Luki 14
14
Yesu kiratɔnŋ bɛɛ kene-i Nufaan jibi ki sun sɛbɛ
1Yawutu kiri wɔ Nufaan jibi tɔri sun sɛbɛ, Yesu ta-i nuŋ nu Farinsiyɛnŋ ŋununtiŋ bɛɛ wɔ mani nu. Koŋ wɔ̀ri wuru niŋ mani nu, nini wuru Yesu pɛrɛkɛ-a. 2Niŋ waaci ki ru, koŋ bɛɛ wuru niŋ mani nu, firi fyɛ kira wuru niŋ nu. 3Yesu i wulu ki shi, ntiŋ i sariya kalimɔɔ kiri fa Farinsiyɛnŋ kiri ranɔri : « Ŋì i kɛɲɛ sariya ki wu, ǹʼfu-i koŋ kiratɔnŋ kene Nufaan jibi ki sun daa, walima ǹʼfu kì? »
4Kí i arì gbansan, koŋ ntiŋ nupwulu kì.
Niŋ na, Yesu i a gbɛ ki bili kiratɔnŋ ki sun, ntiŋ i ntiŋ kene, ntiŋ i ntiŋ bosaara. 5Niŋ kɔɔtɛ, ntiŋ i ǹʼbi kí tɛ : « Nkɛnŋ ábɛɛ ru kwumaŋ, a ntiŋ daŋ walima ntiŋ wɔ naan fɛɛn kɔninta ru Nufaan jibi ki sun, tu ntiŋ a bili ntiŋ i ǹʼpo jona kì? »
6Kí so niŋ nanɔri ki rupwulu-i kì.
Tɔtiŋ sɔɔmaŋ ɲaannashirama ki
7Ŋì i Yesu tu niŋ nufinŋ numaŋ ki ru, ntiŋ i ǹʼja tu koŋ wɔ̀ri dɔri wuru sɛbɛ, nini bɛɛ ri wuru koŋ tɔtiŋ sɔɔmaŋ ni ceeli de-a arì yɛri tɛ. Niŋ na, ntiŋ i wulusuntalinŋ bɛɛ bi kí tɛ. Ntiŋ tu :
8« A koŋ miŋ dɔri cɛnku nunama wu, fa ta sɔɔ tɔtiŋ sɔɔmaŋ nu kì. Sabu ŋì a so kila-i, tu ntiŋ koŋ tɔri dɔri, nwɔ̀ tɔ gbɛ-i mɔɔn ki wu. 9A nintiŋ na, koŋ wɔ̀ ábɛɛ bataa dɔri-i, a niŋ ja na miŋ tɛ, niŋ i na ǹʼbi tu ‹ sɔɔmaŋ ki wɔri koŋ tɔtiŋ tɔri ki tɛ ›, miŋ ɲaankwunkɔni ki a na jɔrɔkɔ, ŋi i ta sɔɔ kɔɔtɛ.
10Nka a koŋ miŋ dɔri ninkunŋ, ta sɔɔ kɔɔtɛ sɔɔmaŋ ki bɛɛ ru. A miŋ ta sɔɔ niŋ mani nu, miŋ dɔritɔnŋ ki na ǹʼja tu miŋ sɔɔmaŋ ki shɔ niŋ mani nu kì, ntiŋ yɛri ki a na ǹʼbi miŋ tɛ : ‹ Ńʼwɔ wɔshuru, na sɔɔ sɔɔmaŋ tɔtiŋ ka ru kwumaŋ. › A niŋ ma waarinŋ wɔ̀ ru, niŋ i baraka de-a miŋ nu koŋ pyɛ kiri ɲaanna. 11Sabu koŋ woo koŋ i a yɛri gbɛ-a, Kirinŋ a nintiŋ sunjɛri. Nka koŋ woo koŋ i a yɛri sunjɛri-ra, Kirinŋ a nintiŋ gbɛ. »
Koŋ dɔrika ɲaan ki nufinŋ tɛ
12Yesu i ǹʼbi a dɔritɔnŋ ki tɛ : « A miŋ suunna walima ciiku si, nʼtu ŋi i ǹʼwɔri-ra kpeeri tɛ, fa nʼwɔ wɔshuru ri walima nʼɲɛnsi walima nʼtindaŋ walima nʼkankanfan nafulutiŋ kiri bantenŋ dɔri ǹʼwu kì. Sabu nini yɛri kiri a so miŋ dɔri-i ǹʼbɛɛ wu sɛbɛ, niŋ a ji miŋ tu kí mɔɔn ki tɔ ki san. 13Nka a miŋ ja nufinŋ namɔni, gbɛwɔ kiri fa bɔlɔma kiri fa mwurunku kiri niŋ fa ɲaanfwuu kiri dɔri ǹʼwu. 14A niŋ ma, miŋ a ji koŋ fɛrɛmaan a, sabu nini a so mɔɔn ki tɔ ki kila wɔri-i nʼtɛ kì. Miŋ i ta-a niŋ kila koŋ telimaan kiri ŋmɛni shikaŋ ki ru. »
Ɲaanjiwulu wɔ̀ bi-i koŋ dɔrimaan kiri bi ki sun nufinŋ sinaŋ ki tɛ
(Matiyu 22.1–10)
15Koŋ wɔ̀ri fa Yesu sɔɔ wuru nufinŋ numaŋ ki ru, niŋ bɛɛ tenŋ niŋ wulu kiri rama-i, niŋ i ǹʼbi Yesu tɛ : « Koŋ wɔ̀ri a nufinŋ sinaŋ ki nu Kirinŋ wɔ Masabi ki ru, nini a ji koŋ fɛrɛmaan ni i dɛ! »
16Yesu i niŋ koŋ ki wɔ wulu ki rupwulu wulusuntalinŋ ka wu. Ntiŋ tu : « Jibi bɛɛ, koŋ bɛɛ wuru ǹʼtɛ a i nufinŋ sinaŋ namɔni, ntiŋ i ǹʼbi koŋ mwɔɔnna tɛ. 17Nufinŋ nu waari ki so-i, ntiŋ i awɔ baaradaŋ ki bo, tu niŋ i ta ǹʼbi konaŋ ki tɛ : ‹ Á na dɔɔ, nufinŋ kiri bataa maan-a. ›
18Nka kí bataa i arì dariwulu bi ɲaan tenŋ tɛ, kí i arì kaan ta nufinŋ numaŋ ki ru. Koŋ jɔnɔ ki tu : ‹ Míŋ ji ŋunaŋ sa-i, míŋ i ǹʼtɛ ŋí i ta niŋ shɛɛli, míŋ i miŋ nafɛ-a, míŋ a ǹʼmaŋ kila kì. › 19Ǹʼtɔri tu : ‹ Míŋ naan tuula byinŋ sa-i dɔɔ, míŋ i ta-a nini kini shɛɛli, míŋ i miŋ nafɛ-a, míŋ a ǹʼmaŋ kila kì. › 20Koŋ tɔri tu sɛbɛ : ‹ Míŋ i faa mari cɛn kɔ-a kaa, niŋ na, míŋ a so ta-i kì. ›
21Baaradaŋ ki i a pwulu, ntiŋ ta niŋ bataa ɲaanbi a ŋununtiŋ ki tɛ. Ŋununtiŋ ki tɔnŋ i kwulu, ntiŋ i ǹʼbi awɔ baaradaŋ ki tɛ : ‹ Bili ta kiliwulinŋ ki fan niŋ fa furuba maŋ kiri ru, ŋi i ta gbɛwɔ kiri fa mwurunku kiri fa ɲaanfwuu kiri fa bɔlɔma kiri dɔri na kwumaŋ. › 22Baaradaŋ ki po-i, niŋ i ta niŋ konaŋ ki bataa dɔri na waarinŋ wɔ̀ ru, ntiŋ tu a ŋununtiŋ ki tɛ : ‹ Ŋuntiŋ, ábɛɛ nwɔ̀ bi-i, míŋ niŋ ma-i, niŋ fa a fɔn na, fu ki faa-a sun kì dɛ! › 23Baaradaŋ ki ŋununtiŋ ki tu niŋ tɛ niŋ na : ‹ Po, ŋi i ta juunŋ saa kiri fa sibi kiri ru, ŋi i ta konaŋ kiri dɔri na faan sun, nwɔma mɔ́ɔ́n kaniŋ ki i faa. 24Sabu míŋ i ǹʼbi-a ábɛɛ tɛ ńʼtu míŋ koŋ jɔnɔ wɔ̀ri dɔri-i, kí i arì kaan na, ńʼtu mɔ́ɔ́n nufinŋ ki bo-a niŋ tɔri tenŋ nɛninɛŋ sun kì. › »
Koŋ ǹʼpa-a Yesu cɛfan dɔɔkunŋ?
(Matiyu 10.37–38)
25Jibi bɛɛ, Yesu fa koŋ mwɔɔnna wuru tiri-ra saa ki fan. Ntiŋ i tu, ntiŋ i ǹʼbi kí tɛ : 26« Konwɔtiŋ i ǹʼtɛ a i na míŋ tɛ, nka ntiŋ dumiŋ ǹʼtɛ a i míŋ pari a tiŋ fa a ɲiŋ ki wu kì, a fa míŋ pari awɔ mari fa a daŋ wu kì, a dumiŋ fa míŋ pari a ɲɛnsimari fa ǹʼshuru wu kì, a dumiŋ fa míŋ pari a yɛri ki ɲinita ki wu kì, nintiŋ a so ji-i mɔ́ɔ́n kalindaŋ i kì. 27Koŋ finŋ woo finŋ a tu ntiŋ i a yɛri ki kpinkpisuu ki shi kì, nintiŋ a so ji-i mɔ́ɔ́n kalindaŋ i kì.
28Nkɛnŋ ábɛɛ ru, a ntiŋ ji ǹʼtɛ a i sankasoŋ tan, tu ntiŋ sɔɔ-ra sun kì, ntiŋ i a miiri ǹʼkpaa ki sun, nwɔma ntiŋ i ǹʼtɔ afinŋ ji-a so walima a ji-a so kì? 29A ntiŋ niŋ ma sun kì, a ntiŋ fu ki cɛ bo, a ntiŋ so ǹʼnakɔ-i kì, koŋ bataa ra na niŋ ja, kí i yɛtan-ni ntiŋ sun, 30kí i ǹʼbi-ri : ‹ Weŋ ka fu tannama tɔnpa-i, wú i na waa ǹʼgbɛ, wú i ǹʼnakɔbali ki tu nmaŋ. › »
31Yesu tu kí tɛ sɛbɛ : « Masa danwɔ nmaŋ sɛbɛ, a ntiŋ ji-a ta a bishi masa karimwuŋ, tu ntiŋ a sɔɔ ntiŋ i a miiri tu afinŋ ji-a so jɔrɔkɔ-i awɔ kari tantɔnŋ koŋ waa byinŋ (10.000) ki wu, a i masa ka ki fa awɔ kari tantɔnŋ waa kɔniŋ (20.000) ki ŋununafu kì? 32Niŋ ɲaan ki tɛ, a ntiŋ i ǹʼtɔ tu afinŋ fa awɔ kari tantɔnŋ kiri ra so a bishi masa ki fa awɔ karidaŋ kiri gbɛ kì, ntiŋ i niŋ tu-a mani narimwuŋ, ntiŋ i kpeeri bo ta niŋ nafɛ, nwɔma arì i kari ki kɔ.
33Mìŋ ɲaan tenŋ ki tɛ, ábɛɛ ru, koŋ woo koŋ so-a a tɛɛpo san-i a gbɛfɛfinŋ kiri ru kì, ntiŋ a so ji-i mɔ́ɔ́n kalindaŋ i kì. »
Nɛŋ wɛɛlufinŋ wɔ̀ ru kì
(Matiyu 5.13; Maraka 9.50)
34Yesu tu sɛbɛ : « Wɛɛlufinŋ ki i finŋ shɔɔrinŋ i. Nka a wɛɛlufinŋ ki nɛŋ ki po san ǹʼnu, nfɛnŋ so-a nɛŋ wɔri-i ǹʼtɛ sɛbɛ sa? 35A niŋ ma, ŋì finŋ tɔri shɔ-a pwɔkulinŋ ki sun kili kì, ǹʼdumiŋ so-a ji-i nɔɔ i kì. Kí i ǹʼkee-ra. Niŋ na, a wulu lama tɔɔn ni ji nwɔ̀tiŋ gbɛ, ntiŋ wulu lama dɛ! »
Currently Selected:
Luki 14: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
