Yuhana 8

Mari wɔ̀ pa-i nankulunbi ru, niŋ bi ki

1Niŋ bataa kɔɔtɛ, Yesu i tiri Olinfyetɔnŋ ki sun. 2Niŋ sisarifuluntɔnŋ ki siira jona, Yesu i a pwulu tiri Kirinfusinaŋ ki ru, konaŋ ki bataa i na a rakɔli ntiŋ tɔntɛ. Yesu i sɔɔ, ntiŋ i kí kali-li. 3Sariya kalimɔɔ kiri fa Farinsiyɛnŋ kiri i na mari bɛɛ wu Yesu tɛ, tu arìbɛɛ nmari pa nankulunbi ru, kí i na nmari tu konaŋ ki faninmwuŋ. 4Kí tu Yesu tɛ : « Kalimɔɔ, mari ka pa-i nankulunbi ru. 5Cintɔnŋ Musa tu yibɛɛ tɛ sariya sɛbɛ ki ru, tu niŋ mari kwuru ki jɛri kwɔ ra nmari i kilɛn. Miŋ ǹʼdanwɔ bi-a niŋ nu? »

6Kí wuru ǹʼtɛ arì i Yesu kɔrɔbɔ, niŋ ki ra kí i ka wulu ka bi, nwɔma arì i pɔlimaŋ kila ntiŋ na. Nka Yesu i a sunsan, ntiŋ i sɛbɛ tan-ni a gbɛnaŋ na fwuniŋ ki sun. 7Kí kwulu-i ntiŋ na nanɔri kiri wu waarinŋ wɔ̀ ru, ntiŋ i jɔrɔkɔ tu, ntiŋ i ǹʼbi kí tɛ tu : « Konwɔtiŋ i ábɛɛ ru, tu ntiŋ bijɛ ma ja-i sun kì, tu nintiŋ jɔnɔ ki kwɔ ki jɛri nmari sun. » 8Ntiŋ a sunsan sɛbɛ, ntiŋ i sɛbɛ ki tan-ni fwuniŋ ki sun. 9Kí niŋ wulu kiri rama-i waarinŋ wɔ̀ ru, kí fɔn bataa i pyɛ tenŋ tenŋ sun, ŋì i tɔnpa ǹʼcɛɛnni kiri sun, kí i tiri, kí i Yesu tenŋ fa mari ki tu nmaŋ. 10Yesu i a ŋununfɛshi, ntiŋ i ǹʼbi nmari tɛ : « Mari ki, miŋ kititɔnŋ kiri ta da? Kí tɔri kiti ki fɛɛn-ɛ miŋ sun kili kì wa? »

11Mari ki i rupwulu tu : « Aayi, míŋ ŋuntiŋ. » Yesu i ǹʼbi nmari tɛ tu : « Míŋ yɛrima ki kiti fɛɛn miŋ sun kì, tiri, nʼdumiŋ fa bijɛ ma kili kì. »

Juniɲa wɔ manisarinŋ ki

12Niŋ kɔɔtɛ, Yesu i wulubi konaŋ ki tɛ tu : « Mínki i juniɲa ki wɔ manisarinŋ ki i. Konwɔtiŋ ǹʼpa míŋ cɛfan, nintiŋ a tiri mancinŋ nu kì, nka ntiŋ a ɲaninkulutɔnbi manisarinŋ ki kila. » 13Niŋ ki ra, Farinsiyɛnŋ kiri tu : « Miŋ yɛrima ki i wulubi-a nʼyɛri bi sun, niŋ na mɔɔn wulu kiri sɛli i kì. » 14Yesu i kí rupwulu tu : « Hali míŋ ji wulubi-a ńʼyɛri bi sun, mɔ́ɔ́n wulu kiri i sɛli i, sabu míŋ i ńʼpomaŋ ki tɔ-a, ŋí i ńʼtirimaŋ ki tɔ-ri. Ábɛɛ dumiŋ míŋ pomaŋ ki tɔ-a kì, á dumiŋ ńʼtirimaŋ ki tɔ-a sɛbɛ kì. 15Ábɛɛ i kiti ki kwuru-ra konanmini wɔ kwuruka ɲaan tɛ, míŋ kiti kwuru-ra koŋ sun kì. 16Hali míŋ ji-a kiti kwuru koŋ sun, míŋ a ǹʼkwuru telibi wu, sabu míŋ tenŋ a na niŋ kiti ki kwuru kì, míŋ Tiŋ wɔ̀ ki míŋ cin-i, niŋ i míŋ fan. 17Ǹʼsɛbɛ ábɔɔ sariya sɛbɛ ki ru tu, a koŋ fuuli ǹʼbi tu bi wɔ̀ ma arìbɛɛ ɲaanna, tu niŋ sɛli i kì wa? 18Míŋ i wulubi-a ńʼyɛri bi sun, míŋ Tiŋ wɔ̀ míŋ cin-i, niŋ i wulubi-ri míŋ bi sun sɛbɛ. » 19Kí i ntiŋ nanɔri : « Miŋ Tiŋ ki da? » Yesu i kí rupwulu tu : « Ábɛɛ míŋ tɔ-a kì, á dumiŋ míŋ Tiŋ ki tɔ-a kì. A ábɛɛ ji wuru míŋ tɔ-ri, ábɛɛ wuru-ra míŋ Tiŋ ki tɔ. » 20Yesu ka wulu kari bi wuru-i, ŋì i ntiŋ tu konaŋ ki kali-la Kirinfusinaŋ ki ru, Kirinŋ kafinŋ bo shɛɛrinŋ ki maŋ ki ru. Koŋ ntiŋ pa kì, sabu ntiŋ wɔ waaci ki so-ri sun kì.

Yesu i koŋ wɔ̀

21Yesu i ǹʼbi kí tɛ sɛbɛ tu : « Míŋ a tiri, ábɛɛ ra míŋ ceeli, nka ábɛɛ ra beeni áwɔ bijɛ kiri ru. Míŋ a tiri mani wɔ̀ ru, ábɛɛ ra so tiri-i niŋ mani ki ru kì. »

22 Yawutu ŋununtiŋ kiri tu : « Wú a na a yɛri kilɛn wa? Sabu wú tu : ‹ Míŋ a tiri mani wɔ̀ ru, ábɛɛ ra so tiri-i niŋ mani ki ru kì. › » 23Yesu tu kí tɛ : « Ábɛɛ i pwɔkulinŋ sun wɔ ri, nka míŋ po-i kirinpɔlila. Ábɛɛ i ka juniɲa ka wɔ ri, nka míŋ ka juniɲa ka wɔ kì. 24Niŋ ki ra, míŋ i ǹʼbi ábɛɛ tɛ ńʼtu ábɛɛ ra beeni áwɔ bijɛ kiri ru, sabu a ábɛɛ bili ǹʼna tu míŋ ‹ Míŋ › i kì, ábɛɛ ra beeni ŋì i á tu áwɔ bijɛ kiri ru. » 25Kí i ntiŋ nanɔri : « Miŋ kɛnŋ? » Yesu tu kí tɛ : « Míŋ i nwɔ̀, míŋ niŋ bi-i ábɛɛ tɛ sun kabi ǹʼcɛtumaŋ ki ru. 26Wulu mwɔɔnna i míŋ gbɛ ŋí i ǹʼbi ábɛɛ bi sun, ŋí i ábɔɔ pɔli kiri ji á wu, nka nwɔ̀tiŋ míŋ cin-i, niŋ wɔ ki i sɛli ki i, míŋ nwɔ̀ rama-i niŋ gbɛ, míŋ i ninki bi-a juniɲa nu konaŋ kiri tɛ. »

27Kí ǹʼtɔ-ri tu ntiŋ wulu ki bi-a arìbɛɛ tɛ Tiŋ Kirinŋ bi sun kì. 28Niŋ ki ra, Yesu i ǹʼbi kí tɛ tu : « A ábɛɛ na Koŋ Danshuru ki fɛshi kɔ cuunŋ waarinŋ wɔ̀ ru, míŋ i nwɔ̀, ábɛɛ ra na niŋ tɔ, tu míŋ finŋ tɔri tenŋ ma-a ńʼyɛrɛtɛ kì, duu míŋ Tiŋ ki míŋ kini-i nwɔ̀ ra, tu míŋ ninki bi-a. 29Míŋ cintɔnŋ ki i míŋ fan, ŋì míŋ tu cinancinŋ kì, sabu nwɔ̀ ki di-i ǹʼtɛ, míŋ i ninki ma-a waarinŋ bataa ru. » 30Yesu niŋ wulu kiri bi-i, koŋ mwɔɔnna i bili ntiŋ na.

Aburahamu daŋ sɛlɛsɛli kiri bi ki

31Yawutu wɔ̀ri bili-i Yesu ra, ntiŋ i ǹʼbi nini tɛ tu : « A ábɛɛ á kulu mɔ́ɔ́n wulu kiri tɛ, sɛli ki ra, ábɛɛ ra ji mɔ́ɔ́n kalindaŋ ni i. 32Ábɛɛ ra na sɛli ki tɔ, niŋ sɛli ki tɔmaan ki i ji-a na ábɛɛ ji á yɛri wɔ ri. » 33Kí tu Yesu tɛ tu : « Yibɛɛ i Aburahamu nupo ri i, yibɛɛ ji ja koŋ tɔri tenŋ wɔ joŋ i sun kì, nfɛnŋ na miŋ i ǹʼbi-ri tu yibɛɛ ra na ji yi yɛri wɔ ri? » 34Yesu i kí rupwulu tu : « Sɛli sɛli ki ra, koŋ finŋ woo finŋ i bijɛ ki ma-a, nintiŋ i bijɛ ki wɔ joŋ i. 35Joŋ ki tu-a kaniŋ ki sun waarinŋ bataa ru kì, nka manitiŋ ki danshuru ki i kanindaŋ i waarinŋ bataa ru. 36Niŋ ɲaan ki tɛ, a Danshuru ki ábɛɛ ji á yɛri wɔ ri, sɛli ki ra, ábɛɛ ra ji á yɛri wɔ ri. 37Míŋ ǹʼtɔ-i ńʼtu ábɛɛ Aburahamu nupo ri i, nka niŋ fa a fɔn na, ábɛɛ i míŋ kilɛnmaŋ ceeli-la, sabu ábɛɛ ncusun mɔ́ɔ́n wulu ki i sɔɔmaŋ kila ábɛɛ cii kiri ru kì. 38Míŋ nwɔ̀ ja-i ńʼTiŋ ki gbɛ, míŋ i ninki bi-a, ábɛɛ yɛrima kiri nwɔ̀ kini-i á tiŋ kiri gbɛ, ábɛɛ i niŋ ma-ni. »

39Kí i ntiŋ nupwulu tu : « Yibɛɛ tiŋ ki i Aburahamu. »

Yesu tu kí tɛ : « A ábɛɛ ji wuru Aburahamu daŋ ni i, ábɛɛ wuru-ra ji niŋ mabi kiri ma-a. 40Nka á ǹʼshɛɛli, ábɛɛ i míŋ kilɛnmaŋ ceeli-la, mínwɔ̀ sɛli ki rama-i Kirinŋ gbɛ, ŋí i ǹʼbi ábɛɛ tɛ. Ábɛɛ i ninwɔ̀ ma-a, Aburahamu kɔniŋ niŋ bishi ma kì dɛ! 41Ábɛɛ i á tiŋ ki mabi kiri ma-a. »

Kí tu Yesu tɛ : « Yibɛɛ kaninfandaŋ kilamaan ni kì dɛ! Tiŋ tenŋ i yibɛɛ ra, niŋ i Kirinŋ i. » 42Yesu tu kí tɛ : « A Kirinŋ ji wuru ábɛɛ tiŋ ki i, ábɛɛ wuru-ra míŋ bidi á tɛ, sabu míŋ po-i Kirinŋ nu, ŋí i na. Míŋ na ńʼyɛri tɛ kì, nka mìnki míŋ cin na-i. 43Míŋ i nwɔ̀ bi-a, nfɛnŋ ncin-a ábɛɛ so-a niŋ daŋ tɔ-i kì? Ábɛɛ á tɔɔnye-a míŋ tɛ kì, ninki yɛ. 44Ábɛɛ tiŋ ki i shitaanni i, ábɛɛ i ǹʼtɛ á i ǹʼnaki a dintɛ bi ki ru. Kabi juniɲa tɔnpa waari ki ru, koŋ kilɛntɔnŋ yɛ, ŋì a tu ja-i sɛli ki ra sun kì, sabu sɛlitiŋ i kì. A ǹʼji puru ki bi-a waarinŋ wɔ̀ ru, ŋì i a yɛri ki ɲaan ki ji-a, sabu purubitɔnŋ yɛ, puru ki tiŋ ki i ji-i. 45Nka míŋ i sɛli ki bi-a, ninki i ncin-a ábɛɛ bili-la míŋ na kì. 46Ábɛɛ ru, nkɛnŋ tenŋ a so ǹʼbi-i tu míŋ bijɛ ma? A míŋ dumiŋ ji sɛli ki bi-a, nfɛnŋ na ábɛɛ bili-la míŋ na kì? 47Konwɔtiŋ i Kirinŋ wɔ koŋ i, nintiŋ i Kirinŋ wɔ wulu kiri rama-a, nka ábɛɛ yìrì rama-a kì, sabu ábɛɛ Kirinŋ wɔ kpeeri i kì. » 48Yawutu kiri i ntiŋ nupwulu tu : « Yibɛɛ jii wuru-i, yi i ǹʼbi tu miŋ Samaritɔnŋ i, niŋ fa tu ɲinijɛ i ji nʼnu. » 49Yesu i kí rupwulu tu : « Ɲinijɛ míŋ nu kì, nka míŋ i ńʼTiŋ ki gbɛ-a, ábɛɛ i míŋ nufyɛ-ri. 50Míŋ ńʼyɛri gbɛmaŋ ceeli-la kì, nka koŋ i nmaŋ, nwɔ̀ i niŋ ceeli-la míŋ tɛ, ninki i kitikwurutɔnŋ ki i. 51Sɛli sɛli ki ra, míŋ a ǹʼbi ábɛɛ tɛ ńʼtu konwɔtiŋ mɔ́ɔ́n wulu kiri pa, ńʼtu nintiŋ a beeni fyewu kì. »

Aburahamu fa a daŋ kiri bi ki

52Yawutu kiri i ǹʼbi ntiŋ tɛ tu : « Dɔnsaŋ, yibɛɛ ǹʼtɔ-i tu ɲinijɛ miŋ nu sɛli ki ra! Aburahamu beeni-i, cintɔnŋ kiri i ji beeni, nka miŋ i ǹʼbi-ri tu konwɔtiŋ miŋ wulu pa, tu nintiŋ a beeni kili kì. 53Niŋ ki ra, miŋ gbɛ-i yibɛɛ tiŋ cɛɛnni Aburahamu wu wa? Niŋ beeni-i, cintɔnŋ kiri i ji beeni. Miŋ nʼyɛri ji-a nkɛnŋ? » 54Yesu i kí rupwulu tu : « A míŋ ji wuru ńʼyɛri gbɛ-a, niŋ gbɛbi ki wuru-ra ji finŋ tɔri tenŋ i kì, nka nwɔ̀ i míŋ gbɛ-a, niŋ i míŋ Tiŋ ki i, ábɛɛ i ǹʼbi-a nwɔ̀ tɛ tu ‹ yɔɔ Kirinŋ ›, 55á dumiŋ ǹʼtɔ-a kì. Míŋ kɔniŋ i ǹʼtɔ-a. A míŋ ǹʼbi tu míŋ ǹʼtɔ-a kì, míŋ a ji purubitɔnŋ i ábɛɛ sali. Nka míŋ i ǹʼtɔ-a, ŋí i ǹʼwɔ wulu kiri pa-ri. 56Ábɛɛ tiŋ cɛɛnni Aburahamu a ciirudi-i, tu afinŋ a mɔ́ɔ́n sunŋ ki ja. Ntiŋ ǹʼja-i, ŋì i ntiŋ ciirudi. »

57Yawutu kiri tu ntiŋ tɛ : « Miŋ yɛri jiri yaafuuli fa byinŋ (50) kila-i sun kì, miŋ ǹʼbi-ri tu miŋ Aburahamu ja wa? »

58Yesu i kí rupwulu : « Sɛli ki ra, míŋ a ǹʼbi ábɛɛ tɛ ńʼtu Aburahamu so-i ji sun, ńʼtu míŋ wuru nmaŋ. »

59Niŋ wulu kiri bimaan ki ra, kí i kwɔ ri shi, tu arì ra Yesu jɛri nini wu. Nka Yesu i a radu po san Kirinfusinaŋ ki ru.

Currently Selected:

Yuhana 8: JOB

Highlight

Copy