Mateus 9

Nai Jesus kura ema paralitiku ka lao la diak

(Marcos 2:1-12; Lucas 5:17-26)

1Hotu tiha Jesus sae fali bero hodi hakur ba tasi sorin, depois Nia too iha Nia sidade rasik. 2Iha nebaa, ema balu hulan mane ain aat ka paralitiku ida, nebee latan hela iha nia toba fatin. Sira lori nia ba Jesus. Bainhira Jesus haree sira nia fiar, Nia dehan ba ema paralitiku nee, “Oan, fiar baa! O nia sala hamoos tiha ona.”

3Mestri relijiaun sira rona liafuan nee, sira murmura dehan, “Ema hatete aat fali Maromak.”

4Maibee Jesus hatene hela sira nia hanoin, entaun Nia dehan, “Nusaa mak imi hanoin aat nunee? 5Ida nebee mak fasil liu, hatete o nia sala hamoos tiha ona ka hatete hamriik i lao ba? 6Agora Hau sei hatudu para imi hatene katak, iha mundu nee, Hau, Ema Oan, iha kbiit hodi hamoos ema nia sala.” Depois Jesus hatete ba ema paralitiku nee, “Hamriik ona! Foti o nia toba fatin hodi fila ba uma.”

7Ema nee mos hamriik kedas hodi lao ba uma. 8Ema barak haree buat nebee Jesus halo nee. Sira hakfodak no tauk, i sira hahii Maromak tanba Nia foo tiha ona kbiit hanesan nee ba ema.

Nai Jesus bolu Mateus para tuir Nia

(Marcos 2:13-17; Lucas 5:27-32)

9Depois Jesus husik tiha fatin nee. Nia lao dadauk, Nia hetan ema kobrador impostu ida naran Mateus, tuur hela iha nia serbisu fatin. Jesus dehan ba nia, “Mai tuir Hau!” I Mateus hamriik hodi ba tuir Jesus.

10Depois Jesus baa haan iha Mateus nia uma, kobrador impostu barak i ema sala nain sira seluk mos mai haan hamutuk ho Jesus ho Nia eskolanti sira.

11Ema hosi grupu relijiaun Farizeu sira haree, i sira husu ba Jesus nia eskolanti sira, “Nusaa mak imi nia mestri haan hamutuk fali ho kobrador impostu i ema sala nain sira nee?”#Lucas 15:1-2

12Maibee bainhira Jesus rona sira nia liafuan nee, Nia dehan, “So ema moras mak presiza doutor, ema nebee saude diak la presiza. 13Baa aprende didiak Maromak nia Liafuan nebee dehan, ‘Hau hakarak atu imi hatudu laran diak ba malu. Se lae imi lori sakrifisiu foo mai Hau mos la iha folin.’ Hau mai atu bolu ema sala nain sira, laos atu bolu ema nebee konsidera nia aan moris loos.”#Mateus 12:7; Oséias 6:6

Tansaa mak Nai Jesus nia eskolanti sira la jejun

(Marcos 2:18-22; Lucas 5:33-39)

14Depois João Sarani Nain nia eskolanti sira mai husu Jesus nunee: “Ami nebee tuir João Sarani Nain halo jejun. Ema Farizeu sira nia eskolanti sira mos jejun. Maibee tansaa mak Ita Boot nia eskolanti sira la jejun?”

15Jesus hataan ho komparasaun ida dehan, “Hau hanesan noivu ida nebee halo festa kazamentu. Bainhira noivu sei hamutuk ho nia bainaka sira, sira la tristi. Maibee too iha loron ida, ema sei lori lakon tiha noivu nee mak nia bainaka sira foin jejun.

16La iha ema ida uza hena foun hodi taka fali ba hena bosan nebee kuak. Se lae hena foun dada hamutuk hena bosan nee sai kiik tiha too estraga halo naklees liu tan.

17Nunee ho tua uvas nebee foun la tau iha tua fatin nebee halo hosi animal nia kulit nebee bosan ona. Tanba tua foun sempre nafurin sae, i sei halo tua fatin bosan nee nakfera. Nunee tua mos fakar sai. Tua foun, tenki tau iha tua fatin foun. Nunee tua fatin bele dura i tua mos la fakar sai.”#9:17:Nunee Jesus hanorin dehan, la bele kahur Nia hanorin nebee foun ho ema Farizeu sira nia hanorin nebee tuan.

Nai Jesus halo moris fali labarik feto ida, i kura mos feto ida

(Marcos 5:21-43; Lucas 8:40-56)

18Jesus sei koalia hela ho João Sarani Nain nia eskolanti sira, responsavel uma kreda ida mai hakneak iha Jesus nia oin hodi husu tulun dehan, “Nai, hau nia oan feto foin mate. Hau husu atu Ita Boot mai tau liman ba nia hodi halo nia moris fali.”

19Entaun Jesus hamriik lao tuir responsavel nee, i Nia eskolanti sira mos baa hamutuk ho Nia.

20-21Iha dalan klaran, iha feto ida terus, tanba nia fulan mai la para durante tinan sanulu resin rua. Feto nee hanoin nunee: “Naran katak hau kona kois deit Nia hena mos, hau nia moras sei diak.” Entaun nia bes-besik ba iha Jesus nia kotuk hodi kona Jesus nia hena rohan.

22Jesus fila ba kotuk i haree feto nee hodi dehan, “Oan, laran metin baa! O hetan kura tanba o fiar mai Hau.” I nia moras diak kedas.

23Bainhira Jesus too iha responsavel nee nia uma, Nia haree ema tokador muzika mate nian i ema barak fadigadu ba-mai. 24Jesus dehan ba sira, “Imi hotu sai tiha. Labarik feto nee la mate, nia toba deit.” Maibee sira hamnasa fali Nia.

25Bainhira ema sira nee sai tiha hotu, Jesus tama ba laran hodi kaer labarik feto nee nia liman, i labarik feto nee hadeer fali. 26Ema konta lemo-lemo buat nebee Jesus halo nee, too ema iha rejiaun nee tomak hatene.

Nai Jesus kura ema matan delek nain rua

27Depois Jesus sai hosi fatin nee. Nia lao dadauk, iha ema matan delek nain rua lao tutuir Nia hodi bolu ho lian makaas dehan, “Liurai David nia jerasaun, hadomi ami baa!”

28Jesus tama tiha ba uma laran, ema matan delek nain rua nee mos tama tuir Nia. Jesus husu ba sira dehan, “Imi fiar katak Hau bele kura imi nia matan ka?”

Sira hataan, “Ami fiar, Nai.”

29Depois Jesus tau liman ba sira nia matan hodi dehan, “Tanba imi nia fiar mak imi hetan kura.” 30Sira nain rua nia matan haree moos kedas. I Jesus bandu makaas sira dehan, “La bele foo hatene buat nee ba see-see deit.”

31Maibee sira sai baa konta lemo-lemo kona ba Jesus iha rejiaun nee tomak.

Nai Jesus kura ema monok ida

32Bainhira sira nain rua nee sai dadauk, ema lori tan ema monok ida ba Jesus. Ema nee espiritu aat domina ona halo nia koalia la diak. 33Jesus duni sai tiha espiritu aat nee, nunee ema nee koalia kedas. Ema barak nebee haree buat nee, sira hotu admira dehan, “Buat ida hanesan nee foin mak akontese iha rai Israel.”

34Maibee ema Farizeu sira dehan, “Nia duni sai espiritu aat nee tanba espiritu aat nia xefi mak foo kbiit ba Nia.”#Mateus 10:25; 12:24; Marcos 3:22; Lucas 11:15

Presiza tan ema atu halao Maromak nia serbisu

35Jesus lao iha sidade ba sidade no aldeia ba aldeia hodi hanorin iha uma kreda sira. Nia foo sai Novidade Diak kona ba oinsaa Maromak ukun nudar Liurai. I ema nebee iha moras oi-oin Nia kura tiha hotu.#Mateus 4:23; Marcos 1:39; Lucas 4:44 36Bainhira Jesus haree ema barak nee, Nia hanoin loos sira, tanba sira la hatene atu halo oinsaa, i la iha ema ida atu tulun sira. Sira hanesan bibi malae nebee la iha bibi atan atu hatudu dalan ba sira.#Numerus 27:17; 1 Liurai sira 22:17; 2 Kronikas 18:16; Ezequiel 34:5; Zacarias 10:2; Marcos 6:34 37Depois Jesus hatete ba Nia eskolanti sira dehan, “Batar iha toos laran maran tiha ona. Batar nee barak teb-tebes, maibee ema nebee atu silu, ituan deit. 38Tanba nee husu ba Toos Nain para haruka tan ema hodi silu batar nee.”#Lucas 10:2

Currently Selected:

Mateus 9: BTDT

Highlight

Copy