Yuhana 17
17
Yesu wɔ rafɛ ki a yɛri ki tɛ
1Yesu niŋ wulu kiri bi kɔ-i, ntiŋ i a ŋununfɛshi kirinpɔlila, ntiŋ i ǹʼbi tu : « Míŋ Tiŋ, waaci ki so-i, á nɔɔri bili a Danshuru ki sun, nwɔma á Danshuru ki i nɔɔri bili á sun. 2Sabu ábɛɛ so wɔri-i ǹʼtɛ juniɲa nu konaŋ kiri bataa sun, nwɔma ábɛɛ koŋ wɔ̀ri wɔri-i ǹʼtɛ, ŋì i ɲaninkulutɔnbi kɔbali ki wɔri-ri nini bataa tɛ. 3Ɲaninkulutɔnbi kɔbali ki i kaa, kí i ábɛɛ tɔ, tu ábɛɛ Kirinŋ tenŋ pe ki i, Kirinŋ sɛlɛsɛli ki, niŋ fa kí i míŋ Yesu Kirisa tɔ, ábɛɛ mínwɔ̀ cin-i. 4Míŋ ábɛɛ nɔɔri ki ji-i pwɔkulinŋ sun, ábɛɛ baara wɔ̀ biye-i míŋ gbɛsun, míŋ niŋ ma-i, ŋí i ǹʼnafaa. » 5Yesu tu sɛbɛ : « Míŋ Tiŋ, nɔɔri wɔ̀ wuru míŋ na ábɛɛ kankantɛ juniɲa cɛtu ki jɛŋ, á niŋ nɔɔri ki bili míŋ sun á ɲaanfɛ dɔnsaŋ. »
Yesu wɔ rafɛ ki awɔ kalindaŋ kiri tɛ
6Yesu tu sɛbɛ : « Míŋ Tiŋ, ábɛɛ koŋ wɔ̀ri ɲaannashi-i juniɲa ki ru, á i kí biye míŋ gbɛsun, míŋ ábɛɛ ɲaanbi-i nini tɛ, nwɔma kí i ábɛɛ tɔ. Ábɔɔ kpeeri wuru-i, ábɛɛ i kí wɔri míŋ tɛ, kí i ji ábɔɔ wulu ki pa. 7Dɔnsaŋ kí ǹʼtɔ-i tu ábɛɛ finŋ wɔ̀ri wɔri míŋ tɛ, tu yìrì bataa po ábɛɛ ru, 8sabu ábɛɛ wulu wɔ̀ri bi-i míŋ tɛ, míŋ niŋ kiri bi-i kí tɛ sɛbɛ, kí i bili yìrì ra, kí i ǹʼtɔ tu míŋ po ábɛɛ ru ncinŋ, kí i bili ǹʼna tu ábɛɛ kiri míŋ cin.
9Míŋ i ábɛɛ rafɛ-a kí tɛ. Míŋ nafɛ ki tan-a juniɲa nu wɔ kiri tɛ kì, duu ábɛɛ nwɔ̀ri wɔri-i míŋ tɛ, sabu nini i ábɔɔ ri. 10Finŋ woo finŋ i mɔ́ɔ́n, niŋ i ábɔɔ, finŋ woo finŋ i ji ábɔɔ, niŋ i ji mɔ́ɔ́n, mɔ́ɔ́n nɔɔri ki i a yɛri ji-ri kíbɛɛ ru. 11Míŋ a po san juniɲa nu, nka kíbɛɛ ra tu pwɔkulinŋ ka sun kwumaŋ, míŋ a tiri ábɛɛ tɛ. Míŋ Tiŋ wɔlinŋ ki, á kí mari á tɔ ki bira, ábɛɛ ninwɔ̀ wɔri-i míŋ tɛ, nwɔma kí i ji tenŋ i, miŋ tu míŋ fa ábɛɛ i tenŋ i ɲaan wɔ̀ tɛ. 12Míŋ wuru kí fan waarinŋ wɔ̀ ru, ábɛɛ nwɔ̀ri wɔri-i míŋ tɛ, míŋ nini gbɛrinpa-i ábɛɛ tɔ ki bira, ábɛɛ ninwɔ̀ wɔri-i míŋ tɛ. Míŋ kí ɲaannasuu-u, ǹʼtɔri dantenŋ fɔni san kí ra kì, duu nwɔ̀ kakan wuru-i niŋ i fɔni, nwɔma Kirinŋ wɔ wulu ki i nafaa.
13Nka míŋ a tiri ábɛɛ tɛ dɔnsaŋ, míŋ i ka wulu kari bi-a, ŋì i míŋ tu juniɲa nu, nwɔma ciirudibi wɔ̀ i míŋ nu, niŋ nafaamaan ki i ji kí ru. 14Míŋ ábɔɔ wulu ki wɔri-i kí tɛ, niŋ ki ra, juniɲa ki i kí bikwɔ-ri a sun, sabu kí juniɲa wɔ ri kì, miŋ tu míŋ yɛrima ki juniɲa wɔ kì. 15Míŋ ǹʼbi-a ńʼtu á kí shi po san juniɲa nu kì, nka ńʼtu á kí ɲaannasuu shitaanni ki jɛŋ. 16Kíbɛɛ juniɲa ka ru konaŋ ni i kì, miŋ tu míŋ yɛrima ki juniɲa nu tɔnŋ i kì. 17Á ncusun kí i ji áwɔ ri, áwɔ sɛli ki baraka ra. Sabu ábɔɔ wulu ki i sɛli ki i. 18Miŋ tu ábɛɛ míŋ cin na-i juniɲa nu ɲaan wɔ̀ tɛ, míŋ yɛrima ki i kí cin-a juniɲa ki ru mìŋ ɲaan tenŋ ki tɛ. 19Míŋ i ńʼyɛri ki bataa wɔri-i ábɛɛ tɛ kí bira, nwɔma kí i arì yɛri bataa wɔri ábɛɛ tɛ sɛli ki baraka ra. »
Yesu wɔ rafɛ ki a ra bilinatɔnŋ kiri bataa tɛ
20Yesu tu sɛbɛ tu : « Míŋ ábɛɛ rafɛ-a kari bantenŋ tɛ kì, nka nwɔ̀ri ra na bili míŋ na kɔ́ɔ́ wulu sunjomaan kiri bira míŋ bi ki sun, míŋ i ábɛɛ rafɛ-a nini tɛ sɛbɛ, 21nwɔma kí bataa i ji tenŋ i. Míŋ Tiŋ, ábɛɛ i míŋ nu, míŋ i ji ábɛɛ ru, mìŋ ɲaan tenŋ ki tɛ, á ncusun kí i ji yibɛɛ ru, nwɔma juniɲa ki i bili ǹʼna, tu ábɛɛ kiri míŋ cin.
22Ábɛɛ nɔɔri wɔ̀ wɔri-i míŋ tɛ, míŋ niŋ wɔri-i kí tɛ, nwɔma kí i ji tenŋ i, miŋ tu yibɛɛ i tenŋ i ɲaan wɔ̀ tɛ. 23Míŋ i kíbɛɛ ru, ábɛɛ i ji míŋ nu, nwɔma kí i ji tenŋ i, a niŋ ma, juniɲa nu tɔnŋ kiri ra ǹʼtɔ tu ábɛɛ míŋ cin, niŋ fa tu kí bi i ji di ábɛɛ tɛ, miŋ tu míŋ bidi-i ábɛɛ tɛ ɲaan wɔ̀ tɛ. »
24Yesu tu sɛbɛ tu : « Míŋ Tiŋ, ábɛɛ kí wɔri-i míŋ tɛ, ǹʼdi-i míŋ tɛ míŋ fa kí i ji mani tenŋ nu, nwɔma ábɛɛ nɔɔri wɔ̀ wɔri-i míŋ tɛ, kí i niŋ ja, sabu ábɛɛ míŋ bidi-i á tɛ juniɲa cɛtu ki jɛŋ.
25Míŋ Tiŋ telimaan, juniɲa ki ábɛɛ tɔ kì, nka míŋ ábɛɛ tɔ-i, kari i ji bili ǹʼna tu ábɛɛ míŋ cin. 26Míŋ ábɛɛ tɔ ki ji-i kí wu, kí i ábɛɛ tɔ, míŋ a ǹʼji kí wu sɛbɛ, nwɔma ábɛɛ míŋ bidi-i á tɛ ɲaan wɔ̀ tɛ, niŋ bidintɛbi ki i ji kí ciiru, míŋ yɛrima ki i ji kí ciiru. »
Currently Selected:
Yuhana 17: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
