tɛ : « Ábɛɛ kitikwurutɔnŋ kɛrimaan ka wɔ wulu ki shɛɛli! 7Niŋ na, Kirinŋ nwɔ̀ri ɲaannashi-i, ŋì i kí ji awɔ ri, a nini ji ǹʼnafɛ-a cii fa sunŋ, ŋì a ye kí tɛ nukwululula kì wa? 8Míŋ i ǹʼbi-a ábɛɛ tɛ, ńʼtu ŋì a kɔ́ɔ́ bi kiri ɲaanpo jona. Niŋ fa a fɔn na, Koŋ Danshuru ki na waari ki ru, ntiŋ a na koŋ jinŋ kila bili-la Kirinŋ na? »
Yesu wulusuntalinŋ wɔ̀ bi-i Farinsiyɛnŋ ki fa ɲinisarakɔlɔtɔnŋ ki bi sun
9Koŋ wɔ̀ri wuru arì yɛri ji-a koŋ telimaan ni i, kí i koŋ pyɛ kiri bikwɔ-ri arì sun, Yesu wulusuntalinŋ ka bi-i nini bi ki sun. Ntiŋ tu : 10« Jibi bɛɛ, shuru fuuli ta-i Kirinŋ nafɛ Kirinfusinaŋ ki ra. Tenŋ wuru Farinsiyɛnŋ ɛ, tenŋ ki i ji ɲinisarakɔlɔtɔnŋ i.
11Farinsiyɛnŋ ki i tu, wú i Kirinŋ nafɛ-ri a ciiru, wú tu : ‹ Kirinsinaŋ, míŋ i baraka bi-a ábɛɛ tɛ, sabu míŋ fa koŋ pyɛ kiri tenŋ i kì. Nini i kwunŋ tan-a, kí i bijɛ ma-ni, niŋ fa kí i kakaalibi ma-ni. Míŋ i baraka bi-a ábɛɛ tɛ, sabu míŋ miŋ tu ɲinisarakɔlɔtɔnŋ ka i kì. 12Kufuluntɔnŋ woo kufuluntɔnŋ, míŋ i sunŋ fuuli sunŋ de-a, ŋí i ńʼwɔ finŋ kiri bataa yaa san-ni. ›
13Ɲinisarakɔlɔtɔnŋ ki tumaan wuru kɔɔtɛ. Niŋ yɛri jɛɛn, niŋ i a ŋuniŋ fɛshi kì, nka wú i tu a kuŋ nufi-a#18.13 kuŋ nufi : Niŋ kɔri ki i tu nwɔ̀tiŋ i a kuŋ ki fi-a, tu nintiŋ ntɔri bi awɔ bi mamaan ki ra, ntiŋ i a pwulu Kirinŋ tɛ., wú i ǹʼbi-ri : ‹ Kirinsinaŋ, á míŋ sunmakwulupa, míŋ i bijɛmatɔnŋ i. › » 14Yesu i awɔ wulu ki rakɔ tu : « Míŋ i ǹʼbi-a ábɛɛ tɛ, ńʼtu Kirinŋ ɲinisarakɔlɔtɔnŋ ka wɔ rafɛ ki mwu-i, niŋ i tiri kulu. Nka Farinsiyɛnŋ ki jii kila Kirinŋ ɲaanfɛ kì, sabu koŋ woo koŋ i a yɛri gbɛ-a, Kirinŋ a nintiŋ sunjɛri. Koŋ woo koŋ i a yɛri sunjɛri-ra, Kirinŋ a nintiŋ gbɛ. »
Yesu juba san-i tiraŋ kiri tɛ
(Matiyu 19.13–15; Maraka 10.13–16)
15Jibi bɛɛ, konaŋ kiri i na arì daŋ#18.15 daŋ kiri : Niŋ daŋ kiri wuru daŋ ni i, ŋì i shi nwɔ̀ri wuru bwɔ sun, ŋì i ta bo nwɔ̀ri wuru juu jiri bwununtenŋ bishi kɔ. kiri wu Yesu tɛ sɛbɛ, nwɔma ntiŋ i a gbɛ pa kí ra. Kalindaŋ kiri niŋ ja-i, kí i jɛbi-ri niŋ koŋ kiri gbɛ. 16Nka Yesu i tiraŋ kiri dɔri kpari a tɛ, ntiŋ i ǹʼbi awɔ kalindaŋ kiri tɛ : « Á fa tiraŋ kiri suu míŋ tɛ na ki sun kì, sabu Kirinŋ wɔ Masabi ki i kíbɛɛ bishi kiri wɔ. 17Sɛli ki ra, míŋ i ǹʼbi-a ábɛɛ tɛ ńʼtu, koŋ finŋ woo finŋ Kirinŋ wɔ Masabi ki pa-a, miŋ tu daŋ i kì, nintiŋ a de ǹʼnu fyewu kì. »
Shuru nafulutiŋ ki bi ki
(Matiyu 19.16–30; Maraka 10.17–31)
18Jibi bɛɛ, Yawutu kiri wɔ ŋununtiŋ bɛɛ i Yesu ranɔri : « Kalimɔɔ shɔɔrinŋ, míŋ kakan ŋí i nfɛnŋ ma, nwɔma ŋí i ɲaninkulutɔnbi kɔbali ki kila? »
19Yesu tu ntiŋ tɛ : « Nfɛnŋ na, miŋ míŋ dɔri-ra tu kalimɔɔ shɔɔrinŋ. Koŋ shɔɔrinŋ tɔri tenŋ nmaŋ, Kirinŋ tenŋ pe ciniŋ kì. 20Miŋ i Kirinŋ wɔ sariya bimaan kiri tɔ-a, ǹʼtu : ‹ Fa nankulunbi ma kì, fa koŋ kilɛn kì, fa kwunŋ tan kì, fa puru ye koŋ wu kì, nʼtiŋ ki fa nʼɲiŋ ki gbɛ. ›#Pobi ki 20.12–16; Sariya kiri 5.16–20. »
21Ntiŋ tu Yesu tɛ : « Míŋ niŋ sariya kiri bataa rasɔɔ, kabi ŋí i ji faa daanwulu. »
22Yesu ntiŋ wɔ wulu kiri rama-i waarinŋ wɔ̀ ru, Yesu tu ntiŋ tɛ : « Bi tenŋ cin-i faa miŋ na. Tiri, ŋi i ta nʼgbɛfɛfinŋ kiri bataa ju, ŋi i ǹʼjalinŋ ki lu gbɛwɔ ri tɛ. A miŋ niŋ ma, miŋ a nafulu mwɔɔnna bo nʼjɛŋ Kirinŋ wɔ ki ru. Niŋ kɔɔtɛ, ŋi i na ǹʼpa míŋ cɛfan. »
23Ntiŋ niŋ nama-i waarinŋ wɔ̀ ru, ntiŋ ciirudi kili kì, sabu nafulutiŋ sinaŋ wuru-i.
24Yesu ǹʼja-i tu koŋ ki ciirudi kili kì, ntiŋ i ǹʼbi : « Nafulutiŋ derama ki furu-i Kirinŋ wɔ Masabi ki ru sa! 25Sɛli ki ra, ɲɔɔnmi demaŋ di-i mɛsɛni ta ra, ŋì i fwuu nafulutiŋ derama ki sun, Kirinŋ wɔ Masabi ki ru. »
26Nwɔ̀ri wuru arì tɔɔnye-a Yesu wɔ wulu kiri tɛ, nini i ntiŋ nanɔri : « A ǹʼji niŋ ɲaan ki tɛ, nkɛnŋ a so a mwu-i? »
27Ntiŋ tu kí tɛ : « Konanmini i waa-ra bi wɔ̀ ra, Kirinŋ i so-a niŋ ma-i. »
28Niŋ bimaan ki ra, Pyɛɛri i ǹʼbi : « Yibɛɛ ji? Yibɛɛ wɔ̀ri yi gbɛfɛfinŋ kiri bataa tu-i nmaŋ, yi i ǹʼpa ábɛɛ cɛfan. »
29Yesu tu kalindaŋ kiri tɛ : « Sɛli ki ra, míŋ i ǹʼbi-a ábɛɛ tɛ, ńʼtu koŋ woo koŋ awɔ kaniŋ, walima awɔ mari, walima a tindaŋ, walima a jifinŋ ni fa a daŋ ni tu-i nmaŋ Kirinŋ wɔ Masabi ki bira, 30ńʼtu ntiŋ a niŋ bataa bishi mwɔɔnna tɔri ri kila juniɲa ka ru, niŋ fa ntiŋ i ji-a ɲaninkulutɔnbi kɔbali ki kila siri. »
Yesu kaan byantɔnŋ ki i a beŋ ki fa a ŋmɛni bi ki bi-a
(Matiyu 20.17–19; Maraka 10.32–34)
31Yesu ta-i awɔ kalindaŋ bwununfuuli ki wu arì cinancinŋ, ntiŋ i ǹʼbi kí tɛ : « Yibɛɛ ra na tunpa ta Yerusalɛmu kaa. Kirinŋ wɔ cintɔnŋ kiri bi wɔ̀ri sɛbɛ wuru Koŋ Danshuru ki bi ki sun, nini bataa ra ta ma, miŋ tu yìrì bi wuru ɲaan wɔ̀ tɛ. 32Kí a ta ntiŋ de shiya tɔri kiri gbɛfɛ. Nini a yɛtan bo ntiŋ sun, kí i ntiŋ ki, kí i lɛju cu ntiŋ sun. 33Kí i ntiŋ bwɔ suulinŋ na, kí i kila kí i ntiŋ kilɛn. Nka ntiŋ kilɛn ki sunŋ byantɔnŋ ki, ntiŋ a ŋmɛni. »
34Nka Yesu wɔ wulu ki wuru nwɔ̀ bi-a, kalindaŋ kiri niŋ tɔ-ri kì, sabu ǹʼkɔri ki radumaan wuru-i kí sun, niŋ na, kí so ǹʼtɔ-i kì.
Yesu ɲaanfwuu bɛɛ ɲaninaŋ ni nawwulu-i
(Matiyu 20.29–34; Maraka 10.46–52)
35Yesu myɛ Yeriko kili ki tɛ waarinŋ wɔ̀ ru, ntiŋ i ta so ɲaanfwuu rafɛ tantɔnŋ bɛɛ sɔɔmaan sun saa ki tɔnŋ na. Wú i konaŋ ni nafɛ-ri. 36Ɲaanfwuu ki konaŋ ki fwuude shinwulu ki rama-i, wú i nanɔri tan tu nfɛnŋ? 37Kí tu wú tɛ tu Yesu, Nansarɛtitɔnŋ ki fwuuderama i.
38Niŋ ki ra, wú i yaalinpo tu : « Dawuda nupo Yesu, á míŋ sunmakwulupa! »
39Koŋ wɔ̀ri wuru saa ki jɛŋ, nini i jɛbi-ri ɲaanfwuu ki gbɛ, nwɔma wú i a gbansan. Nka wú i ǹʼbɛɛ bo-ri awɔ yaalinŋ ki sun, wú tu : « Dawuda nupo, á míŋ sunmakwulupa! »
40Yesu i tu. Ntiŋ tu kí wú gbɛ pa na a tɛ. Kí so-i wú wu ntiŋ tɛ waarinŋ wɔ̀ ru, ntiŋ i wú ranɔri : 41« Miŋ i ǹʼtɛ míŋ i nfɛnŋ ma miŋ tɛ? »
Wú i ntiŋ nupwulu : « Ŋuntiŋ, á ǹʼma míŋ i maannaja sɛbɛ. »
42Yesu tu wú tɛ : « Maannaja, mɔɔn bilinabi ki nʼkene-i. »
43Mìŋ manaanŋ tenŋ ki ru, wú i maannaja, wú i ǹʼpa Yesu cɛfan, wú i baraka bi-ri Kirinŋ tɛ. Konaŋ kiri niŋ ja-i waarinŋ wɔ̀ ru, kí i baraka bi Kirinŋ tɛ.
Currently Selected:
Luki 18: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
