Luki 15

Ɲaanjiwulu wɔ̀ bi-i saanaŋ fɔnimaan jamaan ki bi ki sun

(Matiyu 18.12–14)

1 Ɲinisarakɔlɔtɔnŋ kiri fa bijɛmatɔnŋ mwɔɔnna tɔri ri wuru na-a arì tɔɔnye-ri Yesu tɛ. 2Farinsiyɛnŋ kiri fa sariya kalimɔɔ kiri niŋ ja-i waarinŋ wɔ̀ ru, kí i tɔnkunfɛ wulu bi-ri tu : « Á ǹʼshɛɛli, ka shuru ka i a tu-a bijɛmatɔnŋ kiri i na sɔɔ-ri a fan, fɔ kí i nuŋ nu-ni arìmaŋ fan. »

3Niŋ ki ra, Yesu i wulusuntalinŋ ka bi kí tɛ tu : 4« A saa yaataanŋ ji ábɛɛ bɛɛ gbɛ, a tenŋ fɔni san yìrì ra, ntiŋ yaapyiiraŋ fa bwununtenpɔni ki kee tu-a nmaŋ, ntiŋ i ta tenŋ fɔnimaan ki ceeli ja kì wa? 5A ntiŋ ta ǹʼja waarinŋ wɔ̀ ru, ntiŋ ciirudimaan ki i ǹʼshi bili-la a yɛ sun, ntiŋ i na ǹʼwu a kaashi kiri maŋ ki ru. 6A ntiŋ na so kulu ki ru, ntiŋ i ǹʼbi-a awɔ wɔshuru kiri fa a sɔɔshi kiri tɛ : ‹ Á á yoori míŋ fan, sabu mɔ́ɔ́n saa tenŋ wɔ̀ fɔni wuru-i, míŋ ǹʼja-i. › »

7Yesu tu : « Mìŋ ɲaan tenŋ ki tɛ, míŋ i ǹʼbi-a ábɛɛ tɛ, ńʼtu bijɛmatɔnŋ tenŋ ja ji ntɔri bi awɔ bijɛ kiri ra, ntiŋ i a pwulu Kirinŋ tɛ, ciirudibi wɔ̀ i ji-a Kirinŋ wɔ ki ru niŋ bira, hali niŋ bishi ma-a koŋ telimaan yaapyiiraŋ fa bwununtenpɔni bira kì, nini wɔ̀ maku ntɔri bi bi ra kili kì. »

Ɲaanjiwulu wɔ̀ bi-i warifɔ peeraŋ tenŋ fɔnimaan jamaan ki bi ki sun

8Yesu tu sɛbɛ : « Mari danwɔ nmaŋ sɛbɛ, warifɔ daŋ byinŋ i nwɔ̀ gbɛ, a tenŋ fɔni, tu nmari ra tuu cu, nmari i mani ki bataa su, nmari i wuluwulaaŋ tɛ kiri bataa shɛɛli cunadibi wu fɔ nmari i ǹʼja kì? 9A nmari ǹʼja waarinŋ wɔ̀ ru, nmari ra a fulunmari kiri fa a sɔɔshi mari kiri dɔri, nmari ǹʼbi kí tɛ : ‹ Á á yoori míŋ fan, sabu mɔ́ɔ́n warifɔ daŋ tenŋ wɔ̀ fɔni wuru-i, míŋ ǹʼja-i. › » 10Yesu tu : « Mìŋ ɲaan ki tɛ, míŋ i ǹʼbi-a ábɛɛ tɛ ńʼtu bijɛmatɔnŋ tenŋ ntɔri bi awɔ bijɛ kiri ra, ntiŋ i a pwulu Kirinŋ tɛ, ńʼtu niŋ ji-a ciirudibi Kirinŋ wɔ mɛlɛkɛn kiri gbɛ. »

Ɲaanjiwulu wɔ̀ bi-i daŋ fɔnimaan jamaan ki bi sun

11Yesu tu sɛbɛ : « Danshuru fuuli wuru cɛɛnni bɛɛ gbɛ. 12Jibi bɛɛ, pwaŋ ki i na ǹʼbi arì tiŋ ki tɛ : ‹ Baba, mɔ́ɔ́n lu wɔ̀ ji-a kila ábɔɔ nafulu ki ru, á ńʼwɔ ki wɔri ńʼtɛ. › Cɛɛnni ki i awɔ nafulu ki kila a daŋ fuuli ki faninmwuŋ. Pwaŋ ki wɔ ki i wɔri wú tɛ.

13Ǹʼcin kì, pwaŋ ki i awɔ finŋ kiri bataa ju, wú i yìrì jalinŋ ki bo a gbɛ, wú i tiri a rumaanni kɛniŋ narimaan bɛɛ ru. Wú ta-i so niŋ kɛniŋ ki ru, wú i ta tu bi kulinŋ ma ki ra, wú i a gbɛfɛ jalinŋ ki bataa ruli kɔ.

14Wú na-i awɔ jalinŋ ki fa a gbɛfɛfinŋ kiri bataa ruli kɔ waarinŋ wɔ̀ ru, bɛɛ sinaŋ i de niŋ kɛniŋ ki ru, fɔ wú i waa-ri a yɛri ki wɔ nufinŋ ki kila-i. 15Ǹʼna shɔ kì, wú i ta a yɛri wɔri niŋ kɛniŋ ki ru koŋ bɛɛ tɛ, wú i ji niŋ wɔ baaradaŋ i. Niŋ i wú bo ta awɔ ji ru, wú i ta niŋ wɔ cɛ ri ɲaannasuu-ri. 16Bɛɛ ki kwuluka jɛ ki wú ra, wú wuru-ra a tu, wú i niŋ cɛ kiri wɔ nufinŋ ki bɛɛ nu, wú i a pyii, nka koŋ wuru jɛɛn-na ntiŋ i niŋ tɔri wɔri wú tɛ kì.

17Ŋì wú tu niŋ na, jibi bɛɛ, wú i na sɔɔ, wú i a miiri, wú i ɲakili kila. Wú tu : ‹ Míŋ tiŋ ki wɔ baaradaŋ kiri bataa i nufinŋ nu-a arì pyiika, fɔ kí i ǹʼpyɛ tu-ri, míŋ i ji kwumaŋ, bɛɛ i nfaanna míŋ kilɛn! › 18Wú tu : ‹ Míŋ a tiri ńʼtiŋ ki tɛ, ŋí i ta ǹʼbi kí tɛ : “Baba, míŋ bijɛ ma-i Kirinŋ ɲaanfɛ, ŋí i ǹʼma ábɛɛ wu sɛbɛ. 19Míŋ kakan ŋí i dɔri tu ábɛɛ daŋ kili kì. Á míŋ shi ji awɔ baaradaŋ ki bɛɛ ɛ.” ›

20Wú i jɔrɔkɔ niŋ ɲaan ki tɛ, wú i a pwulu-li a tiŋ kaniŋ ki ru. Wú ta-i myɛ kaniŋ ki tɛ waarinŋ wɔ̀ ru, wú tiŋ ki i tu niŋ i wú yirira ja mani narimwuŋ. Wú makwulu i ntiŋ pa. Ntiŋ i bili po, ntiŋ i ta wú ŋununafu ciirudibi wu, ntiŋ i a kɔlɔkɔli wú wu.

21Wú tu a tiŋ ki tɛ : ‹ Baba, míŋ bijɛ ma-i Kirinŋ ɲaanfɛ, ŋí i ǹʼma ábɛɛ wu sɛbɛ. Míŋ kakan ŋí i dɔri tu ábɛɛ daŋ kili kì. ›

22Nka wú tiŋ ki tu awɔ baaradaŋ kiri tɛ, tu kí na jɛrɛbi kiri bataa ru shɔɔrinŋ ki wu jona, tu kí i na niŋ bo wú sun, tu kí i pyɛɛranŋ ye wú gbɛnaŋ ki ra, niŋ fa tu kí i kari ye wú kanŋ na. 23Ntiŋ tu kí tɛ : ‹ Á ta naan tuula bulinŋ faamaan tenŋ pa, á i na ǹʼkilɛn, yi a yi radi jiŋ, 24sabu míŋ daŋ wɔ̀ i kaa, wú fɔni wuru-i, jiŋ wú ja-i. Wú ji-i miŋ tu wú beeni-ni, wú i ŋmɛni. ›

Kí i ɲaannabyɛ ki tɔnpa.

25Niŋ waari ru, danshuru cɛɛnni ki wuru juunŋ. Niŋ pwulula ki na-i myɛ kulu ki tɛ waarinŋ wɔ̀ ru, niŋ i wɔshɛ wulu ki fa shupɔri wulu kiri rama. 26Niŋ i baaradaŋ ki bɛɛ tenŋ dɔri, niŋ i niŋ nanɔri ǹʼɲaan sun. 27Baaradaŋ ki tu danshuru cɛɛnni ki tɛ : ‹ Miŋ pwaŋ ki namaan yɛ. Miŋ tiŋ ki naan tuula bulinŋ faamaan tenŋ kilɛn-i, tu sabu wú kenemaan na. ›

28Danshuru cɛɛnni ki niŋ nama-i waarinŋ wɔ̀ ru, niŋ tɔnŋ i kwulu, fɔ wú tu a ra de kulu kì. Wú tiŋ ki i po, niŋ i na wulubi wú tɛ, ntiŋ i wú rafɛ. 29Wú tu a tiŋ ki tɛ : ‹ Míŋ ka jiri mwɔɔnna kari ma-i ábɛɛ fan kwumaŋ, ŋí i baara ki ma-ni, míŋ ábɛɛ wulu sɔsɔ sunŋ tenŋ sun kì. Nka sunŋ tenŋ ábɛɛ so hali saanaŋ wɔri-i míŋ tɛ, ńʼfa ńʼwɔ wɔshuru kiri i yi ɲaannabyɛ kì. 30Dɔɔ, ábɛɛ daŋ wɔ̀ ta-i áwɔ jalinŋ ki bataa ruli nankulunmari ri ru, niŋ na-i, ábɛɛ jɛɛn á i naan tuula faamaan kilɛn niŋ tɛ kɛ! ›

31Wú tiŋ ki tu wú tɛ : ‹ Ńʼdanshuru, miŋ i míŋ fan kwumaŋ waaci bataa ru. Míŋ gbɛfɛfinŋ ki bataa i mɔɔn. 32Nka yi kakan-i yi i yi radi jiŋ, sabu miŋ pwaŋ wɔ̀ i kaa, wú i miŋ tu konwɔtiŋ beeni, ntiŋ i ŋmɛni. Wú fɔni wuru-i, nka dɔɔ, wú ja-i. › »

Currently Selected:

Luki 15: JOB

Highlight

Copy