Mateus 6

Kona ba foo ezmola

1Jesus hanorin nafatin dehan: “Kuidadu, keta foti aan hodi hatudu imi nia hahalok diak iha ema nia oin para sira haree. Se imi halo nunee, imi nia Aman iha lalehan sei la selu imi nia kolen.#Mateus 23:5

2Bainhira o foo ezmola ba ema ruma, la bele konta ba-mai hanesan ema laran makerek nebee buka oin. Sira sempre konta sira nia diak iha uma kreda laran ho mos iha estrada ibun para ema bele gaba sira. Hau dehan loloos ba imi, sira simu hotu ona sira nia kolen. 3Maibee bainhira o foo buat ruma ba ema, saida mak o nia liman kuana foo, o nia liman karuk lalika hatene. 4Nunee, o foo nonook deit, maka o nia Aman iha lalehan haree hotu saida mak o halo nee, i Nia sei selu o nia kolen.”

Kona ba halo orasaun

(Lucas 11:2-4)

5“Bainhira imi halo orasaun, la bele halo orasaun hanesan ema laran makerek nebee buka oin. Sira gosta hamriik halo orasaun iha uma kreda laran no mos iha estrada boot atu ema haree. Hau dehan loloos ba imi, sira simu hotu ona sira nia kolen.#Lucas 18:10-14 6Maibee bainhira imi halo orasaun, tama iha kuartu laran, taka odamatan i halo orasaun ba imi nia Aman iha lalehan, nebee ema ida la haree. Maski ema la haree, Nia haree hotu saida mak ema halo nonook, i Nia sei selu imi nia kolen.

7Bainhira imi halo orasaun, la bele repete bebeik hanesan ema sira nebee la konhese Maromak, tanba sira hanoin dehan halo orasaun naruk mak foin sira nia maromak simu. 8La bele halo orasaun hanesan sira, tanba molok imi husu buat ruma ba imi nia Aman iha lalehan, Nia hatene uluk ona buat nebee mak imi presiza. 9Nunee, halo orasaun hanesan nee:

“Ami nia Aman iha lalehan,

tulun ema atu foti aas Ita Boot nia naran santu.

10Mai ukun ema hotu-hotu baa.

Tulun ema iha mundu nee atu halo tuir Ita Boot nia hakarak,

hanesan sira iha lalehan mos halo tuir.

11Foo ai haan natoon mai ami iha loron ida nee.

12Perdua ami nia sala,

hanesan ami mos perdua ona ba ema nebee halo sala mai ami.

13Keta husik ami monu ba tentasaun,

maibee hasai ami hosi buat aat.

[Ita Boot mak Liurai,

Ita Boot mak Kbiit Nain,

Ita Boot mak ema hotu-hotu adora,

too tinan ba tinan nafatin. Amen.]#6:13Dokumentu Evanjelhu Mateus hosi tempu antigu iha barak. Balu hakerek versikulu 13b nee, balu lae.

14Se imi perdua ema nebee halo sala hasoru imi, maka imi nia Aman iha lalehan mos sei perdua imi nia sala. 15Maibee se imi la perdua ema nebee mak halo sala hasoru imi, imi nia Aman mos sei la perdua imi nia sala.”#Marcos 11:25-26

Kona ba Jejun

16“Bainhira imi halo jejun, la bele halo imi nia oin tristi hanesan ema laran makerek sira nebee buka oin. Sira hatudu aan nunee para ema bele hatene katak sira jejun hela. Hau dehan loloos ba imi: sira simu hotu ona sira nia kolen. 17Maibee bainhira imi halo jejun, fasi imi nia oin halo moos i sui imi nia fuuk halo kabeer. 18Nunee, bainhira ema haree imi la nota katak imi jejun. Maibee, imi nia Aman deit iha lalehan mak hatene. Nia haree hotu saida mak ema halo nonook, i Nia sei selu imi nia kolen.”

Kona ba halibur rikusoin iha lalehan

(Lucas 12:33-34)

19“La bele halibur rikusoin barak iha mundu nee. Tanba iha mundu nee nehek mutin bele haan, bele ferujen, i naok-teen bele naok.#Tiago 5:2-3 20Diak liu halibur rikusoin iha lalehan. Iha nebaa, nehek mutin la haan, la ferujen, i naok-teen mos la naok. 21Tanba imi nia rikusoin tau iha nebee, imi nia fuan-laran mos iha nebaa.”

Kona ba moris iha naroman

(Lucas 11:34-36)

22“Imi nia matan hanesan ahi-oan nebee foo naroman ba imi nia aan tomak. Se imi nia matan haree moos, imi nia aan mos naroman. 23Maibee se imi nia matan aat, imi nia aan mos sai nakukun tiha. I bainhira naroman nebee iha imi nia aan la iha ona, maka imi nia moris nakukun teb-tebes.”

Keta preokupa ho imi nia moris

(Lucas 16:13; 12:22-31)

24“La iha ema ida mak bele serbii patraun nain rua. Tanba nia sei odi ida, i hadomi ida seluk. Nia sei foo laran ba ida, i lakohi interese ida seluk. Nunee mos imi la bele serbii ba Maromak no mos serbii ba osan hamutuk.

25Tanba nee Hau hatete ba imi, lalika preokupa ho imi nia moris, ho saida mak imi atu haan, ka atu hemu ka atu hatais. Ita nia moris folin liu hahaan, i ita nia isin lolon folin liu ropa. 26Haree took manu fuik sira nebee semo iha leten nebaa. Manu sira nee la kuda batar, la silu batar, la rai hahaan iha armazen. Maibee imi nia Aman iha lalehan foo ai haan ba sira. Imi folin liu manu sira nee. 27Se imi preokupa kona ba imi nia moris, nee bele aumenta imi nia tinan? Lae! 28Entaun nusaa mak imi preokupa kona ba imi nia ropa? Haree took ai funan nebee moris iha ai-laran nebaa. Ai funan nee la halo serbisu, la soru tais, 29maibee Hau dehan loloos ba imi: Liurai Salomão, maski riku teb-tebes, nia hatais kapaas halo nusaa mos, ai funan sira nee furak liu. 30Maromak mak halo furak duut nebee ohin loron matak iha ai-laran no aban ema soe ba ahi laran. Saa tan imi! Nia sei foo ropa ba imi hatais. Entaun nusaa mak imi nia fiar fraku hanesan nee?!#1 Liurai sira 10:4-7; 2 Kronikas 9:3-6 31Nee duni, lalika preokupa dehan: ‘Ita atu haan saida?’ ka ‘Ita atu hemu saida?’ ka ‘Ita atu hatais saida?’ 32Ema nebee la fiar ba Maromak, sira buka buat sira nee tuun-sae. Maibee imi nia Aman iha lalehan hatene hotu imi nia presiza nee. 33Nunee buka uluk reinu Maromak nian no Nia justisa maka buat sira nebee imi presiza, Nai Maromak sei foo ba imi. 34Entaun lalika preokupa kona ba loron aban, tanba loron aban nee preokupasaun seluk fali. Susar nebee ita hetan iha loron ida nee, too ona ba loron nee.”

Currently Selected:

Mateus 6: BTDT

Highlight

Copy