Mateus 8

Nai Jesus kura ema moras lepra

(Marcos 1:40-45; Lucas 5:12-16)

1Jesus lao tuun mai hosi foho, ema barak lao nadodon tuir Nia. 2I ema moras lepra ida mai hakneak iha Jesus nia oin hodi husu tulun dehan, “Nai, se Ita Boot hakarak, Ita Boot bele kura hau nia moras.”

3I Jesus lolo liman ba tau iha nia isin hodi dehan, “Hau hakarak. O diak ona baa!” I ema nee nia isin moos kedas hosi lepra. 4Depois Jesus dehan ba nia, “La bele konta sai buat nee ba ema seluk. Maibee baa aprezenta aan iha nai-lulik, atu nia haree katak o nia isin moos ona. Depois foo oferta tuir lei Moisés nian, para ema hotu bele hatene katak o diak ona.”#Levitiku 14:1-32

Nai Jesus kura komandante Roma ida nia atan

(Lucas 7:1-10)

5Depois Jesus tama ba iha sidade Kafarnaum. Iha nebaa, komandante Roma ida mai hasoru Jesus hodi husu tulun 6dehan, “Nai, Hau nia atan mane ida iha uma moras paralitiku ka lao la diak. Nia la bele hamriik hosi toba fatin, nia terus atu mate.”

7Jesus hataan, “Hau sei baa kura nia.”

8Maibee komandante nee hataan fali dehan, “Nai, hau la serve atu simu Ita Boot iha hau nia uma. Nai, hatete deit liafuan ruma maka hau nia atan sei hetan kura. 9Hau hatene nunee tanba hau nia komandante sira mos iha kbiit atu foo orden mai hau. Nunee mos, hau iha kbiit atu foo orden ba hau nia soldadu sira. Se hau manda hau nia soldadu ida dehan, ‘Baa nebaa!’, nia mos baa. Se hau hatete, ‘Mai iha nee!’, nia mai. I se hau haruka hau nia atan dehan, ‘Halo ida nee!’, nia halo duni.”

10Rona nunee, Jesus admira, i Nia hatete ba ema sira nebee tuir Nia, “Hau dehan loloos ba imi, Hau seidauk haree ema Israel ida nebee fiar makaas hanesan ema Roma nee. 11Rona mai. Ema barak sei mai hosi fatin-fatin, hosi lorosae i loromonu, sira sei mai tuur haan hamutuk ho Ita nia bei-ala Abraão, Isac no Jacó iha Maromak nia reinu iha lalehan. 12Maski Maromak hili ema Israel atu sai Nia reinu hodi tama ba iha nebaa. Maibee sira barak mak Nia sei soe sai ba iha fatin nakukun. Iha nebaa sira sei tanis halerik i ruun nehan.”#Lucas 13:29

13Depois Jesus dehan ba komandante nee, “Bele fila ona. Buat nebee ita fiar nee sei akontese duni.” Iha oras nee kedas komandante nia atan nee hetan kura.#Mateus 22:13; 25:30; Lucas 13:28

Nai Jesus kura Pedro nia banin feto ho ema barak tan

(Marcos 1:29-34; Lucas 4:38-41)

14Loron ida, Jesus baa iha Pedro nia uma, Nia haree Pedro nia banin feto toba hela, tanba nia isin manas. 15Jesus kaer nia liman, i nia isin manas lakon kedas. Nia hadeer hodi serbii Jesus.

16Bainhira besik kalan ona, ema lori ema barak nebee espiritu aat tama iha sira nia laran. I Jesus foo orden deit, espiritu aat sira nee sai kedas. Nia mos kura ema hotu nebee moras. 17Nunee Nia kumpri saida mak Maromak nia profeta Isaias hakerek nanis ona dehan,

“Nia rasik mak lori ita nia frakeza.

No Nia rasik mak lori ita nia moras.”#Isaías 53:4

Kona ba tuir Nai Jesus

(Lucas 9:57-62)

18Bainhira Jesus haree ema barak mai haleu Nia, Nia haruka Nia eskolanti sira prepara roo para sira baa tasi sorin.

19Molok Jesus sae roo, mestri relijiaun ida mai dehan ba Nia, “Mestri, Ita Boot baa nebee deit, hau prontu atu tuir.”

20Jesus hataan, “Asu fuik iha fatuk kuak hodi hela. Manu fuik mos iha nia knuuk. Maibee Hau, Ema Oan, la iha fatin ida hodi tau Hau nia ulun.”

21Iha tan ema ida nebee baibain tuir Jesus dehan ba Nia, “Nai, foo lisensa mai hau fila baa hakoi uluk hau nia aman mak foin hau tuir Ita Boot.”

22Maibee Jesus hataan, “Mai tuir Hau! Ema nebee lakohi rona Maromak, sira hanesan ema nebee mate tiha ona. Husik ema mate hakoi sira nia mate.”

Nai Jesus halo hakmatek anin boot

(Marcos 4:35-41; Lucas 8:22-25)

23Depois Jesus sae bero, i Nia eskolanti sira mos tuir Nia. 24Iha tasi klaran derepenti anin boot mai, too laloran boot halo tasi been tama iha bero laran. Maibee Jesus toba dukur hela. 25Nia eskolanti sira ba fanu Nia dehan, “Nai, tulun lai. Ita atu mout ona!”

26Jesus hataan, “Nusaa mak imi tauk hanesan nee? Imi nia fiar iha nebee?” Depois Nia hadeer hodi siak anin ho laloran boot nee. Anin para kedas, tasi mos hakmatek fali.

27Nia eskolanti sira admira i dehan, “Ema nee see loos too anin ho laloran mos rona Nia?”

Nai Jesus duni sai espiritu aat sira hosi ema nain rua

(Marcos 5:1-20; Lucas 8:26-39)

28Depois Jesus too iha tasi sorin, iha ema Gadara#8:28:Dokumentu Biblia nian hosi tempu antigu barak. Balu hakerek Gadara, balu hakerek Gergesa, i balu tan hakerek Gerasa. sira nia rain. Iha nebaa, iha mane nain rua espiritu aat sira tama iha sira nia laran. Sira nee siak loos, too la iha ema ida mak brani atu lao liu hosi nebaa. Sira sai mai hosi fatuk kuak nebee ema halo ba rate, i hasoru Jesus. 29Sira hakilar dehan, “Maromak nia Oan, O hakarak halo saida mai ami? O atu mai kastigu ona ami ka? Afinal tempu seidauk too.”

30Laduun dook hosi fatin nee, iha fahi barak teb-tebes haan hela iha foho lolon. 31Espiritu aat sira husu ba Jesus, “Se O atu duni sai ami, entaun haruka ami tama ba iha fahi sira nebaa.”

32Jesus hatete ba sira dehan, “Baa ona!” Entaun espiritu aat sira sai tiha hosi ema nain rua nee hodi tama fali ba fahi sira. Derepenti fahi sira nee halai saruntu malu tuun hosi foho lolon nee, monu hotu ba tasi laran, i mout too mate hotu.

33Haree nunee, fahi atan sira halai ba vila laran hodi konta sai kona ba buat hotu nebee akontese no mos kona ba ema nain rua nebee uluk espiritu aat sira domina nee. 34Depois ema hotu sai mai hosi vila hasoru Jesus, i sira husu fila-fila atu Nia sai ona hosi rai nee.

Currently Selected:

Mateus 8: BTDT

Highlight

Copy