Yuhana 15

Yesu i ɛrɛnsɛnŋ jirinŋ sɔbɛ ki i

1Yesu tu kí tɛ sɛbɛ tu : « Míŋ i ɛrɛnsɛnŋ jirinŋ sɔbɛ ki i, míŋ Tiŋ ki i ǹʼjitiŋ ki i. 2Gbɛrinŋ finŋ woo finŋ i míŋ na, nwɔ̀ daŋ pa-a kì, kí i niŋ kwuru-ra, nka nwɔ̀ i daŋ pa-a, kí i niŋ gbɛrinŋ ki rakwuru-ra, nwɔma ŋì i pa fwuu a jɔnɔ ki sun. 3Míŋ kalinŋ wɔ̀ wɔri-i ábɛɛ tɛ, niŋ ábɛɛ wu fɔɔ-ɔ Kirinŋ ɲaanfɛ kɔ. 4Á á da tu míŋ na, miŋ tu míŋ tu-i ábɛɛ fan ɲaan wɔ̀ tɛ. Gbɛrinŋ wɔ̀ da jirinŋ ki ra kì, niŋ so-a daŋ pa-i kì, mìŋ ɲaan ki tɛ, ábɛɛ ra so daŋ pa-i, á da tubali míŋ na kì. »

5Ntiŋ tu : « Míŋ i ɛrɛnsɛnŋ jirinŋ ki i, ábɛɛ i ji ǹʼgbɛrinŋ kiri i. Konwɔtiŋ da tu-i míŋ na, míŋ i tu ntiŋ fan, nintiŋ a daŋ pa ǹʼmwɔɔnna. Sabu ábɛɛ ra so finŋ tɔri tenŋ ma-i míŋ kɔɔtɛ kì. 6Konwɔtiŋ a da tu míŋ na kì, kí i nintiŋ shi kee-ra taanna, miŋ tu jirinŋ gbɛrinŋ kwurumaan i furu-ra ɲaan wɔ̀ tɛ, kí i ǹʼshi bo tuu ru, tuu ki i ǹʼpa. 7A ábɛɛ á da tu míŋ na, niŋ fa á i mɔ́ɔ́n wulu kiri tu á ciiru, finŋ woo finŋ bi i ábɛɛ ra, á niŋ nafɛ, ábɛɛ ra niŋ bataa kila. 8A ábɛɛ daŋ pa ǹʼmwɔɔnna, á i ǹʼji tu ábɛɛ mɔ́ɔ́n kalindaŋ ni, míŋ Tiŋ ki a gbɛ ninki ra. 9Míŋ Tiŋ ki míŋ bidi-i a tɛ ɲaan wɔ̀ tɛ, míŋ yɛrima ki i ábɛɛ bidi-a ńʼtɛ mìŋ ɲaan tenŋ ki tɛ. Á tu ńʼwɔ bidintɛbi ki ru. 10A ábɛɛ ji mɔ́ɔ́n cinŋ bimaan kiri ma-a, ábɛɛ ra tu mɔ́ɔ́n bidintɛbi ki ru, miŋ tu míŋ ńʼTiŋ ki wɔ cinŋ bimaan kiri ma-i, ŋí i tu kɔ́ɔ́ bidintɛbi ki ru. 11Míŋ ka wulu kari bi-i ábɛɛ tɛ, nwɔma ciirudibi wɔ̀ i míŋ gbɛ, niŋ i ji ábɛɛ gbɛ sɛbɛ, áwɔ ciirudibi ki i nafaa. »

12Yesu tu sɛbɛ tu : « Mɔ́ɔ́n cinŋ bimaan ki i kaa : Á ámaŋ bidi ámaŋ tɛ miŋ tu míŋ ábɛɛ bidi-i ńʼtɛ ɲaan wɔ̀ tɛ. 13Ŋi i nʼyɛri ki ɲini ki wɔri nʼwɔ wɔshuru kiri bira, bidintɛbi tɔri fwuu niŋ sun kì. 14Ábɛɛ i mɔ́ɔ́n wɔshuru ri, a ábɛɛ ji mɔ́ɔ́n cinŋ bimaan kiri ma-a. 15Míŋ a ábɛɛ dɔri joŋ ni i kili kì, sabu joŋ ki a ŋuntiŋ ki mabi kiri tɔ-a kì. Nka, míŋ a ábɛɛ dɔri ńʼwɔ wɔshuru ri, sabu míŋ finŋ woo finŋ nama-i ńʼTiŋ ki gbɛ, míŋ niŋ bataa bi-i ábɛɛ tɛ. 16Ábɛɛ kiri míŋ ɲaannashi kì, nka mínki ábɛɛ ɲaannashi-i. Míŋ ábɛɛ cin-i, ńʼtu á ta daŋ pa, nwɔ̀ a kɔ kì. Niŋ ki ra, a ábɛɛ finŋ woo finŋ nafɛ míŋ Tiŋ ki gbɛ, míŋ tɔ ki wu, niŋ finŋ ki bataa ra wɔri ábɛɛ tɛ. 17Míŋ i nwɔ̀ bi-a ábɛɛ tɛ niŋ i kaa : Á ámaŋ bidi ámaŋ tɛ. »

Yesu wɔ konanbi ki bikwɔ bi ki juniɲa sun

18« A ábɛɛ bikwɔ juniɲa sun, á ǹʼtɔ tu ŋì míŋ bikwɔ a sun ábɛɛ jɛŋ. 19Ábɛɛ ji wuru juniɲa ki wɔ ri, ǹʼwuru-ra awɔ kiri bidi a tɛ. Nka ábɛɛ juniɲa ki wɔ ri kì. Mínki ábɛɛ ɲaannashi po san-i juniɲa ki ru, niŋ ki ra, juniɲa ki i ábɛɛ bikwɔ-ri a sun. 20Á á ɲakili bo, tu míŋ ǹʼbi ábɛɛ tɛ tu : ‹ Joŋ ki gbɛ-a a ŋuntiŋ ki wu kì. › A kí ji míŋ cɔɔri, kí a ábɛɛ yɛrima kiri cɔɔri. A kí ji míŋ wulu pa, kí a ábɛɛ wulu pa. 21Kí a niŋ bataa ma ábɛɛ wu míŋ tɔ ki bira, sabu kí míŋ cintɔnŋ ki tɔ-a kì. 22A míŋ ji wuru na-ni kì, niŋ fa a míŋ ji wuru wulubi-ri kí tɛ kì, kí wuru-ra ji koŋ pɔlimaan ni i kì, nka dɔnsaŋ, jii kí gbɛ kili kì. 23Konwɔtiŋ i míŋ bikwɔ-a a sun, ntiŋ i míŋ Tiŋ ki bikwɔ-a a sun mìnki i. 24Koŋ tɔri so bi wɔ̀ri ma-i kì, a míŋ ji wuru na-ni niŋ bi kiri ma kí ɲaanna kì, kí wuru-ra ji koŋ pɔlimaan ni i kì. Nka kí míŋ mabi kiri ja-i, niŋ fa a fɔn na, kí i míŋ fa ńʼTiŋ ki bikwɔ-ri arì sun. 25Niŋ ma-i, nwɔma wulu wɔ̀ bi-i sariya sɛbɛ ki ru, niŋ i nafaa. Ǹʼbi-i tu : ‹ Kí míŋ bikwɔ-i arì sun ŋuŋ ǹʼna kì. › »

26Yesu tu kí tɛ sɛbɛ tu : « Nwɔ̀ a na ye ábɛɛ tɛ, niŋ a na : Ɲini Sɛlitiŋ ki yɛ, nwɔ̀ i po-a Kirinŋ gbɛ. Míŋ a ǹʼwɔri na ábɛɛ tɛ, ŋì i po ńʼTiŋ ki gbɛ, a niŋ yentɛtɔnŋ ki ja na waarinŋ wɔ̀ ru, ŋì a na wulubi míŋ bi sun. 27Ábɛɛ yɛrima kiri ra na wulubi-ri míŋ bi sun sɛbɛ, sabu ábɛɛ ji-i míŋ fan kabi ńʼwɔ cinŋ ki tɔnpa waari ki ru. »

Currently Selected:

Yuhana 15: JOB

Highlight

Copy