Mateus 7

La bele foo sala ba ema

(Lucas 6:37-38; 6:41-42)

1Jesus hanorin nafatin Nia eskolanti sira dehan, “La bele foo sala ba ema, atu nunee Maromak la foo sala ba o. 2Imi tetu ema nia sala oinsaa, Maromak mos sei tetu imi nunee. I sasukat nebee imi uza ba ema seluk, Maromak sei uza fali sasukat nee ba imi.#Marcos 4:24 3Nusaa mak o haree ai-luruk iha ema seluk nia matan, maibee ai kabelak nebee taka o nia matan rasik, o la senti? 4Oinsaa mak o brani dehan ba o nia maluk: ‘Mai hau hasai tiha ai-luruk nee hosi o nia matan.’ Afinal iha ai kabelak ida taka hela o nia matan rasik. 5Imi ema laran makerek, nebee koalia oin ida, hahalok oin seluk! Hasai tiha uluk ai kabelak iha o nia matan rasik, mak foin o haree moos hodi hasai ai-luruk hosi o nia maluk nia matan.

6Buat nebee Maromak nian, la bele foo ba ema nebee lakohi rona. Nee hanesan imi foo fali ba asu, ka foo murak-mean ba fahi. Se imi halo nunee, fahi sei sama baa-mai, i asu sei fila hodi ataka imi.”

Harohan bebeik ba Nai Maromak

(Lucas 11:9-13)

7“Husu bebeik ba Maromak,

maka Nia sei foo.

Buka bebeik,

maka imi sei hetan.

Tuku bebeik odamatan,

maka odamatan sei nakloke ba imi.”

8Tanba see mak husu bebeik ba Maromak, nia sei simu. See mak buka bebeik, nia sei hetan. See mak tuku bebeik odamatan, Maromak sei loke ba nia.

9Imi nudar aman, bainhira imi nia oan husu paun, imi foo fali fatuk ka? 10Se nia husu ikan, imi foo fali samea ka? Nunka! 11Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Bainhira imi husu, Nia sei foo buat diak teb-tebes ba imi.”

12“Saida deit mak o hakarak atu ema seluk halo ba o, o mos tenki halo hanesan nee ba ema seluk. Ida nee mak Moisés nia lei ho hanorin hosi profeta sira nia livru hori uluk kedas.”#Lucas 6:31

Odamatan baa lalehan nian kloot

(Lucas 13:24)

13“Atu tama ba moris rohan-laek, tenki liu hosi odamatan kloot. Tanba odamatan luan lori ba infernu, nia dalan mos fasil atu ema liu, i ema barak mak tama liu hosi odamatan nee. 14Maibee odamatan atu tama ba moris rohan-laek nee kloot, dalan nee mos susar, i ema ituan deit mak hetan odamatan nee.”

La bele tuir ema nebee hanorin sala

(Lucas 6:43-44)

15“Kuidadu ho ema nebee bosok dehan, sira Maromak nia profeta. Sira finji maus hanesan bibi malae, maibee tuir loloos sira nee hanesan asu fuik. 16Imi sei hatene sira hosi sira nia hahalok, hanesan ita hatene ai huun ida hosi nia fuan. Ai tarak nunka foo fuan fali uvas ka ai fuan figeira. 17Ai huun nebee diak sei foo fuan nebee diak. I ai huun nebee la diak sei foo fuan nebee aat. 18Ai huun diak la bele foo fuan nebee mak aat. I ai huun nebee aat la bele foo fuan diak. 19Ai nebee mak la foo fuan diak, sei tesi tiha hodi soe ba ahi.#Mateus 3:10; Lucas 3:9 20Nunee mos ho profeta falsu sira, imi bele konhese sira hosi sira nia hahalok.”#Mateus 12:33

Se bolu Jesus ‘Nai’, tenki moris tuir Maromak nia hakarak

(Lucas 13:25-27)

21“Ema barak bolu Hau dehan: ‘Nai, Nai!’ Maibee laos sira hotu-hotu mak sei tama ba Maromak nia reinu. So sira nebee moris tuir Hau nia Aman iha lalehan nia hakarak mak bele tama. 22Iha loron ikus bainhira Maromak tesi ema hotu-hotu nia lia, ema barak sei mai dehan, ‘Nai, Nai, ami uluk foo tutan Maromak nia lia tatoli hodi Nai nia naran. Ami mos temi Ita Boot nia naran hodi duni sai diabu hosi ema, i halo milagre oi-oin hodi Ita Boot nia naran.’

23Maibee Hau sei koalia mo-moos ba sira dehan: ‘Hau nunka konhese imi! Imi ema aat, sai hosi nee!’ ”#Salmu sira 6:9

Ema matenek ho ema beik harii uma

(Lucas 6:47-49)

24“Ema nebee rona Hau nia liafuan nee i halo tuir, nia hanesan ema matenek ida nebee harii nia uma iha fatuk leten. 25Depois udan boot mai, mota tuun, anin boot mos huu makaas uma nee. Maibee uma nee la monu, tanba harii metin iha fatuk leten.

26Ema nebee rona Hau nia liafuan maibee la halo tuir, nia hanesan ema beik ida nebee harii nia uma iha rai henek leten. 27Depois udan boot mai, mota tuun, anin boot mos huu makaas uma nee. I uma nee naksobu tiha too rai.”

Nai Jesus hanorin ho kbiit

28Bainhira Jesus hanorin tiha hotu, ema barak nebee rona Nia nee admira, 29tanba Nia hanorin ho kbiit, la hanesan mestri relijiaun sira nia hanorin.#Marcos 1:22; Lucas 4:32

Currently Selected:

Mateus 7: BTDT

Highlight

Copy