Luki 13

Yesu tu nwɔ̀tiŋ ntɔri bi awɔ bijɛ kiri ra kì, tu nintiŋ a haliki

1Niŋ waaci ki ru, Pilati Galiletɔnŋ bɛɛ ri kilɛn wuru-i, ŋì i kí tu saraka wɔri-ra Kirinŋ tɛ. Ntiŋ i nini cunŋ ki ɲaanmi kɔ́ɔ́ finŋ sarakamaan kiri cunŋ ki wu. Niŋ mamaan ki, koŋ bɛɛ ri i ta niŋ nakali Yesu tɛ.

2Yesu tu kí tɛ : « Niŋ Galiletɔnŋ wɔ̀ri kilɛn-i kaa, ábɛɛ cirasun tu nini wuru bi kulinŋ ma-a ŋì i fwuu Galiletɔnŋ pyɛ kiri sun, tu ninki ncin kí i kilɛn wa? 3Niŋ i kì dɛ! Nka míŋ i ǹʼbi-a ábɛɛ tɛ, ńʼtu a ábɛɛ ntɔri bi áwɔ bijɛ kiri ra, á i á pwulu Kirinŋ tɛ kì, ńʼtu ábɛɛ ra haliki mìnkunŋ sɛbɛ. »

4Ntiŋ tu kí tɛ sɛbɛ : « Silowe sankasoŋ ki fɛɛn-ɛ koŋ bwununfulupɔni wɔ̀ri sun Yerusalɛmu ciiru, ábɛɛ cirasun tu nini wuru bi kulinŋ ma-a, ŋì i fwuu Yerusalɛmutɔnŋ pyɛ kiri sun wa? 5Niŋ i kì dɛ! Míŋ i ǹʼbi-a ábɛɛ tɛ, ńʼtu a ábɛɛ ntɔri bi áwɔ bijɛ kiri ra, á i á pwulu Kirinŋ tɛ kì, ńʼtu ábɛɛ ra haliki mìnkunŋ sɛbɛ. »

Ɲaanjiwulu wɔ̀ bi-i jirinŋ pabali bi ki sun

6Niŋ kɔɔtɛ, Yesu i ka wulusuntalinŋ ka bi kí tɛ. Ntiŋ tu : « Shɔ jirinŋ bɛɛ wuru koŋ bɛɛ wɔ ɛrɛnsɛnŋ ji ru. Ntiŋ wuru tu-a, ntiŋ i ta-ri ǹʼnashɛɛli-li daŋ bira, nka ntiŋ wuru daŋ kila-a ǹʼna kì. Jibi bɛɛ, ntiŋ i ta pamaan ceeli ǹʼna, ntiŋ finŋ tɔri kila ǹʼna sɛbɛ kì. 7Ntiŋ i ǹʼbi awɔ baaradaŋ ki tɛ : ‹ Ǹʼshɛɛli, ǹʼjiri byantɔnŋ i kaa, míŋ i na-a daŋ ceeli-li ka shɔ jirinŋ ka ra, nka míŋ finŋ tɔri kila-a ǹʼna kì. Ǹʼkwuru po san kwumaŋ, nwɔma ŋì fa mani ki fɔɔn gbansanŋ i kì. ›

8Nka baaradaŋ ki i a ŋununtiŋ ki wɔ wulu ki rupwulu tu : ‹ Míŋ ŋununtiŋ, á ǹʼtu nmaŋ ɲɛniŋ sun, míŋ a ǹʼkankanfan ki shɛn, ŋí i nɔɔ bo shɛɛli ǹʼna. 9Jirira, a ŋì daŋ pa daa, niŋ a ji niŋ i kì wa? Nka a ŋì daŋ pa kì, ŋì a kwuru po san nmaŋ. › »

Yesu mari kiratɔnŋ bɛɛ kene-i Nufaan jibi ki sun

10 Nufaan jibi bɛɛ sun, Yesu wuru konaŋ kiri kali-la Yawutu kiri wɔ kalinfu bɛɛ ru. 11Mari bɛɛ wuru niŋ mani nu, niŋ jiri bwununfulupɔnɔtɔnŋ ki wuru niŋ i, ɲinijɛ wuru niŋ mari ki ru, fɔ ŋì i kira bo nmari sun, fɔ nmari i nukwunu ǹʼna. 12Yesu nmari ja-i waarinŋ wɔ̀ ru, ntiŋ i nmari dɔri, ntiŋ i ǹʼbi nmari tɛ : « Mari ki, ǹʼshɛɛli, miŋ mwu san-i nʼwɔ bɔlɔmabi ki wu jiŋ. » 13Ntiŋ niŋ bi-i, ntiŋ i a gbɛ bili mari ki sun. Mìŋ manaanŋ tenŋ ki ru, mari ki i kene, nmari i so teli tu-i a kanŋ na. Niŋ ma-i, nmari i baraka bi Kirinŋ tɛ.

14Niŋ mamaan ki ra, kalinfu ki ŋununtiŋ ki tɔnŋ i kwulu, sabu Yesu koŋ kene wuru Nufaan jibi ki sun. Ntiŋ i jɔrɔkɔ, ntiŋ i ǹʼbi konaŋ ki tɛ : « Yi kakan-i yi baara ki ma sunŋ taanmani ciiru, á na-ni niŋ jibi kiri sun, nwɔma á i kene. Á kɔniŋ fa na-ni Nufaan jibi ki sun kì. »

15Ŋuntiŋ ki tu kalinfu ŋununtiŋ ki tɛ : « Ábɛɛ i wulufuulibitiiri i! Ábɛɛ tenŋ tenŋ ki fɔn áwɔ naan walima awɔ sufaniŋ ki pili-la, á i ta ǹʼbo ju sun Nufaan jibi ki sun kì wa? 16Ábɛɛ ji niŋ ma-a, ka mari ka wɔ̀ i Aburahamu nupo ki bɛɛ ɛ, ninwɔ̀ kɔlimaan yɛ shitaanni gbɛ kabi jiri bwununfulupɔni, woo, niŋ kakan niŋ i pili Nufaan jibi ki sun kì kɛ? »

17Yesu niŋ wulu ki bi-i waarinŋ wɔ̀ ru, ntiŋ ɲa kiri bataa i ɲaankwun. Nka jama ki pyɛ ki bataa ciirudimaan wuru-i Yesu wɔ kabakobi mamaan kiri bira.

Kirinŋ wɔ Masabi ki i tɔnpa-a ǹʼpyaanniŋ i

(Matiyu 13.31–33; Maraka 4.30–32)

18Yesu i ǹʼbi sɛbɛ : « Kirinŋ wɔ Masabi ki fa nfɛnŋ po? Míŋ a ǹʼfa nfɛnŋ pyi? 19Ǹʼyɔ miŋ tu mutarididaŋ, koŋ nwɔ̀ shi-i, ntiŋ i ǹʼfiri awɔ nankɔ ru. Ŋì i na ji jirinŋ i, kirinpɔlila ɲaannaanŋ ni i arì foo bo-ri ǹʼkanŋ kiri ru. »

20Ntiŋ tu sɛbɛ : « Míŋ a Kirinŋ wɔ Masabi ki fa nfɛnŋ pyi sɛbɛ? 21Ǹʼyɔ miŋ tu lenfe#13.21 lenfe : Lenfe ki wuru ramɔni-na fani bwuumaan na, kí wuru niŋ fani ki rusu-a, kí i ǹʼbo, ŋì i lɔ. Ǹʼtɔ ki bɛɛ i tu bwuru tuutuufinŋ. A niŋ fani lɔmaan ki ŋuniŋ ki walima ǹʼfurumaan ki bɛɛraaŋ bo-ri fani nusumaan ŋunaŋ ki ru, ǹʼwuru niŋ fani ki bataa tuutuu jɔrɔkɔ-a., mari nwɔ̀ pyaanŋ shi-i, nmari i ǹʼbo fani kulu sinaŋ tenŋ nu, nmari i ǹʼnusu, ŋì i fani ki bataa tuutuu. »

Demantɔnŋ pyaanŋ ki bi ki

(Matiyu 7.13–14, 21–23)

22Ŋì i Yesu tirira ki tu Yerusalɛmu, ntiŋ wuru de-a kili pyaanŋ kiri fa kili sinaŋ kiri ra, ntiŋ i konaŋ kiri kali-li.

23Koŋ bɛɛ i Yesu ranɔri : « Míŋ i ǹʼtɔ-a konaŋ mwumaan ki a mwɔ kì dɛ! »

Yesu i ntiŋ nupwulu tu : 24« Á á banba, á i de demantɔnŋ pyaanŋ ki ra, sabu míŋ a ǹʼbi ábɛɛ tɛ, ńʼtu koŋ mwɔɔnna na demaŋ ceeli ǹʼna, nka kí a so de-i kì.

25A kanintiŋ ki na jɔrɔkɔ, ntiŋ i mani ki tɔnŋ ki sɔɔn, ntiŋ i ábɛɛ tu taanna, niŋ waaci ki ru, ábɛɛ ra na fu ki tɔnŋ nakɔkɔ-ri, á i ǹʼbi-ri : ‹ Ŋuntiŋ, fu ki tɔnŋ nawwulu yi tɛ! › Niŋ waari ki ru, ntiŋ a na ǹʼbi ábɛɛ tɛ : ‹ Míŋ ábɛɛ tɔ-a kì, míŋ ábɛɛ pomaŋ tɔ-a kì. › 26Niŋ waari ki ru, ábɛɛ ra na ǹʼbi : ‹ Ŋuntiŋ, yibɛɛ kiri nufinŋ ki nu-i, yi mwunufinŋ ki mwunu ábɛɛ fan, niŋ fa ábɛɛ áwɔ kalinŋ ki wɔri-i yibɛɛ tɛ yɔɔ kiliwulinŋ kiri fan. Ábɛɛ i ji faa ǹʼbi-a tu ábɛɛ yibɛɛ tɔ-a kì wa? › 27Ŋuntiŋ ki a na a pwulu ǹʼsun sɛbɛ tu : ‹ Mínki tu, míŋ ábɛɛ pomaŋ tɔ-a kì, á á san ńʼɲaanfɛ, ábɛɛ bijɛmatɔnŋ kari bataa! ›

28Jibi wɔ̀, ábɛɛ na Aburahamu fa Ishaka fa Yakuba fa Kirinŋ wɔ cintɔnŋ kiri ja Kirinŋ wɔ Masabi ki ru, á i á yɛri keemaan ja taanna, ábɛɛ ŋuntan wulu ki fa á ɲiinnaŋ nataa wulu a na ji niŋ mani nu. 29Niŋ waaci ki ru, konaŋ kiri ra na po juniɲa nɔnkɔnŋ pyiiraŋ ki bataa ru, kí i na sɔɔ-ri Kirinŋ wɔ Masabi ki ru nufinŋ ki tɛ. 30Niŋ ki ra, ǹʼbɛɛ ri i kɔɔtɛtiiri i jiŋ, nini a na ji jɛntiiri i. Ǹʼbɛɛ ri fani i ji jɛntiiri i jiŋ, nini i ji-a na ji kɔɔtɛtiiri i. »

Yesu i wulubi-a Yerusalɛmu bi ki sun

(Matiyu 23.37–39)

31Niŋ waaci ki ru, Farinsiyɛnŋ kiri bɛɛ ri i na ǹʼbi Yesu tɛ : « Po san kwumaŋ, ŋi i tiri, sabu Ɛrɔdi i ǹʼtɛ a i miŋ kilɛn. »

32Yesu i kí rupwulu : « Á ta ǹʼbi niŋ juunkwuu ki tɛ, tu míŋ a ɲinijɛ kiri kalikali po san konaŋ ki ru, ŋí i kiratɔnŋ kiri kene jiŋ niŋ fa siri. Ǹʼsunŋ byantɔnŋ ki mɔ́ɔ́n baara ki a rafaa. 33Nka míŋ kakan-i ŋí i ńʼbo saa ki sun jiŋ, siri niŋ fa a kɔɔtɛ, sabu Kirinŋ wɔ cintɔnŋ kakan ŋì i kilɛn mani tɔri ru Yerusalɛmu ciniŋ kì. »

34Yesu tu sɛbɛ : « Heyi! Yerusalɛmutiiri, Yerusalɛmutiiri, ábɛɛ wɔ̀ri i Kirinŋ wɔ cintɔnŋ kiri kilɛn-a, ŋì nwɔ̀ri cin na-i á tɛ, á i nini jɛri-ri kwɔ ra, fɔ á i kí kilɛn-ni. Waaci mwɔɔnna, míŋ wuru ǹʼtɛ, ŋí i ábɛɛ rakɔli bo ámaŋ sun, miŋ tu ɲaŋ ɲiŋ i a daŋ ni nakɔli-la a cibi fɛ ɲaan wɔ̀ tɛ, nka ábɛɛ á tu kì. 35Dɔnsaŋ, ǹʼshɛɛli, Kirinŋ a na ábɛɛ tu á cinancinŋ, áwɔ mani ki i ji mani wɔ ɔ. Míŋ i ǹʼbi-a ábɛɛ tɛ, ńʼtu ábɛɛ ɲaniŋ na tu míŋ na kili kì, fɔ ŋì i ta so waarinŋ wɔ̀ ru, ábɛɛ na ǹʼbi tu : ‹ Nwɔ̀tiŋ i na-a Ŋuntiŋ ki tɔ ra, Kirinŋ baraka de niŋ nu! › »

Currently Selected:

Luki 13: JOB

Highlight

Copy