Luki 17
17
Ŋununlibi ki fa bijɛ tu ǹʼtɛmaanna ki
(Matiyu 18.6–7, 21–22; Maraka 9.42)
1Yesu tu awɔ kalindaŋ kiri tɛ : « Sɛli yɛ, bi ri i nmaŋ, nwɔ̀ri i konaŋ curu bo-a bijɛ ma ki sun, nka koŋ wɔ̀ i niŋ bi kiri sababu ki i, bɔni ki i nintiŋ wɔ. 2Koŋ woo koŋ i ji-a sababu, ntiŋ i ka tiraŋ ka bɛɛ tenŋ ŋununli, ntiŋ i ǹʼfɔni, sana ntiŋ i niŋ ma, a kí kwɔtuntuŋ sinaŋ kɔli-li ntiŋ yɛɛra, kí i ta ntiŋ kee bo wɛɛlufinju ki ru, niŋ wuru-ra pari ntiŋ sun. 3Á á ɲakili tu á yɛri ra, á i á yɛri paka shɔ.
A miŋ tindaŋ ki pɔli miŋ gbɛ, jɛbi ǹʼgbɛ. A ntiŋ ja awɔ pɔli ki tɔ, ntiŋ i a pwulu, ntiŋ wɔ pɔli ki tu ntiŋ tɛ. 4A ntiŋ pɔli miŋ gbɛ, hali kaan jɔnpɔni sunŋ ki ru, a ntiŋ na miŋ tɛ ǹʼfɔn tenŋ tenŋ ki ra, ntiŋ i na ǹʼbi : ‹ Míŋ ntɔri bi-i ńʼwɔ bi mamaan ki ra, ǹʼtu ńʼtɛ ›, ǹʼtu ntiŋ tɛ. »
Bilinabi pyaanŋ i bi sinaŋ ma-a
(Matiyu 17.20)
5 Cindaŋ kiri tu Ŋuntiŋ ki tɛ : « Ǹʼbɛɛ bo yɔɔ bilinabi ki sun. »
6Ŋuntiŋ ki tu kí tɛ : « Hali ábɔɔ bilinabi ki gbɛka ki ji wuru fiŋ#17.6 Sɛbɛ kiri ru, ǹʼyɔ bi-a tu mutaridi, niŋ daŋ ki i miŋ tu fiŋ daŋ, saɲuu i ji ǹʼnu. daŋ po-ri, ábɛɛ wuru-ra so ǹʼbi-i jirinŋ ka tɛ tu ǹʼfa a kanaŋ ki cɛn po, ŋì i ta a yɛri ye wɛɛlufinju ki ru, ǹʼwuru a tu ábɔɔ wulu ki ra ncinŋ. »
Joŋ wɔ̀ a tukulu ki faa-a
7Yesu tu : « A joŋ ji ábɛɛ bɛɛ gbɛ, a niŋ joŋ ki ji ntiŋ wɔ ji ki ɲaannasuu-ra, walima ntiŋ wɔ nafulufinŋ kiri rakpari-ra. A niŋ joŋ ki na, ŋì i po jaŋ ki fan waarinŋ wɔ̀ ru, ntiŋ i awɔ joŋ ki dɔri-ra, tu ŋì na sɔɔ, ŋì i nufinŋ ki nu wa? 8Aayi dɛ! Míŋ i ǹʼbi-a ńʼtu ntiŋ ǹʼbi-a joŋ ki tɛ : ‹ Nʼnukɔli, ŋi i nufinŋ si wɔri ńʼtɛ, ŋí i ǹʼnu, ŋí i ńʼmwunu. A míŋ pyii waarinŋ wɔ̀ ru, miŋ a kila ŋi i ǹʼbɛɛ nu, ŋi i nʼmwunu. Ŋì ma-a ninkunŋ kì wa? › 9Ntiŋ a niŋ joŋ ki co, tu niŋ awɔ cinŋ ma wɔ ki bataa ma a ɲaan tɛ wa? 10Mìŋ ɲaan tenŋ ki tɛ, cinŋ wɔ̀ biye-i ábɛɛ gbɛ sun, ábɛɛ ja niŋ bataa ma, miŋ tu ǹʼbi-i ɲaan wɔ̀ tɛ, á ǹʼbi á yɛri tɛ : ‹ Yibɛɛ i baara matɔnŋ gbansanŋ ni i. Yibɛɛ bo-i nwɔ̀ ra, yibɛɛ niŋ bantenŋ ma-i. Yibɛɛ gbɛbi tɔri ceeli-la kili kì. › »
Yesu tuutiŋ koŋ byinŋ kene-i
11Yesu tirira ki Yerusalɛmu, ntiŋ i de Galile fa Samari sɔɔta kiri faninmwuŋ. 12Ntiŋ deera kili bɛɛ ra, tuutiŋ koŋ byinŋ i ta ntiŋ ŋununafu. Kí i tu mani narimwuŋ, 13kí i arì wulu so ntiŋ sun : « Kalimɔɔ Yesu, á yibɛɛ sunmakwulupa. »
14Yesu kí ja-i, ntiŋ tu kí tɛ tu, kí ta arì yɛri ji Kirinŋ tɛ sarakawɔrɔtɔnŋ kiri wu.#17.14 Ka mani ka ɲaan i bi-a Sarakawɔrɔtɔnŋ kiri 14.1–32 kiri ru.
Ŋì i tuutiŋ kiri tu saa ki fan, kí bataa i kene. 15Kí ru koŋ tenŋ ǹʼja-i tu afinŋ kene waarinŋ wɔ̀ ru, niŋ pwulula ki i na Yesu tɛ. Niŋ i tu baraka bi-a Kirinŋ tɛ a sɔbɛ ra. 16Nʼso-i Yesu tɛ waarinŋ wɔ̀ ru, ŋi i ta nʼkwushiri ntiŋ fɛ, ŋi i nʼɲaanfɛ ki da fwuniŋ sun, ŋi i baraka bi ntiŋ tɛ. Niŋ koŋ ki wuru Samaritɔnŋ i. 17Niŋ ki ra, Yesu tu : « Míŋ tu koŋ byinŋ ki bataa kene kì wa? Koŋ teenpɔni pyɛ ki ji? 18Koŋ kila kíbɛɛ ru, nwɔ̀tiŋ a pwulu, ntiŋ i na baraka bi Kirinŋ tɛ, ka jɛ ka ciniŋ kì wa? » 19Niŋ kɔɔtɛ Yesu i ǹʼbi shuru ka tɛ : « Jɔrɔkɔ, ŋi i tiri, mɔɔn bilinabi ki nʼmwu-i. »
Kirinŋ wɔ Masabi ki nanama taanmashɛ kiri
(Matiyu 24.23–28, 37–41)
20 Farinsiyɛnŋ kiri i Yesu ranɔri tu : « Kirinŋ wɔ Masabi ki a na waarinŋ danwɔ ru? » Ntiŋ tu kí tɛ : « Kirinŋ wɔ Masabi ki a na, miŋ tu konaŋ sunufinŋ i kì. 21Koŋ a na ǹʼbi sɛbɛ tu : ‹ Á ǹʼshɛɛli, ǹʼyɔ kwumaŋ › walima ‹ ǹʼyɔ keŋ kaa kì ›, sabu Kirinŋ wɔ Masabi ki i juu ábɛɛ faninmwuŋ kɔ. »
22Niŋ kɔɔtɛ, Yesu i ǹʼbi awɔ kalindaŋ kiri tɛ : « Waaci a na so, ábɛɛ ra na ǹʼceeli, á i Koŋ Danshuru ki wɔ sunŋ tenŋ ja, nka ábɛɛ ra na ǹʼja kì. 23Konaŋ kiri ra na ǹʼbi ábɛɛ tɛ : ‹ Á ǹʼshɛɛli, ǹʼyɔ kwumaŋ › walima ‹ á ǹʼshɛɛli, ǹʼyɔ keŋ kaa. › Á fa ǹʼpa kí cɛfan kì dɛ! 24Kirinŋ ki i ŋani-na kirinpɔli ki kɛlinŋ tenŋ tɛ, ǹʼsarinŋ ki i ja kɛlinŋ tɔri ki tɛ ɲaan wɔ̀ tɛ, Koŋ Danshuru ki a na ji mìŋ ɲaan tenŋ ki tɛ, a na shikaŋ ki ru. 25Nka sana niŋ i ma, waajibi yɛ, ntiŋ kakan-i ntiŋ i cɔɔri kusɛbɛ, niŋ fa jiintɔnŋ ki i a kaan ntiŋ tɛ.
26Bi wɔ̀ri ma-i Nawu wɔ sunŋ ki ra, nini bishi kiri ra na ma Koŋ Danshuru ki na jibi kiri ra. 27Konaŋ kiri tu wuru nufinŋ nu ki ra, niŋ fa mwunufinŋ mwunu ki fa cɛn tan kiri ra, fɔ ŋì i ta so Nawu de jibi ki sun kwurinŋ sinaŋ ki ru, judali sinaŋ ki i kila, ŋì i na finŋ kiri bataa haliki.
28Walima, ŋì a na ji miŋ tu ǹʼma-i Lɔti#17.28 Lɔti : Lɔti wuru Haran daŋ i. Haran nwɔ̀ wuru Aburahamu pwaŋ i. Lɔti fa Aburahamu tiri-i Kaanna arìmaŋ fan. Mìŋ Lɔti ki a mwu-i Sodɔmu fa Gomɔri haliki tuu ki wu (Tɔnpa ki 19.12). wɔ sunŋ ki ra ɲaan wɔ̀ tɛ. Konaŋ kiri tu wuru nufinŋ nu ki ra, niŋ fa mwunufinŋ mwunu ki ra, kí i arɔɔ ku ri ju-ri, kí i arɔɔ ji ri kaan-ni, niŋ fa kí i arɔɔ fu ri tan-ni. 29Nka jibi wɔ̀ Lɔti po san-i Sodɔmu#Tɔnpa ki 18.20 ŋì i ta bo 19.25. kili ki ru, tuu fa kiribi i po kirinpɔli ki ra miŋ tu kirinŋ judaŋ, ŋì i na konaŋ ki bataa kilɛn. 30Koŋ Danshuru ki a na a yɛri ji jibi wɔ̀, niŋ shikaŋ, ŋì a na ji ninkunŋ.
31Niŋ shikaŋ, a niŋ na ma, ŋì i hali nwɔ̀tiŋ tu tanka sun, a ntiŋ wɔ finŋ kiri ji ntiŋ gbɛfɛ kì, ntiŋ fa a yɛri kɔli jɛri de-a fu ki ru, a i yìrì shi-a kili kì. Mìŋ ɲaan tenŋ ki tɛ, a ǹʼna fa nwɔ̀tiŋ wu juunŋ, ntiŋ fa a pwulu na kulu kì. 32Nwɔ̀ ma-i Lɔti wɔ mari ki wu, á á ɲakili bo niŋ tɛ.#Tɔnpa ki 19.26. 33Niŋ shikaŋ, konwɔtiŋ a na ji ǹʼtɛ a i a ɲinita ki mwu, nintiŋ a bɔni ǹʼnu. Nka nwɔ̀tiŋ a na bɔni a ɲinita ki ru, nintiŋ a ǹʼkila. 34Míŋ i ǹʼbi-a ábɛɛ tɛ, ńʼtu niŋ shikaŋ cii ki ru, a ǹʼta fa koŋ fuuli wu bilifinŋ tenŋ nu, koŋ tenŋ ki a na shi san koŋ tenŋ ki ra. 35Mari fuuli a na tu finŋ ɲɛ-a arìmaŋ fan mani tenŋ nu, tenŋ ki a na shi san tenŋ ki ra. 36[Shuru fuuli a na ji arìmaŋ fan ji tenŋ nu, tenŋ ki a na shi san tenŋ ki ra. »]
37Kalindaŋ kiri i Yesu ranɔri : « Yibɛɛ Ŋuntiŋ, niŋ a na ma mani danwɔ ru? »
Ntiŋ tu kí tɛ : « Finŋ kwuu ki a na ji mani wɔ̀ ru, juba kiri ra na arìmaŋ nakɔli niŋ mani nu. »
Currently Selected:
Luki 17: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
