Yuhana 16

1Yesu tu kí tɛ sɛbɛ tu : « Míŋ i wulu ki bi-a ábɛɛ tɛ ka ɲaan ka tɛ, nwɔma ábɛɛ fa na bilinabi ki tonbo kì. 2Kí a na ábɛɛ kwɔ po san Yawutu kiri wɔ kalinfu kiri ru. Waaci ki bɛɛ ra na so, nwɔ̀ri a na ábɛɛ kilɛn-ni, ŋì a na ji nini cirasun, tu arìbɛɛ i Kirinŋ gbɛ-a. 3Kí a na niŋ bi kiri bataa ma ábɛɛ wu, sabu kí míŋ Tiŋ ki tɔ ja kì, kí míŋ yɛrima ki tɔ kì. 4Míŋ i niŋ bi kiri bi-a ábɛɛ tɛ dɔnsaŋ, nwɔma a yìrì na ma waarinŋ wɔ̀ ru, ábɛɛ ɲakili i na bo tu, míŋ yìrì jɛnbi-ri ábɛɛ tɛ. »

Ɲiniwɔlinŋ ki mabi kiri

Yesu tu awɔ kalindaŋ kiri tɛ : « Míŋ wɛri ŋí i niŋ bi kiri bi ábɛɛ tɛ kì, sabu míŋ wuru faa-a ábɛɛ fan. 5Dɔnsaŋ, míŋ a tiri ńʼcintɔnŋ ki tɛ, nka ábɛɛ tɔri dantenŋ míŋ nanɔri-ra tu : ‹ Miŋ ta-a da kì wa? › 6Míŋ ǹʼja-i ńʼtu, míŋ i wulu kiri bi-a ábɛɛ tɛ ka ɲaan ka tɛ, ńʼtu ninki ábɛɛ bataa gbɛɛratɛɛ-ɛ. 7Nka míŋ sɛli ki bi-i ábɛɛ tɛ ńʼtu míŋ tiri ki tɔndi ábɛɛ ra, sabu a míŋ tiri kì, Yentɛtɔnŋ ki a na ábɛɛ tɛ kì. Nka a míŋ tiri, míŋ a ǹʼbo na ábɛɛ tɛ.

8A niŋ na waarinŋ wɔ̀ ru, ŋì a na ǹʼji juniɲa nu tɔnŋ kiri wu tu kí fɔnimaan ni i bijɛ ki bi ki sun, kí i fɔni telibi ki bi ki sun niŋ fa Kirinŋ wɔ kiti ki bi ki sun sɛbɛ. 9Nwɔ̀ i bijɛ ki bi ki i, kí fɔnimaŋ ki i kaa : Kí bili-la míŋ na kì. 10Telibi ki bi ki sun, kí fɔnimaŋ ki i kaa : Míŋ i tiri-ra Tiŋ ki tɛ, niŋ fa ábɛɛ ra míŋ ja kili kì. 11Kirinŋ wɔ kiti ki bi ki sun, kí fɔnimaŋ ki i kaa : kiti ki fɛɛn-ɛ juniɲa ki ŋununtiŋ ki sun kɔ.

12Finŋ mwɔɔnna i faa míŋ gbɛ ŋí i ǹʼbi ábɛɛ tɛ, nka nini faan ki gbɛ-i faa ábɛɛ sun. 13Niŋ ki ra, Ɲini Sɛlitiŋ ki na waarinŋ wɔ̀ ru, niŋ a na ábɛɛ jɛnpa, ŋì i sɛli ki bataa bi á tɛ, sabu ǹʼwɔ wulu kiri ra na po-ri ǹʼyɛrima ki ru kì. Nka ŋì finŋ woo finŋ nama, ŋì a na ninki bi ábɛɛ tɛ, ŋì i bi naanna kiri bi á tɛ. 14Ŋì a na míŋ gbɛ, sabu ŋì a na wulu wɔ̀ kila míŋ gbɛ, ŋì a na ninki bi ábɛɛ tɛ.

15Finŋ woo finŋ i Tiŋ Kirinŋ gbɛ, niŋ bataa i mɔ́ɔ́n, niŋ ki ra, míŋ i ǹʼbi ńʼtu, Yentɛtɔnŋ ki a na wulu wɔ̀ kila míŋ gbɛ, ńʼtu ŋì a na ninki bi ábɛɛ tɛ. 16Ǹʼtu-i pyaanniŋ ábɛɛ ra míŋ ja kì, niŋ kɔɔtɛ, pyaanniŋ á i ǹʼja sɛbɛ. »

Kalindaŋ kiri wɔ gbɛɛratɛɛbi ki rapwulu ji bi ki ciirudibi i

17Ntiŋ wɔ kalindaŋ kiri bɛɛ ri arìmaŋ nanɔri-ri tu, ka wulu ka daŋ ki ǹʼdanwɔ? Ntiŋ tu : « Pyaanniŋ ábɛɛ ra míŋ ja kì, niŋ kɔɔtɛ pyaanniŋ, á i ji-a ǹʼja sɛbɛ », niŋ fa tu : « Sabu míŋ i tiri-ra Tiŋ ki tɛ. »

18Kí tu sɛbɛ : « Ntiŋ pyaanniŋ danwɔ wulu bi-a? Ntiŋ ǹʼtɛ a i nfɛnŋ bi yibɛɛ tɛ? »

19Yesu i ǹʼtɔ tu kí ǹʼtɛ arì i afinŋ nanɔri, ntiŋ tu kí tɛ : « Míŋ ǹʼbi wɔ̀ tan-i ábɛɛ tɛ tu : ‹ Pyaanniŋ ábɛɛ ra míŋ ja kì, niŋ kɔɔtɛ, pyaanniŋ á i ji-a ǹʼja sɛbɛ ›, ábɛɛ i ámaŋ nanɔri-ra ninki kɔri ki sun wa? 20Sɛli ki ra, míŋ a ǹʼbi ábɛɛ tɛ, ńʼtu ábɛɛ ra na ŋuntan, á i á makwulu wulu bi-ri waarinŋ wɔ̀ ru, juniɲa nu konaŋ kiri ra na arì ciirudi-ri. Ábɛɛ gbɛɛra na tɛɛ, nka ábɔɔ gbɛɛratɛɛ ki a na napwulu ji ciirudibi i. 21A mari ji awɔ daŋ ki ji-a, nmari i ɲaanfɛkwulu-la, sabu niŋ waaci ki so-i. Nka a nmari awɔ daŋ ki ji, nmari ɲakilila i fɔni-na niŋ ɲaanfɛkwulu ki bataa tɛ, sabu nmari ciiru i di-a, tu afinŋ konaŋ ji bo juniɲa nu. 22Mìŋ ɲaan tenŋ ki tɛ, ábɛɛ yɛrima kiri gbɛɛratɛɛmaan yɛ dɔnsaŋ, nka míŋ a na ábɛɛ ja sɛbɛ, ábɛɛ ciiru ki a na di, koŋ a na so niŋ ciirudibi ki mwu-i ábɛɛ wu kì. 23A niŋ jibi ki na so, ábɛɛ ra na míŋ nanɔri finŋ tɔri tenŋ bi sun kili kì. Sɛli ki ra, míŋ a ǹʼbi ábɛɛ tɛ, ńʼtu ábɛɛ na finŋ woo finŋ nafɛ míŋ Tiŋ ki gbɛ, míŋ tɔ ki wu, ńʼtu kí a na niŋ wɔri ábɛɛ tɛ.

24Ŋì i na so dɔnsaŋ sun, ábɛɛ finŋ tɔri rafɛ-i míŋ tɔ ki wu sun kì, á ǹʼnafɛ, ŋì a wɔri ábɛɛ tɛ, niŋ ɲaan ki tɛ, ábɔɔ ciirudibi ki a rafaa.

25Míŋ i ka bi kari bataa bi-a ábɛɛ tɛ wulusuntalinŋ ni nu, nka waaci bɛɛ ra na so, míŋ a na wulubi ábɛɛ tɛ niŋ ɲaan ki tɛ kili kì, nka míŋ a na Tiŋ ki bi ki fɔɔbi ábɛɛ tɛ. 26Niŋ shikaŋ, ábɛɛ ra na Tiŋ ki rafɛ-ri á yɛri tɛ míŋ tɔ ki wu, míŋ ǹʼbi-a ńʼtu míŋ a ńʼTiŋ ki rafɛ ábɛɛ tɛ kì dɛ! 27Sabu Tiŋ ki yɛrima ki ábɛɛ bidi-i a tɛ. Tiŋ ki a ábɛɛ bidi a tɛ, sabu ábɛɛ míŋ bidi-i á tɛ, niŋ fa á i ji bili ǹʼna, tu míŋ po Kirinŋ nu. 28Míŋ po-i Tiŋ Kirinŋ nu, ŋí i na juniɲa nu, dɔnsaŋ míŋ a po san juniɲa nu, ŋí i ńʼpwulu tiri ńʼTiŋ ki tɛ. »

29Yesu wɔ kalindaŋ kiri tu ntiŋ tɛ tu : « Ɔnhɔɔn! Dɔnsaŋ ábɔɔ wulu kiri fɔɔ yibɛɛ ɲaanna, ábɛɛ wulu ki bi-a wulusuntalinŋ nu kili kì. 30Dɔnsaŋ yibɛɛ ǹʼtɔ-i tu ábɛɛ finŋ bataa tɔ-a, hali ábɛɛ kakan-i á i ranɔri finŋ wɔ̀ fɔn na, ábɛɛ i niŋ bataa tɔ-a. Ninki ncin-i yibɛɛ bili ǹʼna tu ábɛɛ po Kirinŋ nu. »

31Yesu i kí rupwulu tu : « Ábɛɛ tu ábɛɛ bili míŋ na dɔnsaŋ kɛ? 32Nka waaci bɛɛ ra na so, ǹʼyɛri so-i kɔ, ábɛɛ bataa ra na bili, á i á ranari míŋ na, koŋ fɔn tenŋ tenŋ i tiri a tamaŋ nu, á i míŋ tenŋ tu. Nka míŋ a na tu ńʼcinancinŋ i kì, sabu Tiŋ ki i míŋ fan. 33Míŋ niŋ bi-i ábɛɛ tɛ, nwɔma ábɛɛ i ɲaanfɛfili kila míŋ gbɛ. Ábɛɛ ɲaanfɛkwulu-i ka juniɲa ka ru, nka á á cunadi, sabu míŋ so kila-i juniɲa ki sun kɔ. »

Currently Selected:

Yuhana 16: JOB

Highlight

Copy