Yuhana 7

Yesu ta-i bwɔ fɛ sɔɔ ɲaannabyɛ ki ru

1Niŋ kɔɔtɛ, Yesu wuru a maanni de-a Galile sɔɔta ki ru, ntiŋ wuru a tu-a ntiŋ ta Yude sɔɔta ru kili kiri ra kì, sabu Yawutu jɛntɔnŋ kiri wuru ntiŋ kilɛnmaŋ ceeli-la. 2Niŋ fa wuru Yawutu kiri wɔ bwɔ fɛ sɔɔ ɲaannabyɛ ki#7.2 bwɔ fɛ sɔɔ ɲaannabyɛ ki : Niŋ wuru Yawutu kiri wɔ jiri sun ɲaannabyɛ ki bɛɛ ɛ. Niŋ ɲaannabyɛ ki wuru ma-a jiri ki ɲɛ jɔnpɔnɔtɔnŋ ki sunŋ bwununtaantɔnŋ ki i, ŋì i ta bo ǹʼsunŋ kɔniŋ fa fuluntɔnŋ ki sun. Niŋ ɲaannabyɛ ki wuru ma-a bilaŋ de ki sun. Isirayɛlidaŋ ki bataa wuru san-a bwɔ fɛ ka sunŋ jɔnpɔni ka ciiru. myɛ-ɛ kɔ#Sarakawɔrɔtɔnŋ kiri 23.34; Sariya kiri 16.13; Pobi ki 23.16; 34.22.. 3Yesu tindaŋ kiri i ǹʼbi ntiŋ tɛ : « Po ŋi i tiri Yude sɔɔta ki ru, nwɔma mɔɔn kalindaŋ wɔ̀ri i niŋ mani kiri ru, nini i so miŋ mabi kiri ja-i. 4Konwɔtiŋ i ǹʼtɛ a i tɔ, niŋ i awɔ bi kiri radu ma-a kì. Miŋ tu miŋ i ka bi bishi kari ma-a, ta nʼyɛri ji, nwɔma konaŋ ki bataa i nʼtɔ. » 5Yesu tindaŋ kiri wuru ka bi-a, sabu kíbɛɛ yɛrima kiri bili-li ntiŋ na kì.

6Yesu i a tindaŋ kiri rupwulu tu : « Mɔ́ɔ́n waaci ki so-i sun kì, nka ábɛɛ gbɛ, waaci bataa shɔ-i. 7Juniɲa ki a so ábɛɛ bikwɔ-i a sun kì, nka míŋ bikwɔ-i ǹʼsun, sabu míŋ i ǹʼbi-a ńʼtu ǹʼmabi kiri shɔ kì. 8Ábɛɛ tiri ka ɲaannabyɛ ka ru, míŋ a so ta-i nmaŋ sun kì, sabu mɔ́ɔ́n waaci ki so-i sun kì. »

9Niŋ bimaan ki kɔɔtɛ, ntiŋ i tu Galile nmaŋ. 10Nka, niŋ fa a fɔn na, ntiŋ tindaŋ kiri tiri-i waarinŋ wɔ̀ ru, ntiŋ yɛri ki i ta sɛbɛ, nka ntiŋ ta wuru du ru. 11Yawutu kiri i ntiŋ ceeli de-ri ɲaannabyɛ ki ru, kí i nanɔri tan de-ri tu : « Wú a ji da sa? »

12Ntiŋ tɔ ki wuru konaŋ ki tɔnŋ na. Ǹʼbɛɛ ri tu : « Koŋ shɔɔrinŋ yɛ dɛ! »

Koŋ tɔri ri i ǹʼbi-ri tu : « Koŋ sɔbɛ i kì dɛ! Wú i konaŋ kiri fɔni-na. »

13Miŋ tu koŋ bataa wuru kɛni-na Yawutu jɛntɔnŋ kiri jɛŋ, koŋ tɔri wuru jɛɛn-na ntiŋ i Yesu wulu ki bi po taanna koŋ i ǹʼnama kì.

Yesu cɛfan wulu ki kɛɛ-ɛ

14Ŋì i konaŋ ki tu ɲaannabyɛ ki faninmwuŋ, Yesu i ta Kirinfusinaŋ ki ra, niŋ mani nu, ntiŋ i konaŋ ki kali-li. 15Niŋ botɔnsun i Yawutu kiri bataa pa, kí i arìmaŋ nanɔri-ri tu : « Wú ji dɔɔkunŋ wú i Sɛbɛ ki ru wulu kiri tɔ-ri ka ɲaan ka tɛ, wú dumiŋ yìrì kali ja kalimɔɔ gbɛ kì? »

16Yesu tu kí tɛ : « Míŋ konaŋ ki kali-la finŋ woo finŋ na, ǹʼtɔri dantenŋ po-a míŋ yɛrima ki ru kì. Nwɔ̀tiŋ míŋ cin-i, míŋ yìrì bataa kila-i niŋ gbɛ. 17Konwɔtiŋ i ǹʼtɛ a i Kirinŋ dintɛ bi ki ma, ntiŋ a ǹʼtɔ mɔ́ɔ́n kalinŋ ki ru wulu kiri ra, a yìrì ji po-a Kirinŋ nu walima a yìrì ji po-a míŋ yɛrima ki ru. 18Konwɔtiŋ i a yɛri wɔ wulu bi-a, nintiŋ i a yɛri gbɛmaŋ ceeli-la. Nka nwɔ̀tiŋ i a cintɔnŋ ki gbɛmaŋ ceeli-la, nintiŋ i sɛlitiŋ i, kɛrɛmaŋ nwɔ̀ ra kì. 19Míŋ tu, Musa sariya ki wɔri ábɛɛ tɛ kì wa? Niŋ fa a fɔn na, ábɛɛ tɔri tenŋ sariya ki wulu pa-a kì! Nfɛnŋ na, ábɛɛ míŋ kilɛnmaŋ ceeli-la? »

20Konaŋ ki i ntiŋ nupwulu tu : « Ɲinijɛ i miŋ nu! Nkɛnŋ ǹʼtɛ a i miŋ kilɛn? »

21Yesu i kí rupwulu tu : « Míŋ bi tenŋ pe ma-i Nufaan jibi ki sun, niŋ i bo ábɛɛ tɔnŋ sun. 22Musa sɔɔpeefɛmaanna ki sariya ki wɔri-i ábɛɛ tɛ, ninwɔ̀ i ladaŋ i, nwɔ̀ yɛri po Musa gbɛ kì, nka ǹʼkila-i yi tiŋ cɛɛnni kiri gbɛ. Ábɛɛ i niŋ ma-a Nufaan jibi ki sun, niŋ ábɛɛ fɔɔn-na kì. 23Niŋ ki ra, a danshuru ki ji so-a sɔɔpeefɛ Nufaan jibi ki sun, sariya ki libali, nfɛnŋ na ábɛɛ i a tɔnkwulu-li míŋ cɛfan koŋ kwuturu kenemaan bira Nufaan jibi ki sun? 24Á fa bi kiri shɛɛli arì kɔɔsun ki ra, á i pɔli wɔri koŋ tɛ kì, nka á yìrì shɛɛli ŋì i kɛɲɛ sɛli ki wu. »

25Ntiŋ jamaan ki i bo Yerusalɛmutɔnŋ kiri bɛɛ ri tɔnŋ sun, kí i ǹʼbi tu : « Taa kí i koŋ wɔ̀ kilɛnmaŋ ki ceeli-la, ntiŋ kaa kì wa? 26Ntiŋ shɛɛli wulu ki bi-a filɛɛ sun konaŋ ki faninmwuŋ ka ɲaan ka tɛ, kí dumiŋ wulubi-a ntiŋ tɛ kì! Yibɔɔ jɛntɔnŋ kiri yɛri ki fa ji ǹʼja tu Kirisa yɛrima ki i kì dɛ? 27Yibɛɛ kɔniŋ i koŋ ka pomaŋ ki tɔ-a, nka Kirisa, a niŋ na waarinŋ wɔ̀ ru, koŋ a na ntiŋ pomaŋ tɔ kì. »

28Niŋ ki ra, Yesu i tu konaŋ ki kali-la Kirinfusinaŋ ki ru, ntiŋ i wulu ka bi faanna, tu : « Ábɛɛ tu, ábɛɛ míŋ tɔ-a, á i ńʼpomaŋ ki tɔ-ri kɛ! Nka, á ǹʼtɔ tu míŋ na ńʼyɛri wɔ na nu kì, Sɛlitiŋ ki míŋ cin na-i. Ábɛɛ ntiŋ tɔ-a kì. 29Míŋ kɔniŋ i ntiŋ tɔ-a, sabu míŋ po-i ntiŋ nu, mìntiŋ ki i ji míŋ cin na. »

30Niŋ ki ra, koŋ mwɔɔnna wuru ǹʼtɛ arì i ntiŋ pa, nka koŋ tɔri dantenŋ so ntiŋ pa-i kì, sabu ntiŋ wɔ waaci ki so-ri sun kì. 31Niŋ fa a fɔn na, konaŋ ki ru, koŋ mwɔɔnna i bili ntiŋ na. Kí i ǹʼbi-ri tu : « A Kirisa na, ntiŋ a na botɔnsunbi sinaŋ danwɔ ma, tu ka shuru ka nwɔ̀ ma kì? »

32Konaŋ kiri wuru wulu tɔtɔɔlaaŋ wɔ̀ri bi-a arìmaŋ tɛ Yesu bi ki sun, niŋ i so Farinsiyɛnŋ kiri sun. Niŋ ki ra, Kirinŋ tɛ sarakawɔrɔtɔnŋ kiri ŋununtiŋ kiri fa Farinsiyɛnŋ kiri i Kirinfusinaŋ ki ɲaannasuutɔnŋ kiri bo, tu kí ta ntiŋ pa.

33Yesu tu kí tɛ : « Míŋ kakan-i ŋí i waaci pyaanŋ ma ábɛɛ fan sɛbɛ, ŋí i kila, ŋí i ńʼpwulu ta ńʼcintɔnŋ tɛ. 34Ábɛɛ ra na míŋ ceeli, ábɛɛ ra na míŋ ja kì, á dumiŋ a so ta-i míŋ maŋ ki ru kì. »

35Niŋ ki ra, ntiŋ wɔ wulu ki ramatɔnŋ kiri i arìmaŋ nanɔri-ri tu : « Wú a ta da, nwɔma yibɛɛ fa wú ja kì? Yawutu wɔ̀ri jeɲe-i shiya tɔri kiri kanfɛ, wú fa ji ǹʼtɛ a i ta nini tɛ kì dɛ? Walima wú fa ji ǹʼtɛ a i ta awɔ kalinŋ ki wɔri shiya tɔri kiri tɛ kì dɛ? 36‹ Ábɛɛ ra na míŋ ceeli, ábɛɛ ra na míŋ ja kì, á dumiŋ a so ta-i míŋ maŋ ki ru kì ›, wú ǹʼtɛ a i nfɛnŋ bi niŋ na? »

Ɲaninkulutɔnbi ju ki

37Ɲaannabyɛ ki jibi rakɔɔra ki, niŋ jibi sinaŋ ki sun, Yesu i ta tu konaŋ ki faninmwuŋ, ntiŋ i fali, ntiŋ i ǹʼbi tu : « A jumwunu ji nwɔ̀tiŋ wu, ntiŋ na míŋ tɛ, ntiŋ i a mwunu. 38Sabu ǹʼsɛbɛ-i Sɛbɛ kiri ru tu, Konwɔtiŋ bili míŋ na, baa ju ɲaninkulutɔnŋ ni a wulu po ntiŋ nu. »

39(Koŋ wɔ̀ri ra na bili Yesu ra, nini i a Ɲiniwɔlinŋ wɔ̀ kila, ntiŋ wuru ninki wulu bi-a. Niŋ waari ru, Ɲiniwɔlinŋ ki wɔri-ri sun kì, sabu Yesu de-ri awɔ nɔɔri ki ru sun kì.)

Konaŋ ki ru kila-i Yesu bi ki sun

40Koŋ wɔ̀ri Yesu wɔ wulu kiri rama wuru-i, nini mwɔɔnna i ǹʼbi-ri tu : « Sii ǹʼna ǹʼnu kì, Cintɔnŋ wɔ̀ i sunsuu-ra, ka shuru ka yɛ. »

41Ǹʼtɔri ri i ǹʼbɛɛ bo-ri ǹʼsun tu : « Kirisa yɛ, Kirinŋ Ɲaannakonshimaan ki. »

Nka kwuru tɔri ri i ǹʼbi-ri tu : « Kirinŋ Ɲaannakonshimaan ki a so po-i Galile sɔɔta ki ru wa? » 42Kí tu sɛbɛ : « Kirinŋ wɔ wulu sɛbɛ kiri ǹʼbi-a tu Kirinŋ Ɲaannakonshimaan ki kakan ntiŋ i ji masa Dawuda nupo o, tu ntiŋ i po Bɛtilɛhɛmu, masa Dawuda sɔɔ kili ki ra kì wa? »

43Niŋ ɲaan ki tɛ, konaŋ ki i rukila Yesu bi ki sun. 44Ǹʼbɛɛ ri wuru ǹʼtɛ arì i ntiŋ pa, nka koŋ tɔri tenŋ jɛɛn, ntiŋ i ntiŋ pa kì.

45Kirinfusinaŋ ki ɲaannasuutɔnŋ kiri i arì pwulu ta sarakawɔrɔtɔnŋ kiri ŋununtiŋ kiri fa Farinsiyɛnŋ kiri tɛ. Nini i kí ranɔri tu : « Ábɛɛ na wú wu nfɛnŋ na kì? »

46Kirinfusinaŋ ki ɲaannasuutɔnŋ kiri tu : « Koŋ tɔri tenŋ wulubi ja ka koŋ ka sali sun kì. »

47Farinsiyɛnŋ kiri i kí rupwulu tu : « Á tu dɔɔkunŋ? Ábɛɛ yɛrima kiri ncusun-i wú i á fɔni wa? 48Ábɛɛ Farinsiyɛnŋ ki bɛɛ tenŋ walima jɛntɔnŋ ki bɛɛ tenŋ bilimaan ja-i wú ra wa? 49Koŋ wɔ̀ri i bili-la wú ra, nini i kpeeri i, nwɔ̀ri finŋ tɔri dantenŋ tɔ-a sariya ki ru kì, kí bataa dankamaan ni yɛ. »

50Niŋ wulu ki sun, koŋ bɛɛ wuru kí ru tu Nikodɛmu, ninwɔ̀ ki ta wuru Yesu tɛ cii ki ru, niŋ tu kí tɛ tu : 51« Ŋì i kɛɲɛ yibɔɔ sariya ki wu, yibɛɛ so-a kiti fɛɛn koŋ sun, ntiŋ dariwulu lamabali, walima ntiŋ mabi ki tɔbali wa? »

52Kí i ntiŋ nupwulu tu : « Miŋ yɛri ki i Galiletɔnŋ ki bɛɛ wa? Ta Sɛbɛ kiri rufɔɔka shɔ, miŋ a ǹʼja tu Kirinŋ wɔ cintɔnŋ dantenŋ kakan ŋì i po Galile sɔɔta ki ru kì. » 53Niŋ ma-i, koŋ bataa i tiri awɔ mani nu.

Currently Selected:

Yuhana 7: JOB

Highlight

Copy