Yuhana 9
9
Ɲaanfwuu bɛɛ kene bi ki
1Yesu fwuudera mani bɛɛ ru, ntiŋ i shuru ɲaanfwuu bɛɛ ja, niŋ koŋ ki ji po wuru ɲaanfwuu u. 2Ntiŋ wɔ kalindaŋ kiri i ntiŋ nanɔri tu : « Kalimɔɔ, nfɛnŋ na koŋ ka i ji po ɲaanfwuu u? Ntiŋ yɛrima ki wɔ bijɛ mwɔɔn ntiŋ sun daa ntiŋ jifinŋ kiri wɔ? »
3Yesu i kí rupwulu tu : « Mìntiŋ wɔ bijɛ i kì, ntiŋ jifinŋ ni wɔ dumiŋ i kì. Nka ka ma-i, nwɔma Kirinŋ wɔ sotinbi ki i ji ntiŋ sababu ra. 4Sunŋ sarinŋ ki i nmaŋ waarinŋ wɔ̀ ru, yi kakan-i yi i míŋ cintɔnŋ ki wɔ baara kiri ma, a niŋ ji-i kì, koŋ a na so baara ma-i cii ki ru kì. 5Ŋì i míŋ tu juniɲa nu, míŋ i juniɲa wɔ manisarinŋ ki i. »
6Niŋ wulu kiri bimaan ki kɔɔtɛ, Yesu i lɛju bo fwuu ru, ntiŋ i ǹʼnusu, ntiŋ i ɲaanfwuu ki ɲaninaŋ kiri sunciriki niŋ jɔ ki wu. 7Yesu i ǹʼbi ntiŋ tɛ tu : « Ta nʼɲaannu ki wu Silowe tonta ki ru ju ki ra. » Silowe kɔri ki i tu : « cinmaan. » Ɲaanfwuu ki i tiri a ɲaannu ki wu, ntiŋ pwulumaan ki i maanna ja-ri.
8Niŋ ɲaanfwuu ki sɔɔshi kiri fa koŋ wɔ̀ri wuru ntiŋ tɔ-a nafɛ tan ki wu, nini i ǹʼbi-ri tu : « Mìŋ koŋ ka wuru sɔɔ-ra kwumaŋ ntiŋ i konaŋ kiri rafɛ-ri kì wa? » 9Ǹʼbɛɛ ri tu : « Mìŋ koŋ ki yɛ. » Ǹʼtɔri ri tu : « Mìntiŋ ki i kì, ntiŋ poshi yɛ. » Nka koŋ ki tu : « Mínki yɛrima ki yɛ. » 10Kí i ntiŋ nanɔri : « Miŋ ɲaninaŋ kiri rawwulu dɔɔkunŋ? »
11Ntiŋ i kí rupwulu tu : « Koŋ wɔ̀ tɔ ki i tu Yesu, ninki jɔ rusu kɔri-i míŋ ɲaninaŋ kiri sun, ntiŋ i ǹʼbi tu ŋí ta ńʼɲaannu ki wu Silowe tonta ki ru ju ki ra. Míŋ ta-i ńʼɲaannu ki wu, míŋ i ǹʼja míŋ ɲaninaŋ kiri i maannaja-ri. »
12Kí i ntiŋ nanɔri : « Niŋ koŋ ki da? » Ntiŋ i kí rupwulu tu : « Míŋ ǹʼtɔ kì. »
Ɲaanfwuu ki kene bi ki rufɔɔ bi ki Farinsiyɛnŋ kiri gbɛ
13Kí i niŋ ɲaanfwuu kenemaan ki pa tiri Farinsiyɛnŋ kiri tɛ. 14Sabu, Yesu jɔ ki kɔri wuru koŋ ki ɲaninaŋ kiri sun, ntiŋ i kene jibi wɔ̀, niŋ wuru Yawutu kiri wɔ Nufaan jibi i. 15Farinsiyɛnŋ kiri i ntiŋ nanɔri a ɲaninaŋ kiri rawwuluka ɲaan ki sun sɛbɛ. Ntiŋ i kí rupwulu tu : « Ntiŋ jɔ shi kɔri-i míŋ ɲaninaŋ kiri sun, míŋ i ta yìrì sunwu, yìrì i nawwulu. »
16Ɲaanfwuu ɲaninaŋ nawwulumaan ki ninki wɔ̀ bi-i, Farinsiyɛnŋ kiri bɛɛ ri tu : « Koŋ ka po Kirinŋ nu kì, sabu ntiŋ Nufaan jibi ki gbɛ-a kì. »
Nka ǹʼtɔri ri tu : « Bijɛmatɔnŋ a so ka botɔnsunbi kari bishi ri ma-i wa? » Kí wulu ki i bɔli amaŋ ciniŋ. 17Niŋ ma-i, Farinsiyɛnŋ kiri i arì pwulu kí i ɲaanfwuu kenemaan ki ranɔri sɛbɛ tu : « Konwɔtiŋ miŋ ɲaninaŋ kiri rawwulu-i, miŋ nfɛnŋ miiri-ra niŋ koŋ ki bi ki sun? »
Ntiŋ tu kí tɛ : « Kirinŋ wɔ cintɔnŋ yɛ. »
18Nka niŋ fa a fɔn na, Yawutu kiri so-ri bili-i ǹʼna tu koŋ ka wuru ɲaanfwuu u, tu ntiŋ ɲaninaŋ kiri i nawwulu kì. Niŋ ki ra, kí i ntiŋ jifinŋ kiri dɔri, 19kí i nini nanɔri tu : « Ábɛɛ ǹʼbi-a tu ábɛɛ daŋ wɔ̀ ji po ɲaanfwuu u, ka yɛ wa? Ǹʼji dɔɔkunŋ dɔnsaŋ ŋì i maannaja-ri? » 20Ɲaanfwuu ki jifinŋ kiri i kí rupwulu tu : « Yibɛɛ ǹʼtɔ-i tu yibɛɛ danshuru ki i, wú i ji ji po ɲaanfwuu u. 21Nka ǹʼji-i ɲaan wɔ̀ tɛ, wú i maannaja-ri dɔnsaŋ, yibɛɛ niŋ tɔ kì dɛ! Konwɔtiŋ wú ɲaninaŋ kiri rawwulu-i, yibɛɛ nintiŋ tɔ sɛbɛ kì. Á wú yɛrima ki ranɔri, daŋ i kili kì, wú a ǹʼɲaanbi ábɛɛ tɛ. » 22Ɲaanfwuu ki jifinŋ kiri niŋ bi-i Yawutu jɛntɔnŋ kiri jɛŋ kɛmi bira. Sabu Yawutu kiri fu wuru ǹʼsun, tu koŋ finŋ woo finŋ ǹʼbi tu Yesu Mwutɔnŋ ki i, tu nintiŋ a kalikali po san kalinfu ki ru. 23Ninki jɛŋ kɛmi ki ncin-i ɲaanfwuu ki jifinŋ kiri i ǹʼbi tu : « Daŋ i kili kì, á wú yɛrima ki ranɔri! »
24Farinsiyɛnŋ kiri i koŋ ki dɔri sɛbɛ, kí i ǹʼbi ntiŋ tɛ tu : « Yibɛɛ ǹʼtɔ-i tu ka koŋ ka bijɛmatɔnŋ i. Sɛli ki bi yi tɛ Kirinŋ ɲaanfɛ dɛ! »
25Ntiŋ i kí rupwulu tu : « Bijɛmatɔnŋ i woo, bijɛmatɔnŋ i kì woo, míŋ niŋ tɔ kì dɛ! Míŋ i finŋ tenŋ pe tɔ-a, míŋ ɲaninaŋ kiri fwuumaan wuru-i, nka dɔnsaŋ yìrì i maannaja-a. »
26Kí tu ntiŋ tɛ tu : « Ntiŋ nfɛnŋ ma miŋ wu? Ntiŋ miŋ ɲaninaŋ kiri rawwulu dɔɔkunŋ? »
27Koŋ ki i kí rupwulu tu : « Míŋ ninki bi wuru ábɛɛ tɛ sun, nka ábɛɛ á tɔɔncu mɔ́ɔ́n wulu ki fɛ kì. Nfɛnŋ na, ábɛɛ i ji ǹʼtɛ á i mìŋ wulu tenŋ ki rama sɛbɛ? Ábɛɛ yɛrima kiri fa ji ǹʼtɛ á i ji ntiŋ wɔ kalindaŋ kiri bɛɛ ri i kì dɛ? »
28Kí i ntiŋ ki, kí i ǹʼbi tu : « Minki i niŋ weŋ ki wɔ kalindaŋ ki i, a niŋ ji-i kì, yibɛɛ i Musa wɔ kalindaŋ ni i. 29Yibɛɛ kɔniŋ ǹʼtɔ-i tu Kirinŋ wulubi Musa tɛ, nka ka wɔ̀ i kaa, yibɛɛ niŋ pomaŋ tɔ kì. »
30Ɲaanfwuu kenemaan ki tu : « Ka a kabako dɛ! Ábɛɛ tu ábɛɛ ntiŋ pomaŋ tɔ kì, niŋ i faa ntiŋ dumiŋ ji míŋ ɲaninaŋ kiri rawwulu ji! 31Yibɛɛ ǹʼtɔ-i tu Kirinŋ bijɛmatɔnŋ wɔ rafɛ pa-a kì. Nka konwɔtiŋ i kɛni-na Kirinŋ jɛŋ, ntiŋ i ǹʼwulu pa-ri, Kirinŋ i nintiŋ wɔ rafɛ ki pa-a. 32Kabi fɔlɔfɔlɔ, konwɔtiŋ ji po-i ɲaanfwuubi ki wu, yibɛɛ ǹʼnama ja sun tu ǹʼbɛɛ niŋ bɛɛ ɲaninaŋ ni nawwulu ja-i sun kì. 33A koŋ ka ji wuru po-ri Kirinŋ nu kì, ntiŋ wuru-ra so finŋ tɔri tenŋ ma-i kì. »
34Kí i ǹʼbi ntiŋ tɛ tu : « Miŋ ji po-i bijɛmatɔnŋ i, minki i ǹʼtɛ ŋi i yibɛɛ kali wa? »
Niŋ bimaan ki ra, kí i ntiŋ kwɔ po taanna.
Ɲaanfwuu sɛlɛsɛli kiri bi ki
35Yesu ǹʼnama-i tu kí ɲaanfwuu kenemaan ki kwɔ po taanna, ntiŋ fa wú ta-i fu, ntiŋ i wú ranɔri tu : « Miŋ bili-i Koŋ Danshuru ki ra wa? »
36Koŋ ki tu Yesu tɛ tu : « Niŋ nkɛnŋ? Míŋ ŋuntiŋ, á ntiŋ ji ńʼwu, nwɔma ŋí i bili ntiŋ na. »
37Yesu tu wú tɛ : « Miŋ ɲaniŋ i mìntiŋ ki sun kaa, ninwɔ̀ i wulu ki bi-a miŋ tɛ kaa. »
38Weŋ ki tu : « Míŋ bili-i ǹʼna, Ŋuntiŋ ki. » Wú i a kwushiri Yesu fɛ, wú i ntiŋ gbɛ.
39Yesu tu : « Míŋ na-i juniɲa nu, nwɔma kiti ki i kwuru, nwɔ̀ri maannaja-a kì, nini i maannaja, nwɔ̀ri i maannaja-a, nini ɲaninaŋ kiri i fwuu. »
40Farinsiyɛnŋ wɔ̀ri wuru niŋ mani nu nmaŋ, nini niŋ wulu ki rama-i, kí i Yesu ranɔri tu : « Yibɛɛ yɛrima kiri i ɲaanfwuu ri i wa? »
41Yesu i kí rupwulu tu : « A ábɛɛ ji wuru ɲaanfwuu ri i, ábɛɛ wuru-ra ji bijɛtiŋ ni i kì, nka ábɛɛ ǹʼbi wɔ̀ tan-a tu ábɛɛ maannaja-a, ninki i ábɛɛ ji-a bijɛmatɔnŋ ni i. »
Currently Selected:
Yuhana 9: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
