Luki 16

Ɲaanjiwulu wɔ̀ bi-i nafulu ŋununu sɔɔtɔnŋ kɛrɛbimaan bi ki sun

1Yesu tu awɔ kalindaŋ kiri tɛ : « Nafulutiŋ sinaŋ bɛɛ wuru nmaŋ. Niŋ koŋ bɛɛ shi sɔɔ wuru awɔ nafulu ki ŋununu. Konaŋ kiri i ta wú tɔ bi-ri nafulutiŋ ki tɛ, tu wú ntiŋ wɔ nafulu ki ruli-a. 2Wú ŋununtiŋ ki i wú dɔri, ntiŋ i na ǹʼbi wú tɛ : ‹ Míŋ i nwɔ̀ rama-a miŋ bi ki ru, niŋ di míŋ tɛ kì. Miŋ nʼwɔ baara ki ma-i ɲaan wɔ̀ tɛ, niŋ ɲaanbi míŋ tɛ, sabu miŋ a so tu-i mɔ́ɔ́n nafulu ki ŋununu kili kì. ›

3Niŋ na, wú i ǹʼbi a ciiru : ‹ Míŋ ŋununtiŋ ki tu a ra míŋ kwɔ san awɔ jalinŋ ki sun. Míŋ a ǹʼji dɔɔkunŋ dɔɔ? Baraka míŋ nu ŋí i ji kaan kì, a ǹʼbi tu míŋ nafɛ tan de-ri, niŋ ɲaankwunŋ i míŋ tɛ. 4Míŋ a nwɔ̀ ma dɔɔ, míŋ niŋ tɔ-i. Míŋ a niŋ ma, nwɔma a kí na míŋ kwɔ san jalinŋ ki sun waarinŋ wɔ̀ ru, kpeeri i kila, nwɔ̀ri a míŋ ŋununafuka shɔ arɔɔ mani ni nu. ›

5Niŋ ɲaan ki tɛ, koŋ wɔ̀ri kɔni kiri shi wuru wú ŋununtiŋ ki gbɛ, wú i kí dɔri tenŋ tenŋ. Nwɔ̀ jɔnɔ na-i, wú i niŋ nanɔri : ‹ Míŋ ŋununtiŋ ki wɔ jinŋ miŋ na? › 6Niŋ tu wú tɛ : ‹ Ŋuŋ duŋ yaataanŋ. › Wú tu niŋ tɛ : ‹ Sɔɔ, mɔɔn kɔni ki sɛbɛ ki i kaa. Ǹʼsɛbɛ jona, ŋuŋ duŋ yaafuuli fa byinŋ (50). › 7Wú tu ǹʼtɔri tɛ : ‹ Miŋ ji, mɔɔn ki jinŋ i? › Niŋ tu wú tɛ : ‹ Bilaŋ tɔtɔɔlinŋ yaataanŋ. › Wú tu niŋ tɛ : ‹ Mɔɔn kɔni ki sɛbɛ ki i kaa. Ǹʼsɛbɛ tɔtɔɔlinŋ yaapyiiraŋ. › »

8Yesu tu nafulutiŋ ki niŋ nama-i waarinŋ wɔ̀ ru, ntiŋ i ka koŋ daalintiŋ ka tɔjii bi awɔ kɛrɛbi bi mamaan ki bira. Yesu tu sɛbɛ : « Sɛli ki ra, nwɔ̀ri ɲaniŋ i po-a ka juniɲa ka tɛ, nini i arìmaŋ faninmwuŋ bi kiri ma-a kɛrɛbi wu, ŋì i fwuu manisarinŋ nu tɔnŋ kiri sun. »

9Yesu tu sɛbɛ : « Míŋ i ǹʼbi-a ábɛɛ tɛ, ńʼtu á wɔshuru ri ceeli á yɛri ra ka juniɲa ka ru nafulu ki wu, nwɔma a ǹʼna kɔ waarinŋ wɔ̀ ru, niŋ wɔshuru kiri i so ábɛɛ ŋununafuka shɔ-i Kirinŋ wɔ ki ru.

10Konwɔtiŋ i koŋ sɔbɛ ɛ finŋ pyaanŋ bi ru, nintiŋ a ji koŋ sɔbɛ ɛ bi sinaŋ bi ki ru sɛbɛ. Nka konwɔtiŋ i daalintiŋ i bi pyaanŋ ki ru, nintiŋ fani na ji daalintiŋ i bi sinaŋ bi ki ru sɛbɛ. 11Ka juniɲa ka ru nafulu wɔ̀ i koŋ fɔni-na, a koŋ bili ábɛɛ ra niŋ bi ru kì, nkɛnŋ a jɛɛn ntiŋ i bili ábɛɛ ra, ntiŋ i nafulu sɔbɛ bi ye ábɛɛ gbɛsun? 12A ábɛɛ sii kontɔrifinŋ ki sun, á i niŋ nakparika shɔ kì, nkɛnŋ a jɛɛn ntiŋ i ábɛɛ yɛrima kiri wɔ ki wɔri á tɛ?

13Baaradaŋ tɔri tenŋ so-a cinŋ ma-i ŋununtiŋ fuuli tɛ kì, sabu tenŋ ki bi a kwɔ ntiŋ sun, tenŋ ki bi i di ntiŋ tɛ. Nbɛɛrawɔ, ntiŋ a a kulu tenŋ tɛ, ntiŋ a a kulu tenŋ tɛ kì. Mìŋ ɲaan tenŋ ki tɛ, ábɛɛ ra so baara ma-i Kirinŋ tɛ, á i ǹʼma jalinŋ ki tɛ mìŋ waaci tenŋ ki ru kì. »

Yesu wɔ wulusuntalinŋ tɔri kiri

(Matiyu 11.12–13; 5.31–32; Maraka 10.11–12)

14Jalinŋ ki bidi wɔ̀ tan-i Farinsiyɛnŋ kiri tɛ, nini Yesu wɔ wulu kari rama-i waarinŋ wɔ̀ ru, kí i yɛtan bo-ri ntiŋ sun. 15Ntiŋ tu kí tɛ : « Ábɛɛ i á yɛri ji-a koŋ fɔɔmaan ni i konaŋ kiri ɲaanna, nka Kirinŋ ɲaniŋ i ábɛɛ ciiru kiri ra, sabu bi wɔ̀ri i bi sinaŋ ni i konaŋ kiri ɲaanna, nini i ɲii ǹʼnu finŋ ni i Kirinŋ ɲaanna.

16Fɔlɔfɔlɔ, Kirinŋ wɔ sariya ki fa Kirinŋ wɔ cintɔnŋ kiri wɔ wulu kiri wuru sɔɔ-ra konaŋ kiri i kali-li, fɔ ŋì i na so Wutɔnŋ Yuhana wɔ waaci ki sun. Ŋì i shi niŋ sun sa, Kirinŋ wɔ Masabi ki ru Wulujii ki i sunjo-a konaŋ kiri tɛ. Koŋ bataa i a sunfuru-ra kí i demaŋ ceeli-li niŋ Masabi ki ru. 17Kirinpɔli ki fa pwɔkulinŋ kiri ra so kɔ-i, nka Kirinŋ wɔ sariya ki wulubaalinŋ tenŋ a so po san-i nmaŋ kì.

18A koŋ woo koŋ awɔ mari fwuru ba, ntiŋ i ǹʼtɔri cɛn, nintiŋ i nankulunbi ma-a. A koŋ woo koŋ mari fwuru bamaan cɛn, nintiŋ i nankulunbi ma-ni sɛbɛ. »

Ɲaanjiwulu wɔ̀ bi-i nafulutiŋ sinaŋ ki fa Lansaari bi ki sun

19Yesu i ka wulusuntalinŋ ka bi awɔ kalindaŋ kiri tɛ sɛbɛ : « Ka wuru nafulutiŋ sinaŋ bɛɛ ɛ. Ntiŋ wuru juulinŋ tɔtiŋ kpaafuru ri bo-a a sun, ntiŋ i nufinŋ jii nu-ni jibi woo jibi, niŋ fa ntiŋ i a ɲaannabyɛ-ri. 20Gbɛwɔ bɛɛ wuru nmaŋ, nwɔ̀ tɔ wuru tu Lansaari. Niŋ sun ki bataa wuru ta ri, niŋ bili wuru nafulutiŋ ka wɔ mani ki tɔnŋ na. 21Nufinŋ bwulubwulu wɔ̀ri wuru fɛɛn-na nafulutiŋ ki wɔ nuŋ numaŋ ki ru, Lansaari wuru ǹʼtɛ a i nini kila nu. Nka wú bilimaan ki tu-ri niŋ mani nu, kwuu kiri wuru na-a wú ra ta kiri sunfyɛn-ni.

22Ka gbɛwɔ ka na-i beeni, Kirinŋ wɔ mɛlɛkɛn kiri i niŋ shi, yìrì i ta ntiŋ sɔɔ Aburahamu tɔntɛ alijina ki ru. Nafulutiŋ ki fani i na beeni, kí i ntiŋ kwuu ki ye. 23Ŋì i nafulutiŋ ka ɲaanfɛkwulumaan ki tu jaanama ki ru, ntiŋ i a ŋuniŋ fɛshi, ntiŋ i Aburahamu ja mani narimwuŋ, Lansaari i ji ntiŋ tɔntɛ.

24Niŋ na nafulutiŋ ki i dɔri tan, ntiŋ i ǹʼbi : ‹ Míŋ tiŋ Aburahamu, á míŋ sunmakwulupa! Á Lansaari bo ta a gbɛnaŋ ki ŋuniŋ ki de ju ru, wú i na míŋ nɛninɛŋ ki fili niŋ wu, sabu míŋ cɔɔrika jitan-i ka tuu ka ru. ›

25Aburahamu tu nafulutiŋ ki tɛ : ‹ Ńʼdaŋ, nʼɲakili bo ǹʼtɛ tu waarinŋ wɔ̀ ru miŋ wuru juniɲa ciiru, tu miŋ nʼwɔ ɲaanfɛfili ki kila niŋ waari ki ru, ŋi i Lansaari tu awɔ ɲaanfɛkwulu ki ru. Dɔnsaŋ, Lansaari i awɔ ɲaanfɛfili ki ru, miŋ i ji nʼwɔ ɲaanfɛkwulu ki ru. 26Niŋ bantenŋ i kì, bili ǹʼna tu kukuta sinaŋ yibɛɛ fa ábɛɛ faninmwuŋ. Niŋ ɲaan ki tɛ, a konwɔtiŋ ji ǹʼtɛ a i po kwumaŋ, a i ta ábɛɛ tɛ, nintiŋ fa so fwuu-u kì, a nwɔ̀tiŋ ji ǹʼtɛ a i po ábɛɛ tɛ, a i na yibɛɛ tɛ, niŋ fani fa so fwuu-u kì. ›

27Nafulutiŋ ki tu : ‹ Míŋ tiŋ, míŋ i ábɛɛ rafɛ-a, á Lansaari bo ta míŋ tiŋ ki wɔ kaniŋ ki sun, 28sabu míŋ tindaŋ koŋ taanŋ i nmaŋ, wú i ta kí racin, nwɔma kí fa na ka ɲaniŋ ka ru sɛbɛ kì. ›

29Aburahamu tu nafulutiŋ ki tɛ : ‹ Kirinŋ wɔ Sariya ki fa Kirinŋ wɔ cintɔnŋ kiri wɔ wulu kiri i kí fan nmaŋ, kí arì tɔɔnye nini tɛ, kí i yìrì pa. ›

30Nafulutiŋ ki tu : ‹ Aayi, míŋ tiŋ Aburahamu, niŋ a ǹʼpo kì, nka koŋ beenimaan ki bɛɛ ja ji bo ta wulubi kí tɛ, kí a bili niŋ na, kí i ntɔri bi arɔɔ bijɛ kiri ra, kí i na Kirinŋ tɛ. ›

31Aburahamu tu niŋ na : ‹ A kí so bili-i Kirinŋ wɔ sariya ki fa Kirinŋ wɔ cintɔnŋ kiri wɔ wulu kiri ra kì, hali koŋ ŋmɛni po san konkwuu kiri ru, ntiŋ i ta wulubi kí tɛ, kí a bili ǹʼna fyewu kì. › »

Currently Selected:

Luki 16: JOB

Highlight

Copy